डॉ. चंद्रशेखर गणेश पेशवे आणि इतिहास संस्कृती कट्टा यांच्या वतीने ‘बहमनी  साम्राज्याचा इतिहास’व्याख्यान
पुणे : बहमनी साम्राज्याच्या १९१ वर्षांच्या राजवटीचे दूरगामी परिणाम आपल्यावर झाले. मराठी भाषेत अनेक फारसी शब्द आले. पेशवा, बक्षी, फडणवीस अशी आडनावे आली.  भाषा,वेशभूषा, सैन्य व्यवस्था, शासन व्यवस्था यामध्ये अमुलाग्र बदल झाले. परकिय आक्रमणे हे केवळ २ सुलतानापुरते मर्यादित नव्हते. तर ते खूप मोठे सांस्कृतिक आक्रमण होते त्याचे परिणाम आजही आपण भोगत आहोत, असे मत इतिहास अभ्यासक जयकुमार पाठक यांनी व्यक्त केले. 
डॉ. चंद्रशेखर गणेश पेशवे आणि इतिहास संस्कृती कट्टा यांच्या वतीने ‘बहमनी साम्राज्याचा इतिहास’ या व्याख्यानाचे आयोजन सदाशिव पेठेतील भारत इतिहास संशोधक मंडळ येथे करण्यात आले होते. यावेळी  जयकुमार पाठक बोलत होते. इतिहास अभ्यासक मंदार लवाटे, विद्याचरण पुरंदरे , सचिन जोशी, योगेश गायकर, संदीप परांजपे, महेश फळणसंकर, गोपाळ जोशी, चिंतामणी केळकर, विशाल खुळे,भासमती सोमण यावेळी उपस्थित होते. 

जयकुमार पाठक म्हणाले, बहमनी राजवटीचे वैशिष्ट्य म्हणजे १९१ वर्षे अल्पसंख्याकांनी बहुसंख्यांकावर राज्य केले. त्यांची परंपरा, संस्कृती पूर्ण वेगळी असली तरी राज्यकर्ते यशस्वी ठरले. त्यांची राजवट इतकी प्रदीर्घ काळ टिकण्याचे कारण म्हणजे त्यांनी गाव गाडे व्यवस्थेला कधीही धक्का लावला नाही. 

ते पुढे म्हणाले, अल्लाउद्दीन हसन गंगू बहमनी याने बहमनी साम्राज्याची स्थापना केली. तुघलकांच्या काळात जे अत्याचार झाले ते बहमनी राजवटीत झाले नाहीत. बहमनी राजवटीला हिंदू आणि मुस्लिम यांचा पाठिंबा मिळाला. धार्मिक बाबींमध्ये बहमनी सुलतानांनी ढवळाढवळ केली नाही तसेच शियाबुद्धीन अहमद वगळता कोणीही धर्मांतर करायला सक्ती केली नाही. त्यामुळे लोकांचा विश्वास बहमनी राजवटीत होता. राजेंद्र ठाकूरदेसाई यांनी प्रास्ताविक केले. विद्याचरण पुरंदरे यांनी आभार मानले.

अलाउद्दीन हसन गंगू बहमनी मधील गंगू हे हिंदू नाव – अलाउद्दीन हसन गंगू बहमनी या नावातील गंगू या नावाचे कुतूहल अनेक जणांना आहे. कारण गंगू हे हिंदू नाव आहे. अलाउद्दीन हसन गंगू बहमनी हा गंगरस नावाच्या ब्राह्मणाकडे कामाला होता. त्यांनी केलेल्या उपकाराची परतफेड करण्यासाठी त्याने गंगू हे नाव आपल्या नावास जोडून घेतले. 

सातारा दि.16 :  स्वातंत्र्याचा अमृत महोत्सवानिमित्त देशातील 75 डिजिटल बँकींग युनिटची स्थापना करण्यात आली असून यामध्ये सातारा येथील बँक ऑफ महाराष्ट्रचाही समावेश आहे. डिजीटल कार्यप्रणालीचे लोकार्पण दूरदृष्य प्रणालीद्वारे पंतप्रधान नरेंद्र मोदी यांच्या हस्ते झाले.

यावेळी दूरदृष्य प्रणालीद्वारे केंद्रीय अर्थ मंत्री निर्मला सितारामण उपस्थित होत्या. तर पायोनिर टॉवर, सातारा येथून खासदार धनंजय महाडीक, आमदार श्रीमंत छत्रपती शिवेंद्रसिंहराजे भोसले, आमदार जयकुमार गोरे, जिल्हाधिकारी रुचेश जयवंशी, बँक ऑफ महाराष्ट्रचे व्यवस्थापकीय संचालक तथा मुख्य कार्यकारी अधिकारी ए.एस. राजीव, अंचल प्रबंधक विवेक नाचणे, जिल्हा अग्रणी बँक व्यवस्थापक युवराज पाटील यांच्यासह विविध संस्थांचे पदाधिकारी, नागरिक मोठ्या संख्येने उपस्थित होते.

डिजीटल बँकेतील अधिकारी हे ग्राहकांना डिजिटल व्यवहार कसे करावे याबाबत मार्गदर्शन करणार आहेत. यामध्ये ग्राहकांना अनेक सुविधा देण्यात येणार आहेत. तसेच वित्तीय साक्षरता, डिजीटल व्यवहार, ऑनलाईन फसवणूक होणार नाही याचेही ग्राहकांना प्रशिक्षण देण्यात येणार आहे. तसेच ग्राहकांच्या शंकांचेही निरासण करण्यात येणार आहे.

स्वातंत्र्याच्या अमृत महोत्सवानिमित्त 75 जिल्हृयातील 75 डिजिटल बँक करण्यात आल्या आहेत. यामध्ये महाराष्ट्रातील नागपूर, औरंगाबाद तसेच सातारा येथील बॅक ऑफ महाराष्ट्रचा समावेश आहे. या डिजिटील बँकींगमुळे आर्थिक सक्षमीकरणाला चालना, डिजिटल बँकीग साक्षरता होण्यास मदत होणार असल्याचा विश्वास उपस्थित मान्यवरांनी व्यक्त केला.

सारसबागे समोर उभारणार बाळासाहेबांच्या शिवसेनेचे भवन

पुणे- कॉंग्रेसचे नेते राहुल गांधी देशभर भारत जोडो चे अभियान राबवीत असताना पुण्यातून कॉंग्रेस ला भगदाड पद्न्याची चिन्हे दिसत आहेत . सुमारे ३० वर्षे निष्ठेने कॉंग्रेसचे कार्यकर्ते म्हणून ओळखले जाणारे सुधीर कुरुमकर यांनी मुख्यमंत्री एकनाथ शिंदे यांच्या नेतृत्वाखालील बाळासाहेबांच्या शिवसेनेत प्रवेश केला आहे. हळू हळू कॉंग्रेसचे अनेक निष्ठावंत देखील आता बदलत्या राजकीय स्थितीत पक्ष बदलण्याच्या मार्गावर जाऊ शकतात असे चित्र आहे. कुरुमकर यांच्या पुढाकाराने बाळासाहेबांच्या शिवसेनेचे सेना भवन हे त्यांच्या सारसबागे समोरील देवीच्या मंदिराजवळील इमारतीत लवकरच उभारले जाते आहे. सुमारे साडेचार हजार चौरस फुटाचे ऑफिस या निमित्ताने मुख्यमंत्री एकनाथ शिंदे यांच्या नेतृत्वाखालील बाळासाहेबांच्या शिवसेनेला प्राप्त होणार आहे.

कुरुमकर यांचे वडील शंकरराव कुरुमकर संयुक्त महाराष्ट्राच्या चळवळीत अग्रणी कार्यकर्ते म्हणून ओळखले जात , गाडगीळ यांच्या समवेत कॉंग्रेसचे पाईक म्हणून त्यांचे नाव घेतले जात .पर्वती मतदार संघ, कसबा मतदार संघ या सह शहराच्या विविध भागात एक समंजस सहयोगी कार्यकर्ता म्हणून ओळख असलेले सुधीर कुरुमकर यांना ३० वर्षात कॉंग्रेस कडून एकदा फक्त पीएमटी सदस्य पदावर काम करण्याची संधी मिळाली होती. पण अन्यत्र कुठेही कधी त्यांचा विचार झाला नव्हता . त्यांच्या अशा पक्ष बदलाने निष्ठावन्तांमधील वर्षानुवर्षे दबलेली खदखद बाहेर पडू लागल्याचे दिसत आहे. सुधीर कुरुमकर आता उपशहर प्रमुख म्हणून बाळासाहेबांच्या शिवसेनेचे काम पाहणार आहेत .

पुणे, 15 ऑक्‍टोबर 2022

इलेक्ट्रॉनिक्स आणि मेकॅनिकल इंजिनिअर्स कोअर यांनी  15 ऑक्टोबर 2020 रोजी 80 वा स्थापना दिवस  साजरा केला. भारतीय सैन्यासाठी आवश्यक  असलेल्या उपकरणांच्या विशाल श्रेणीची  देखभाल करण्याची जबाबदारी ईएमई कोअर वर असते. ईएमईच्या स्थापनेपासून म्हणजे 1943 पासून, या दलाने प्रत्येक आघाड्यांवर आपले कर्तृत्व सिद्ध केले आहे आणि वेगळी  ओळख निर्माण  केली आहे. ईएमई चा हा सात दशकांचा प्रवास,  त्यांच्या नैतिकतेचा मजबूत पाया, तंत्रकुशलता आणि अनुकरणीय व्यावसायिकतेच्या उदाहरणांनी परिपूर्ण आहे.

याप्रसंगी, दक्षिण कमांड मुख्यालयाचे  चीफ ऑफ स्टाफ, लेफ्टनंट जनरल अरविंद वालिया, यांनी  लेफ्टनंट जनरल जे.एस. नैन, परम विशिष्ट सेवा पदक, अति विशिष्ट सेवा पदक, सेना पदक, एडीसी, जनरल ऑफिसर कमांडिंग-इन-चीफ, दक्षिण कमांड यांच्या वतीने ईएमई कोअर च्या सर्व श्रेणीतील अधिकाऱ्यांचे,  दर्जेदार कामगिरी कायम राखल्याबद्दल आणि कर्तव्याप्रती असलेल्या समर्पण भावनेबद्दल अभिनंदन केले. यापुढील काळातही अशाच भावनेने आणि निष्ठेने काम सुरू ठेवावे, असे आवाहनही त्यांनी केले.

पुणे दि.१५- शेतकऱ्यांचे उत्पन्न वाढविल्याशिवाय त्यांना शहराकडे जाण्यापासून रोखता येणार नाही. त्यादृष्टीने प्रयत्न करताना ग्रामीण अर्थव्यवस्था मजबूत करण्यासाठी कृषिउद्योगांची महत्वाची भूमिका आहे, असे प्रतिपादन राज्याचे वस्त्रोद्योग मंत्री तथा जिल्ह्याचे पालकमंत्री चंद्रकांत दादा पाटील यांनी केले.

वैकुंठ मेहता राष्ट्रीय सहकार व्यवस्थापन संस्था, पुणे येथे आयोजित कृषिउद्योगांच्या मुख्य कार्यकारी अधिकाऱ्यांच्या ‘सूत्र २०२२’ परिषदेत ते बोलत होते. कार्यक्रमाला वैकुंठ मेहता राष्ट्रीय सहकार व्यवस्थापन संस्थाचे संचालक पार्थ राय, संस्थेच्या माजी विद्यार्थी संघटनेचे अध्यक्ष संतोष रामगिरे, डॉ.हेमा यादव, डॉ.डी. रवी, अनिल तिवारी उपस्थित होते.

मंत्री श्री. पाटील म्हणाले, पारंपरिक शेतीच्या आधारे शेतकऱ्यांचे उत्पन्न वाढविता येणार नाही. त्यामुळे शेतकरी उत्पादक कंपन्या स्थापन करण्याला शासन प्रोत्साहन देत आहे. कृषिउद्योग ग्रामीण विकासासाठी महत्वाचे असल्याने त्यांनी शेतकऱ्यांचे उत्पादन वाढवून शेतमालाला बाजार मिळवून देण्यासाठी पुढाकार घ्यावा.

सहकार क्षेत्राला अधिक मजबूत करण्यासाठी सहकारी संस्थांना बळकट करावे लागेल. वैकुंठ मेहता राष्ट्रीय सहकार व्यवस्थापन संस्थानी या क्षेत्रात चांगले काम करणारे विद्यार्थी घडवले. सहकार विषयातील पदव्युत्तर अभ्यासक्रमच्या फार कमी संस्था देशात आहेत. या क्षेत्रातील विविध शैक्षणिक संस्थांचे नेतृत्व करण्याची क्षमता या संस्थेत आहे असे त्यांनी सांगितले.

वस्त्रोद्योग क्षेत्रात अनेक सुधारणा करण्यात येत असून राज्याला वस्त्रोद्योग क्षेत्रात पहिल्या क्रमांकावर आणण्यासाठी उद्योजकांच्या सूचनेनुसार लवकरच मुंबईत खरेदी-विक्री केंद्र सुरू करण्याचे प्रयत्न आहेत, असेही श्री. पाटील म्हणाले.

कार्यक्रमात उपस्थितीत अन्य मान्यवरांनीही यावेळी विचार व्यक्त केले.

पुणे दि.१५-तीर्थक्षेत्रांच्या विकासासाठी सरकारचे प्राधान्य असून भाविकांना आवश्यक सुविधा देण्यासाठी विकास आराखड्याव्यतिरिक्त इतर विकासकामांसाठीचा स्वतंत्र प्रस्ताव सादर करावा, असे निर्देश पालकमंत्री चंद्रकांतदादा पाटील यांनी दिले.

पालखीतळ/मार्ग विकास आराखड्यातील पुणे जिल्ह्यातील देहू, आळंदी, भंडारा डोंगर व सुदुंबरे विकास आराखडा कामकाजाचा आढावा घेण्यासाठी आयोजित बैठकीत ते बोलत होते.

बैठकीस आमदार राहुल कुल, जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी अधिकारी आयुष प्रसाद उपस्थित होते.

पालकमंत्री श्री.पाटील यांनी तिर्थस्थळाच्या परिसरातील नवीन रस्ते, पुल,भक्तनिवास बांधकाम, घाट बांधकाम, मल:निःसारण, स्वच्छतागृहे आदी कामांचा आढावा घेतला.

श्री. पाटील म्हणाले, तीर्थक्षेत्रांच्या विकासाला शासनाने प्राधान्य दिले असून भाविकांच्या गरजा लक्षात घेऊन विकासकामांचे प्रस्ताव सादर करावेत. देहू येथे पूर्ण झालेली कामे स्थानिक स्वराज्य संस्थेकडे हस्तांतरित करण्यात यावी. तिर्थस्थळाच्या ठिकाणी स्वच्छता राहील आणि भाविकांना असुविधा होणार नाही याची दक्षता घ्यावी व त्यासाठी आवश्यक कामे प्रस्तावित करावी.

पुणे जिल्हा परिषद अंतर्गत चांगली कामगिरी करणाऱ्यांचा सत्कार

पुणे जिल्हा परिषदेचे मुख्य कार्यकारी अधिकारी आणि प्रशासक आयुष प्रसाद यांनी पुणे जिल्हा परिषदेच्या अंतर्गत सर्व विभाग आणि पंचायत समित्यांच्या कामगिरीचा अहवाल यावेळी पालकमंत्री चंद्रकांत पाटील यांना सादर केला. आर्थिक वर्षाच्या पहिल्या सहामाहीत चांगल्या कामगिरीसाठी आरोग्य विभागाला सर्वोत्कृष्ट विभाग तर मावळला सर्वोत्कृष्ट तालुका म्हणून पालकमंत्र्यांच्या हस्ते गौरविण्यात आले.

आरोग्य विभागाने प्राथमिक आरोग्य सेवा केंद्रे आणि रुग्णवाहिकांसाठी उपकरणे खरेदी करून पायाभूत सुविधांचे बळकटीकरण आणि पथकांकडून तपासणी करून चांगली कामगिरी केली आहे.

पुणे, दि. १५: कौशल्य, रोजगार, उद्योजकता व नाविन्यता विभागाच्यावतीने महाराष्ट्र स्टार्टअप सप्ताह अंतर्गत नौरोसजी वाडिया कॉलेज पुणे येथे आयोजित पंडीत दिनदयाल उपाध्याय महारोजगार मेळाव्यात सहभागी उद्योजकांनी मुलाखतीद्वारे ५६० बेरोजगार उमेदवारांची रोजगारासाठी प्राथमिक निवड केली.

जिल्हा कौशल्य विकास, रोजगार व उदयोजकता मार्गदर्शन केंद्र, पुणे, मॉडर्न एज्युकेशन सोसायटीचे नौरासजी वाडिया कॉलेज आणि नेस वाडिया कॉलेज ऑफ कॉमर्स, टॅलेंटकॉर्प सोल्युशन प्रा.लि.,पुणे आणि भारतरत्न मौलाना आझाद सोशल एज्युकेशन ॲण्ड स्पोर्टस असोसिएशन,पुणे यांच्या संयुक्त विद्यमाने मेळाव्याचे आयोजन करण्यात आले.

महारोजगार मेळाव्यास जिल्हा परिषदेचे मुख्य कार्यकारी अधिकारी आयुष प्रसाद, कौशल्य विकास, रोजगार व उद्योजकता विभागीय आयुक्तालयाच्या उपायुक्त अनुपमा पवार, मॉर्डन एज्युकेशन सोसायटीचे विश्वस्त डॉ.मनोहर सानप, जिल्हा कौशल्य विकास,रोजगार व उद्योजकता मार्गदर्शन केंद्राचे सहायक आयुक्त सा. बा. मोहिते आदी उपस्थित होते.

जिल्ह्यातील उद्योजकांशी समन्वय साधून बेरोजगार उमेदवारांना रोजगारांची संधी उपलब्ध होण्याच्यादृष्टीने या मेळाव्याचे आयोजन करण्यात आले होते. मेळाव्यामध्ये ६ हजार ६४६ रिक्त पदांच्या भरतीसाठी ३४ उद्योजकांनी सहभाग नोंदविला.मेळाव्यात १ हजार ११३ उमेदवार मुलाखतीस उपस्थित राहिले. त्यापैकी सुमारे ५६० बेरोजगार उमेदवारांची प्राथमिक स्तरावर निवड करण्यात आली.

मेळाव्याच्या यशस्वीतेसाठी जिल्हा कौशल्य विकास,रोजगार व उद्योजकता मार्गदर्शन केंद्राला नौरोसजी वाडिया कॉलेजचे प्राचार्य डॉ.फरहान सुर्वे, नेस वाडिया कॉलेज ऑफ कॉमर्सच्या प्राचार्य डॉ.वृषाली रणधीर यांचे सहकार्य लाभले.
00

पुणे-महापालिकेत ३०० कोटीच्या इलेक्ट्रिक बसेसच्या टेंडर वरून उच्च पातळीवरील २ अधिकाऱ्यांत वादंग सुरु असताना आता पुणे महानगर परिवहन महामंडळाच्या (पीएमपीएल ) अध्यक्ष आणि व्यवस्थापकीय संचालकपदी ओमप्रकाश बकोरिया यांची नियुक्ती करण्यात आली आहे. पीएमपीचे विद्यमान अध्यक्ष आणि व्यवस्थापकीय संचालक लक्ष्मीनारायण मिश्रा यांच्या जागेवर बकोरिया यांची बदली करण्यात आली असून राज्य शासनाने त्याबाबतचे आदेश काढले आहेत. बकोरिया येत्या काही दिवसांत पदभार स्वीकारतील, अशी माहिती पीएमपीकडून देण्यात आली.केंद्रीय शिक्षण मंत्री धर्मेंद्र प्रधान यांचे स्वीय सहाय्य म्हणून लक्ष्मीनारायण मिश्रा यांची नेमणूक दिल्ली येथे करण्यात आली आहे. त्यामुळे गेल्या काही महिन्यांपासून पीएमपीएल चे अध्यक्ष आणि व्यवस्थापकीय संचालकपद रिक्त होते. त्यामुळे ओमप्रकाश बकोरिया यांची या जागेवर नियुक्ती करण्यात आली आहे.

ओमप्रकाश बकोरिया यांनी पुणे महापालिकेत अतिरिक्त आयुक्त म्हणून कार्यभार सांभळला होता. त्यानंतर त्यांची बदली क्रीडा आयुक्त म्हणून करण्यात आली होती. महापालिकेत कार्यरत असताना वाहतूक कोंडी सोडविण्यासाठी त्यांनी सातत्याने उपाययोजना करण्यावर भर दिला होता. आळंदी रस्ता आणि नगर रस्ता बीआरटी मार्गाचे कामही त्यांच्या कार्यकाळात पूर्ण झाले. तसेच या दोन्ही मार्गांचे लेखापरीक्षणही त्यांनी करून घेतले होते. त्यांच्याकडे पीएमपीएलचा कार्यभार आल्याने पीएमपीच्या कामकाजात लक्षणीय सुधारणा होण्याची शक्यता आहे.

पुणे दि.१५: जिल्ह्यातील विकासकामे वेगाने मार्गी लावायची असून निधीची कमतरता भासू दिली जाणार नाही. अधिकाधिक नाविन्यपूर्ण उपक्रम राबवण्यासाठी शासकीय निधीसोबतच उद्योगांच्या सामाजिक उत्तरदायित्व निधीतूनही सहकार्य घेण्यात येईल, अशी ग्वाही राज्याचे उच्च व तंत्र शिक्षण मंत्री तथा जिल्ह्याचे पालकमंत्री चंद्रकांत पाटील यांनी दिली.

पालकमंत्री श्री. पाटील यांनी जिल्हाधिकारी कार्यालयात झालेल्या आढावा बैठकीत जिल्ह्यातील विविध विकासकामांचा आढावा घेतला. त्यावेळी ते बोलत होते. बैठकीस आमदार राहुल कुल, जिल्हाधिकारी डॉ. राजेश देशमुख, मुख्य कार्यकारी अधिकारी आयुष प्रसाद, सह पोलीस आयुक्त संदीप कर्णिक, पोलीस अधीक्षक डॉ.अभिनव देशमुख, उप वनसंरक्षक राहुल पाटील आदी उपस्थित होते.

येत्या स्थानिक स्वराज्य संस्थांच्या निवडणुका लक्षात घेऊन मंजूर निधी वेळेत खर्च होईल याचे नियोजन करण्यात यावे अशा सूचना देऊन पालकमंत्री श्री. पाटील म्हणाले, पशुसंवर्धन विभागाने लंपी आजार नियंत्रणात आणण्यासाठी आवश्यक उपाययोजना कराव्यात, त्यासाठी आवश्यक निधी देण्यात येईल. शिरूर परिसरात बिबट्याच्या संचारामुळे नागरिकांमध्ये भीती असल्याने बिबट्या पकडण्यासाठी अधिकचे पिंजरे लावावेत आणि तज्ज्ञ व्यक्तींची मदत घ्यावी. सार्वजनिक बांधकाम विभागाने रस्त्यावरील खड्ड्यांच्या दुरुस्तीसाठी आवश्यक नियोजन करावे.

जिल्ह्यातील पर्यटनस्थळांचा विकास करण्यासाठी निवडक स्थळ घेऊन तेथील विकासाचे नियोजन करावे, जेणेकरून अशा ठिकाणी भेट देणाऱ्या पर्यटकांची संख्या वाढू शकेल. आगामी काळातील रोजगार कौशल्याधारित असणार आहे. त्यामुळे विद्यार्थ्यांच्या कौशल्य विकासावर भर देण्यात यावा. त्यासाठी जास्तीत जास्त निधीची तरतूद करण्यात येईल, असेही ते म्हणाले.

शासकीय कार्यालयांच्या छतावर सौर पॅनेल बसवावेत
शासकीय कार्यालयांचा वीजेचा खर्च वाचवण्यासाठी आवश्यक वीज सौरऊर्जेवर निर्मित करणे आवश्यक आहे. त्यामुळे जिल्ह्यातील सर्व शासकीय कार्यालयांच्या छतावर सौरऊर्जा पॅनेल बसवण्याचा उपक्रम हाती घ्यावा. त्यासाठी निधी उपलब्ध करून देण्यात येईल.

यावेळी पालकमंत्र्यांच्या हस्ते समाज कल्याण विभागातर्फे तयार करण्यात आलेल्या सेवा पंधरवडा पुस्तिकेचे प्रकाशन करण्यात आले. जिल्हा वार्षिक योजनेच्या माध्यमातून वैद्यकीय अधिकाऱ्यांसाठी तयार करण्यात आलेल्या माहिती पुस्तिकेचेही यावेळी प्रकाशन करण्यात आले.

अग्रणी बँकेतर्फे बँक मित्र नेमणूक पत्राचे वितरण
अग्रणी बँकेतर्फे जिल्हा परिषदेकडून कामे करण्याचा ठेका मिळालेल्या कंत्राटदारांना कर्ज मंजुरीचे पत्र पालकमंत्री श्री.पाटील यांच्या हस्ते प्रातिनिधिक स्वरूपात वितरित करण्यात आले.

गाव पातळीवर बँकिंगच्या प्राथमिक सेवा पुरविण्याचे काम बँक मित्र यांचेमार्फत केले जात आहे. पालकमंत्र्यांच्या हस्ते प्रातिनिधिक स्वरूपात अशा बँक मित्र महिलांना बँक ऑफ महाराष्ट्र कडून नेमणूक पत्राचे वितरण करण्यात आले.

यावेळी जिल्हाधिकारी डॉ. देशमुख तसेच मुख्य कार्यकारी अधिकारी आयुष प्रसाद यांनी आढावा सादर केला. विविध विभागांच्या खातेप्रमुखांनीही आपापल्या विभागांची माहिती सादर केली.

महात्मा जोतिराव फुले शेतकरी कर्जमुक्ती योजनेंतर्गत नियमित कर्ज भरणाऱ्या पात्र शेतकऱ्यांना ५० हजार रुपयांचे अनुदान देण्यात येणार आहे. शेतकऱ्यांच्या आधार प्रमाणीकरणासाठी आज सार्वजनिक क्षेत्रातील बँका, सर्व व्यापारी बँका तसेच पुणे जिल्हा मध्यवर्ती सहकारी बँक सुरू असून जिल्हा मध्यवर्ती सहकारी बँकेच्या शाखा रविवारीही त्यासाठी सुरू राहणार आहे, असेही अधिकाऱ्यांनी सांगितले.
000

पुणे दि १५: गावची कायदा व सुव्यवस्था राखण्यात पोलीस पाटलांची भूमिका महत्त्वाची आहे. कोरोना कालावधीत पोलीस प्रशासनासोबतच पोलीस पाटलांनी बजावलेली कामगिरी कौतुकास्पद आहे. त्यामुळे कोरोना विषाणू संसर्गाला नियंत्रणात आणण्यासाठी मोठी मदत झाली, असे प्रतिपादन उच्च व तंत्र शिक्षण मंत्री चंद्रकांत दादा पाटील यांनी केले.पुणे ग्रामीण पोलीस मुख्यालयातील भीमा शंकर हॉलमध्ये पुणे ग्रामीण पोलीस दल स्मृतिचिन्हांचे अनावरण श्री. पाटील यांच्या हस्ते झाले, त्यावेळी ते बोलत होते. यावेळी कोल्हापूर परिक्षेत्राचे विशेष पोलिस महानिरीक्षक मनोज लोहिया, पोलीस अधीक्षक डॉ.अभिनव देशमुख, बारामती अपर पोलीस अधीक्षक मिलिंद मोहिते, अपर पोलीस अधीक्षक मितेश घट्टे, श्रीमती उषा लक्ष्मण आदी उपस्थित होते.

पालकमंत्री श्री. पाटील म्हणाले, कोरोना संसर्गाच्या कालावधीत पोलीस प्रशासन, आरोग्य तसेच स्चच्छता कर्मचारी यांनी केलेले कार्य उल्लेखनीय आहे. पोलीस प्रशासनाला नागरिकांनीही चांगले सहकार्य केले. सर्वांच्या मदतीमुळे संसर्ग रोखण्याबरोबरच अनेकांचे प्राणही वाचले आहेत. कोरोना कालावधीत कार्य करताना काही पोलीस पाटलांना यामध्ये आपले प्राण गमवावे लागले, प्राण अमूल्य आहेत मात्र त्यांच्या कुटुंबियांना काही प्रमाणात का होईना मदत देण्यात येत आहे. प्रत्येक अडचणीच्या वेळी शासन त्यांच्या कुटुंबासोबत असेल, असे त्यांनी सांगितले.

पोलीस प्रशासनाला गुन्ह्यांचा तपास करताना साक्षीदार अत्यंत महत्त्वाचा आहे. साक्षीदाराच्या साक्षीनेच गुन्ह्याचा तपास उलगडण्यात मदत होते. त्यामुळे आज गौरव करण्यात येत असलेले साक्षीदार नागरिक यांची कामगिरी समाजासाठी महत्त्वाची ठरणार आहे. सर्वसामान्य माणसासाठी पोलीस यंत्रणेला सहकार्य देण्याबाबतचे प्रशिक्षण, तपासातील कौशल्य याबाबत मार्गदर्शन मिळाले तर गुन्ह्यांचा तपास गतीने होईल, असेही श्री. पाटील म्हणाले.

श्री. लोहिया म्हणाले, जनतेसोबतचे पोलिसांचे सबंध वाढावेत यासाठी हे स्मृतिचिन्ह तयार करण्यात आले आहे. समाजाची सेवा करताना आपण समाजसेवक आहोत या भावनेने पोलिसांनी काम करावे, तसेच कायद्याने दिलेल्या अधिकाराचा वापर सर्वसामान्यांसाठी करावा, असेही ते म्हणाले.

पोलीस अधीक्षक डॉ.देशमुख म्हणाले, पोलीस व सर्वसामान्य नागरिक यांच्यातील सहकार्याचे नाते स्पष्ट करणारे स्मृतिचिन्ह महत्वाचे आहे. कोरोना कालावधीत पोलीस पाटील यांनी केलेले सहकार्य अत्यंत महत्त्वाचे ठरले. पोलीस प्रशासन व नागरिक एकत्रितपणे समाजात चांगले काम करूया, असे त्यांनी सांगितले.

यावेळी श्रीमती उषा लक्ष्मण यांनीही मनोगत व्यक्त केले.

पालकमंत्र्यांच्या हस्ते कोरोनाने निधन झालेल्या पोलीस पाटील यांच्या कुटुंबियांना सानुग्रह अनुदानाचे वाटप करण्यात आले तसेच पोलीस तपासात सहकार्य केलेल्या नागरिकांचाही पालकमंत्री श्री. पाटील यांच्या हस्ते सत्कार करण्यात आला. शिल्पकार गिरीश चरवड व प्रशांत गायकवाड यांचा विशेष सत्कार करण्यात आला.
यावेळी पोलीस दलातील अधिकारी, पोलीस पाटील, त्यांचे कुटुंबिय, नागरिक उपस्थित होते.