पुण्यातील गणेश मंडळांचा पुढाकार – कातकरी लोकांना दिवाळी फराळ, आकाशकंदील
पुणे ः दिवाळीचा फराळ व फटाक्यांची आतीषबाजी हे शब्द कोणाच्या तरी तोंडून ऐकणारी कातकरी समाजाची वस्ती आकाशकंदील, फराळ, फटाके आणि पणत्यांच्या प्रकाशाने उजळून निघाली. पुण्यापासून अगदी मोजक्या अंतरावर असलेल्या डोंगर द-यामध्ये राहणारे कातकरी समाजातील शेतमजूर दिवाळीनिमित्त आयोजित आनंदोत्सवात सहभागी झाले होते.  चिमुकल्यांनी ही फटाके उडविण्याचा मनमुराद आनंद लुटला.
गुरुवार पेठेतील वीर शिवराय तरुण मंडळ आणि येरवड्यातील नवज्योत मित्र मंडळ, बुधवार पेठेतील साईनाथ मंडळ ट्रस्टच्या संयुक्त विद्यमाने या कार्यक्रमाचे आयोजन करण्यात आले. पुणे सातारा रस्त्यावरील कापूरहोळ जवळ चेलाडी या आदिवासी पाड्यावर ५० कुटुंबाला दिवाळी फराळ व आकाशकंदिल देण्यात आले. यावेळी वीर शिवराय मंडळाचे अध्यक्ष किरण सोनिवाल, मोहित झांजले, चैतन्य सिन्नरकर, नवज्योत मंडळाचे अमित जाधव, साईनाथ मंडळाचे पियुष शहा उपस्थित होते. 
डोंगरावरील या वस्तीमध्ये प्रत्येक घरात जावून कार्यकर्त्यांनी दिवाळी फराळ, उटणे, पणत्या, आकाशकंदील देऊन कुटुंबांना दिवाळीच्या शुभेच्छा दिल्या. तसेच प्रत्येक घराच्या दरवाजामध्ये आकाशकंदील लावत त्यांना दिवाळीचे महत्त्व सांगितले. चिमुकल्यांनी फटाके उडविण्यासोबतच फराळाचे पदार्थ खाण्याचा आनंदही लुटला

पुणे ः

भारतीय विद्या भवन आणि इन्फोसिस फाऊंडेशनच्या सांस्कृतिक प्रसार कार्यक्रमांतर्गत आयोजित दिवाळी पहाट कार्यक्रमाला शनीवारी चांगला प्रतिसाद मिळाला. शनीवार, २२ ऑक्टोबर २०२२ रोजी सकाळी साडेसहा वाजता हा कार्यक्रम झाला. मेहदी हसन, अनुप जलोटा, जगजित सिंग यांनी गायलेल्या रचनांचा ‘ सुबह- ए-समर्पण ‘ हा कार्यक्रम भारतीय विद्या भवनचे सरदार महादेव बळवंत नातू सभागृह,(सेनापती बापट रस्ता) येथे झाला.

व्ही.पी.म्युझिक अॅकेडमी निर्मित या कार्यक्रमात विवेक पांडे, प्रिशिता पांडे यांनी भजन, गरबा गीते, गझलांचे बहारदार सादरीकरण केले. प्रकाश सुतार ( कीबोर्ड ), सारंग भांडवलकर ( तबला ), आसिफ खान उस्मान इनामदार ( संगीतवाद्य ) , अतुल गद्रे (गिटार ) यांनी साथसंगत केली.

‘ मैलि चादर ओढ के कैसे ‘ या भजनगुरू हरी ओम शरण यांच्या भजनाने कार्यक्रमाची सुरवात झाली. अनुप जलोटा यांच्या ‘ऐसी लागी लगन ‘,च्या समर्पित भजनांनी दिवाळीची पहाट भक्ती रंगांने उजळत गेली. अनुप जलोटा यांनी लोकप्रिय केलेली ‘ रंग दे चुनरिया ‘,’चदरिया झिनी, रे झिनी ‘ अशी भजने रसिक प्रेक्षकांची दाद मिळवून गेली.

‘ ये दौलत भी ले लो ‘ , ‘फिर छिडी बात, रात फुलों की ‘ , ‘ चुपके , चुपके रातदिन ‘ , ‘दिल ढुंढता है ‘, ‘ आज जाने की जिद ना करो ‘ सारख्या काही रसिकप्रिय गझलाही सादर करण्यात आल्या.मेहदी हसन यांची ‘रंजीश ही सही ‘ गझल वाहवा मिळवून गेली.

हा कार्यक्रम विनामूल्य होता.‘भारतीय विद्या भवन’ आणि ‘इन्फोसिस फाऊंडेशन’च्या सांस्कृतिक प्रसार कार्यक्रमांतर्गत सादर होणारा हा १४४ वा कार्यक्रम होता. भारतीय विद्या भवनचे मानद सचिव प्रा.नंदकुमार काकिर्डे यांनी स्वागत केले. अपर्णा दास यांनी आभार मानले.

पुणे :

साहित्य व साहित्यिक चळवळ क्षेत्रातील योगदानासाठी महाराष्ट्र साहित्य परिषद पिंपरी-चिंचवड शाखेचे अध्यक्ष राजन लाखे यांना मातंग साहित्य परिषद तर्फे महाराष्ट्राचे राज्यपाल भगतसिंह कोशारी यांच्या हस्ते ‘विशेष साहित्य सन्मान ‘ प्रदान करण्यात आला. राजभवन मुंबई येथे झालेल्या कार्यक्रमात अखिल भारतीय समरसता मंडळाचे सदस्य रमेश पांडव, ह.भ.प.शिवाजीराव मोरे,डॉ.धनंजय भिसे, डॉ.अंबादास सगट उपस्थित होते.

महाराष्ट्रातील विविध क्षेत्रात विशेष कार्य करणा-या व्यक्तींचा यावेळी गौरव करण्यात आला.पिंपरी चिंचवड मधून लाखे यांना हा मान मिळाला.

राजन लाखे यांचे पिंपरी चिंचवड शहरातील साहित्यिक वाटचालीत मोलाचे योगदान आहे. त्यांनी काव्यपहाट, साहित्यिकांची आरोग्य तपासणी हे कार्यक्रम प्रथमच सुरु केले तसेच अखिल भारतीय साहित्य संमेलनातील ‘कविकट्टा’ या व्यासपीठावर १०२४ कवींना स्थान देऊन साहित्य क्षेत्रात विक्रम केला. पूर्णपणे साहित्याला वाहिलेला ‘अक्षरवेध’ हा दिवाळी अंक सुरु केला. कोरोनाच्या काळात म.सा.प च्या माध्यमातून सर्वाधिक कार्यक्रम घेऊन महाराष्ट्रातील साहित्य क्षेत्राच्या नकाशावर पिंपरी चिंचवडला प्रथम क्रमांकावर आणले. याचे फलित म्हणजे मसाप पिंपरी चिंचवड शाखेला ‘सर्वोत्कृष्ठ शाखा पुरस्कार’ दुस-यांदा प्राप्त झाला.

कवयित्री शांता शेळके यांचा जन्मशताब्दी महोत्सव , १०० मान्यवर, १०० आठवणी, १०० कविता याद्वारे मानवंदना देऊन साहित्य क्षेत्रात यापूर्वी कधीही न झालेला असा अभिनव तसेच ऐतिहासिक उपक्रम ते राबवित असून हा उपक्रम सोशल मिडिया च्या माध्यमातून जगभरातील तमाम रसिकांपर्यंत पोहचवत आहेत. या उपक्रमाची ‘आशिया बुक ऑफ रेकॉर्डस ‘ने दखल घेतली आहे.

पुणे : रांगोळ्यांचा थाट, मांडलेला पाट, सुगंधी तेल-उटण्यांचा सुवास, औक्षणाचे ताट, गोडाचा घास आणि त्यावर चढलेला नव्या कपड्यांचा साज या साऱ्यांचा अविस्मरणीय अनुभव मिळाल्याने ‘त्यांचा’ही दीपोत्सव आनंदमय झाला. शाही अभ्यंगस्नान आणि मनसोक्त फराळाचा आनंद घेताना ही मुले भारावून गेली.

निमित्त होते, पदपथ-सिग्नलवर राहणाऱ्या मुलांसाठी माजी उपमहापौर व काँग्रेस पक्षाचे माजी गटनेते आबा बागुल आणि मित्रपरिवाराने आयोजित केलेल्या ‘शाही अभ्यंगस्नाना’चे!
नामदार गोखले रस्त्यावरील गुडलक चौकात झालेल्या या अनोख्या उपक्रमाने पदपथावर राहणाऱ्या मुलांमुलींची शनिवारची सकाळ सुखद ठरली. खेळण्या-बागडण्याचे आणि शिकण्याचे वय असतानाही परिस्थितीने पोटाची खळगी भरण्यासाठी दररोजची सकाळ रोजगारासाठीच उजाडते. ना दसरा ना दिवाळी असे खडतर जीवन जगणाऱ्या या मुलांना आपल्याप्रमाणेच दिवाळीचा आनंद लुटता यावा, यासाठी बागुल पिता-पुत्र आणि मित्रपरिवाराने गेल्या तेरा वर्षांपासून हा उपक्रम हाती घेतला आहे. शाही अभ्यंगस्नानानंतर या मुलांना नवे कपडे, फराळ आणि फटाके अशी मेजवानी मिळाल्याने मुलांचा आनंद गगनात मावेनासा झाला. तर या आनंदमय सोहळ्याने पालकांच्या डोळ्यात आनंदाश्रू तरळले.
प्रारंभी कार्यकर्त्यांकडून परिसराची स्वछता करून येथे रांगोळ्यांचा सडा घालण्यात आला होता. त्यावर पाट मांडून प्रत्येक मुलाला उटणे लावून स्नान घालण्यात आले. त्यानंतर औक्षण करून, नवे कपडे आणि फराळ देण्यात आला. आबा बागुल, जयश्री बागुल, अमित बागुल, हर्षदा बागुल,अभिषेक बागुल आणि कार्यकर्त्याकडून या मुलांना सुवासिक तेल-उटणे लावून मंगलमय वातारणात झालेला अभ्यंगस्नानाचा हा सोहळा रस्त्यावरून जाणाऱ्या नागरिकांचे लक्ष वेधून घेत होता आणि नागरिकही त्यात सहभागी होत होते. या उपक्रमात विलास रत्नपारखी ,महेश ढवळे,इम्तियाज तांबोळी, सागर आरोळे, धनंजय कांबळे, योगेश निकाळजे,निलेश कदम, राहुल तौर, बाबासाहेब पोळके, संतोष पवार, समीर शिंदे, निखिल सोनावणे, किशोर भालेराव आदींसह कार्यकर्ते सहभागी झाले होते.

पुणे-महाराष्ट्रातील शिंदे – फडणवीस सरकारने दिवाळीनिमित्त जाहीर केलेल्या “शंभर रुपयात किराणा किट” हि फसवी योजना असल्याचा आरोप करत या फसवणुकीच्या निषेधार्थ व अन्नधान्य वितरण व्यवस्था पुन्हा पूर्ववत सुरू करावी या मागणीसाठी राष्ट्रवादी काँग्रेस पार्टीच्या वतीने दांडेकर पुल येथे आंदोलन करण्यात आले.याप्रसंगी शहराध्यक्ष प्रशांत जगताप , प्रवक्ते प्रदीप देशमुख ,संतोष नांगरे, सौ.मृणालिनी वाणी, सौ.प्रिया गदादे, विपुल मैसुरकर, बाळासाहेब अटल, विजय बागडे, समीर पवार, शशिकला कुंभार, अमोल ननावरे, मोनहाज शेख, संजय दामोदरे, राहुल गुंड, प्रदीप शिवशरण, शिवम ईभाड, संकेत शिंदे,व इतर प्रमुख मोठ्या संख्येने हजर होते.

यावेळी प्रशांत जगताप म्हणाले,’ मोठमोठी आश्वासन् देवून ती पूर्ण न करणाऱ्या या भाजपवाल्यांनी नेहमीप्रमानेच यावेळीही राज्यातील जनतेला फसविलेच आहे.दिवाळी सुरू होवून सुध्दा अजूनही कार्डधारकांना धान्य मिळालेले नाही. शंभर रुपयात किराणा किट ची घोषणा केली, पुरवठादाराने किराणा किट उपलब्ध देखील करून दिल्या परंतु या किटवर फसवणुकीचे बोधचिन्ह असणाऱ्या शिंदे -फडणवीस यांचा फोटो नसल्यामुळे या किट वितरित करण्यात आल्या नाही. अखेर गरिबांना दिवाळीच्या एक दिवस अगोदर देखील संबंधित किट मिळालेल्या नाहीत. प्रगत व विकसित समजल्या जाणाऱ्या महाराष्ट्रासाठी ही बाब अत्यंत दुर्दैवी आहे. एकीकडे ओला दुष्काळ सदृश्य परिस्थिती आहे, गेल्या दोन वर्षात कोविडमुळे दिवाळी आनंदाने व उत्साहात साजरी करता आली नव्हती यावर्षी ती आनंदात साजरी करता येणार अशी खोटी आश्वासने देत शिंदे- फडणवीस सरकारने ही लोकप्रिय घोषणा केली. परंतु आजही गरिबांना संबंधित किट मिळू शकलेले नाही.
राष्ट्रवादी काँग्रेस पार्टी या गोष्टीचा निषेध करते महाविकास आघाडी सरकारच्या काळात कडक लॉकडाऊन असताना देखील सार्वजनिक धान्य वितरण व्यवस्था अत्यंत सुनियोजितपणे सुरू होती. या सरकारने लोकप्रिय घोषणांच्यापायी संबंधित व्यवस्था बिघडवली असून जी काही आश्वासने दिली होती ती देखील यांना पूर्ण करता आली नाहीत म्हणून राष्ट्रवादी काँग्रेस पार्टीने सदर बाबीचा निषेध व्यक्त केला येत्या दोन दिवसात सार्वजनिक धान्य वितरण प्रणाली पुन्हा पूर्ववत सुरू न झाल्यास पालकमंत्र्यांना काळे झेंडे दाखविण्यात येतील असेही जगताप यावेळी म्हणाले.

देशाच्या विकासात शासकीय सेवेचे मोठे योगदान- केंद्रीय मंत्री नारायण राणे

पुणे, 22 ऑक्‍टोबर 2022

पंतप्रधान नरेंद्र मोदी यांच्या हस्ते दूरदृश्य प्रणालीच्या माध्यमातून आज रोजगार मेळावा- या 10 लाख कर्मचाऱ्यांच्या नोकरभरती मोहिमेचा शुभारंभ झाला. या समारंभात, देशभरातील 75 हजार नवनियुक्त कर्मचाऱ्यांना नियुक्ती पत्रे देण्यात आली.

पुण्यामध्ये केंद्रीय मंत्री नारायण राणे यांच्या उपस्थितीत हा कार्यक्रम पार पडला.

राज्यसभा सदस्य प्रकाश जावडेकर, महाराष्ट्राचे उच्च तंत्र शिक्षण मंत्री चंद्रकांत पाटील, टपाल सेवा, पुणे क्षेत्राच्या संचालक सिमरन कौर, पुणे क्षेत्राचे पोस्ट मास्टर जनरल, रामचंद्र जायभाये देखील यावेळी उपस्थित होते.

भारतीय टपाल विभाग, पुणे कार्यालयाकडून या कार्यक्रमाचे आयोजन करण्यात आले होते.

यावेळी केंद्रीय सूक्ष्म, लघु व मध्यम उद्योग मंत्री नारायण राणे यांनी प्रमुख पाहुणे म्हणून आपले मनोगत व्यक्त केले.

भारत सर्व क्षेत्रात विकसित व्हावा, हा पंतप्रधान यांचा प्रयत्न आहे. भारत आज आर्थिक क्षेत्रात सुरक्षित आहे, हा विश्वास पंतप्रधान देत आहेत, असे केंद्रीय मंत्री नारायण राणे म्हणाले.

आजचा कार्यक्रम आगळावेगळा आहे. 75 हजार व्यक्तींच्या माध्यमातून 75 हजार कुटुंबे जोडली गेली आहेत, असे सांगून भारताला मोठे करण्यात सरकारी सेवेत येणाऱ्यांचा मोठा हातभार आहे. प्रामाणिक सेवा देणे आपले कर्तव्य आहे, याची जाणीव राणे यांनी उपस्थित नवनियुक्त कर्मचाऱ्यांना करून दिली.

देशासाठी, कुटुंबासाठी योगदान देण्यासाठी नोकरी आवश्यक ठरते, अशी भावना व्यक्त करून राणे यांनी सर्व अधिकारी, कर्मचारी यांना नवीन सेवेसाठी शुभेच्छा दिल्या.

नारायण राणे पुढे म्हणाले की, पंतप्रधान आम्हाला दर आठवड्याला देशाच्या प्रगतीसाठी, नागरिकांसाठी काय करता येईल यावर मार्गदर्शन करतात. त्यादृष्टीने आम्ही प्रयत्न करत आहोत. तुम्ही आमच्या सोबत या, भारत आत्मनिर्भर, स्वयंपूर्ण करूयात. आर्थिक क्षेत्रात दहाव्या स्थानावरून पाचव्या स्थानावर आलो आहोत, तिसऱ्या आणि त्यानंतर पहिल्या स्थानावर जायचा प्रयत्न करू, असे आवाहन राणे यांनी केले. राणे यांनी उत्तम कार्यक्रमाच्या नियोजनाबद्दल पुणे टपाल विभागाचे अभिनंदन देखील केले.

यावेळी पंतप्रधान नरेंद्र मोदी यांनी नवनियुक्त कर्मचाऱ्यांना मार्गदर्शन केले.

पंतप्रधान मोदी यांच्या, युवकांना रोजगाराच्या संधी प्रदान करण्याच्या तसेच नागरिकांच्या कल्याणाप्रति असलेल्या कटिबद्धतेची पूर्तता करण्याच्या दृष्टीने, हे एक महत्वाचे पाऊल ठरणार आहे. पंतप्रधान मोदी यांच्या निर्देशांनुसार, सर्व मंत्रालये आणि विभागांमध्ये असलेल्या मंजुरीप्राप्त रिक्त जागा भरण्याचे काम मिशन मोडवर सुरु झाले आहे.

देशभरातून निवडले गेलेले नवनियुक्त कर्मचारी, ती सुलभ आणि तंत्रज्ञानयुक्त करण्यात आली आहे.

पुणे : ” विविध कारणांमुळे शहरातील वाहतुक कोंडी होत आहे. वाहतुक कोंडी टाळण्यासाठी पोलिस ठाण्यांकडील पोलिस, गृहरक्षक दल, खासगी वॉर्डन अशा स्वरुपाचे पुरेसे मनुष्यबळ उपलब्ध करुन देण्यात येत आहे. तसेच नियमांचे उल्लंघन करणाऱ्यांवर पोलिस कर्मचाऱ्यांऐवजी सीसीटीव्हीद्वारे ऑनलाईन दंडाची कारवाई होईल.” असे पालकमंत्री चंद्रकांत पाटील यांनी शनिवारी स्पष्ट केले.शहरातील वाहतूक व कायदा-सुव्यवस्थेबाबत पालकमंत्री चंद्रकांत पाटील यांनी शनिवारी पोलिस आयुक्त अमिताभ गुप्ता यांच्यासह वरिष्ठ पोलिस अधिकाऱ्यांसमवेत बैठक घेतली. त्यानंतर झालेल्या पत्रकार परिषदेस ते उपस्थित होते. यावेळी माजी महापौर व भारतीय जनता पक्षाचे प्रदेश सरचिटणीस मुरलीधर मोहोळ, स्थायी समिती माजी अध्यक्ष हेमंत रासने, माजी आमदार बापू पठारे उपस्थित होते.

चौतीस गावांमध्ये 1000 कोटीची कामे करणार

पुणे महापालिकेत समाविष्ट झालेल्या चौतीस गावांमध्ये बांधकाम आराखडा मंजूर करण्यासाठी पुणे महानगर प्रदेश विकास प्राधिकरणाने (पीएमआरडीए) विकसन शुल्क घेतले. त्याचे पाचशे कोटी रुपये निधी “पीएमआरडीए’कडे आहे. मात्र, त्यातून”पीएमआरडीए’ ने चौतीस गावांमध्ये कोणतेही विकासकाम सुरू केले नाही. हा विरोधाभास असून, “पीएमआरडीए’ ने हा निधी दिल्यास, त्यामध्ये महापालिका व नगरविकास खाते आणखी पाचशे कोटी रुपयांची भर घालून समाविष्ट गावात एक हजार कोटी रुपयांची विकासकामे सुरू केली जातील. त्यातून समाविष्ट गावांमधील अनेक नागरी प्रश्न मार्गी लागतील, असेही पाटील यांनी सांगितले.

आठशे पोलिस पुण्यातुन भरती केले जाणार

राज्यातील पोलिस दलामध्ये लवकरच वीस हजार पोलिसांची केली जाणार आहे. त्यापैकी आठशे पोलिस पुण्यातुन भरती केले जाणार आहेत. याबरोबरच पुणे पोलिस दलात वाघोली, खराडी, बाणेर, फुरसुंगी, आंबेगाव, नांदेड सिटी, काळेपडळ अशी सात नवीन पोलिस ठाणीही मंजुर झाली आहेत. त्यासाठी आवश्‍यक निधीसाठी राज्याच्या वित्त मंत्रालयाकडे पाठपुरावा केला जाणार असल्याचे त्यांनी सांगितले.

पुणे शहर स्वच्छ व सुंदर करण्यासाठी उद्योजक आणि सामाजिक संस्थांशी संवाद
 
पुणे दि. २२: पुण्याचे उद्योग संशोधन आणि उत्पादनात पुढे आहेत. स्वच्छतेबाबतही उपयुक्त संशोधन करीत नवे उपक्रम राबविण्यासाठी उद्योजकांनी पुढे यावे आणि पुण्याला स्वच्छ व सुंदर शहर करण्यासाठी सहकार्य करावे, असे प्रतिपादन जिल्ह्याचे पालकमंत्री चंद्रकांत दादा पाटील यांनी केले.

मराठा चेंबर ऑफ कॉमर्स, इंडस्ट्रीज अँड अ‍ॅग्रीकल्चरतर्फे आयोजित बैठकीत ते बोलत होते. कार्यक्रमाला जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी अधिकारी आयुष प्रसाद, मराठा चेंबरचे अध्यक्ष डॉ.सुधीर मेहता , माजी महापौर मुरलीधर मोहोळ आदी उपस्थित होते.

पालकमंत्री पाटील म्हणाले, शहरातील नागरिकांसाठी शहर स्वच्छता, वाहतूक नियोजन आणि पावसाच्या पाण्याचा योग्य निचरा होणे असे तीन महत्वाचे विषय आहे. सांडपाण्यावर प्रक्रिया करून त्याचा पुनर्वापर करणे आणि कचऱ्याचे वर्गीकरण करून त्यातून उत्पन्न घेण्याचे प्रयोग गरजेचे आहेत. अशा विषयांबाबत चांगल्या सूचना चेंबरने कराव्यात.

स्वच्छता कर्मचाऱ्यांचे प्रशिक्षण आणि त्यांना कचरा वेचण्यासाठी आवश्यक सुविधा देणे गरजेचे आहे. त्यांना काही प्रमाणात वस्तूंच्या स्वरूपात मदत करून त्यांची कार्यक्षमता वाढवता येईल. ओल्या कचऱ्यावर प्रक्रिया करून वीज निर्मितीसारखे प्रकल्प राबविण्यासाठी उद्योजकांचे सहकार्य महत्वाचे ठरेल. स्वच्छतेबाबत सर्व संबंधित घटकांचा सहभाग वाढवून जनप्रबोधनावर भर देण्यात यावा, असेही त्यांनी सांगितले.

शहरातील रस्त्यांचे नूतनीकरण करण्याच्या सूचना देण्यात आल्या आहेत. पाऊस बंद होताच ही कामे सुरू करण्यात येईल. एनडीए चौकातील वाहतूक समस्याही दूर होत आहे, असेही श्री.पाटील म्हणाले.

डॉ.मेहता यांनी प्रास्ताविकात उपक्रमाची माहिती दिली. शहर स्वच्छ करण्यासाठी शासन आणि प्रशासनासोबत चेंबर काम करेल. स्वच्छतेचे उद्दीष्ट सामुहिक प्रयत्नातून साध्य करता येईल असे ते म्हणाले.

बैठकीला उद्योग संस्थांचे प्रतिनिधी, सामाजिक संस्थांचे प्रतिनिधी, शासकीय अधिकारी उपस्थित होते.

पुणे -पौड रस्त्यावरील कोंडवाड्यात ठेवलेली जनावरे घेऊन जाण्यासाठी आलेल्या दोघांना मारहाण केल्याच्या आरोपातून भाजपाचे माजी नगरसेवक, हिंदुत्ववादी नेते मिलिंद एकबोटे यांच्यासह आठ जणांची निर्दोष मुक्तता करण्याचे आदेश प्रथम वर्ग न्यायदंडाधिकारी आर. व्ही. डाफरे यांनी दिले. १९ वर्षांनंतर या खटल्याचा निकाल लागला.

या प्रकरणात न्यायालयात दोषाराेपपत्र दाखल करण्यात आले होते. आरोपींच्या वतीने ॲड. महेश गजेंद्रगडकर, ॲड. एम. डी. झोडगे, ॲड. देशपांडे, ॲड. डोंगरे यांनी कामकाज पाहिले.या खटल्यात सरकारी वकिलांनी पाच साक्षीदार तपासले होते. खटला प्रलंबित असताना आरोपी मनोज रासगे यांचे निधन झाले. एकबोटे यांनी आरोपींशी संगमनत करून दंगा घातला. आरोपींनी मारहाण केल्याचा आरोप सरकारी वकील सिद्ध करू शकले नाही, असा निष्कर्ष न्यायालयाने काढला.

या प्रकरणात मिलिंद एकबोटे यांच्यासह हरिश्चंद्र शिवराम कोंढरे, हेमंत बबनराव बोरकर, बापू बबन काळे, प्रकाश नामदेव शेलार, राजेश बापूराव कोल्हापुरे, रामदास नारायण आंबेकर, पंडित परशुराम मोडक यांची निर्दोष मुक्तता करण्यात आली. कोंडवाड्यात ठेवलेली जनावरे आणि गाई घेऊन जाण्यासाठी आलेल्या शकील कुरेशी आणि नासीर कुरेशी यांना जमावाने मारहाण केल्याची फिर्याद शकील कुरेशी यांनी कोथरूड पोलीस ठाण्यात दिली होती. ४ जून २००३ रोजी ही घटना घडली होती.

पुणे : साखळीपीर तालिम राष्ट्रीय मारुती मंदीर, जय आनंद ग्रुप संचालित ऋषीआनंदवन व लायन्स क्लब ऑफ पुणे सेंट्रल यांच्या संयुक्त विद्यमाने वंचित-संचितांची दिवाळी साजरी करण्यात आली. जैन साध्वी इंद्रकवरजी महाराज साहब यांच्या जयंतीनिमित्त ‘समाजधनपुजन’ करण्यात आले. यावेळी १०० गरजू परिवारांना दिवाळीनिमित्त दिवाळी फराळ वाटप करण्यात आले.
वंचितांची व संचितांची एकत्रीत दिवाळी व समाजातील उपेक्षित घटकांना अभ्यंगस्नान घालुन, औक्षण करुन त्यांना नविन कपडे-साडीचोळी देऊन फराळ वाटप करण्याचे हे विसावे वर्ष आहे. यासह वर्षभर कार्यरत असणाऱ्या पोलीस कर्मचारी, फायर ब्रिगेड जवान, मनपा सफाई कर्मचारी यांचे औक्षण करुन त्यांचा सन्मान करण्यात आला.
धनत्रयोदशीच्या निमित्ताने नाना पेठेतील साखळीपीर तालिम चौकात झालेल्या या कार्यक्रमावेळी रविंद्र माळवदकर, विजयकुमार मर्लेचा, भाई कात्रे, शिवानी माळवदकर, जयप्रकाश सोनी, शांतीलाल नवलाखा, ईश्वर बोरा, संजय कटारिया, संतोष कर्नावट, प्रवीण तालेडा, विजय धोका, नितीन ओस्तवाल, विजय चोरडिया, रमणलाल कोठारी, बबन लाहोटी, रमेश लाहोटी आदी उपस्थित होते.
जय आनंद ग्रुपचे सदस्य संतोष भुरट यांच्या धर्मपत्नी प्रतिभा भुरट व शांतीलाल नवलखा यांच्या मातोश्री श्रीमती चांदकॅंवर बाई दगडूलालजी नवलाखा यांचे नुकतेच निधन झाले. त्यांच्या स्मृतीला अभिवादन करण्यात आले. हा कार्यक्रम घडविण्यासाठी जय आनंद ग्रुप, पुणे संचलित ऋषी आनंदवनचे अध्यक्ष विजयकुमार मर्लेचा व कार्याध्यक्ष विजय चोरडिया यांनी विशेष प्रयत्न केले.