नवी दिल्ली- दिल्लीतील हवेची गुणवत्ता सलग पाचव्या दिवशी ‘अतिशय वाईट ‘ श्रेणीत राहिल्यामुळे प्राथमिक शाळा सक्तीने बंद ठेवायला लागल्या आहेत,याबद्दल गंभीर चिंता व्यक्त करत,केंद्रीय राज्यमंत्री (स्वतंत्र प्रभार) विज्ञान आणि तंत्रज्ञान;  पृथ्वी विज्ञान राज्यमंत्री (स्वतंत्र प्रभार) डॉ जितेंद्र सिंह यांनी सावध केले आहे की वायू प्रदूषणाशी संबंधित शेतातील कचरा जाळण्याच्या घटनांमध्ये राजस्थानमध्ये 160% आणि पंजाबमध्ये 20% वाढ झाली आहे. ते पुढे म्हणाले, याचा अर्थ असा होतो की दोन्ही राज्यांतील सरकार अशा प्रकारचा कचरा जाळणे थांबविण्यासाठी पुरेसे प्रयत्न करत नाहीत आणि त्यामुळे दिल्ली एनसीआरमधील हवेची गुणवत्ता सतत ढासळत आहे.

भू- विज्ञान मंत्रालयाच्या  भारतीय हवामान विभागाचेही डॉ जितेंद्र सिंह प्रभारी आहेत, ते यासंदर्भात म्हणाले की, दुसरीकडे, हरियाणा आणि उत्तर प्रदेश सारख्या राज्यांत अशा प्रकारच्या  घटनांमध्ये लक्षणीय  घट नोंदविण्यात आली  आहे.

2018-19 पासून, पंतप्रधान नरेंद्र मोदी यांच्या सूचनेनुसार, केंद्र सरकारने 3,138 कोटी रुपये राज्यांना शेतातील कचरा व्यवस्थापनासाठी दिले आहेत, त्यापैकी जवळपास 1,500 कोटी रुपये केवळ पंजाबला देण्यात आले आहेत,असे डॉ जितेंद्र सिंह यांनी निदर्शनास आणून दिले.

दिल्लीत या वर्षी ऑक्टोबरमध्ये “अतिशय खराब” हवेची गुणवत्ता सतत 7 दिवस नोंदवली गेली आहे, याउलट  ऑक्टोबर 2021 मध्ये असे एकही प्रकरण आढळले नाही, असा इशाराही त्यांनी  दिला.

मुंबई दि. 6 – रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री ना.रामदास आठवले 6 दिवसांच्या अमेरिका दौऱ्यावर आज पहाटे  नवी दिल्ली विमानतळावरून रवाना  झाले असून आज सकाळी अमेरिकेच्या जॉन केनेडी विमानतळ न्यूयॉर्क येथे  पोहोचले आहेत. अमेरिका दौऱ्यात ना.रामदास आठवले हे न्यूयॉर्क ;न्यूजर्सी आणि ह्युस्टन  या शहरांना भेट देणार आहेत. 

केंद्रीय राज्यमंत्री ना.रामदास आठवले  अमेरिका दौऱ्यात  अमेरीकेतील भारतीय दूतावास येथे भेट देणार आहेत. भारतीय दुतावासातील अधिकाऱ्यांची ते भेट घेणार आहेत.तसेच अमेरीकेतील  भारतीय नागरिकांशी भारतीय दुतावस  येथे संवाद साधणार आहेत.

न्यूयॉर्क येथे इंडो अमेरिकन असोसिएशन फॉर सोशल डेव्हलपमेंट  च्या परिषदेत ना.रामदास आठवले प्रमुख पाहुणे म्हणून उपस्थित राहणार आहेत. अमेरिका दौऱ्या दरम्यान अमेरिकीतील विविध शहरांत वास्तव्यास असणाऱ्या भरतीयांशी ते संवाद साधणार आहेत. येत्या दि.12 नोव्हेंबर रोजी अमेरिका दौरा पूर्ण करून ना.रामदास आठवले भारतात परतणार आहेत.

कौशल्य विकास मंत्री मंगलप्रभात लोढा यांची माहिती

अजूनही १५ नोव्हेंबरपर्यंत स्पर्धेत सहभागाची संधी

मुंबई, दि. 6 नोव्हेंबर 2022 : आयटीआयच्या अभ्यासक्रमामध्ये विद्यार्थ्यांचा सहभाग वाढविण्याच्या उद्देशाने हाती घेण्यात आलेल्या ‘सुचवा तुमच्या आवडीचे कौशल्य अभ्यासक्रम’ या स्पर्धेला विद्यार्थ्यांचा चांगला प्रतिसाद लाभला आहे. कालपर्यंत तब्बल ६७ हजार ९९० विद्यार्थ्यांनी या स्पर्धेत सहभाग नोंदविला आहे, अशी माहिती राज्याचे कौशल्य, रोजगार, उद्योजकता आणि नाविन्यता मंत्री मंगलप्रभात लोढा यांनी दिली.

मागील काही वर्षांपासून आयटीआयच्या विविध अभ्यासक्रमांकडे विद्यार्थ्यांचा कल वाढत असून अधिकाधिक विद्यार्थी कौशल्याधारित प्रशिक्षण घेऊन रोजगार किंवा स्वयंरोजगार करीत आहेत. आता उद्योगांमधील बदलते नवनवे तंत्रज्ञान आणि त्याअनुषंगाने आयटीआयच्या अभ्यासक्रमांमध्ये आवश्यक बदल करण्यासाठी विभागाने पुढाकार घेतला असून यासाठी व्यवसाय शिक्षण व प्रशिक्षण संचालनालयाकडून १५ नोव्हेबरपर्यत ही राज्यस्तरीय स्पर्धा जाहीर करण्यात आली आहे. याअंतर्गत वेगळ्या हटके संकल्पना सुचविणाऱ्या विद्यार्थ्यांना बक्षीस देण्यात येणार आहेत. औद्योगिक व सामाजिक क्षेत्रात वेगाने बदल होत असल्याच्या काळात विद्यार्थ्यांना नवनवी कौशल्ये आत्मसात करणे गरजेचे बनले आहे. हे लक्षात घेऊन आयटीआयमध्ये शॉर्ट टर्म सर्टिफिकेट कोर्सेस सुरु करण्याचा निर्णय विभागाने घेतला असून स्वत: अभ्यासक्रम निवडण्याची संधी विद्यार्थ्यांना देण्यात येत आहे, असे मंत्री श्री. लोढा यांनी सांगितले.

या स्पर्धेअंतर्गत सर्वाधिक २० हजार ७६० इतक्या विद्यार्थ्यांनी स्वयंरोजगाराशी संबंधित अभ्यासक्रम सुचविण्यासाठी सहभाग घेतला आहे. त्या खालोखाल २० हजार ३६४ विद्यार्थी अत्याधुनिक तंत्रज्ञानावर आधारित अभ्यासक्रम सुचविण्यासाठी स्पर्धेत सहभागी झाले आहेत. कृषी क्षेत्रातील अभ्यासक्रम सुचविण्यासाठी १७ हजार ४४५ विद्यार्थी स्पर्धेत सहभागी झाले आहेत तर ४ हजार २५५ विद्यार्थी महिला रोजगाराशी संबंधित अभ्यासक्रम सुचविणार आहेत. ५ हजार १६६ विद्यार्थ्यांनी अतिशय उपयुक्त अभ्यासक्रम सुचविण्यासाठी स्पर्धेत नोंदणी केली आहे. स्पर्धेत सुमारे ५६ हजार २०७ इतक्या मुलांनी तर ११ हजार ७०५ इतक्या मुलींनी सहभाग घेतला आहे. यातील सुमारे 61 टक्के विद्यार्थी हे आयटीआयच्या प्रथम वर्षातील तर 27 टक्के विद्यार्थी हे द्वितीय वर्षात शिकणारे आहेत.

कशी असणार स्पर्धा ?

अधिक माहितीसाठी आणि स्पर्धेत सहभागासाठी विद्यार्थ्यांनी स्थानिक आयटीआयमध्ये संपर्क साधावा. स्पर्धेत विद्यार्थ्यांना शेती, स्वयंरोजगार, महिलांचे रोजगार, आधुनिक तंत्रज्ञानावर आधारीत अभ्यासक्रम व अन्य उपयुक्त अभ्यासक्रम सुचवता येणार आहेत. ते विषय कसे उपयुक्त आहे हेदेखील सांगायचे आहे. सुचविलेले अभ्यासक्रम एनएसक्यूएफशी संलग्न असावेत. सर्वोत्कृष्ट विषयानुसार विद्यार्थ्याची निवड केली जाईल. त्यासाठी जिल्हा व्यवसाय शिक्षण व प्रशिक्षण अधिकाऱ्याच्या अध्यक्षतेखाली निवड समिती नियुक्त केली आहे. सर्वोत्कृष्ट संकल्पना सुचविणाऱ्या विद्यार्थ्यांना प्रत्येक जिल्ह्यात ५ हजार, ३ हजार व २ हजार रुपयांची बक्षिसे दिली जाणार असून त्यांनी सुचविलेल्या अभ्यासक्रमांचा विचार केला जाणार आहे.

येत्या मंगळवारी, 8 नोव्हेंबर 2022 (कार्तिक 17, शके 1944) रोजी खग्रास चंद्रग्रहण लागणार आहे. चंद्रोदयाच्या वेळी हे ग्रहण भारतातील सर्व ठिकाणाहून दिसेल. मात्र, ग्रहणाच्या आंशिक आणि खग्रास टप्प्यांची सुरुवात भारतात कुठूनही दिसणार नाही,  कारण चंद्रोदयाच्या आधीच ग्रहणकाळ सुरू होणार आहे.

खग्रास आणि आंशिक अशा दोन्ही टप्प्यांवर अखेरीचा चंद्र  देशाच्या पूर्वेकडील भागांतून दिसू शकेल. देशाच्या उर्वरित भागातून केवळ आंशिक टप्प्याचा शेवट दिसणार आहे.

भारतीय प्रमाण वेळेनुसार ग्रहण दुपारी 2 वाजून 39 मिनिटांनी सुरू होईल.  खग्रास चंद्रग्रहण 3 वाजून 46 मिनिटांनी सुरू होईल. खग्रास टप्पा सायंकाळी 5  वाजून 12 मिनिटांनी तर आंशिक टप्पा 6 वाजून 19 मिनिटांनी समाप्त होईल.

दिल्ली, मुंबई, चेन्नई आणि बेंगळुरू सारख्या इतर शहरांचा विचार करता, चंद्रोदयाच्या वेळी, खग्रास समाप्तीनंतरचे आंशिक ग्रहण चालू असेल आणि वरील शहरांमध्‍ये , चंद्रोदयाच्या वेळेपासून अनुक्रमे 50 मिनिटे , 18 मिनिटे , 40 मिनिटे,  आणि 29 मिनिटे,  काळांसाठी आंशिक ग्रहण संपेपर्यंत ते दिसू शकेल.  

भारतातील काही ठिकाणच्या स्थानिक परिस्थितीशी संबंधित तक्ता, संदर्भासाठी स्वतंत्रपणे जोडला आहे.  (स्रोत: पोझिशनल अॅस्ट्रॉनॉमी सेंटर, कोलकाता; भारतीय हवामान विभाग

मुंबई-महाराष्ट्र विधानसभेच्या ‘166 – अंधेरी पूर्व’ या मतदारसंघाच्या पोटनिवडणुकीसाठीची मतमोजणी आज रविवार, दिनांक 6 नोव्हेंबर 2022 रोजी पार पडली. सकाळी 8 वाजेपासून सुरू झालेल्या या मतमोजणी प्रक्रियेत एकूण 66,530 मतांसह शिवसेना (उद्धव बाळासाहेब ठाकरे) पक्षाच्या श्रीमती ऋतुजा रमेश लटके  विजयी झाल्या आहेत अशी घोषणा निवडणूक निर्णय अधिकारी तथा उपजिल्हाधिकारी श्री.प्रशांत पाटील केली. यावेळी केंद्रीय निवडणूक निरीक्षक देवेश देवल उपस्थित होते. त्यानंतर श्री. पाटील यांनी विजयी उमेदवार श्रीमती ऋतुजा लटके यांना पोटनिवडणुकीत विजयी झाल्याचे प्रमाणपत्र प्रदान केले.

अंधेरी पूर्व’ या विधानसभा मतदारसंघाच्या सर्व 256 केंद्रांवर दिनांक 3 नोव्हेंबर रोजी मतदान प्रक्रिया पार पडली होती. या मतदान प्रक्रियेत एकूण 31.75 टक्के मतदारांनी आपला मतदानाचा हक्क बजावला होता. आज या मतदानाच्या मतमोजणीस सकाळी 8 वाजता सुरुवात झाली. प्रारंभी टपाली मतमोजणी करण्यात आली. त्यानंतर एकूण 19 फेऱ्यांमध्ये ई.व्ही.एम. द्वारे मतमोजणी करण्यात आली. मतमोजणी केंद्राच्या परिसरात कडेकोट बंदोबस्त ठेवण्यात आला होता.  माध्यमांना मतमोजणी प्रक्रियेची तात्काळ माहिती मिळण्याच्या दृष्टीने माध्यम कक्षही स्थापन करण्यात आला होता.

महाराष्ट्र विधानसभेच्या ‘166 – अंधेरी पूर्व’ या मुंबई उपनगर जिल्ह्याच्या विधानसभा मतदारसंघात झालेल्या निवडणुकीच्या मतमोजणीत शेवटच्या १९ व्या फेरी अखेर अणि टपाली मतदानातून  उमेदवारांना मिळालेली एकूण मते याची आकडेवारी खालील प्रमाणे आहे:

१) श्रीमती ऋतुजा रमेश लटके (पक्ष – शिवसेना उद्धव बाळासाहेब ठाकरे) : ६६,५३० विजयी

२) श्री. बाला व्यंकटेश नाडार (पक्ष – आपकी अपनी पार्टी ) : 1,515

३) श्री.मनोज श्रावण नायक (पक्ष – राईट टू रिकॉल पार्टी) : 900

४) श्रीमती नीना खेडेकर (अपक्ष ) : 1,531

५) श्रीमती फरहाना सिराज सय्यद (अपक्ष ) : 1,093

६) श्री.मिलिंद कांबळे (अपक्ष ) : 624

७) श्री.राजेश त्रिपाठी (अपक्ष ) : 1,571

(नोटा : 12,806, अवैध मते 22)

एकूण मते : 86,570

कुनोच्या अधिवासातील, अनिवार्य विलगीकरणानंतर वातावरणात आणखी रुळण्यासाठी 2 चित्त्यांना एका मोठ्या बंद परिसरात सोडल्याची माहिती पंतप्रधान नरेंद्र मोदी यांनी आज दिली.

पंतप्रधान मोदी यांनी  ट्विटमध्‍ये  म्हटले आहे की;  

“आनंदाची बातमी! कुनोच्या अधिवासातील, अनिवार्य विलगीकरणानंतर वातावरणात आणखी रुळण्यासाठी 2 चित्त्यांना एका मोठ्या बंद परिसरात सोडले आहे. इतरांना लवकरच सोडले जाईल. सर्व चित्ते निरोगी, सक्रिय आणि वातावरणाशी व्यवस्थित जुळवून घेत आहेत हे जाणून देखील मला आनंद झाला.  “

डेहराडून -विज्ञानाने कालच्या परी-कथांचे आजच्या वास्तवात रुपांतर केले आहे आणि म्हणूनच पारंपरिक ज्ञानाचा आधुनिक संशोधनाबरोबरचा संयोग अपेक्षेपलीकडील परिणाम देऊ शकतो असे केंद्रीय विज्ञान आणि तंत्रज्ञान (स्वतंत्र प्रभार), भूविज्ञान (स्वतंत्र प्रभार), पंतप्रधान कार्यालय, कार्मिक, सार्वजनिक तक्रारी, निवृत्ती वेतन, अणुऊर्जा आणि अवकाश राज्य मंत्री डॉ. जितेंद्र सिंह यांनी आज सांगितले.

डेहराडून इथल्या उत्तरांचल विद्यापीठाच्या परिसरात आयोजित आकाश तत्त्व- “जीवनासाठी आकाश”, या विषयावरील 4-दिवसीय राष्ट्रीय परिषदेमध्ये बीजभाषण देताना डॉ. जितेंद्र सिंह म्हणाले की, भारत आज नवोदित देशांना नॅनोसॅटेलाइटसह उपग्रह निर्मितीमध्ये आणि क्षमता विकासात मदत करत आहे. म्हणून संपूर्ण जग भारताकडे एक प्रेरणा स्थान म्हणून पाहत आहे, ते म्हणाले. डॉ जितेंद्र सिंह  म्हणाले की, जागतिक राष्ट्रसंघामध्ये भारताचं स्थान उंचावत असून, अंतराळ संशोधनाच्या मदतीने ते शक्य होईल. अंतराळ क्षेत्रात आज 102 पेक्षा जास्त स्टार्टअप्स कार्यरत आहेत. त्याशिवाय, भू-स्थानिक मार्गदर्शक सूचनांनी 6 लाखापेक्षा जास्त भारतीय गावांचे सर्वेक्षण करण्यासाठी स्वामित्व (SVAMITVA) सारख्या योजनांना बळ दिले आहे,  असे ते  म्हणाले. 

डॉ जितेंद्र सिंह  म्हणाले, भारताच्या अंतराळ क्षेत्राबाबतच्या आकांक्षा चंद्र आणि मंगळावरील मोहिमांमधून प्रतिबिंबित होत असल्या, तरी गगनयान ही देशाची पहिली मानवी अंतराळ मोहीम, भारताच्या अवकाशातील साहसी मोहिमांमधील एक महत्त्वाचा टप्पा असेल. मानवरहित गगनयान उड्डाण 2023 च्या अखेरीला होणार आहे. मानवरहित दुसरे उड्डाण 2024 च्या मध्याला होईल, तर मानवासह होणारे उड्डाण 2024 पर्यंत नियोजित आहे, असे ते  म्हणाले. 

डॉ जितेंद्र सिंह  म्हणाले की, या तीन दिवसांच्या परिषदेत सुमारे 35 नामवंत वक्ते त्यांचे दृष्टिकोन मांडणार आहेत, म्हणून डेहराडून परिषदेमधून ते आकाश तत्वाच्या विविध आयामांवर नवीन विचारांची अपेक्षा करत आहेत. भारतातील तरुणांना आधुनिक वैज्ञानिक प्रगतीसह प्राचीन विज्ञानामधील ज्ञानाची ओळख करून देणे हा या परिषदेचा मुख्य उद्देश आहे.