पुणे -मातंग एकता आंदोलन महाराष्ट्र राज्य यांच्या वतीने आध्यक्रांतीगुरु लहुजी वस्ताद साळवे यांच्या २२८ व्या जयंतीच्या पूर्व संध्येला आज सायं ६ वासता दिपोत्सव कार्यक्रमाचे आयोजन करण्यात आलेले होते या कार्यक्रमाचे उदघाटन माजी गृहराज्य मंत्री रमेशदादा बागवे (संस्थापक अध्यक्ष मातंग एकता आंदोलन महाराष्ट्र राज्य ) यांच्या हस्ते करण्यात आले.

यावेळी कार्यक्रमाचे संयोजक , संघटनेचे प्रदेश कार्याध्यक्ष अविनाश बागवे , मातंग समाजाचे जेष्ठ नेते अंक्कल सोनावणे, संघटनेचे शहर अध्यक्ष विठ्ठल थोरात, पुणे शहर महीला अध्यक्षराजश्री अडसुळ ,सौ सुरेखा खंडाळे,अरुण गायकवाड, मधुकर चांदणे , संजय साठे, दयानंद अडागळे, सुनिल बावकर, मारुती कसबे, रोहीत अवचिते , हुसेन शेख सचिन वाघमारे ,लक्षमण चव्हाण ,अदित्य गायकवाड , व इतर मान्यवर व महीला मोठ्या संख्येने यावेळी उपस्थित होत्या.

विद्यापीठाच्या निवडणुकीत पहिलीच घटना

विद्यापीठ विकास मंचचे उमेदवार बिनविरोध विजय

पुणे –

सावित्रीबाई फुले पुणे विद्यापीठाचा देशातील विद्यापीठाच्या इतिहासात पहिल्यांदाच संस्थाचालक गटातून अधीसभेवर विद्यापीठ विकास मंचाच्या पाच उमेदवारांची बिनविरोध निवड झाली.

संस्थाचालकांच्या खुल्या गटातून डॉ. राजेंद्र विखे-पाटील, डॉ.अपूर्व हिरे, प्रा. विनायक आंबेकर, श्री. अशोक सावंत यांची आणि महिला गटात डॉ. ज्योत्स्ना एकबोटे यांचा बिनविरोध उमेदवारांत समावेश आहे.

विद्यापीठ विकास मंचाचे समन्वयक राजेश पांडे यांनी विजयी उमेदवारांचे अभिनंदन केले आहे.

पांडे म्हणाले, विद्यापीठाच्या इतिहासात पहिल्यांदाच संस्थाचालक गटात बिनविरोध निवडणूक झाली आहे. ही बिनविरोध होण्यासाठी विद्यापीठ विकास मंचच्या प्रयत्नांना यश आले आहे. डॉ गजानन एकबोटे,डॉ. राजेंद्र विखे पाटील, डॉ अपूर्व हिरे, प्रा. एन. डी. पाटील, डॉ. नितीन ठाकरे, डॉ संदीप कदम, अभाविप चेप्रदेश मंत्री अनिल ठोंबरे यांनी त्यासाठी विशेष प्रयत्न केले.

पुणे,दि.१३: प्रमुख जिल्हा व सत्र न्यायाधीश तथा पुणे जिल्हा विधी सेवा प्राधिकरणाचे अध्यक्ष श्याम चांडक यांच्या अध्यक्षतेखाली आयोजित राष्ट्रीय लोक अदालतीमध्ये ६६ हजार ४३९ प्रलंबित दावे निकाली काढून पुणे जिल्ह्याने राज्यात पुन्हा एकदा प्रथम स्थान पटकावले.

लोक अदालतीमध्ये बँकेचे कर्जवसूली १ हजार ४०६, तडजोड पात्र फौजदारी ६ हजार १८६, वीज देयक ३६८, कामगार विवाद खटले १३, भुसंपादन ८८, मोटार अपघात दावे न्यायाधिकरण १३६, वैवाहिक विवाद १४४, निगोशिएबल इन्स्ट्रूमेंट ॲक्ट १ हजार ५११, इतर दिवाणी ३८४, महसूल ५ हजार १४, पाणी कर ४९ हजार २६१, ग्राहक विवाद २८ आणि इतर १ हजार ९०० प्रकरणे अशी एकूण ६६ हजार ४३९ निकाली काढण्यात आली आहेत.

तडजोडीसाठी ठेवण्यात आलेल्या ६६ हजार ७४१ प्रलंबित प्रकरणांमधून ९ हजार ६७३ प्रकरणे निकाली काढण्यात आली आणि यात ७१ कोटी २९ लाख तडजोड शुल्क वसूल करण्यात आले. वादपूर्व १ लाख २८ हजार ५४६ दाव्यापैकी ५६ हजार ७६६ दावे निकाली काढण्यात येऊन ६८ कोटी ७३ लक्ष रुपये तडजोड शुल्क वसूल करण्यात आले. एकूण ६६ हजार ४३९ दावे निकाली काढण्यात येऊन १४० कोटी २ लक्ष रुपये तडजोड शुल्क म्हणून वसूल करण्यात आले.

घटस्फोटासाठी अर्ज केलेल्या ५ जोडप्यांनी लोक अदालतीत सामंजस्याने परत संसार करण्याचा निर्णय घेतला.

विशेष मोहिमेअंतर्गत ७ नोव्हेंबर ते ११ नोव्हेंबर दरम्यान १३ हजार ७६० दावे सुनावणीसाठी घेण्यात येऊन त्यापैकी १२ हजार २२ निकाली काढण्यात आले आहेत. अशा प्रकारे पुणे जिल्ह्याने राष्ट्रीय लोक अदालतीच्या आयोजनादरम्यान दावे निकाली काढण्यात अग्रेसर राहण्याची परंपरा कायम राखली आहे. या यशस्वी आयोजनासाठी जिल्ह्याच्या सर्व न्यायालयातील अधिकारी-कर्मचारी, विविध विभागांचे अधिकारी आणि नागरिकांचे चांगले सहकार्य मिळाले असे विधी सेवा प्राधिकरणाचे सचिव तथा दिवाणी न्यायाधीश वरिष्ठ स्तर मंगल कश्यप यांनी सांगितले.
000

• जीपीए मेगाजिपीकॉन परिषदेचे उद्घाटन

पुणे, प्रतिनिधी, (१३ नोव्हेंबर) :
समाजाचे आरोग्य चांगले ठेवण्यासाठी फॅमिली डॉक्टरची भूमिका अत्यंत महत्त्वपूर्ण आहे. आपल्याकडे उपचारासाठी येणाऱ्या रुग्णाच्या आजाराचे योग्य निदान, त्यावर पूरक उपचार तसेच त्यांना आवश्यक असलेले मार्गदर्शन करण्याची मोठी जबाबदारी त्यांच्यावर असते. करोनाच्या काळात रुग्णसेवेमध्ये फॅमिली डॉक्टरने दिलेले योगदान उल्लेखनीय आहे. फॅमिली डॉक्टरची संकल्पना येणाऱ्या काळात अधिकाधिक वृद्धिंगत व्हावी, अशी अपेक्षा प्रसिद्ध कर्करोग तज्ञ पद्मविभूषण डॉ. सुरेश अडवाणी यांनी रविवारी व्यक्त केली.
जनरल प्रॅक्टिशनर्स असोसिएशनच्या वतीने (जीपीए) ‘मेगाजिपीकॉन’ षरिषदेचे आयोजन करण्यात आले होते. या परिषदेचे उद्घाटन तसेच संघटनेच्या वतीने दिल्या जाणाऱ्या ‘ जीपी लाईफ टाईम अचीव्हमेंट अवॉर्ड ‘ (जीवनगौरव पुरस्कार) चे वितरण डॉ. अडवाणी यांच्या हस्ते झाले. त्यावेळी ते बोलत होते. रुबी हॉल क्लिनिक चे प्रमुख आणि प्रसिद्ध ह्रदय रोग तज्ञ डॉ. परवेझ ग्रॉंड, जीपीएच्या पुणे शाखेचे अध्यक्ष डॉ. हरीभाऊ सोनावणे, उपाध्यक्ष डॉ. श्रीराम जोशी, खजिनदार डॉ. शुभदा जोशी, सचिव डॉ. सुनील भुजबळ, डॉ. अप्पासाहेब काकडे, सहसचिव डॉ. संदीप निकम, डॉ. भाग्यश्री मूनोत-मेहता, डॉ. शिवाजी कोल्हे आदी यावेळी उपस्थित होते.
या कार्यक्रमात जीपीएच्या माजी अध्यक्ष डॉ. सौ. संगीता खेनट यांना जीवन गौरव पुरस्काराने सन्मानित करण्यात आले. बाणेर येथील बंटारा भवन येथे हा कार्यक्रम पार पडला.
पद्मविभूषण डॉ. अडवाणी म्हणाले की, परदेशात प्रत्येक विषयात तज्ज्ञ असलेल्या डॉक्टरची संख्या वाढत आहे. परिणामी तेथील फॅमिली डॉक्टरची संख्या घटत चालली आहे, त्यांचे गंभीर परिणाम दिसण्यास सुरुवात झाली आहे. आपल्याकडे अशी परिस्थिती निर्माण होऊ नये, यासाठी एकत्रित प्रयत्न करण्याची गरज आहे. फॅमिली डॉक्टर हा समाजाचा मुख्य पाया आहे, त्याच्याकडे उपचारासाठी आलेल्या रुग्णाला होत असलेल्या त्रासाचे योग्य ते निदान करून आवश्यकता वाटल्यास कोणत्या तज्ज्ञाकडे उपचार घ्यावेत, याचे योग्य ते मार्गदर्शन हे डॉक्टर करू शकतात. गेल्या काही वर्षात भारतात महिलांमध्ये ‘ ब्रेस्ट कॅन्सर’ चे प्रमाण वाढत असून यासाठी महिलांमध्ये जनजागृती होणे गरजेचे आहे. महिलांनी मेमोग्राफी सारख्या चाचण्या मोठ्या प्रमाणात करण्याची गरज असल्याचेही डॉ. अडवाणी यांनी सांगितले.
हॉस्पिटल उभारणे सोपे असते, मात्र ते चालविणे अवघड असून डॉक्टरांना अनेक आव्हानांना सामोरे जावे लागत असल्याचे डॉ. परवेझ ग्रॉंड यांनी आपल्या मनोगतामध्ये सांगितले. ‘मेगाजिपीकॉन’ ही दोन दिवसीय परिषद आयोजित करण्यामागची भूमिका जीपीएचे अध्यक्ष डॉ. हरिभाऊ सोनावणे यांनी सांगितली. या कार्यक्रमात संघटनेच्या वतीने तयार करण्यात आलेल्या ‘ समग्र आरोग्यम् ‘ या अंकाचे प्रकाशन मान्यवरांच्या हस्ते झाले.

विविध विषयांवर तज्ज्ञांनी केले मार्गदर्शन

दोन दिवसांच्या या परिषदेमध्ये ‘यूरोलॉजीमध्ये रोबोटिक सर्जरी’, ‘मधुमेहाचे व्यवस्थापन’, ‘आहार आणि रक्तविज्ञान’, ‘मधुमेह व्यवस्थापन’, गुडघे बदलण्यासाठी रोबोटिक तंत्रज्ञानाचा वापर का करावा’, ‘मणक्याच्या रुग्णांमध्ये अलीकडील प्रगती, दैनंदिन ओपीडीमध्ये व्यवस्थापन’, ‘ऑन्कोलॉजी’मध्ये प्रगती’, ‘ टाईप-२ डायबिटीज रिव्हर्स करणे शक्य आहे का?’ अशा विविध विषयांवर चर्चासत्रे झाली.

पुणे: स्वप्नपुर्ती महिला ग्रामसंघाने राबविलेला एल.ई.डी. बल्ब निर्मिती प्रकल्प पथदर्शी असून येत्याकाळात राज्यात एक मोठा उद्योग समूह म्हणून नावारूपास येईल, असा विश्वास अतिरिक्त मुख्य सचिव राजेश कुमार यांनी व्यक्त केला. राज्यातील प्रत्येक गावातील महिलांपर्यंत अशा स्वरूपाचे नावीन्यपूर्ण उपक्रम पोहचवून त्यांच्या कुटुंबाला आर्थिकदृष्ट्या सक्षम करण्यासाठी प्रयत्न करावेत, असेही आवाहन त्यांनी अधिकाऱ्यांना केले.

भोर तालुक्यात खोपी गावातील स्वप्नपूर्ती महिला ग्रामसंघाच्यावतीने राबविण्यात उपक्रमांना दिलेल्या भेटीप्रसंगी ते बोलत होते. यावेळी जिल्हा परिषदेचे मुख्य कार्यकारी अधिकारी आयुष प्रसाद, अतिरिक्त मुख्य कार्यकारी अधिकारी चंद्रकांत वाघमारे, जिल्हा ग्रामीण विकास यंत्रणेच्या प्रकल्प संचालक शालिनी कडू, उपमुख्य कार्यकारी अधिकारी कमलाकर रणदिवे, सचिन घाडगे, मिलिंद टोणपे, भोर पंचायत समितीचे गट विकास अधिकारी विजय धनवटे, पेसाचे सहसंचालक विक्रांत बगाडे, संबंधित विभागाचे अधिकारी व कर्मचारी तसेच गावातील ग्रामस्थ आणि महिला बचत गटातील सदस्या उपस्थित होत्या.

ग्रामसंघाने सुरू केलेल्या उपक्रमाचे कौतुक करून श्री. कुमार म्हणाले, ग्रामसंघातील गटाच्यावतीने राबविण्यात आलेला एल.ई.डी. बल्ब बनविणे व दुरूस्त करण्याबाबतचा उपक्रम पथदर्शी आहे. या उपक्रमाच्या धर्तीवर राज्यातील इतर जिल्ह्यातील महिला समूह गटांना उपक्रम राबविण्यासाठी प्रोत्साहित करणार असल्याचे सांगत नवनवीन उपक्रम राबविण्याबाबत सूचना केल्यास त्याबाबत सकारात्मक विचार करण्यात येईल. उमेद व एमएसआरएम अभियानाच्यामाध्यमातून अधिकाधिक महिलांपर्यंत महिला समक्षीकरण धोरणाची अंमलबजावणी करण्यात येईल, असे श्री. कुमार म्हणाले.

महिला बचत गट व ग्रामसंघाना सोई-सुविधा पुरविणार
श्री.प्रसाद म्हणाले, शासनाच्या उमेद व महाराष्ट्र राज्य ग्रामीण जीवनोन्नती अभियानामधून जास्तीत जास्त महिला बचत गटांना लाभ मिळण्यासोबतच जिल्हा परिषद निधीअंतर्गत ग्रामसंघाना त्यांचे व्यवसाय वृद्धींगत करण्यासाठी आवश्यक असणाऱ्या सर्व सोई-सूविधा व कायदेशीर मार्गदर्शन पुरविण्यात येणार आहे.

महिला बचत गटांना जि.प.निधीअंतर्गत निवडक गटातील प्रति बचत गटास प्रायोगिक तत्वावर २ लाख रूपये अनुदान व राष्ट्रीयकृत बँकेमार्फत पुरवठा करणेत आलेल्या अर्थसहाय्यातून पुण्यश्री सुपर शॉपींची स्थापना येणार आहे. पहिल्या टप्प्यात पुणे जिल्ह्यात भोर व मावळ तालुक्यात प्रत्येकी १ किरकोळ विक्रीचे दुकान करण्यात आले आहे.

महाराष्ट्र राज्य ग्रामीण जीवनोन्नती व उमेद अभियानाअंतर्गत जिल्ह्यात मागील २ वर्षात बचत गटांची संख्या ४ हजारावरुन २४ हजारवर पोहोचली आहे. २०१९ – २० या वर्षात ५९ कोटी, २०२०-२१ वर्षात ९८ कोटी व २०२१-२२ वर्षात २०२ कोटी कर्ज वाटप झाले आहे. चालू आर्थिक वर्षाअखेर जिल्ह्यातील महिला बचत गटांना एकूण ४०० कोटींची कर्ज वाटप राष्ट्रीयकृत बँकेमार्फत करण्यात येणार आहे, असे श्री.प्रसाद म्हणाले.

स्वप्नपूर्ती महिला ग्रामसंघ
महाराष्ट्र राज्य ग्रामीण जीवनोन्नती अभियान (एमएसआरएलएम) पुणे अंतर्गत पुणे जिल्ह्यातील भोर तालुक्यात खोपी गावामध्ये एकूण २३ महिला बचतगटांनी एकत्रित येऊन स्वप्नपूर्ती महिला ग्रामसंघाची स्थापना केली. या अंतर्गत मैत्री, जिजामाता, जीवन आनंद, क्रांती ज्योती, उत्कर्ष स्फुर्ती व प्रेरणा या एकूण ७ समूहातील एकूण ११ महिलांनी शासन, स्वयंसहायता गटातील महिलांकडील निधी तसेच राष्ट्रीयकृत बँकेमार्फत पुरवठा करण्यात आलेले अर्थसहाय्य ड्रीम एल.ई.डी. लाईट प्रकल्पाची सुरुवात केली.

कुक्कुट पालन व्यवसाय अंतर्गत सुरवातीला (१५ हजार पक्षांचे ) वातानूकुलीत व स्वयंचलित १० गुंठ्यात पोल्ट्रीशेड हे मैत्री, उत्कर्ष जिजामाता, जीवन आनंद व प्रेरणा या ५ समुहातील २० महिलांनी एकत्रित येऊन तब्बल ७० लाखाच्या प्रकल्पाची उभारणी केली आहे. त्याच बरोबर स्वयंसहायता महिलां गटांच्या माध्यमातून मनरेगा व कृषी विभागामार्फत मोठ्या प्रमाणात आंबा व तैवाण पेरू या फळपिकांची लागवड केली आहे. ग्रामसंघाने गावामध्ये घणकचरा व्यवस्थापन, कंपोस्ट खत, गांडूळ खत प्रकल्पाची उभारणी केली आहे.

ग्रामसेवक प्रशिक्षण संस्थेला भेट

राजेश कुमार यांनी  मांजरी फार्म येथील ग्रामसेवक प्रशिक्षण संस्थेलाही भेट दिली. 

यावेळी जिल्हा परिषदेचे मुख्य कार्यकारी अधिकारी आयुष प्रसाद, यशदाचे उपमहासंचालक डॉ. मल्लिनाथ कलशेट्टी, संस्थेचे प्राचार्य राहूल काळभोर आदी उपस्थित होते.

श्री. कुमार म्हणाले, ग्रामसेवक हा गावपातळीवर काम करणारा महत्वाचा घटक आहे. अहमदनगर जिल्ह्यातील राळेगणसिद्धी आणि हिवरे बाजार यासारख्या आदर्श गावे निर्माण झाली पाहिजे. ग्रावपातळीवर काम करताना विविधप्रकारच्या अडचणी येतात परंतु अशा परिस्थितीत सक्षमपणे काम करणारा ग्रामसेवक तयार झाला पाहिजे, यादृष्टीने शासन काम करीत आहे. गावांचा पायाभूत विकास करुन आदर्श गावे निर्माण करण्यासाठी ग्रामसेवकांनी काम करावे. प्रशिक्षण संस्थेने अशा प्रकारचे प्रशिक्षण देण्याबाबत नियोजन करावे. पंचायत राज निर्मिती करणे तसेच शासनाच्या इतर घटकावर काम करण्यासाठी राज्य नेहमीच अग्रेसर आहे, असेही ते म्हणाले.

यावेळी प्रशिक्षण संस्थेचे प्राचार्य श्री. काळभोर यांनी संस्थेचे कार्याविषयी माहिती दिली. सुरुवातीला संस्था व प्रशिक्षाणार्थ्यांनी त्यांचे स्वागत केले.