पुणे-भाजपच्या आमदार आणि पुणे शहराच्या माजी महापौर मुक्ता टिळक यांचं दीर्घ आजारानं गुरुवारी निधन झालं. गेल्याकाही महिन्यांपासून त्या कर्करोगाशी झुंज देत होत्या, अखेर आज त्यांची प्राणज्योत मालवली. पुण्यातील गॅलेक्सी केअर रुग्णालयात त्यांच्यावर उपचार सुरु होते, याच ठिकाणी त्यांनी दुपारी ३ वाजून ३० मिनिटांनी अखेरचा श्वास घेतला.मुक्ता टिळक या लोकमान्य टिळक यांचे पणतू शैलेश टिळक यांच्या पत्नी आहेत.

मुक्ता टिळक या आमदार होण्यापूर्वी पुण्याच्या सन 2017 ते 19 या दरम्यान महापौर होत्या. कसबा विधानसभा मतदारसंघाचे अनेक वर्ष आमदार राहिलेले पुण्याचे विद्यमान खासदार गिरीश बापट यांच्या रिक्त जागेवर मुक्ता टिळक यांची वर्णी लागली होती. त्यानंतर बापट यांच्यासह भाजप पदाधिकाऱ्यांनी टिळक यांना कसबा विधानसभा मतदारसंघातून निवडून आणण्यासाठी मोठ्या प्रमाणात प्रयत्न केले होते. मागील दीड ते दोन वर्षांपासून टिळक या कॅन्सरच्या आजाराने ग्रस्त होत्या. याबाबत त्यांच्यावर रुग्णालयात उपचार सुरू होते. पुण्यातील गॅलेक्सी हॉस्पिटलमध्ये त्यांच्यावर उपचार सुरू असतानाच गुरुवारी दुपारी त्यांची प्राणज्योत मालवली आहे. उद्या सकाळी त्यांचे पार्थिव अंत्यदर्शनसाठी 9 ते 11 केसरीवाडा येथील राहत्या घरी ठेवण्यात येईल.अंत्यविधी वैकुंठ स्मशामभुमी येथे 11 वाजता होणार आहे.

पुण्यातील भावे स्कूलमधून शालेय शिक्षण घेतलेल्या मुक्ता टिळकांनी फर्ग्युसन महाविद्यालयातून पुढील शिक्षण घेतले होते. पुणे विद्यापीठातून त्यांनी जर्मन भाषाही शिकलीय. मार्केटिंग विषयात त्यांनी एमबीएची पदवी मिळवलीय. तसेच मुक्ता टिळकांनी पत्रकारितेचं शिक्षणही घेतले आहे. सुरुवातीच्या काळात त्यांनी हिंदुस्थान पेट्रोलियम, आरबीआय, किर्लोस्कर ऑईल इंजिन्स, थरमॅक्स, प्रवीण मसाले आदी कंपन्यांमध्ये काम केले. मुक्ता टिळक यांच्या माहेरी राजकीय पार्श्वभूमी नव्हती. मात्र, त्यांच्यावर संघाचे संस्कार होते. टिळक घराण्यात आल्यावरच आपसूकच त्यांना राजकीय वारसा मिळाला. त्यांच्या राजकारणाची सुरुवात ही समाजकारणातून झाली.

राज्यसभेसाठी रुग्णवाहिकेतून मतदानासाठी पोहचल्या

राज्यसभा निवडणुकीत एकही आमदार रणांगणाबाहेर राहू नये यासाठी भाजपकडून खबरदारी घेण्यात आली होती. मुक्ता टिळक अॅम्ब्युलन्समधून विधानभवनात पोहोचल्या होत्या. मुक्ता टिळक कर्करोगाशी झुंज देत होत्या. तब्येत खालावलेली असतानाही मुक्ता टिळक राज्यसभेच्या मतदानासाठी आल्या होत्या. मतदानाच्या दिवशी त्यांना अॅम्ब्युलन्समधून विधानभवनात आणले होते.

पुणे, दि. २१ : डॉ.बाबासाहेब आंबेडकर संशोधन व प्रशिक्षण संस्था (बार्टी) व महाराष्ट्र उद्योजकता विकास केंद्र पुणे यांच्यावतीने अनुसूचित जाती प्रवर्गातील उमेदवारांसाठी दोन महिने कालावधीचे ‘सायबर सुरक्षा आणि डेटाबेस रिकव्हरी’ या विषयावरील मोफत प्रशिक्षणाचे आयोजन २६ डिसेंबर पासून करण्यात येणार आहे.

हे प्रशिक्षण अनिवासी हायटेक तांत्रिक उद्योजकता विकास कार्यक्रमाअंतर्गत होणार असून या प्रशिक्षणासाठी उमेदवार हा संगणक विज्ञान, इलेक्ट्रॉनिक्स, टेलिकमुनिकेशन पदवीधारक असावा अथवा उमेदवाराने समतुल्य संगणकाचे शिक्षण पूर्ण केलेले असावे. प्रशिक्षणात संबंधित विषयाची तांत्रिक माहिती, उद्योजकता विकासाचा अभ्यासक्रम, उद्योग सुरु करण्याबाबतची माहिती, कर्ज प्रकरण, शासकीय अनुदान, प्रकल्प अहवाल, उद्योजकीय प्रेरणा प्रशिक्षण, बाजारपेठ इत्यादी माहिती दिली जाणार आहे.

प्रशिक्षणासाठी इच्छुक व पात्र लाभार्थ्यांनी २४ डिसेंबर पर्यंत ९८२२०६८१६५ किंवा ९४०३०७८७६५ या क्रमांकावर संपर्क साधावा, असे आवाहन महाराष्ट्र उद्योजकता विकास केंद्राचे विभागीय अधिकारी मदन कुमार शेळके यांनी केले आहे.

• विभागीय आयुक्त सौरभ राव यांचे रिक्षा संघटनांसोबत बैठक

पुणे-टू व्हीलर रॅपिडो बाबत गुंतागुंतीचा प्रश्न निर्माण झाला असून या प्रश्नावर ठोस कारवाई होताना दिसत नाही. परिवहन विभागाने महाराष्ट्र शासनाला पत्र दिले आहे. ॲप तातडीने काढण्यासंदर्भात मागणी केली आहे. पुणे आरटीओने गुगल वितरण पत्र दिले आहेत. प्रशासकीय पातळीवरती आम्ही पूर्ण प्रयत्न करत असून मी लवकरच पुणे पोलीस आयुक्त यांच्याशी चर्चा करून या संदर्भामध्ये तातडीने निर्णय घेण्याचे आदेश देणार असल्याचे पुणे विभागीय आयुक्त म्हणाले. याबरोबरच राज्य सरकारच्या पातळीवरील प्रश्न सोडवले जातील. लवकरच संयुक्तपणे परिवहन आयुक्तांसोबत बैठक घेण्यात येईल. स्थानिक आरटीओच्या प्रश्नांसंदर्भात मीटर कॅरीबॅशनची मुदत तातडीने वाढविण्याचे आदेश मी आता लगेच देतो, असे आश्वासन विभागीय आयुक्त सौरभ राव यांनी दिले.

रिक्षा चालकांच्या विविध प्रश्नांसाठी महाराष्ट्र रिक्षा पंचायत, राष्ट्रीय ऑटो टॅक्सी बस ट्रान्सपोर्ट फेडरेशनचे राष्ट्रीय अध्यक्ष बाबा कांबळे यांच्या नेतृत्वाखाली पुणे विधान भवन येथे आंदोलन करण्यात आले होते. मात्र वरील मागण्या संदर्भात ठोस कृती न झाल्यामुळे बाबा कांबळे यांच्या नेतृत्वाखाली शिष्टमंडळ विभागीय आयुक्तांना भेटून चर्चा केली.

या वेळी पुणे रिक्षा फेडरेशनचे अध्यक्ष आनंद तांबे, जय महाराष्ट्र रिक्षा संघटनेचे गुलाब सय्यद, ड्रायव्हर चालक-मालक संघटनेचे शिवा देशमुख, आदी पदाधिकारी यावेळी उपस्थित होते.

या वेळी बाबा कांबळे म्हणाले की, आम्ही सातत्याने आंदोलन, मोर्चा करत आहोत. 19 डिसेंबर रोजी रिक्षा चालकांनी आंदोलन केल्याने गुन्हे दाखल झाले होते. तरीही रिक्षा चालक मोठ्या संख्येने आंदोलनामध्ये सहभागी झाले होते. अनेक लोकांनी त्यांना सहभागी होऊ नका, असे सांगितले. तर काही लोकांनी सहभागी झाला तर पोलीस अटक करतील असेही सांगितले. तरी देखील रिक्षा चालक आपल्या आर्थिक परिस्थितीला कंटाळून आंदोलनामध्ये सहभागी झाले आहेत. त्यांना त्यांच्या कुटुंबाची परिवाराची काळजी आहे. अशा परिस्थितीमध्ये प्रशासनात देखील कायदेशीर बाजू लावून धरली पाहिजे. बेकायदेशीर टॅक्सी तातडीने बंद करून मोबाईल ऍप्लिकेशन मधून हटवल्या पाहिजे ही मागणी अत्यंत रास्त आहे. कल्याणकारी मंडळाचा मुद्दा अत्यंत रस्ता आहे. या सर्व मागण्या का मान्य होत नाही, हा प्रश्न आता रिक्षा चालकांना मोठ्या प्रमाणे भेडसावत असून या प्रश्नांवरती रिक्षा चालकांमध्ये असंतोष निर्माण झालेला आहे, असे बाबा कांबळे म्हणाले.
19 डिसेंबर रोजी आम्ही इशारा आंदोलन केला आहे. सरकारने आम्हाला हलक्यात घेऊ नये. अन्यथा दिल्ली, गुजरात, उत्तर प्रदेश, महाराष्ट्र, पंजाब, बिहारसह देशभरामध्ये एकाच वेळी चक्काजाम आंदोलन करू, असा इशारा देखील यावेळी बाबा कांबळे यांनी दिला.

पुणे पिंपरी चिंचवड शहरात गेल्या अनेक दिवसापासून आंदोलन सुरू आहे परंतु स्थानिक पातळीवरती हा प्रश्न सुटत नाहीये यामुळे केंद्र सरकारने कायदे केले व राज्य सरकारने याबद्दल योग्य भूमिका घेतली नाही यामुळे केंद्र आणि राज्य अशा दोन्ही पातळीवरती आपल्याला लढावे लागणार आहे हे रिक्षा चालकांनी समजून घ्यावे आता हा लढा आपल्याला देशव्यापी करावा लागणार आहे पुढचा आंदोलन दिल्ली आणि मुंबई येथेच केले पाहिजे असे बाबा कांबळे यावेळी म्हणाले.

या वेळी संघटनेने पुढील मागण्या मांडल्या –

१) रॅपिड मोबाईल आपलिकेशन मधून टू व्हीलर ची सुविधा हटवा.

२) रॅपिडो ओला उबेर कंपनीवर जनतेचे फसवणूक केली म्हणून फसवणुकीचा गुन्हा दाखल करा.

३) मान्यता नसताना टू व्हीलर टॅक्सी व्यवसाय करत असेल तर ही सेवा बेकायदेशीर म्हणून घोषित करा.

४) रिक्षा चालक मालकांसाठी प्रलंबित असलेले कल्याणकारी महामंडळ तातडीने घोषित करा.

५) मुक्त रिक्षा परवाना बंद करा ई रिक्षाला परवाना सक्तीचा करा.

६) पिंपरी चिंचवड पुणे येथे मीटर कॅरीबॅॅशनची मुदत 30 जानेवारीपर्यंत वाढवा.

पुणे-

डीईएस मा. स. गोळवलकर गुरुजी विद्यालयात वार्षिक स्नेहसंमेलनानिमित्त भगवान श्रीकृष्णाच्या जीवनातील महत्त्वाच्या प्रसंगांचे ‘कृष्णायन’ या नृत्य, नाट्यप्रवेशाच्या माध्यमातून सादरीकरण करण्यात आले. गीताधर्म मंडळाचे अध्यक्ष डॉ. मुकुंद दातार, कीर्तनकार चारूदत्त आफळे, सारिका वाघ यांची प्रमुख उपस्थिती होती. डीईएसचे अध्यक्ष डॉ. शरद कुंटे अध्यक्षस्थानी होते. 
दातार म्हणाले, ‘केवळ वैयक्तिक विचार न करता समाज म्हणून विचार करावा हे श्रीकृष्णाचे तत्त्वज्ञान आचरणात आणण्याची आवश्यकता आहे. राष्ट्र म्हणून पिढी घडविण्यासाठी हे तत्त्वज्ञान उपयुक्त ठरेल.’
शाला समितीचे अध्यक्ष मिलींद कांबळे, मुख्याध्यापिका मंजुषा खेडकर यांच्या मार्गदर्शनाखाली प्रज्ञा पोतदार, वरदा पटवर्धन, प्रसाद लागू, अपर्णा माने, पल्लवी पवार, स्मिता नाईक, विकास दिग्रसकर यांनी संयोजन केले.

रानडे बालक मंदिर शाळेत स्नेहसंमेलन
डेक्कन एज्युकेशन सोसायटीच्या न्यायमूर्ती रानडे बालक मंदिर शाळेत ‘स्वातंत्र्याचा अमृतमहोत्सव’ या संकल्पनेवर वार्षिक स्नेहसंमेलनाचे आयोजन करण्यात आले होते. माँ तुझे सलाम, हर घर तिरंग, मम देशो भारत, ए वतन मेरे वतन आदी देशभक्तिपर गाण्यांवर नृत्य सादर करण्यात आली. विविध राज्यांच्या पारंपरिक वेशभूषा करून विविधतेतून एकात्मतेचे दर्शन घडविले.
संस्थेचे अध्यक्ष डॉ. शरद कुंटे अध्यक्षस्थानी होते. डॉ. अनंत निमकर, चारूदत्त निमकर, शाला समिती अध्यक्षा राजश्री ठाकर मुख्याध्यापिका अमिता दाते यांच्या मार्गदर्शनाखाली हर्षाली अवसरे, श्रद्धा खोले यांनी संयोजन केले.

• उमरजी मदर अँड चाईल्ड केअर हॉस्पिटलचा पुढाकार

पुणे, 20 डिसेंबर-
वंध्यत्वावरील उपचारानंतर प्रसूती, प्रसूती नैसर्गिक की सिझेरियन, बाळाला दूध पाजताना येणाऱ्या अडचणी आणि डिलिव्हरीनंतर येणारे नैराश्य यासारख्या विविध प्रश्नांबाबत मातांना मार्गदर्शन करण्यासाठी उमरजी मदर अँड चाईल्ड केअर हॉस्पिटलच्या पुढाकाराने मदर सपोर्ट ग्रुप स्थापन करण्यात आला आहे.
येत्या शनिवारी (दि.२४ डिसेंबर) पुण्यातील बोट क्लब येथे सकाळी दहा ते दुपारी एक वाजेदरम्यान या सपोर्ट ग्रुपची कार्यशाळा आयोजित केली आहे. यामध्ये विविध वर्गातील मातांना प्रसूती पूर्व आणि प्रसूतीनंतर नेमकी कोणती काळजी घ्यावी यासाठी मातांचा सपोर्ट ग्रुप तसेच स्त्री रोग तज्ज्ञ मार्गदर्शन करणार आहेत.
उमरजी मदर अँड चाईल्ड केअर हॉस्पिटलचे वैद्यकीय संचालक डॉ. चिन्मय उमरजी यांनी याबाबत अधिक माहिती देताना सांगितले की, ‘वंध्यत्वावरील उपचारानंतर त्यांची प्रसूती कशा पद्धतीने असते. त्यांची काही आव्हाने आहेत का? त्यांना कोणत्या गोष्टीची काळजी घ्यावी लागते यासंदर्भात २३ डिसेंबरला स्त्री रोग तज्ज्ञांशी चर्चा केली जाणार आहे. त्याशिवाय २४ डिसेंबरला (शनिवारी) विविध समस्यांना सामोरे गेलेल्या मातांचा सपोर्ट ग्रुप आहेत. त्या चार प्रकारच्या मदर सपोर्ट ग्रुपची कार्यशाळा आयोजित केली आहे. त्यामध्ये सुमारे ५० महिला सहभागी होणार आहेत. नवी दिल्लीचे ज्येष्ठ रेडिओलॉजिस्ट डॉ. अशोक खुराना आणि ज्येष्ठ स्त्री रोग तज्ज्ञ आणि हॉस्पिटलच्या संचालिका डॉ. मुक्ता उमरजी यावेळी मातांना मार्गदर्शन करणार आहेत.’
डॉ. उमरजी म्हणाले, ‘सध्या चार प्रकारच्या मदर्सचा सपोर्ट ग्रुप आहे. त्यामध्ये आई आणि बाळामध्ये काही दोष असल्यास त्यांच्या आजाराचे निदान करण्याचे मोठे आव्हान होते. आता उपचारानंतर आई आणि बाळ सुखरुप आहेत. त्या दोघांचे ही सुरळीत सुरु आहे अशा मातांचा पहिला ग्रुप. दुसऱ्या गटात डिलिव्हरीनंतर बाळासह आईची कोणती काळजी घेतली पाहिजे. कोणत्या गोष्टी करायच्या तसेच डिलिव्हरीनंतर नैराश्य येते किंवा बाळाला दूध पाजताना काही अडचणी येतात अशा महिलांचा समावेश आहे. या समस्यांना तोंड दिलेल्या महिला दुसऱ्या मातांना मार्गदर्शन करणार आहेत. ‘बस्टिंग द मिथ्य्स’ म्हणजे प्रसूतीबाबत काही गैरसमज आहेत. त्यात नाळ असेल किंवा बाळाने पोटात शी केली तर सिझर करायला हवे, छोटे बाळ आहे तर सिझर करावे लागेल किंवा बाळाच्या हृदयात जन्मजात दोष आहे तर ते टर्मिनेट करायला हवे अशा प्रकारच्या छोट्या छोट्या गोष्टींबाबत गैरसमज आहेत. त्यांचा एक सपोर्ट ग्रुप आहे. त्याशिवाय नैसर्गिक जन्म सहज शक्य असतो. अशा वर्गातील महिलांना गर्भधारणेसाठी फारसे काही उपचार करावे लागत नाही अशा चार प्रकारच्या मातांचा सपोर्ट ग्रुप आहे. त्याशिवाय या कार्यशाळेत जुळ्या बाळांच्या जन्माबाबत काही गुंतागुंत निर्माण होते. त्या गुंतागुंतीनंतर काय काळजी घ्यावी याबाबतही या कार्यशाळेत मार्गदर्शन केले जाणार आहे.
सर्व वर्गातील महिला आपला आलेला अनुभव शेअर करणार आहेत. तसेच सध्या समस्यांना तोंड देणाऱ्या महिला रुग्णांना मार्गदर्शन करणार आहेत, असेही डॉ. उमरजी यांनी सांगितले.

पुणे, दि. २१: राष्ट्रीय ग्राहक दिनानिमित्त २३ डिसेंबर रोजी विविध शासकीय कार्यालयाद्वारे राबविण्यात येणाऱ्या योजना व तक्रार निवारण प्रणालीबाबत माहिती देणारे प्रदर्शन जिल्हाधिकारी कार्यालयाच्या आवारात आयोजित करण्यात येणार आहे.

या प्रदर्शनात वस्तू व सेवा खरेदी करताना दर्जा तसेच वजन मापामध्ये होणाऱ्या फसवणुकीपासून सावधानता बाळगणे, ग्राहकांच्या हक्कांचे संरक्षण व संवर्धन, ग्राहकांच्या जबाबदाऱ्या, कर्तव्य आदीबाबत जागरूकता येण्याच्यादृष्टीने संदेश देणारे विविध शासकीय कार्यालयाचे स्टॉल्स उभारण्यात येणार आहेत. नागरिकांनी प्रदर्शनाला भेट द्यावी, असे आवाहन जिल्हा पुरवठा अधिकारी सुरेखा माने यांनी केले आहे.