पुणे : झारखंड येथील गिरडोह जिल्ह्यातील श्री सम्मेद शिखरजी हे जैन धर्मियांच्या पवित्र तीर्थस्थानास दिलेला पर्यटन स्थळाचा दर्जा रद्द करून ते ठिकाण तीर्थस्थळ म्हणून घोषित करावे, या मागणीसाठी सकल जैन संघ पुणे च्या वतीने सोमवारी (९ जानेवारी) सकाळी ९ वाजता भव्य मूक मोर्चा काढण्यात येणार आहे. हा मोर्चा पुणे शहरातील शंकरशेठ रस्त्यावरील ओसवाल बंधू समाज कार्यालयापासून ते जिल्हाधिकारी कार्यालयापर्यंत काढला जाणार आहे. यामध्ये पुणे शहर, पिंपरी-चिंचवडसह जिल्ह्यातील जैन समाज हजारोंच्या संख्येने सहभागी होणार आहे.

पत्रकार भवन येथे झालेल्या पत्रकार परिषदेत सकल जैन संघ, पुणेचे अध्यक्ष अचल जैन, उपाध्यक्ष विजय भंडारी, उपाध्यक्ष मिलिंद फडे, सचिव अनिल गेलडा, प्रसिद्धी प्रमुख सतिश शहा व योगेश पांडे यांनी ही माहिती दिली.

भारतीय जनता पक्ष, काँग्रेस, राष्ट्रवादी काँग्रेस यासह अनेक राजकीय पक्ष आणि हिंदू, मुस्लिम, बौद्ध धर्मियांनी देखील श्री सम्मेद शिखरजी संबंधीच्या जैन धर्मियांच्या मागणीला पूर्ण समर्थन दिले आहे. त्यामुळे सोमवारी निघणाऱ्या भव्य मूक मोर्चात हजारोंच्या संख्येने जैन समुदाय सहभागी होईल. तसेच, या मूक मोर्चामध्ये जास्तीत जास्त जैन समाजाने सहभागी व्हावे, असे आवाहनही यावेळी करण्यात आले.

महाराष्ट्रासह देशातील मुंबई, दिल्ली, अहमदाबाद, इंदोर, सुरत, बंगळुरु, कोल्हापूर याठिकाणी हजारोंच्या संख्येने जैन समाजाचा मोर्चा निघाला आहे. या विषयाकडे केंद्र व झारखंड सरकारचे लक्ष वेधण्यासाठी इतर शहरांमध्येही असेच मोर्चे निघणार आहेत.

श्री सम्मेद शिखरजी या पवित्र स्थळाविषयी जैन समाजाच्या भावना तीव्र आहेत. सरकारने याची त्वरित दखल घ्यावी, अशी अपेक्षा आहे. जैन धर्मियांच्या भावना तीव्र असण्याचे कारण म्हणजे जैन धर्माच्या २४ पैकी २० तीर्थंकरांची निर्वाणभूमी श्री सम्मेद शिखरजी येथे आहे. हिंदु धर्मियांसाठी जसे काशी तीर्थस्थान आहे तसेच, जैन धर्मियांसाठी श्री सम्मेद शिखरजी आहे. जैन समाजातील प्रत्येक व्यक्ती त्याच्या आयुष्यात एकदातरी या तीर्थक्षेत्राला भेट देण्याची इच्छा ठेवते आणि दर्शनासाठी जाते.  याठिकाणी दर्शन घेतल्याशिवाय मोक्ष मिळत नाही, अशी जैन धर्मियांची भावना आहे.

श्री सम्मेद शिखरजी येथील तीर्थस्थानाचा परिसर आदिवासीबहुल आहे. जंगल, डोंगर यांनी तो व्यापला आहे. हे स्थळ समुद्रसपाटीपासून सुमारे पाच हजार फूट उंच आहे. येथे २० तीर्थंकरांच्या चरण पादुका आहेत. दर्शनासाठी येथे २७ किलोमीटरची परिक्रमा पायी करावी लागते.

“श्री सम्मेद शिखरजी हे जैन धर्मियांचे पवित्र तीर्थस्थान असल्याने त्याला पर्यटनस्थळ म्हणून मिळालेली मान्यता योग्य नाही. त्याला जैन समाजाचा विरोध आहे. हे पवित्रस्थळ असून त्याचं पावित्र्य राखलं गेलं पाहिजे. देशामध्ये कोणत्याच धर्मियांच्या पवित्र तीर्थस्थानाच्या ठिकाणी असा निर्णय झालेला नाही. त्यामुळे जैन धर्मियांच्या या पवित्र तीर्थस्थानासंबंधीही चुकीचा निर्णय होऊ नये. श्री सम्मेद शिखरजी हे पर्यटनस्थळ म्हणून न राहता ते तीर्थक्षेत्रच राहिले पाहिजे, त्याचा तीर्थक्षेत्राचा दर्जा कायम राहावा, अशी सकल जैन समाजाची मागणी आहे.”

– अचल जैन (अध्यक्ष, सकल जैन संघ, पुणे)

“आज खऱ्या अर्थाने जैन वर्ग दु:खी झाला आहे. प्रत्येकवेळी रस्त्यावर उतरून मगच निर्णय घ्यायला पाहिजे का? हा एक प्रश्न मोठा आहे. आम्ही वेगवेगळ्या गोष्टींचा विरोध केला आहे. मात्र, अद्यापपर्यंत यासंदर्भात परिपत्रक काढले गेले नाही. जैन समाज हा नेहमी शांतीप्रिय असा समाज आहे. मक्का, मदिना, काशीसारखा आमचे तीर्थक्षेत्र आहे. हजारो वर्षांची परंपरा आहे. लोकांच्या भावना दुखवल्या जातील, असं कार्य आम्हाला सरकारकडून अपेक्षित नाही. हा फक्त विषय धर्माचा नाही. हा विषय आहे संस्काराचा, इतिहासाचा. या गोष्टी आस्थेवर अवलंबून आहेत. आमची सरकारला विनंती आहे की, आता आश्वासन नको तर परिपत्रक काढून निर्णय घ्यावा.”

– विजय भंडारी (उपाध्यक्ष, सकल जैन संघ, पुणे)

“जैन धर्मियांचे पवित्रस्थान म्हणून हे स्थान हजारो वर्षांपासून याठिकाणी आहे. मुघल व त्यानंतरची ब्रिटिश राजवट ते आतापर्यंत हे तीर्थस्थान टिकून राहिले आहे. झारखंड राज्याच्या निर्मितीपूर्वी हे स्थळ बिहारमध्ये होते. सध्या ते झारखंड राज्यात असून २०१८ मध्ये झारखंड सरकारने हे स्थळ पर्यटनस्थळ घोषित केले व तशी अधिसूचना काढली. त्यानंतर याला भारत सरकारच्या वन मंत्रालयाने इको सेंसिटिव्ह झोन सोबतच पर्यटनस्थळ म्हणून ५ ऑगस्ट २०१९ मध्ये मान्यता दिली.”

मिलिंद फडे (उपाध्यक्ष, सकल जैन संघ, पुणे)

“श्री सम्मेद शिखरजी हे पवित्रस्थान असून, पर्यटनस्थळ म्हणून याला आमचा विरोध आहे. झारखंड सरकारने काढलेले परिपत्रक आम्हाला मान्य नाही. त्यामुळे आमच्या समाजात याबद्दल प्रचंड रोष आहे. आमची सरकारला ही विनंती आहे की, सरकारने पर्यटनस्थळाचा दर्जा रद्द करून पवित्रस्थळ राहण्याबाबतचे परिपत्रक काढावे. आमचा हा विषय आस्था आणि भावनेशी निगडित आहे. त्यामुळे हे स्थळ पुन्हा पवित्रस्थळ राहावे, ही जैन समाजाची एकमुखी मागणी आहे.”

– अनिल गेलडा (सचिव, सकल जैन संघ, पुणे)

“सरकार कोणाचेही असो जैन समाजाने सरकारला नेहमीच साथ दिली आहे. तीर्थस्थानाला पर्यटनस्थळाचा दर्जा देऊन तेथील अस्मिता, पवित्रता बिघण्याचे काम होणार आहे. अनेक ठिकाणी आमचे साधू-महाराज आजही उपोषण करत आहेत. त्यामुळे हे पुन्हा पवित्रस्थळ राहावे, या मागणीसाठी आम्ही मोर्चा काढणार असून, सरकारने लक्ष द्यावे आणि निर्णय रद्द करून परिपत्रक काढावे, अशी आमची सरकारकडे मागणी आहे.”

– सतिश शहा (प्रसिद्धी प्रमुख, सकल जैन संघ, पुणे)

पुणे, दि. ५ :नव्या शैक्षणिक धोरणात पूर्वप्राथमिक आणि प्राथमिक स्तरावर अभ्यासाचा विचार न करता ज्या-ज्या गोष्टीचा विकास होऊ शकतो त्याचा सर्वाधिक विकास करण्याचा विचार किंवा व्यक्तिमत्व फुलविण्याचा विचार केला असून मातृमंदिरच्या नूतन इमारतीत अशाप्रकारे अनुभवावर आधारित शिक्षणाला अनुरूप वातावरण तयार केले आहे. उद्याची पिढी घडविण्यासाठी अशा शिक्षणाचा फायदा होईल आणि त्यातून देशाच्या आणि समाजाच्या प्रगतीला हातभार लागेल, असा विश्वास राज्याचे उपमुख्यमंत्री देवेंद्र फडणवीस यांनी व्यक्त केला.

न्यू इंग्लिश स्कूल परिसरातील डेक्कन एज्युकेशन सोसायटीचे मुरलीधर लोहिया मातृमंदिर नूतन वास्तूच्या उद्घाटन प्रसंगी ते बोलत होते. कार्यक्रमाला राज्याचे क्रीडामंत्री गिरीष महाजन, संस्थेचे विश्वस्त जगदीश कदम, श्री मुकुंद भवन ट्रस्टचे कार्यकारी विश्वस्त पुरुषोत्तमदास लोहिया, डॉ.रवींद्र आचार्य, आशिष पुराणिक, कार्यवाह धनंजय कुलकर्णी , मुख्याध्यापिका माधुरी बर्वे आदी उपस्थित होते.

मोठा इतिहास लाभलेल्या ऐतिहासिक संस्थेत येण्याची संधी मिळाल्याबद्दल आनंद व्यक्त करून श्री.फडणवीस म्हणाले, लोकमान्य टिळक, आगरकर आणि छत्रपती शाहू महाराज यांच्यासारख्या द्रष्ट्या महापुरुषांनी या संस्थेची स्थापना केली. आज ही संस्था एका वटवृक्षाप्रमाणे विविध शाखांमध्ये बहरली असून ५० हजार विद्यार्थ्यांच्या जीवनाला नवी दिशा देण्याचे कार्य करते आहे. डेक्कन एज्युकेशन सोसायटीच्या परंपरेला साजेसे मातृमंदिर सुरू करण्यात आले आहे. राष्ट्रीय शिक्षणाची आवश्यकता असलेल्या काळात स्थापन झालेल्या या संस्थेने देशात नवे शिक्षणाचे प्रयोग होत असताना आणि नवे धोरण अंमलात येते तेव्हा अग्रेसर राहून त्याचा अवलंब आपल्याकडे करावे हेच अपेक्षित होते आणि ते मातृमंदिरने केले असल्याचे सांगून श्री.फडणवीस यांनी शाळेचे अभिनंदन केले.

विद्यार्थ्यांना शाळा हवीशी वाटेल असे वायुमंडल अपेक्षित
कुठल्याही संस्थेचे मूल्यमापन हे सुंदर इमारतीच्या आधारे किंवा पायाभूत सुविधांच्या आधारे करता येत नाही, तर त्या शाळेची इमारत आपले बाहु उघडून प्रत्येक व्यक्तीला आपल्या कवेत घ्यायला तयार आहे का यावर होते. विद्यार्थ्यांना तिथे जाण्याची इच्छा होईल असे वातावरण शिक्षक करतात का, तिथे गेल्यानंतर विद्यार्थ्यांना भिती न वाटता तिथले वातावरण हवेहवेसे वाटेल असे वायुमंडल तिथे तयार होते काय या आधारावर शाळेचे मूल्यमापन होते. जुन्या काळात शिक्षणाची पद्धत कठोर होती.आज शिक्षणाची ओढ तयार व्हावी, विद्यार्थ्यांना आवड निर्माण होईल असे शिक्षण अपेक्षित आहे. प्रत्येक व्यक्तीतील गुणांची अभिव्यक्ती करता येईल असा विचार नव्या शैक्षणिक धोरणाने केला आहे.

मातृभाषेला ज्ञानभाषा करायची आहे
इंग्रजी जगात बोलली जाणारी मोठी भाषा असल्याने तिचा तिरस्कार करून चालणार नाही, मात्र मातृभाषेचा पुरस्कार करावा लागेल. जगात प्रगत राष्ट्रांच्या विकासात मातृभाषेचा वाटा आहे, त्यामुळे मातृभाषेचा विचार इंग्रजी शिक्षण घेताना करावाच लागेल. त्यामुळे नव्या शैक्षणिक धोरणात मातृभाषेतल्या शिक्षणाचा समावेश सर्व विषयात करण्यात आला आहे. उच्च आणि तंत्रशिक्षण, वैद्यकीय शिक्षण मातृभाषेत घेता येणार आहे. आपली भाषा ज्ञानभाषा केल्याने आणि त्या भाषेत ज्ञान दिल्याने प्रत्येक व्यक्तीला आपल्या गुणानुरूप विकसीत होण्याची संधी मिळेल. ग्रामीण युवकांनाही स्वतःची प्रगती साधता येईल.

शिक्षणाच्या माध्यमातून आपण नवभारत घडवत आहोत. विद्यार्थ्यांना विजयाचा इतिहास शिकवायला हवा. आपली उज्ज्वल संस्कृती आणि परंपरेचा स्विकार करत आणि त्याचवेळी संविधानाने दिलेल्या मुल्यांची जोपासना करत आपल्याला पुढे जायचे आहे. संविधानाची मूल्ये रुजवली आणि आपल्या संस्कृतीतील चांगल्या बाबी शिक्षणात आणल्यास भारत विश्वगुरू पदापर्यंत पेाहोचेल. असा पाया भरण्याचे कार्य मातृमंदिर संस्थेने केले असल्याचे श्री.फडणवीस म्हणाले.

यावेळी श्री.लोहिया यांनीदेखील मनोगत व्यक्त केले. संस्थेची वाटचाल नव्या युगाला साजेशी असल्याचे ते म्हणाले.

संस्थेचे विश्वस्त कदम यांनी प्रास्ताविकात संस्थेची माहिती दिली. शाळेच्यावतीने राष्ट्रीय शिक्षण आणि अनुभवावर आधारित शिक्षण पद्धतीवर भर दिला जातो असे त्यांनी सांगितले. नव्या शैक्षणिक धोरणाला अनुकूल नूतन इमारत असल्याचे ते म्हणाले.

नूतन इमारत उभी करण्यात योगदान देणाऱ्यांचा यावेळी सत्कार करण्यात आला.

पुणे, दि. ५: नोकरीइच्छुक युवक-युवतींना नामवंत खाजगी कंपन्या, कारखाने, उद्योगसमूह यांच्या माध्यमातून उत्तमोत्तम रोजगाराच्या संधी उपलब्ध करुन देण्याच्या प्रयत्नांचा भाग म्हणून कौशल्य विकास, रोजगार व उद्योजकता मार्गदर्शन केंद्राच्यावतीने यापुढे प्रत्येक महिन्याला रोजगार मोहीम अर्थात ‘प्लेसमेंट ड्राईव्ह’चे आयोजन करण्यात येणार आहे. त्याअंतर्गत पहिला प्लेसमेंट ड्राईव्ह येत्या ११ जानेवारी २०२३ रोजी आयोजित करण्यात आला आहे.

कौशल्य विकास, रोजगार व उद्योजकता मार्गदर्शन केंद्र हे कार्यालय वेळोवेळी जिल्ह्यातील वेगवेगळ्या भागात रोजगार मेळावे आयोजित करुन, सर्व स्तरातील जास्तीत जास्त उमेदवारांना रोजगार मिळवून देण्याचा प्रयत्न सातत्याने करीत आहे. याचाच एक पुढील टप्पा म्हणून आता प्रत्येक महिन्याच्या दुसऱ्या बुधवारी या कार्यालयामध्येच प्लेसमेंट ड्राईव्हचे आयोजन करण्याचा निर्णय घेण्यात आला आहे.

याप्रसंगी विविध पदांकरिता वेगवेगळ्या पात्रतेच्या उमेदवारांची तात्काळ नोकरभरती आवश्यक आहे अशा कंपन्यांच्या प्रतिनिधींना या कार्यालयात उमेदवारांच्या थेट प्रत्यक्ष मुलाखती घेण्याकरिता पाचारण करण्यात येणार आहे. या मुलाखतींना प्रत्यक्ष हजर राहून पात्र होतील अशा उमेदवारांना लगेच जागेवरच नोकरीची संधी मिळणार आहे.

पुणे जिल्ह्यातील नोकरीइच्छुक युवक-युवतींनी या संधीचा लाभ व अधिक माहिती घेण्यासाठी विभागाच्या www.rojgar.mahaswayam.gov.in या संकेतस्थळाला भेट द्यावी. नोंदणी नसल्यास प्रथम आपली नांवनोंदणी करावी आणि होमपेजवरील नोकरीसाधक (जॉब सीकर) लॉगीन मधून आपापल्या युझर आयडी व पासवर्डच्या आधारे लॉगीन करावे.

उमेदवारांनी लॉगीन केल्यानंतर डॅशबोर्ड मधील ‘पंडीत दीनदयाळ उपाध्याय जॉब फेअर’ या बटनावर क्लिक करुन प्रथम पुणे विभाग व नंतर पुणे जिल्हा निवडून त्यातील ‘1स्ट प्लेसमेंट ड्राइव्ह- पुणे’ या रोजगार मेळाव्याची निवड करावी. उद्योजकनिहाय त्यांच्याकडील रिक्तपदांची माहिती घ्यावी आणि आवश्यक पात्रता धारण करीत असल्याची खात्री करुन उचित असलेल्या रिक्तपदासाठी ऑनलाईन पद्धतीने आपला पसंतीक्रम नोंदवावा.

ऑनलाईन नोंदणी केलेल्या उमेदवारांनी बुधवार ११ जानेवारी रोजी समक्ष जिल्हा कौशल्य विकास, रोजगार व उद्योजकता मार्गदर्शन केंद्र, पुणे-११ येथे आपल्या सर्व कागदपत्रांसह उपस्थित राहून या प्लेसमेंट ड्राईव्हमध्ये सहभागी व्हावे आणि रोजगाराच्या या महापर्वणीचा लाभ घ्यावा, असे आवाहन प्र. सहाय्यक आयुक्त सागर मोहिते यांनी केले आहे.

पुणे, दि. ५ : महाराष्ट्र राज्य ऑलिम्पिक क्रीडा स्पर्धेच्या मुख्य क्रीडाज्योत रॅलीचा शिवाजीनगर येथील छत्रपती शिवाजी महाराज प्रिपेटरी मिलिटरी स्कूलच्या प्रांगणात मोठ्या उत्साहात शुभारंभ करण्यात आला. यावेळी ८ विभागांच्या क्रीडा ज्योतीचे समायोजन करून शालेय शिक्षण व क्रीडा विभागाचे सचिव रणजित सिंग देओल आणि विभागीय आयुक्त सौरभ राव यांच्या हस्ते झेंडी दाखवून क्रीडाज्योत रॅलीची सुरुवात करण्यात आली.

यावेळी क्रीडा व युवक सेवा संचालनालयचे आयुक्त डॉ. सुहास दिवसे, महाराष्ट्र ऑलम्पिक असोसिएशनचे महासचिव नामदेव शिरगावकर, उपाध्यक्ष संजय शेठे, सहसचिव प्रशांत देशपांडे, क्रीडाज्योतीचे मुख्य समन्वयक अमित गायकवाड, समन्वयक उदय पवार, राज्य क्रीडा मार्गदर्शक शिवाजी कोळी, छत्रपती शिवाजी महाराज प्रिपेटरी मिलिटरी स्कूलचे शिक्षक, क्रीडा शिक्षक आदी उपस्थित होते.

कार्यक्रमात छत्रपती शिवाजी महाराज प्रिपेटरी मिलिटरी स्कूलच्या विद्यार्थ्यांनी कवायत आणि योगासन प्रात्यक्षिक सादर केले. नूतन मराठी विद्यालय, रेणुका स्वरूप, अहिल्या देवी हायस्कूल, विमलताई गरवारे प्रशालेच्या विद्यार्थ्यांनी मोठ्या उत्साहात आणि ढोल ताशांच्या गजरात क्रीडाज्योत रॅलीचे स्वागत केले. या उपक्रमात मार्गावरील शाळा महाविद्यालयातील विद्यार्थी, क्रीडा मंडळे, खेळाडू सहभागी झाले.

क्रीडाज्योत लाल महाल-कसबा गणपती-दगडूशेठ गणपती-समाधान चौक-तुळशीबाग चौक-शगुन चौक-भानु विलास टॉकिज चौक- अल्का टॉकीज छत्रपती संभाजी महाराज पुतळा येथून गाडीने फर्ग्यूसन मार्गे पुणे विद्यापीठ चौक-बाणेर फाटा या मार्गे शिवछत्रपती क्रीडा संकुल बालेवाडी येथे पोहोचली.

आंतरराष्ट्रीय खेळाडू तेजस्विनी सावंतने रॅलीचे नेतृत्व केले. त्यांच्या सोबत खेलरत्न पुरस्कारार्थी पद्मश्री शीतल महाजन, ध्यानचंद पुरस्कारार्थी, तसेच अनेक राष्ट्रीय खेळाडू या रॅलीत सहभागी झाले.

पुणे –जागतिक मराठी अकादमी आणि डॉ. डी. वाय. पाटील विद्यापीठ, पिंपरी यांच्या संयुक्त विद्यमाने दिनांक ६,७, व ८ जानेवारी या कालावधीत ‘शोध मराठी मनाचा’ २०२३ या १८ वे जागतिक मराठी संमेलनाची पूर्वतयारी पूर्ण झाली आहे. यानिमित्त डी. वाय.पाटील विद्यापीठ प्रेक्षागृहाचे सर्व आवार सजविण्यात आले आहे. प्रवेशद्वाराची भव्य कमान, सुंदर रांगोळी व फुलांची आरास याबरोबरच मुख्य इमारतीपर्यंत सेल्फी-पॉईंट्स, स्वागताचे बोर्ड्स व झालर उभारण्यात आली असून सनई, वाजंत्री अशी जय्यत तयारी करण्यात आली आहे. पिंपरीमध्ये कार्यक्रम स्थळाकडे जाण्यासाठी दिशादर्शक फलक सर्वत्र लावण्यात आले आहेत. देशातील व परदेशातील सर्व पाहुण्यांचे कुमकुम तिलक लावून व ओवाळून स्वागत केले जाणार आहे. देशातील व परदेशातील बहुसंख्य निमंत्रित पाहुणे पुण्यात पोहोचले असून परदेशी  पाहुण्यांची व्यवस्था हेल्टन हॉटेल येथे आणि देशातील पाहुण्यांची व्यवस्था फन हॉटेल येथे करण्यात आली आहे. याशिवाय डी. वाय. पाटील विद्यापीठाच्या हॉस्टेल्समध्येही निवासासाठी व्यवस्था करण्यात आली आहे. संमेलनाच्या स्टेजवर आकर्षक इलेक्ट्रॉनिक बोर्डने बॅकड्रोप सजविण्यात आला आहे. तसेच जेवण्यासाठी स्वतंत्र व्यवस्था, मिडिया रूम आदि व्यवस्था पूर्ण झाली आहे.  सर्व भागात उत्तम सुरक्षा व्यवस्था तैनात करण्यात आली आहे. अशी माहिती संमेलनाचे स्वागताध्यक्ष डॉ. डी. वाय. पाटील विद्यापीठाचे कुलपती डॉ. पी. डी. पाटील यांनी दिली.

या १८ व्या जागतिक मराठी संमेलनात अमेरिका, ब्रिटन, फ्रान्स, जर्मनी, कॅनडा, ऑस्ट्रेलिया, दुबई, दक्षिण कोरिया, नेदरलँड, मॉरिशस, न्यूझीलंड, या देशांमधील मराठी मान्यवर सहभागी झाले आहेत.

या संमेलनाचा उद्घाटन सोहळा आज शुक्रवार दिनांक ६ जानेवारी रोजी सायंकाळी ४:३० वाजता राष्ट्रवादी काँग्रेस पक्षाचे अध्यक्ष पद्मविभूषण खासदार शरद पवार यांच्या हस्ते होणार आहे. कॉँग्रेस पक्षाचे ज्येष्ठ नेते व माजी केंद्रीय गृहमंत्री सुशीलकुमार शिंदे प्रमुख पाहुणे म्हणून उपस्थित राहणार आहेत. यावेळी ज्येष्ठ उद्योजक आणि प्राज इंडस्ट्रीजचे संस्थापक डॉ.प्रमोद चौधरी यांना ‘जागतिक मराठी भूषण पुरस्कार २०२३’ आणि ज्येष्ठ अभिनेते मोहन आगाशे यांना विवा चॅरिटेबल ट्रस्ट, वसई- ‘जागतिक मराठी गौरव पुरस्कार’ देऊन सन्मानित करण्यात येणार आहे. याप्रसंगी भाई जयंत पाटील, हितेंद्र ठाकूर, नागराज मंजुळे, अभिनेते सयाजी शिंदे, उद्योगपती अरुण फिरोदिया, हणमंतराव गायकवाड आणि परदेशातील व महाराष्ट्रातील निमंत्रित प्रमुख पाहुणे म्हणून उपस्थित राहतील.

उद्घाटन सोहळ्यापूर्वी दिनांक ६ जानेवारी रोजी दुपारी २:०० वाजता ‘समुद्रापलीकडे’– भाग-१ हा परदेशस्थ मान्यवरांशी संवादाचा कार्यक्रम होणार आहे. या कार्यक्रमाला हैद्राबाद (तेलंगणा राज्य) पोलीस आयुक्त महेश भागवत यांची सन्माननीय उपस्थिती लाभणार आहे. यामध्ये मनोज शिंदे (अमेरिका), आर्या तावरे (ब्रिटन), भरत गीते (जर्मनी), राजेश बाहेती (दुबई), रोहिदास आरोटे (दक्षिण कोरिया), वृंदा ठाकूर (नेदरलँड्स), विद्या जोशी (अमेरिका), ब्रायन परेरा (ऑस्ट्रेलिया) आदी मान्यवर सहभागी होणार असून त्यांच्याशी सचिन इटकर संवाद साधतील.

याच दिवशी दुसऱ्या सत्रामध्ये दुपारी ३:३० वाजता प्राज इंडस्ट्रीजचे संस्थापक व उद्योगपती डॉ.प्रमोद चौधरी यांची मुलाखत होणार असून त्यांच्याशी प्रा.मिलिंद जोशी संवाद साधतील. या कार्यक्रमाला महाराष्ट्राचे साखर आयुक्त शेखर गायकवाड हे प्रमुख पाहुणे म्हणून उपस्थित राहणार आहेत.

सायं. ६:३० वाजता ‘कलावंतांच्या सामाजिक जाणिवा’ या कार्यक्रमात दिग्दर्शक आणि अभिनेते नागराज मंजुळे, अभिनेते आकाश ठोसर आणि अभिनेते सयाजी शिंदे सहभागी होणार आहेत.

 या जागतिक मराठी संमेलनासाठी प्रवेशिका आवश्यक असून या प्रवेशिका डॉ. डी. वाय. पाटील विद्यापीठ, संत तुकाराम नगर, पिंपरी, पुणे या कार्यक्रम स्थळी उपलब्ध असतील.

पुणे, दि. ४: महाराष्ट्र राज्य ऑलिम्पिक क्रीडा स्पर्धेच्या मुख्य क्रीडाज्योत रॅलीचा किल्ले रायगड येथून छत्रपती शिवाजी महाराजांच्या जयघोषात शुभारंभ करण्यात आला. पद्मश्री डॉ. हिम्मतराव बावस्कर यांनी ज्योत प्रज्वलित केल्यानंतर ऑलम्पियन खेळाडू श्री अजित लाकरा यांना सोपवून रॅलीस सुरुवात करण्यात आली.

यावेळी महाडच्या उपविभागीय अधिकारी प्रतिमा पुदलवाड, तहसीलदार सुरेश काशीद महाड, शिवछत्रपती पुरस्कारार्थी संजय कडू, आंतरराष्ट्रीय खेळाडू प्रतीक्षा गायकवाड, राष्ट्रीय दिव्यांग खेळाडू सिद्धेश शिर्के मुख्य समन्वयक अमित गायकवाड, समन्वयक उदय पवार, राज्य क्रीडा मार्गदर्शक शिवाजी कोळी आदी उपस्थित होते.

महाराष्ट्र राज्य ऑलिम्पिक क्रीडा स्पर्धेच्या मुख्य क्रीडाज्योत रॅलीचा पुण्यातील एसएसपीएमएस महाविद्यालयाच्या प्रागंणात गुरुवार ५ जानेवारी २०२३ रोजी सकाळी १० वाजता शुभारंभ करण्यात येणार आहे. राज्यातील आठही जिल्ह्यातून आलेल्या क्रीडाज्योती पुण्यातील एसएसपीएमएस येथे रायगड येथील मुख्य ज्योतीत विलीन करण्यात येणार आहेत. ही क्रीडाज्योत लाल महाल-कसबा गणपती-दगडूशेठ गणपती-समाधान चौक-तुळशीबाग चौक-शगुन चौक-भानु विलास टॉकिज चौक- अल्का टॉकीज छत्रपती संभाजी महाराज पुतळा येथून गाडीने फर्ग्यूसन मार्गे पुणे विद्यापीठ चौक-बाणेर फाटा या मार्गे शिवछत्रपती क्रीडा संकुल, म्हाळुंगे-बालेवाडी येथे दुपारी १ वाजता पोहोचणार आहे.

या रॅलीत खेलरत्न पुरस्कारार्थी अंजली भागवत, पदमश्री पुरस्कारार्थी शितल महाजन, ध्यानचंद पुरस्कारार्थी स्मिता यादव (शिरोळे), ऑलिम्पियन खेळाडू मारुती आडकर, धनराज पिल्ले, अजित लाकरा, विक्रम पिल्ले बाळकृष्ण आकोटकर, आंतरराष्ट्रीय खेळाडू तेजस्विनी सावंत, राही सरनोबत, स्वपनिल कुसाळे, रुतुजा भोसले, श्रद्धा तळेकर, अर्जून पुरस्कारार्थी निखील कानिटकर, शंकुतला खटावकर, शांताराम जाधव, रेखा भिडे, गोपाळ देवांग, मनोज पिंगळे, काका पवार, राहूल आवारे, नंदन बाळ, संदीप किर्तने, नंदू नाटेकर, सुयश जाधव व मुरलीकांत पेटकर सहभागी होणार आहेत.