पुणे -राष्ट्रवादी काँग्रेसचे विधानपरिषदेचे आमदार अमोल मिटकरी यांनी बुलढाणा जिल्ह्यातील सिंदखेड राजा येथे राजमाता जिजाऊ जन्मोत्सव कार्यक्रमानंतर पुणे शहराचं नामकरण जिजाऊनगर करावे, अशी मागणी केली आहे. “पुणे शहराचे नामकरण “जिजाऊ नगर” व्हावे ही महाराष्ट्रातील तमाम शिवभक्तांची इच्छा आहे. येणाऱ्या अधिवेशनात याबाबत सरकारकडे मागणी करणार” असं ट्विट अमोल मिटकरी यांनी केलं आहे.

अमोल मिटकरी यांच्या मागणीवर पुण्यातील हिंदू महासंघाचे आनंद दवे यांनी विरोधाची भूमिका घेतली आहे. “पुणे शहराचं नाव बदलून राजमाता जिजाऊनगरी, जिजाऊनगर करावं, अशी मागणी संभाजी ब्रिगेडनं केली आहे. खरंतर प्रात: स्मरणीय जिजाऊमाता देशातील सर्व हिंदुत्ववाद्यांना वंदनीय आहेत. परंतु, जिजाऊमाता यांचं नाव पुण्याला नाव देणं उचित होणार नाही. लाल महालात राजमाता जिजाऊंचं सर्वात मोठं स्मारक उभारावं, अशी आमची जुनी मागणी आहे. ती का पूर्ण होत नाही, असा सवाल आनंद दवे यांनी विचारला आहे.

यशस्वी खेळाडूंना स्वत:कडून प्रत्येकी एक हजाराचे क्रीडा साहित्य देण्याची पालकमंत्र्यांची घोषणा

पुणे दि.१४: पुणे जिल्हा परिषदेच्यावतीने आयोजित यशवंतराव चव्हाण जिल्हास्तरीय कला, क्रीडा आणि सांस्कृतिक महोत्सवाचे उद्घाटन राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांतदादा पाटील यांच्या हस्ते करण्यात आले. महोत्सवातील पदक विजेत्यांना आपल्यावतीने प्रत्येकी एक हजार रुपयांचे क्रीडा साहित्य देण्यात येईल आणि प्रथम क्रमांक मिळविणारा खेळाडू वर्षभरात कुठेही खेळण्यासाठी गेल्यास त्याला रेल्वे किंवा विमानाचे तिकीटही काढून देण्यात येईल, अशी घोषणा त्यांनी केली.

शिवछत्रपती क्रीडा संकुल म्हाळुंगे – बालेवाडी येथे आयोजित या उद्घाटन कार्यक्रमास जिल्हा परिषदेचे मुख्य कार्यकारी अधिकारी आयुष प्रसाद, अतिरिक्त मुख्य कार्यकारी अधिकारी चंद्रकांत वाघमारे, राज्याचे क्रीडा व युवक सेवा सहसंचालक चंद्रकांत कांबळे, पुणे जिल्हा शिक्षण व प्रशिक्षण संस्थेच्या प्राचार्या शोभा खंदारे, प्राथमिक शिक्षणाधिकारी संध्या गायकवाड आदी उपस्थित होते.

श्री.पाटील म्हणाले, देश बुद्धीमत्ता आणि आर्थिक क्षेत्रात पुढे जात असताना क्रीडा क्षेत्रात आपण मागे आहोत. इतर देशात शालेयस्तरावर खेळांना चांगले प्रोत्साहन देण्यात येत असल्याने ते देश आंतरराष्ट्रीय स्पर्धांमध्ये यशस्वी होतात. हे लक्षात घेऊनच देशपातळीवर खेळांना प्रोत्साहन देण्यात येत असून राज्यातही शालेय स्तरावर खेळाडूंना प्रोत्साहन देण्यात येत आहे. आंतरराष्ट्रीय पातळीवर पदक विजेत्यांना वर्ग एक अधिकारी म्हणून थेट नियुक्ती देण्यात येत आहे. खेळाडूंनी खेळाकडे करिअर म्हणून बघावे यासाठी त्यांना आवश्यक सुविधा व प्रोत्साहन देणे गरजेचे आहे. नुकतेच महाराष्ट्र राज्य ऑलिम्पिक स्पर्धा आणि खेलो इंडियाचेही आयोजन करण्यात आल्याचे त्यांनी सांगितले.

जिल्हा स्पर्धांसाठी निवड झाल्याबद्दल खेळाडूंचे अभिनंदन करून श्री.प्रसाद म्हणाले, खिलाडूवृत्तीने सर्वांनी चांगल्या खेळाचे प्रदर्शन करावे. या स्पर्धांमधून पुढे विभागीय, राज्यस्तरीय स्पर्धा व नंतर देशपातळीवरील खेलो इंडिया स्पर्धेसाठी खेळाडूंची निवड होईल असा विश्वास त्यांनी व्यक्त केला.

शिक्षणाधिकारी श्रीमती गायकवाड म्हणाल्या, जिल्हा परिषदेच्या केंद्र, बीट आणि तालुका स्तरावर स्पर्धा होऊन जिल्हास्तरीय स्पर्धांसाठी निवड झाली आहे. यामध्ये सुमारे १८ स्पर्धा घटक असून तालुक्यांचे संघ आणि वैयक्तिक स्तरावरील स्पर्धक मिळून ३ हजार ५११ विद्यार्थी या स्पर्धेत सहभागी झाले आहेत. या स्पर्धेतून मुलांच्या सर्व कलागुणांना वाव मिळतो असेही त्या म्हणाल्या.

यावेळी खेळाडू विद्यार्थ्यांसमवेत श्री.पाटील यांच्या हस्ते क्रीडाज्योत प्रज्वलित करून महोत्सवाचे उद्घाटन करण्यात आले. राष्ट्रीय खेळाडू उमेश थोपटे यांनी खेळाडूंना क्रीडा प्रतिज्ञा दिली.
000

तळजाई पठारावरील पस्तीस हजार संघस्वयंसेवकांच्या शिबिराला चाळीस वर्षे पूर्ण

पुणे – तळजाई टेकडीच्या पठारावर राष्ट्रीय स्वयंसेवक संघाने भरवलेल्या ‘प्रांतिक शिबिरा’ला शनिवारी (१४ जानेवारी) चाळीस वर्षे पूर्ण होत आहेत. तळजाईच्या पठारावर दोनशे एकर जागेवर हे शिबिर उभारण्यात आले होते आणि १४ १५ १६ जानेवारी १९८३ असे तीन दिवस चाललेल्या या शिबिरात तब्बल पस्तीस हजार संघस्वयंसेवकांची उपस्थिती होती. शिबिराला चाळीस वर्षे पूर्ण होत असल्याच्या निमित्ताने स्वयंसेवकांकडून या शिबिराच्या आठवणी जागवल्या जाणार आहेत.
पुणे शहर, पश्चिम महाराष्ट्र, मुंबई, कोकण, गोवा, संभाजीनगर, मराठवाडा, नाशिक आणि खान्देश या भागातील बावीसशे चाळीस गावांमधून या शिबिरासाठी संघस्वयंसेवक आले होते. शिबिराच्या उभारणीसाठी शेकडो स्वयंसेवक तळजाईच्या पठारावर दोन महिने रात्रंदिवस राबत होते. शिबिराला आलेल्या स्वयंसेवकांसाठी छत्तीस स्वयंपूर्ण नगरे उभारण्यात आली होती. एका नगरात एक हजार स्वयंसेवकांची निवास, भोजन आदी सर्व व्यवस्था होती, अशी माहिती संघाचे पश्चिम महाराष्ट्र प्रांत कार्यवाह डॉ. प्रवीण दबडघाव यांनी शुक्रवारी दिली.
संक्रांतीच्या निमित्ताने शिबिराला आलेल्या सर्वांना गुळाच्या पोळ्यांचे भोजन देण्यात आले होते. या गुळाच्या पोळ्या पुण्यातील घराघरांमधून संकलित करण्यात आल्या होत्या. या उपक्रमाला पुणेकर माता-भगिनींनी उत्स्फूर्त प्रतिसाद दिला होता आणि सुमारे पावणेदोन लाख गुळाच्या पोळ्या शहरातून संकलित झाल्या होत्या, असेही डॉ. दबडघाव यांनी सांगितले.
संघाच्या कार्याचे आणि संघाकडून चालवल्या जाणाऱ्या सेवाकार्यांचे दर्शन घडवणारे चारशे चित्रांचे ‘संघदर्शन’ हे प्रदर्शन, शिवधनुष्याच्या आकाराचे प्रवेशद्वार, पृथ्वीच्या आकाराचे आणि त्यावर शेषशाही नागाने फणा धरलेले दोन मजली भव्य व्यासपीठ ही या शिबिराची आकर्षणे ठरली होती. ‘संघदर्शन’ प्रदर्शनाला तीन दिवसात तीन लाख नागरिकांनी भेट दिली होती, अशीही माहिती डॉ. दबडघाव यांनी दिली.
तत्कालीन सरसंघचालक बाळासाहेब देवरस यांच्यासह संघाचे अनेक केंद्रिय अधिकारी या शिबिरात उपस्थित होते आणि शिबिरात १४ जानेवारी रोजी झालेल्या मकरसंक्रमण उत्सवाच्या अध्यक्षस्थानी प्रसिद्ध साहित्यिक, ‘स्वामी’कार रणजित देसाई यांची उपस्थिती होती. डॉ. अरविंद लेले यांनी लिहिलेले ‘हिंदू सारा एक…’ हे गीत या शिबिरात स्वयंसेवकांनी एकसुरात गायले. विख्यात संगीतकार आणि गायक सुधीर फडके यांनी ते व्यासपीठावरून गायले होते आणि प्रसिद्ध संगीतकार राम कदम यांनी हे गीत स्वरबद्ध केले होते.
शिबिराच्या निमित्ताने पुण्यातून १६ जानेवारी रोजी दोन भव्य पथसंचलने काढण्यात आली होती. या संचलनांचेही शहरात जागोजागी स्वागत करण्यात आले होते. या शिबिराला चाळीस वर्षे पूर्ण होत असल्याच्या निमित्ताने पुण्यातील स्वयंसेवकांकडून या शिबिराच्या आठवणींना उजाळा दिला जाणार आहे. शिबिराची संपूर्ण माहिती देणारी एक फिल्मही तयार करण्यात आली असून ती समाजमाध्यमातून प्रसारित करण्यात येत असल्याचे डॉ. दबडघाव यांनी सांगितले.
पस्तीस हजार स्वयंसेवकांची उपस्थिती, समाजाकडून मिळालेला अभूतपूर्व प्रतिसाद आणि पुणेकरांनी शिबिराला आलेल्या स्वयंसेवकांसाठी मोठ्या प्रेमाने दिलेल्या लाखो गुळाच्या पोळ्या ही या शिबिराची खास वैशिष्ट्य ठरली. या शिबिराने कार्यकत्यांना उत्साह मिळाला. संघकार्याला मोठी गती मिळाली. शिबिराने ‘हिंदू सारा एक…’ हा मंत्र महाराष्ट्राला दिला. 
सुरेश उर्फ नाना जाधव प्रांत संघचालक, रा. स्व. संघ, पश्चिम महाराष्ट्र प्रांत

सोशल रिस्पॉन्सिबिलिटी समूहाच्या वर्धापन दिनानिमित्त राज्यातील विविध गोसेवकांचा सन्मान 
पुणे : चंगळवाद आणि अति हव्यासाच्या पोटी आपण हरितक्रांतीचे मूळ बिघडवून टाकले आहे. यामुळे आपण देशातील माती आणि पाणी नष्ट करत चाललो आहोत. हीच परिस्थिती राहिली तर देशातील ग्राम संस्कृती नष्ट होईल आणि देश मोठ्या संकटात सापडेल, अशी भीती व्यक्त करतानाच देशातील ग्राम संस्कृती, कृषी संस्कृती,  गोवंश वाचवला तरच देश वाचेल, अशी भावना आदर्श गाव समितीचे प्रमुख पद्मश्री पोपटराव पवार यांनी व्यक्त केली. 

स्वामी विवेकानंद, राजमाता जिजाऊ जयंती आणि सोशल रिस्पॉन्सिबिलिटी समूहाच्या वर्धापन दिनानिमित्त कोहिनूर ग्रुपच्या सहकार्याने  राज्यातील विविध गोसेवकांचा पोपटराव पवार यांच्या हस्ते भांडारकर इन्स्टिटयूट च्या सभागृहात आयोजित कार्यक्रमात सन्मान करण्यात आला. यावेळी कोहिनूर ग्रुपचे संचालक कृष्णकुमार गोयल, शेखर धर्माधिकारी, दादा वेदक, राजेंद्र लुंकड, महेंद्र देवी, रमेश अग्रवाल, विजय वरुडकर, श्रीकांत कुलकर्णी, सुधीर पाचपोर, नितीन आपटे, कान्होपात्रा गायकवाड,सुनील बेनके, डॉ रवींद्र वाघोले, जगदीश गजऋषी, विशाल वरुडकर आदी  मान्यवर उपस्थित होते.
गो विज्ञान संस्थेचे अध्यक्ष राजेंद्र लुंकड यांना विवेकानंद गोसेवक जीवनगौरव पुरस्कार यावेळी प्रदान करण्यात आला. अनिल पांडे, कमलेश सावला ,डॉ गणपत झिरोनकर, प्रतीक भेगडे, शिवप्रसाद कोरे, परमेश्वर स्वामी, विठ्ठल मुरकेवार, डॉ अजित उदावंत, अमर ढगे, आनंद कोल्हटकर ,नंदा बिरजे, तृप्ती अग्निहोत्री, अश्विनी बेलन या गो सेवकांचा यावेळी सन्मान करण्यात आला.

पोपटराव पवार म्हणाले, आपल्या शिक्षण व्यवस्थेमध्ये संस्कृती आणि संस्कारांचे शिक्षण पाहिजे त्याप्रमाणात दिले जात नाही. त्यामुळेच आजची तरुणाई ही चंगळवादाकडे झुकत चालली आहे. त्यांना पाणी आणि मातीचे महत्त्व पटवून दिले तरच या तरुणाईला निसर्गाविषयी प्रेम आणि आकर्षण वाटेल.

दादा वेदक म्हणाले, आधुनिक तंत्रज्ञानाचा वापर करून हिंदुस्तानी परंपरा जगाच्या कानाकोपऱ्यात पोहोचविली पाहिजे. या तंत्रज्ञानाच्या माध्यमातून गो सेवेचा प्रचार आणि प्रसार करून गोसेवेला संपूर्ण जगात प्रतिष्ठा प्राप्त करून दिली पाहिजे.

कृष्णकुमार गोयल म्हणाले, गो सेवक अगरबत्ती, धूप, साबण अशा विविध प्रकारची उत्पादने तयार करतात. परंतु या उत्पादनांचे योग्य प्रकारे मार्केटिंग होत नसल्यामुळे ही उत्पादने शहरापर्यंत पोहोचू शकत नाही. गो सेवेची संस्कृती ही ग्रामीण भागातून शहरी भागामध्ये पोहोचविली पाहिजे. त्यासाठी गो सेवेच्या माध्यमातून तयार करण्यात आलेल्या उत्पादनांचे मोठ्या प्रमाणावर मार्केटिंग होणे गरजेचे आहे. या साठी कोहिनूर ग्रुप यांच्या सहयोगाने आम्ही राष्ट्रीय कर्तव्य अभियान अंतर्गत गो संवर्धन सहयोग अभियान या यूट्यूब चैनल ची आज सुरुवात करत आहोत.

या प्रसंगी सोशल रिस्पॉन्सिबिलिटी संस्थापक अध्यक्ष विजय वरुडकर यांनी मागील ८ वर्षांचा सामाजिक संस्थेचा कार्य प्रवास सांगितला. तसेच विवेकानंद जयंती निमित्त व राष्ट्रीय युवक दिनानिमित्त युवकांना जागतिक पातळीवर रोजगार उभारणी साठी प्रयत्न व्हावेत यासाठी मिशन अटल आंतरराष्ट्रीय कौशल्य विकास केंद्र माध्यमातून आम्ही काम करणार आहोत अशी भूमिका मांडली. या वेळी टाटा सोशल ट्रस्ट व मोक्ष योगा द्वारे सुरू असलेल्या कौशल्य विकास प्रशिक्षणाची माहिती देण्यात आली.

रसायन मुक्त शेती कॅन्सर मुक्त स्वस्थ भारत घडवण्यासाठी राष्ट्रीय कर्तव्य अभियान अंतर्गत येणाऱ्या ५ वर्षात राज्यातील ७५००० शेतकरी कुटुंब यांना ७५००० देशी गोवंश आधारीत शेती उत्पादन साठी जोडण्याचे काम आम्ही करत आहोत यासाठी सर्वांनी सहकार्य करावे, अशी विनंती करण्यात आली.

सीमा लिमये, नितीन आपटे, श्रीकांत कुलकर्णी,विठल मुरकेवार, प्रतीक्षा ढवळीकर,संतोष सुरवसे, चेतन मराठे, सागर पाटील, रवींद्र चव्हाण, विशाल वरूडकर यांनी कार्यक्रम संयोजन केले होते.  रमेश अग्रवाल यांनी प्रास्ताविक केले. डॉ आशिष पोलकडे यांनी सर्व मान्यवर व उपस्थित व्यक्तींचे आभार मानले.

राष्ट्रीय कर्तव्य अभियान अंतर्गत सुरू विविध उपक्रमांची माहिती घेण्यासाठी 8446004580 या क्रमांकावर संपर्क साधावा अशी विनंती संयोजक समिती द्वारे करण्यात आली.

खासदार श्रीनिवास पाटील यांचे मत; टॉप मॅनेजमेंट कन्सॉर्टियमतर्फे ‘एक्सलन्स अवॉर्ड’चे वितरणअतुल किर्लोस्कर यांना ‘जीवनगौरव’; डॉ. अरविंद नातू, संदीप कर्णिक, नीता मेहता आदींचा सन्मान
पुणे : “पुण्यात घडलेली प्रत्येक व्यक्ती एक संस्था व विद्यापीठ आहे. एकमेकांच्या साथीने प्रगतीकडे वाटचाल करणाऱ्या अशा आदर्श व्यक्तिमत्वांचे कार्य समाजाला प्रेरक असते. पुरस्कारांच्या माध्यमातून अशा आदर्शांना नव्या पिढीसमोर ठेवले जात आहे, ही चांगली गोष्ट आहे,” असे मत सिक्कीमचे माजी राज्यपाल, सातारा लोकसभा मतदारसंघाचे खासदार श्रीनिवास पाटील यांनी केले.
टॉप मॅनेजमेंट कन्सॉर्टियमतर्फे विविध क्षेत्रातील मान्यवरांना उल्लेखनीय कार्याबद्दल ‘अवॉर्डस ऑफ एक्सलन्स’ पुरस्कार पाटील यांच्या हस्ते वितरित करण्यात आले. खराडी येथील हॉटेल रॅडीसन ब्लू येथे झालेल्या सोहळ्यावेळी सौ. बाहरी मल्होत्रा, लेफ्ट. जनरल डॉ. दत्तात्रय शेकटकर, नीलकंठ ज्वेलर्सचे दिलबाग सिंग, ‘टीएमसी’चे अध्यक्ष अश्विनी मल्होत्रा, महासचिव डॉ. जयसिंग पाटील, जेनीस सोमजी आदी, सुंद्री परचानी आदी उपस्थित होते.
उद्योजक अतुल किर्लोस्कर यांना ‘जीवनगौरव पुरस्कार’ प्रदान करण्यात आला. ज्येष्ठ शास्त्रज्ञ प्रा. डॉ. अरविंद नातू (विज्ञान व तंत्रज्ञान), जागतिक आरोग्य संघटनेचे सल्लागार डॉ. सुभाष साळुंके (सार्वजनिक आरोग्य), पुण्याचे पोलीस सहआयुक्त संदीप कर्णिक व भारतीय विमानतळ प्राधिकरणाचे संचालक संतोष ढोके (प्रशासन), टेक्नोक्रॅट आनंद शिराळकर (युवा उद्योजक), पॉवरलिफ्टर नीता मेहता (क्रीडा) यांना सन्मानित करण्यात आले.
श्रीनिवास पाटील म्हाणाले, “पुणे विद्येचे, संस्कृतीचे, देवालयाचे माहेरघर आहे. ही संस्कृती आपण जपली पाहिजे. समाजात अनेक गरीब व गरजू लोक आहेत. त्यांच्या सक्षमीकरणासाठी पुढाकार घ्यायला हवा. सर्वाना सोबत घेऊन प्रगतीचा मार्ग साधायला हवा. वाहतूक कोंडीसह पुण्यातील इतर नागरी प्रश्न सोडविण्यावर काम होण्याची गरज आहे.” ज्या जिजाऊंनी पुण्याची उभारणी केली, त्यांचे नाव पुण्याला देण्याचा विचारप्रवाह जोर धरतोय, याकडेही त्यांनी लक्ष वेधले.
 किर्लोस्कर ग्रुपच्या माध्यमातून उभारलेल्या कार्याचा हा गौरव असून, त्याचा नम्रपणे स्वीकार करत असल्याची भावना अतुल किर्लोस्कर यांनी व्यक्त केली. संदीप कर्णिक, संतोष ढोके, आनंद शिराळकर, डॉ. सुभाष साळुंके यांनीही सत्काराला उत्तर देत आपली मनोगते व्यक्त केली. अश्विनी मल्होत्रा यांनी प्रास्ताविक केले. जुही मेश्राम यांनी सूत्रसंचालन केले. डॉ. जयसिंग पाटील यांनी आभार मानले.

रस्त्यावरील लढाईबरोबर न्यायालयीन लढाई देखील जिंकलो ः बाबा कांबळे

बाबा कांबळे, आनंद तांबे यांनी दाखल केले होते हस्तक्षेप (entarveshn) याचिका

पिंपरी / प्रतिनिधी

रॅपिडो कंपनीची बेकायदेशीर दुचाकी टॅक्‍सी बंद होण्यासाठी वारंवार निवेदने, आंदोलने छेडत होतो. त्या विरोधात आम्ही रस्त्यावरची लढाई लढली आहे. पुण्यामध्ये रिक्षा बंद करण्याचे मोठे आंदोलन घेतले होते. रस्त्यावरची लढाई जिंकली होती. दुसऱ्या बाजूला न्यायालयीन लढा देखील सुरूच होता. कोट्यवधी रिक्षा चालक मालकांची भूमिका ऐकून घेतल्यानंतर रॅपिडो कंपनीच्या प्रवासी वाहतूकीला बंदी घालण्याचे आदेश उच्च न्यायालयाने दिले. त्यामुळे न्यायालयीन लढाई देखील आम्ही जिंकलो असून रिक्षा चालक मालकांचा हा विजय असल्याचे महाराष्ट्र रिक्षा पंचायतचे अध्यक्ष बाबा कांबळे यांनी प्रतिपादन केले. न्याय दिल्याबद्दल न्यायदेवतेचे आभार व्यक्त करतो, असेही बाबा कांबळे म्हणाले.

रॅपिडो कंपनीने दुचाकी प्रवासी वाहतूकीबाबत उच्च न्यायालयामध्ये याचिका दाखल होती. त्या विरोधात महाराष्ट्र रिक्षा पंचायतचे अध्यक्ष बाबा कांबळे, पुणे रिक्षा फेडरेशनचे आनंद तांबे यांनी न्यायालयामध्ये आमचे म्हणणे ऐकूण घ्यावे, यासाठी पुर्नयाचिका दाखल केली होती. त्याची आज शुक्रवारी (दि. 13) सुनावणी झाली. या वेळी उच्च न्यायालयाने हा निर्णय दिला.

या सूनावणीवेळी महराष्ट्र रिक्षा पंचायतचे अध्यक्ष बाबा कांबळे, पुणे रिक्षा फेडरेशनचे अध्यक्ष आनंद तांबे, राष्ट्रवादी रिक्षा संघटनेचे विजय ढवळे, सर्वसामान्य रिक्षा चालक आप्पा हिरेमठ, संतोष नेवासकर, सचिन रसाळ आदीसह रिक्षा चालक मालक मोठ्या संख्येने उपस्थित होते. या वेळी बाबा कांबळे बोलत होते.

बाबा कांबळे म्हणाले की, रिक्षा चालकांचे हातावरचे पोट आहे. दिवसभर राबल्यानंतर आपले घर कसेबसे चालवले जाते. मात्र ओला-उबेर, रॅपिडो या मोठ्या खासगी कंपन्या प्रवासी वाहतूक करायला लागल्यापासून रिक्षा चालकांवर उपाशी राहण्याची वेळ आली होती. प्रवाशी मिळत नव्हते. संबंधीत खासगी कंपन्यांनी कायदेशीर प्रक्रिया देखील पुर्ण केलेल्या नाहीत. त्यामुळे त्यांची प्रवासी वाहतूक बेकायदेशीर असल्याचे आम्ही सांगत होतो. त्या विरोधात सातत्याने आंदोलने छेडत होतो. नुकतीच न्यायालयात ही आरपारची लढाई पोचली. त्यामध्ये न्यायदेवतेने रिक्षा चालकांचे म्हणणे ऐकून घेऊन रिक्षा चालकांना न्याय दिला असल्याचे बाबा कांबळे म्हणाले.

डॉ. श्रीपाल सबनीस यांचे मत; दळवी, डॉ. शहा यांना ‘राष्ट्रीय बंधुता पुरस्कार’ प्रदान

पुणे, ता. १३ : “महापुरुषांचे विचार समाजाला जोडणारे, देशाला प्रगतीच्या दिशेने नेणारे आहेत. मात्र, प्रत्येक जाती-धर्माने महापुरुष वाटून घेण्याची स्पर्धा लागल्याचे दिसते. जाती-धर्माच्या नावावर समाजात दुफळी निर्माण होत असताना बंधुतेचा विचार पेरण्याची गरज आहे. कारण बंधुता माणूस जोडण्याचे तत्वज्ञान शिकवते,” असे परखड मत ज्येष्ठ साहित्यिक, माजी संमेलनाध्यक्ष डॉ. श्रीपाल सबनीस यांनी केले.
राष्ट्रीय बंधुता साहित्य परिषद आणि औंध येथील रयत शिक्षण संस्थेचे डॉ. बाबासाहेब आंबेडकर महाविद्यालय या संस्थाच्या वतीने नवी पेठ येथील एस. एम. जोशी सभागृहात २४ व्या राष्ट्रीय बंधुता साहित्य संमेलनाचा समारोपावेळी डॉ. श्रीपाल सबनीस बोलत होते. ज्येष्ठ साहित्यिक शंकर आथरे यांच्या अध्यक्षतेखाली झालेल्या या संमेलनात राष्ट्रीय बंधुता साहित्य परिषदेचे संस्थापक अध्यक्ष बंधुताचार्य प्रकाश रोकडे, ज्येष्ठ साहित्यिक अशोक कुमार पगारिया, स्वागताध्यक्ष डॉ. विजय ताम्हाणे, प्रा. चंद्रकांत वानखेडे, डॉ. अरुण आंधळे, प्रकाश जवळकर, प्रा. डॉ. प्रभंजन चव्हाण आदी उपस्थित होते.
माजी विभागीय आयुक्त चंद्रकांत दळवी आणि चिंचवड येथील प्रतिभा ग्रुप ऑफ इन्स्टीट्यूटचे संस्थापक संचालक ज्येष्ठ व्यवस्थापन तज्ञ डॉ. दीपक शहा यांना ‘राष्ट्रीय बंधुता पुरस्कार’ देऊन डॉ. सबनीस यांच्या हस्ते सन्मानित करण्यात आले. सत्यशोधकी पगडी, प्रबोधनाची लेखणी, सन्मानचिन्ह, मानपत्र आणि पाच हजार रुपये असे या पुरस्काराचे स्वरूप होते. दळवी व शहा यांनी पुरस्काराच्या रकमेत प्रत्येकी ११ हजार रुपये घालून ३२ हजारांचा निधी बंधुता परिषदेला सुपूर्त केला.
पुढील वर्षी होणाऱ्या २५ व्या राष्ट्रीय बंधुता साहित्य संमेलनाच्या अध्यक्षपदी ज्येष्ठ कवयित्री मधुश्री ओव्हाळ, तर स्वागताध्यक्ष पदी बंधुता प्रकाशनाच्या संचालिका मंदाकिनी रोकडे यांची निवड करण्यात आल्याची घोषणा यावेळी करण्यात आली. बंधुता मायमराठी पुरस्काराने मधुराणी बनसोड (वाशिम), सीमा गांधी (पिंपरी), सचिन शिंदे (उमरखेड), तुकाराम कांबळे (नांदेड), तेजस गायकवाड (सोलापूर), नरेंद्र पाटील (धुळे), साईनाथ फुसे (औरंगाबाद), घनशाम सावरकर (परभणी), प्रतिभा मगर (पुणे) व महादेव सुरवसे (परळी वै.) यांना सन्मानित करण्यात आले.
डॉ. श्रीपाल सबनीस म्हणाले, “अनेक महापुरुष संघर्षासाठी वापरले जात आहेत. अशावेळी प्रकाश रोकडे बंधुतेची पताका खांद्यावर घेऊन गेली पाच दशके समाजात बंधुता पेरण्याचे काम करत आहेत. याच विचारांवर चालणाऱ्या दळवी आणि डॉ. शहा यांचा सन्मान दिशादर्शक आहे.”
चंद्रकांत दळवी म्हणाले, “बंधुतेच्या नावाने मिळालेला पुरस्कार विशेष आहे. ‘गर्व से कहो बंधू है’ हा नारा घेऊन रोकडे गेली ५० वर्षे बंधुतेची चळवळ व्यापक करत आहेत. प्रशासनात काम करताना मीही बंधुभावाच्या विचारातून काम केले. हा विचार आणखी व्यापक करण्यासाठी चळवळीला जोडून घेतले आहे.”
बंधुताचार्य प्रकाश रोकडे म्हणाले, “दळवी यांनी प्रशासकीय सेवेतून, तर डॉ. शहा यांनी शिक्षण सेवेतून बंधुतेचा विचार जपला आहे. अशा कर्तृत्ववान व संवेदनशील माणसांमुळे समाजात बंधुता पेरण्यास मदत झाली. समाजाला एकसंध ठेवण्याचे काम बंधुतेचा विचार करतो. त्यामुळे त्यांचा आपण सर्वानी अंगीकार केला पाहिजे.”
शंकर आथरे यांनी अध्यक्षीय समारोप केला. सीए अशोक कुमार पगारिया, प्रा. डॉ. अरुण आंधळे यांनीही आपले मनोगत व्यक्त केले. डॉ. दीपक शहा यांच्या वतीने त्यांच्या पत्नी प्रतिभा शहा यांनी पुरस्कार स्वीकारला व पुरस्काराबद्दल आभार व्यक्त केले. संगीता झिंजुर्के यांनी सूत्रसंचालन केले. डॉ. प्रभंजन चव्हाण यांनी आभार मानले.