नागरिकांना पर्यायी मार्गाचा वापर करण्याचे आवाहन

पुणे, दि. २४: माघी श्रीगणेश जयंतीच्या पार्श्वभूमीवर शिवाजी मार्गावरील श्रीमंत दगडूशेठ हलवाई गणपती मंदीर येथे दर्शनासाठी भाविकांची मोठ्या प्रमाणात गर्दी होण्याची शक्यता लक्षात घेता २५ जानेवारी रोजी सकाळी ६ वाजेपासून गर्दी संपेपर्यंत वाहतूकीस बंदी करण्याबाबतचे आदेश निर्गमित करण्यात आले आहे. नागरिकांनी पर्यायी मार्गाचा वापर करण्याचे आवाहन शहर पोलीस वाहतूक शाखेतर्फे करण्यात आले आहे.

अग्नीशमन वाहने, पोलीस वाहने, रुग्णवाहिका आदी अत्यावश्यक सेवेतील वाहनांना ही बंदी असणार नाही. स. गो. बर्वे चौक येथून शिवाजी रोडने स्वारगेटकडे जाणाऱ्या सर्व प्रकारच्या जड वाहतूकीस पीएमपीएमएल बसेस वगळून बंदी असेल. प्रीमियर गॅरेज चौक ते मंगला सिनेमागृहासमोरुन नागदेव ऑईल डेपो चौक दरम्यान तात्पुरत्या स्वरुपात नो-पार्किंग, नो-हॉल्टींग करण्यात येत आहे.

पीएमपीएमएल बसेसचे मार्ग : या कालावधीत पीएमपीएमएल बसेससाठी प्रीमियर गॅरेज चौक, मंगला सिनेमागृहासमोरुन उजवीकडे वळून खुडे चौक, उजवीकडे वळून पुणे मनपा कोर्ट कॉर्नर, प्रीमियर गॅरेज चौक असा पुणे मनपा येथील वर्तुळाकार बस मार्ग राहील. स. गो. बर्वे चौकातून छत्रपती श्री शिवाजी महाराज मार्गाने स्वारगेटकडे जाणाऱ्या पीएमपीएमएल बसेस प्रीमियर गॅरेज चौकातून डावीकडे वळून मंगला सिनेमागृहासमोरुन पुढे उजवीकडे वळून खुडे चौक, बालगंधर्व चौक, डावीकडे वळून खंडोजीबाबा चौक, अलका टॉकीज चौक, टिळक रोडने पुरम चौक मार्गे जातील.

स. गो. बर्वे चौकातून छत्रपती श्री शिवाजी महाराज मार्गाने पुणे स्टेशनकडे जाणाऱ्या बसेस प्रीमियर गॅरेज चौकातून डावीकडे वळून मंगला थिएटर समोरुन पुढे डावीकडे वळून राष्ट्रवादी काँग्रेस भवन उजवीकडे वळून कुंभारवेस चौक डावीकडे वळून शाहिर अमर शेख चौक मार्गे जातील. कोथरुडकडून येणाऱ्या व अप्पा बळवंत चौक मार्गे पुणे स्थानककडे जाणाऱ्या पीएमपीएमएल बसेस बाजीराव रोडने गाडगीळ पुतळा चौक उजवीकडे वळून कुंभार वेस चौक मार्गे पुणे स्थानकाकडे जातील.

दुचाकी व हलक्या चारचाकी वाहनांसाठी मार्ग: ही वाहने स. गो. बर्वे चौकातून सरळ जंगली महाराज मार्गाने बालगंधर्व चौकातून डावीकडे वळून इच्छितस्थळी जातील.

जिजामाता चौकातून छत्रपती श्री शिवाजी महाराज मार्गाने स्वारगेटकडे जाण्याकरीता पर्यायी मार्गाचा वापर वापर करावा. जिजामाता चौक डावीकडे वळून गणेश रोडने फडके हौद चौक, देवजीबाबा चौक, उजवीकडे वळून हमजेखान चौक सरळ महाराणा प्रताप रोडने किंवा उजवीकडे वळून लक्ष्मी रोडने सोन्या मारुती चौक, बेलबाग चौक, डावीकडे वळून शिवाजी रोडने इच्छितस्थळी जातील. शिवाजीपुलावरुन गाडगीळ पुतळा चौक. डावीकडे वळून कुंभारवेस चौक, शाहिर अमर शेख चौक मार्गे इच्छितस्थळी जातील. शिवाजीपुलावरून गाडगीळ पुतळा चौक मार्गे फडके हौद चौकाकडे जाताना (प्रेमळ विठोबा मंदिराकडे जाणारा रस्ता वगळून) वाहने जिजामाता चौकातूनच डावीकडे वळून जातील.

अप्पा बळवंत चौकातून बुधवार चौकाकडे जाणारी सर्व वाहतूक पर्यायी मार्गातून वळविण्यात येत असून ही वाहने अप्पा बळवंत चौक, बाजीराव रोडने इच्छितस्थळी जातील.

बाजीराव रोडने सायंकाळी महत्वाच्या व मानाच्या गणपतींच्या मिरवणुका सुरु झाल्यानंतर आवश्यकतेप्रमाणे पुरम चौकातून बाजीराव रोडने मनपाकडे जाणारी वाहतूक आवश्यकतेनुसार इतर मार्गावर वळविण्यात येईल. सदरची वाहने पुरम चौकातून टिळक रोडने अलका टॉकीज चौक, खंडोजीबाबा चौक मार्गे इच्छितस्थळी जातील.

त्याचप्रमाणे मानाचे गणपतींच्या मिरवणुकीच्या अनुषंगाने तसेच शहराचे मध्यवर्ती भागातील वाहतूकीची परिस्थती पाहून शिवाजी रोड, बाजीराव रोड, गणेश रोड, लक्ष्मी रोड व इतर मिरवणुक मार्गावरील अंतर्गत वाहतूकीत आवश्यकतेप्रमाणे बदल करण्यात येणार असल्याचे पोलीस उपायुक्त विजयकुमार मगर यांनी कळविले आहे.

पुणे, दि. २४: सामाजिक न्याय व विशेष सहाय्य विभाग आणि इतर मागास बहुजन कल्याण विभागामार्फत देण्यात येणाऱ्या भारत सरकार शिष्यवृत्ती, शिक्षण शुल्क, परीक्षा शुल्क प्रतिपूर्ती, राजर्षी शाहू महाराज गुणवत्ता शिष्यवृत्ती आणि व्यावसायिक अभ्यासक्रमात शिक्षण घेत असलेल्या विद्यार्थ्यांना निर्वाह भत्ता इत्यादी योजनेचे सन २०२२-२३ या शैक्षणिक वर्षातील अर्ज विद्यार्थ्यांनी महाडीबीटी पोर्टलवरुन भरावेत असे आवाहन करण्यात आले आहे.

पुणे जिल्ह्यातील अनुसूचित जाती, विमुक्त जाती, भटक्या जमाती, विशेष मागास प्रवर्ग आणि इतर मागास प्रवर्गातील विद्यार्थ्यांनी विहित मुदतीत आपले शिष्यवृत्तीचे अर्ज https://mahadbtmahait.gov.in या पोर्टलवर ऑनलाईन भरून ऑफलाईन पद्धतीने आपल्या महाविद्यालयात जमा करणे आवश्यक आहे.

सन २०२२-२३ या वर्षात १०० टक्के विद्यार्थ्यांची नोंदणी झालेली नसल्याने सर्व महाविद्यालयातील प्राचार्यांनी ३१ जानेवारी २०२३ पर्यंत १०० टक्के नोंदणी होईल याची दक्षता घ्यावी. तसेच महाविद्यालयाकडील प्रलंबित अर्जही २ दिवसात सहायक आयुक्त कार्यालयाकडे सादर करावेत.

जिल्ह्यातील सर्व महाविद्यालयांनी प्रवेशित एकही पात्र मागासवर्गीय विद्यार्थी शिष्यवृत्तीपासून वंचित राहणार नाही याची खबरदारी घ्यावी. विहित मुदतीत अर्ज सादर न केल्यास आणि त्यामुळे एखादा पात्र मागासवर्गीय विद्यार्थी शिष्यवृत्तीपासून वंचित राहिल्यास त्यास सामाजिक न्याय विभाग आणि इतर मागास बहुजन कल्याण विभाग जबाबदार राहणार नाहीत, असे समाज कल्याण सहाय्यक आयुक्त संगिता डावखर यांनी कळविले आहे.

पुणे, दि.२४: स्वातंत्र्याचे अमृत महोत्सवी वर्ष आणि जिल्हा ग्रंथालय अधिकारी कार्यालयाच्या स्थापनेच्या रौप्य महोत्सवी वर्षाचे औचित्य साधून ‘वाचक वाढवा अभियान’ राबविण्यात येत आहे. या अंतर्गत जिल्हा ग्रंथालय अधिकारी कार्यालयामार्फत नवीन वैयक्तिक व संस्था सभासद नोंदणी करण्यात येत आहे.

ग्रंथालयात १ लाख २५ हजार ४०० हून अधिक ग्रंथसंपदा आहे. यामध्ये अनेक संदर्भ ग्रंथ, कथा, कादंबऱ्या, व्यक्तीमत्व विकास, महिलांसाठींचे ग्रंथ, बालवाङ्मय, स्पर्धा परीक्षा आदी विषयांचे ग्रंथ मराठी, हिंदी व इंग्रजी भाषेतील उपलब्ध आहेत. या ग्रंथालयात १ हजार ४७८ वैयक्तिक व २० संस्था सभासद आहेत.

जिल्ह्यातील जेष्ठ नागरिक, महिला, शालेय व महाविद्यालयीन विद्यार्थी व शिक्षक, संशोधक आदी तसेच शासनमान्य सार्वजनिक व ग्रामपंचायत ग्रंथालये, संशोधन ग्रंथालये, जिल्हा व तालुका ग्रंथालय संघ, शाळा, महाविद्यालये व इतर नोंदणीकृत संस्थांनी जिल्हा ग्रंथालय, ९६६/१, सरदार बिल्डींग, गुरुद्वारासमोर, रविवार पेठ, पुणे येथे भेट देऊन सभासद होण्याचे आवाहन जिल्हा ग्रंथालय अधिकारी श्रेया गोखले यांनी केले आहे.

पुणे-पुणे जिल्ह्यातल्या पारगाव (ता. दौंड) येथे एकाच कुटुंबातील 7 मृतदेह सापडल्याने एकच खळबळ उडाली आहे. बदलत्या काळात आतंरधर्मीय, आंतरजातीय लग्न मोठ्या प्रमाणात होऊ लागली आहेत. मात्र, अद्याप जुन्या रितीरिवाजांना पाळून असलेल्या एका कुटंबातील मुलाने लग्नाकरिता एका महिलेस पळवून नेल्याच्या रागातून मुलाच्या पित्यासह कुटुंबाने आत्महत्या केल्याचा धक्कादायक प्रकार उघडकीस आला आहे.

पोलिसांना सर्व मृतदेहांची ओळख पटवण्यात यश आले आहे. यात तीन लहान मुलांचा समावेश असल्याने हळहळ व्यक्त होत आहे.दौंड तालुक्यातील पारगाव येथे भीमा नदी पात्रात सोमवारी एकाच कुटुंबातील चार जणांचे मृतदेह सापडले होते. आज मंगळवारी, 24 जानेवारी रोजी दुपारी 1 नंतर या नदीपात्रात पुन्हा तीन लहान मुलांचे मृतदेह आढळून आले आहेत. या सर्व मृतदेहांची ओळख पटविण्यात पोलिसांना यश आले आहे. मोहन उत्तम पवार (अंदाजे वय 50 वर्षे) संगीता मोहन पवार (अंदाजे वय 45 वर्षे, दोघे रा. खामगाव, ता.गेवराई) त्यांचे जावई श्यामराव पंडित फुलवरे (अंदाजे वय 32 वर्षे) त्यांची पत्नी राणी श्यामराव फुलवरे (अंदाजे वय 27 वर्षे) श्यामराव फुलवरे यांचा मुलगा रितेश श्यामराव फुलवरे (वय 7 वर्षे) छोटू श्यामराव फुलवरे (वय 5 वर्षे) आणि कृष्णा (वय 3 वर्षे) असे एकूण 7 जणांचे मृतदेह या नदीपात्रात आढळून आले आहेत. याबाबत यवत पोलिस ठाण्यात अक्समात मृत्यूचा गुन्हा दाखल करण्यात आला आहे.

पुणे स्थानिक गुन्हे शाखेचे वरिष्ठ पोलिस निरीक्षक अविनाश शिळीमकर यांनी दिलेल्या माहितीनुसार, मोहन पवार हे मुळचे बीड जिल्हयातील गेवराई परिसरातील रहिवासी असून एक वर्षापूर्वी कुटुंबासह दौंड परिसरातील पारगाव येथे रहाण्यास आले होते. शेतमजुरी, माती खोदकाम, उसतोडणी अशी कामे ते करत होते. मोहन पवार हे निघोज गावात पालावर राहत असताना त्यांचा छोटा मुलगा अनिल पवार (वय-20) याने त्यांच्याच समाजातील पतीपासून विभक्त राहत असलेल्या महिलेला 17 जानेवारी रोजी लग्नाकरिता पळवून नेले होते.अनिलने महिलेला पळवून नेल्याचे समजताच मोहन पवार यांनी त्यांच्यापासून पुण्यात विभक्त राहत असलेला मोठा मुलगा राहुल पवार यास फोन करून माहिती दिली. तुझ्या छोट्या भावाने एकाची मुलगी पळवून नेली आहे. त्यामुळे ती परत आणण्यास त्याला सांग, अन्यथा आम्ही विष घेऊन कुटुंबासह आत्महत्या करू असे सांगितले होते. त्यानंतर त्या दिवशी रात्री मोहन पवार हे त्यांच्या पालासह कुटुंबास घेऊन समाजात बदनामी होईल या भीतीने दुसरीकडे निघून गेले. त्यानंतर त्यांचा ठावठिकाणा मिळून येत नव्हता.

पोलिसांना 18 ते 22 जानेवारी दरम्यान भीमा नदीपात्रात एकाच कुटुंबातील चार मृतदेह मिळून आले होते. घातपाताचा संशय व्यक्त केला जाऊ लागल्याने पोलिसांनी एनडीआरएफ पथकाच्या मदतीने नदीपात्रात शोधकार्य सुरू केल्यावर मंगळवारी आणखी तीन मृतदेह बचावकार्य पथकास नदीपात्रात सापडले. घटनेची माहिती मिळताच, पुणे ग्रामीण पोलिस अधीक्षक अंकित गोयल यांनी घटनास्थळी जाऊन परिस्थितीची पाहणी केली. एकाच कुटुंबातील सातजणांचा अशाप्रकारे मृत्यू झाल्याने परिसरात हळहळ व्यक्त होत आहे. पुढील तपास यवत पोलिस करत आहेत.

पुणे, दि. 24 : मराठी विश्वकोश हे ज्ञानाच्या लोकशाहीकरणाचे साधन असून मराठी भाषेचे संवर्धन व वृद्धीमध्ये विश्वकोशाचे मोलाचे योगदान असल्याचे प्रतिपादन महाराष्ट्र राज्य मराठी विश्वकोश निर्मिती मंडळाचे अध्यक्ष डॉ. राजा दीक्षित यांनी केले.

मराठी भाषा संवर्धन पंधरवाड्यानिमित्त विभागीय माहिती कार्यालय आणि जिल्हा माहिती कार्यालय, पुणे यांच्या संयुक्त विद्यमाने आयोजित ‘विश्वकोशाची जडणघडण आणि मराठी भाषा’ या विषयावर आयोजित व्याख्यान प्रसंगी ते बोलत होते. यावेळी पुणे विभागीय माहिती उपसंचालक डॉ. पुरुषोत्तम पाटोदकर, जिल्हा माहिती अधिकारी डॉ. किरण मोघे, भाषा संचालनालयाचे अधीक्षक सुनील सिरसाट आदी उपस्थित होते.

डॉ. दीक्षित म्हणाले, मराठी विश्वकोश ज्ञानाचे साधन असल्याने निर्मिती प्रक्रियेमध्ये अचूकता आणि गुणवत्तेला महत्व देण्यात येत आहे. लोकशिक्षणाच्या अध्यापनशास्त्रात विश्वकोश हे मोलाचे साधन आहे. विश्वकोश भाषावृद्धी व समृद्धीला हातभार लावतो. परिभाषा व प्रमाणभाषा घडवण्यासाठी मंडळ जाणीवपूर्वक प्रयत्न करते. ग्रामीण भाग, आदिवासी पाडे, लहान बालकांपर्यत विश्वकोश पोहचवण्यासाठी प्रयत्न करण्यात येत आहेत. मुद्रित आणि संगणकीय माध्यमांचा मेळ घालून ही वाटचाल चालू राहणार आहे.

मराठी विश्वकोशाच्या दुसऱ्या आवृत्तीसाठीचे काम सुरू झाले आहे. नोंदींमध्ये अचूकता व अद्ययावतता आणणे आणि वादग्रस्तता येऊ नये याची काळजी घेणे अशी त्रिसूत्री वापरून, मूळ छापील नोंदी आणि संकेतस्थळावरील नव्या नोंदी एकत्र करून दुसरी विस्तारित आवृत्ती तयार करण्यात येईल. कुमार कोशाचे दोन नवे खंड सुमारे सहा महिन्यांत, तर नवे माहितीपुस्तक येत्या वर्षभरात प्रकाशित करण्याचा प्रयत्न आहे.  येत्या काळात बालकोश आणि ऑलिंम्पिक कोशाची निर्मितीही प्रस्तावित आहे.

विश्वकोशाचे कार्य उत्तम रितीने चालावे यासाठी शासनाने सकारात्मक भूमिका घेतली आहे. मराठी भाषा विभागाचे मंत्री  दीपक केसरकर यांनी वाई येथील मराठी विश्वकोश कार्यालयाला भेट देऊन नव्याने अद्ययावत इमारत उभारणार असल्याची घोषणा केली आहे. शासनाच्या पाठिंब्यामुळे अधिक जोमाने कार्य करीत पुढील उपक्रम राबवण्याचा निर्धार डॉ. दीक्षित यांनी व्यक्त केला.

माहिती व तंत्रज्ञानाच्या वेगवान युगात तंत्रज्ञानाच्या माध्यमातून विश्वकोश वाचकांपर्यत पोहचविण्यात येत आहे. मराठी विश्वकोश 2007 या वर्षी सीडीमध्ये, 2011 मध्ये संकेतस्थळावर, 2017 मध्ये पेनड्राईव्ह आणि 2018 मध्ये भ्रमणध्वनी उपयोजकावर उपलब्ध करुन देण्यात आले आहे. दोन्ही  संकेतस्थळांना मिळून सुमारे तीन कोटी वाचकांनी भेट दिली आहे, असेही डॉ. दीक्षित म्हणाले.

डॉ. पाटोदकर म्हणाले, माहिती व जनसपंर्क महासंचालनालयाच्या वतीने शासनाच्या विविध लोककल्याणकारी निर्णयांची, ध्येयधोरणांची, उपक्रमांची माहिती प्रसिद्धीच्या माध्यमातून नागरिकांपर्यत पोहचविण्यात येते. नागरिकांपर्यंत अचूक व वस्तुनिष्ठ माहिती पोहचविण्यासाठी विभाग नेहमीच प्रयत्न करीत आहे. हे काम करीत असताना मराठी भाषेचे अचूक ज्ञान असणे फार गरजेचे असून यासाठी मराठी विश्वकोशाचा माहिती व जनसंपर्क विभागाला संदर्भ म्हणून नेहमीच उपयोग होत असतो, असेही ते म्हणाले.

पुणे-दिनांक 24 जानेवारी, 2023
बहू माध्यमातून प्रदर्शित दूर्मिळ छायाचित्रे, लघूपट तसेच अत्यंत कमी वेळात भारतीय स्वातंत्र्य
लढ्याची माहिती श्री मार्तंड देव संस्थान जेजूरी येथे येण्यारा भाविंकाना व्हावी यासीठी आयोजित करण्यात
आलेल्या आजादी का अमृत महोत्सव व आंतरराष्ट्रीय तृणधान्य वर्षे- 2023 या बहूमाध्यम प्रदर्शनाला भेटी
द्याव्यात,असे आवाहन माहिती आणि प्रसारण मंत्रालयाचे, पत्र सूचना कार्यालय मुंबई व केंद्रीय संचार ब्यूरो,
पुणे (महाराष्ट्र व गोवा राज्य ) च्या अतिरिक्त महासंचालक श्रीमती स्मिता वत्स शर्मा यांनी उद्घाटन प्रसंगी
केले.
या प्रसंगी प्रमाद गायकवाड, उपविभागीय अधिकारी, उपविभागीय कार्यालय, पुरंदर, निखिल देशमुख,
उपसंचालक,केंद्रीय संचार ब्यूरो, पुणे, राजेद्र जगताप, मुख्याधिकारी, श्री मार्तंड देवस्थान जेजुरी, चारुदत्त
इंगोले, मुख्याधिकारी जेजुरी नगर परिषद, धनराज गिराम, बालविकास अधिकारी, पंचायत समिती पुरंदर,
डॉ. सारंग डांगे, वैद्यकिय अधिकारी, प्राथमिक आरोग्य केंद्र, बेलसर. श्री मार्तंड देवस्थान जेजुरीचे माजी
विश्वस्त सर्वश्री तुशार सहाणे, पंकज निकूडे पाटील, सॉलिसिटर प्रसाद शिंदे, अशोकराव संकपाळ,
व्यवस्थापक सतीश घाडगे, क्षेत्रीय प्रचार अधिकारी माधव जायभाये, सहायक प्रचार अधिकारी पी.कुमार
आदी मान्यवर यावेळी उपस्थित होते.

या प्रदर्शनाचे आयोजन माहिती आणि प्रसारण मंत्रालयाचे केंद्रीय संचार ब्यूरो, प्रादेशिक कार्यालय पुणे व श्री
मार्तंड देव संस्थान जेजुरी, ता. पुरंदर, जि. पुणे यांच्या वतीने करण्यात आले असून या प्रदर्शनात भारतीय
स्वातंत्र्य लढ्याच्या इतिहासातील विविध महत्त्वाच्या घटना-घडामोडी, बहूमाध्यमातून प्रदर्शित करण्यात
आल्या आहेत. यात 1857 ते 1947 या कालखंडातील भारतीय स्वातंत्र्य लढ्यातील महत्वाच्या घडामोडी
आणि महान स्वातंत्र्यसेनानी यांची जीवनगाथा अत्यंत संक्षिप्त माहिती आणि बहूमाध्यमातून अधूनिक
तंत्रज्ञानाच्या सहायाने दर्शविण्यात आली आहे.
संयूक्त राष्ट्र संघाने 2023 हे वर्षे आंतराष्ट्रीय तृणधान्य वर्षे म्हणून साजरे करण्याच्या निर्णय घेतला आहे,
भारत हा जगातील सर्वात जास्त तृणधान्य पिकविणारा देश आहे, ज्वारी,बाजरी,नाचणी, वरई,राळा,
राजगिरा या धान्यातून आरोग्यास लोह, कॅल्शियम, झिंक, आयोडिन आदी घटक मिळतात, सा सर्व धान्यांचा
प्रचार व प्रसार करण्यासाठी या प्रदर्शनस्थळी तृणधान्य प्रदर्शनही भरविण्यात आले आहे.
गडावर येणा-य़ा भाविकांना कमीत कमी वेळात आणि मनोरंजनाच्या माध्यमातून या प्रदर्शनाची माहिती
देण्यासाठी या प्रदर्शनात विविध स्वातंत्र्य सेनानींचे कटआऊट्स, बॅकलीट पॅनल्स्, एलइजी वॉल, प्रदर्शनी
पॅनल्स, लघू चित्रपट आदी माध्यमांचा वापर करण्यात आला आहे.

प्रदर्शनाच्या ठिकाणी तहसिल कार्यालय, पंचायत समिती, पुरंदर, जेजुरी नगर परिषद यांच्या द्वारे विविध
योजनांची माहिती देणारे स्टाल्स् मांडण्यात आले आहेत, यात महिला बाल कल्याण विभागाच्या वतीने
तृणधान्यची माहिती देण्यासाठी या धान्यंपासून तयार करण्यात आलेल्या सकस आहाराचे प्रदर्शन
भरविण्यात आले आहे. आरोग्य विभागाद्वारे भाविकांची प्राथमिक तपासणी करुन त्यांना तात्पूरता उपचार
देण्यासाठी स्टाल उभारण्यात आला आहे. नगर परिषद जेजुरीच्या वतिने आयुषमाण भारत आणि प्रधानमंत्री
स्वनिधी योजनांचे लाभधारकांना कार्ड वाटप करण्यात आले या प्रदर्शन स्थळी जय मल्हार कलापथकाद्वारे
सांस्कृतिक कार्यक्रमाचे आयोजन करण्यात आले आहे.
हे प्रदर्शन दिनांक 24 ते 28 जानेवारी 2023 पर्यत सर्व भाविकांसाठी खूल ठेवण्यात आले असून सर्व
नागरिकांनी या प्रदर्शनास भेटी द्याव्यात असे आवाहन भारत सरकाच्या वतीने करण्यात आले आहे.

पुणे, 23 जानेवारी 2023

नेताजी सुभाषचंद्र बोस यांच्या जयंतीनिमित्त साजऱ्या होत असलेल्या “पराक्रम दिना”निमित्त  केंद्रीय शिक्षण मंत्रालयातर्फे घेण्यात आलेल्या देशव्यापी चित्रकला स्पर्धा उपक्रमाचा भाग म्हणून आज गणेशखिंड येथील केंद्रीय विद्यालय तसेच लोहगाव येथील एअर फोर्स स्टेशन येथे असलेले केंद्रीय विद्यालय क्र.1 येथे जिल्हास्तरीय चित्रकला स्पर्धेचे आयोजन करण्यात आले. येत्या 27 जानेवारी 2023 रोजी होणार असलेल्या “परीक्षा पे चर्चा” या कार्यक्रमाच्या पार्श्वभूमीवर, विद्यार्थ्यांमध्ये परीक्षेविषयी असलेल्या तणावाचे निवारण करण्यासाठी देखील या अभिनव उपक्रमाचे आयोजन करण्यात आले होते. या स्पर्धेत सहभागी झालेल्या  200 हून अधिक विद्यार्थ्यांना ई-प्रमाणपत्रे तसेच पंतप्रधान नरेंद्र मोदी यांनी लिहिलेले “एग्झाम वॉरियर्स” या पुस्तकाच्या प्रती देऊन गौरविण्यात आले.

परीक्षा पे चर्चा हा कार्यक्रम दर वर्षी आयोजित करण्यात येतो आणि त्यात परीक्षेला सामोरे जाणाऱ्या हजारो विद्यार्थ्यांशी पंतप्रधान अर्थपूर्ण संवाद साधतात. परीक्षेचा ताण कमी करण्यासाठी आणि परीक्षेत उत्तम दर्जाचे यश मिळविण्यासाठी पंतप्रधानांनी विद्यार्थ्यांना 25 मंत्र दिले आहेत. आजच्या चित्रकला स्पर्धेच्या संकल्पना म्हणून हे 25 मंत्रच देण्यात आले होते. पुणे आणि परिसरातील विविध शाळांतील विद्यार्थ्यांनी या स्पर्धेसाठी उत्स्फूर्त प्रतिसाद नोंदवला.

केंद्रीय विद्यालय क्र.1 एएफएस लोहगाव:

लोहगाव येथील केंद्रीय विद्यालय क्र.1 एएफएस मध्ये पुणे जिल्ह्यातील 21 शाळांमध्ये शिकणाऱ्या 105 विद्यार्थ्यांनी या स्पर्धेत भाग घेतला. यामध्ये केंद्रीय विद्यालये, सीबीएसई तसेच राज्य शिक्षण मंडळाच्या शाळांमध्ये शिकणाऱ्या विद्यार्थ्यांचा समावेश होता. परीक्षक मंडळाच्या सदस्यांनी सर्व चित्रांचे बारकाईने परीक्षण करुन अंतिम निकाल घोषित केले. सर्वोत्कृष्ट चित्रासाठी पुढील पाच विद्यार्थ्यांना पुरस्कार देण्यात आले: 1)भूमी जैवाल (डॉ.मर थिओफिलस शाळा), 2) हर्षल देवकर (एयर फोर्स शाळा, चंदननगर), 3)ओवी यादव (लष्करी शाळा, दिघी), 4)रितेश रोशन (केव्ही1 एएफएस) आणि 5)शिवानी गाडे (जवाहर नवोदय विद्यालय) ग्रुप कॅप्टन संजय पिसे, श्री राजेंद्र वडळकर, श्रीमती प्रफुल्ला शिंदे आणि इतर मान्यवर यावेळी उपस्थित होते.

केंद्रीय विद्यालय गणेशखिंड, पुणे 

गणेशखिंड येथील केंद्रीय विद्यालयात आयोजित करण्यात आलेल्या स्पर्धेत 22 शाळांच्या 100 विद्यार्थ्यांनी भाग घेतला. यामध्ये केंद्रीय विद्यालये, सीबीएसई शाळा तसेच राज्य शिक्षण मंडळाच्या शाळांमध्ये शिकणाऱ्या विद्यार्थ्यांचा समावेश होता.

परीक्षकांनी अंतिम निकाल जाहीर केले. चित्रकला स्पर्धेचे पाच विजेते पुढीलप्रमाणे आहेत:

1. अवनी थोरात (डी.ए.व्ही. पब्लिक स्कुल, पुणे),
2. श्वेता चव्हाण (केंद्रीय विद्यालय, गणेशखिंड, पुणे)
3. सानिका संजय कुमार (केंद्रीय विद्यालय क्र.1 देहू रोड,पुणे)
4. मुस्कान सोळंकी (जी.के.गुरुकुल, पिंपळे सौदागर, पुणे)
5. उर्जिता राव (डी.ए.व्ही. सरकारी शाळा,औंध, पुणे

विद्यालयाच्या प्राचार्य शबाना खान, श्री उज्ज्वल आवारे यांच्यासह इतर मान्यवर या कार्यक्रमाला उपस्थित होते.

पुणे – राज्यपाल भगतसिंह कोश्यारी सतत वादग्रस्त विधान करत राहिल्याने त्यांची पदावरून हकालपट्टी केली पाहिजे, अशी मागणी राष्ट्रपतींकडे करत आलो आहे. राज्यपाल भगतसिंह कोश्यारी यांना स्वेच्छेने मुक्त न होऊ देता, राष्ट्रपतींनी त्यांची हकालपट्टी करावी, अशी आमची मागणी असल्याचे काँग्रेस प्रदेशाध्यक्ष नाना पटोले म्हणाले.काँग्रेस पक्षाच्या वतीने महात्मा फुले वाडा येथे आयोजित ‘हाथसे हाथ जोडो ‘अभियानाच्या राज्यस्तरीय कार्यक्रमाच्या शुभारंभ प्रसंगी ते बोलत होते.यावेळी माजी केंद्रीय गृहमंत्री सुशीलकुमार शिंदे, शहर अध्यक्ष अरविंद शिंदे ,माजी मंत्री रमेश बागवे, माजी आमदार मोहन जोशी, माजी आमदार दीप्ती चौधरी, अभय छाजेड,संगीता तिवारी उपस्थित होते.

राज्याचे राज्यपाल भगतसिंह कोश्यारी यांनी प्रधानमंत्री यांना लेखी पत्र पाठवत जबाबदारीमधून मुक्त करण्यात यावे असे सूचित केले. मात्र, राज्यपाल यांनी राज्यात सविधाननुसार काम करणे महत्वाचे होते मात्र तसे ते वागले नाही. त्यांच्या काळात राज्यपाल भवन हे भाजप भवन झाले होते. संविधान व्यवस्थेला छेद देण्याचा काम त्यांनी केले. राज्यपाल यांना एका पक्षाची बाजू घेऊन काम करणे चुकीचे होते.

राज्यपाल यांच्या मनात बहुजन समाज बाबतचा राग वेळोवेळी त्यांच्या वक्तव्यामधून दिसून आला. महात्मा फुले, सावित्रीबाई फुले, डॉ बाबासाहेब आंबेडकर, छत्रपती शिवाजी महाराज यांच्याबाबत आक्षेपार्ह वक्तव्य त्यांनी केले. भाजप कार्यकर्ता राज्यपाल होऊन ते वारंवार राज्यातील महापुरुष यांचा अपमान करत होते. त्यामुळे राष्ट्रपती यांना आमची विनंती आहे की, त्यांनी कोश्यारी यांची हकालपट्टी करावी, त्यांना स्वइच्छेनुसार राज्यातून जाऊ देऊ नये. यापुढे संविधान रक्षण करणारे राज्यपाल, राष्ट्रपती यांनी महाराष्ट्रामध्ये पाठवावे, असे मत पटोले यांनी व्यक्त केले.

पटोले म्हणाले, आजपासून महाराष्ट्र मध्ये पक्षाचे हे अभियान सुरू करत आहे.देशाच्या संविधान व्यवस्थेला आव्हान देण्याचे काम सध्या करण्यात येत आहे. सुशिक्षित लोकांना बेरोजगार करण्याचे काम केले जात आहे.लोकशाहीत जनता देशात राजा असून त्यांना आव्हान देण्याचे काम सत्ताधारी करत आहे.काँग्रेस नेते राहुल गांधी यांनी ‘भारत जोडो’ यात्रा माध्यमातून लाखो लोकांना देशभरात जोडले आहे. महात्मा फुले यांनी समतेचा विचार दिलेला आहे.त्याकाळी बहुजन यांना संपविण्याचा काम करण्यात येत होते आणि शेतकऱ्यांवर अत्याचार केला जात होता त्याचा सामना त्यांनी केला.

आंबेडकर यांचा युती बाबत नेमका प्रस्ताव नाही

शिवसेना पक्ष प्रमुख उद्धव ठाकरे आणि भारिप नेते प्रकाश आंबेडकर यांच्या युतीला आमच्या शुभेच्या आहे. त्यांचा युती बाबत कोणता प्रस्ताव आमच्याकडे अद्याप आलेला नाही. ठाकरे यांच्याशी माझे आज बोलणे झालेले आहे. त्यांची पत्रकार परिषद ही महविकास आघाडीची नव्हती तर सदर दोन पक्षाची होती. युती बाबत नेमका प्रस्ताव अद्याप आंबेडकर यांनी आम्हाला दिलेला नाही असे मत पटोले यांनी व्यक्त केले.

पुणे, दि. २३ जानेवारी २०२३:नवीन वीजजोडण्यांसाठी पुरेशा प्रमाणात नवीन वीजमीटर उपलब्ध करून देण्यासाठी महावितरणच्या पुणे परिमंडलामध्ये सूक्ष्म नियोजन सुरु करण्यात आले आहे. यामध्ये दर आठवड्यामध्ये दोनदा नवीन वीजजोडण्यांसह विभागनिहाय वीजमीटरच्या उपलब्धतेचा आढावा घेण्यात येत आहे व आवश्यकतेनुसार मीटर उपलब्ध करून देण्यात येत आहे. या नियोजनामुळे कोटेशनची रक्कम भरलेल्या (पेडपेंडिंग) तसेच पायाभूत यंत्रणा अस्तित्वात असलेल्या ठिकाणी नवीन वीजजोडणी कार्यान्वित करण्याची प्रक्रिया अधिक गतीमान झाली आहे.

दरम्यान, पुणे परिमंडलामध्ये सद्यस्थितीत सिंगल व थ्रीफेजचे एकूण ३१ हजार ५०५ नवीन वीजमीटर उपलब्ध आहेत तर कोटेशनची रक्कम भरलेल्या व पायाभूत यंत्रणा अस्तित्वात असलेल्या ९ हजार ५९१ अकृषक ग्राहकांकडे नवीन वीजजोडणी कार्यान्वित करण्यात येत आहे.

पुणे परिमंडलामध्ये नवीन वीजजोडण्या देण्याची कार्यवाही तत्परतेने करण्याचे निर्देश मुख्य अभियंता श्री. राजेंद्र पवार यांनी दिले आहेत. त्यासाठी सर्वच १२ विभागांमधील नवीन वीजजोडणी तसेच वीजमीटरच्या उपलब्धतेबाबत परिमंडलस्तरावरून दर सोमवारी व गुरुवारी विभागनिहाय आढावा घेण्यात येत आहे. नवीन वीजजोडणी देण्यासोबतच नादुरुस्त मीटर बदलायचे आहेत त्या विभागात पुरेशा संख्येत व तातडीने नवीन मीटर उपलब्ध करून देण्यात येत आहेत. या प्रक्रियेचा दर सोमवारी मुख्य अभियंता श्री. राजेंद्र पवार स्वतंत्रपणे आढावा घेत आहेत. त्यामुळे नवीन वीजजोडण्या कार्यान्वित करण्याच्या गतीमध्ये लक्षणीय वाढ झाली आहे.

पुणे परिमंडल अंतर्गत भोसरी, पिंपरी, कोथरूड, शिवाजीनगर, रास्तापेठ, पद्मावती, पर्वती, नगररोड, बंडगार्डन, मंचर, मुळशी व राजगुरुनगर विभागांमध्ये सोमवार (दि. २३)पर्यंत सिंगल फेजचे २१ हजार ८२ तसेच थ्री फेजचे १० हजार ४२३ नवीन वीजमीटर उपलब्ध आहेत. तर या तुलनेत सर्वच १२ विभागांमध्ये पायाभूत यंत्रणा अस्त्तित्वात असलेल्या सिंगल फेजच्या ७ हजार ७०५ आणि थ्री फेजच्या १ हजार ८८६ अशा एकूण ९ हजार ५९१ नवीन वीजजोडण्या कार्यान्वित करण्याची प्रक्रिया सुरू आहेत.

गेल्या जानेवारी ते डिसेंबरपर्यत महावितरणकडून तब्बल एक लाख ७७ हजार १८६ नवीन वीजजोडण्या देण्यात आल्या आहेत. यामध्ये लघुदाब वर्गवारीमध्ये घरगुती- १ लाख ४६ हजार ७८, वाणिज्यिक- १९ हजार ८५९, औद्योगिक- ३५०४ आणि कृषी व इतर ७ हजार ४५५ अशा एकूण १ लाख ७६ हजार ८९६ तर उच्चदाब वर्गवारीमध्ये २९० नवीन वीजजोडण्या देण्यात आल्या आहेत.

 नवीन वीजजोडणी व नादुरुस्त मीटर बदलण्यासाठी नवीन मीटर उपलब्ध होत नसल्यास महावितरणच्या संबंधित विभागाचे कार्यकारी अभियंता यांच्याशी ग्राहकांनी थेट संपर्क साधावा. सोबतच पुरेशा प्रमाणात वीजमीटर उपलब्ध असल्याने वीजग्राहकांना बाजारातून मीटर खरेदी करण्याची आवश्यकता नाही असेही महावितरणकडून स्पष्ट करण्यात आले आहे.