पुणे दि. 25 : खासदार बापट यांनी केलेल्या मागणीवरुन शिवाजीनगर रेल्वे स्टेशन येथून पुणे-लोणावळा लोकल सेवा सुरु करण्यास रेल्वे प्रशासनाने मान्यता दिली असून ३० जानेवारी पर्यंत बापट यांच्या हस्ते त्याचे उद्घाटन होणार असून पुणे-लोणावळा लोकल सेवा सुरु होणार आहे.
खासदार बापट यांनी सांगितले की पुणे रेल्वे स्टेशन येथून परराज्यात लांब पल्याच्या गाड्यांनी तसेच पुणे-लोणावळा लोकलने प्रवास करणाऱ्या प्रवाशांची संख्या लक्षणीय आहे. आणि दिवसेंदिवस ती वाढत आहे. यामुळे पुणे रेल्वे स्टेशनवर प्रचंड ताण येत असून स्टेशन कडे जाणाऱ्या रस्त्यांवर प्रचंड वाहतूक कोंडीमुळे नागरिकांना वेळेत स्टेशनवर पोहचणे अवघड होते. तसेच पुणे रेल्वे स्टेशनवर इतर मुलभूत सुविधांवरही ताण येत आहे. त्यामुळे प्रवाशांना नाहक त्रास सहन करावा लागतो. या सर्व गोष्टींचा विचार करता पुणे रेल्वे स्टेशन वरील ताण कमी करण्यासाठी शिवाजीनगर, खडकी आणि हडपसर स्टेशन वरून लोकल तसेच बाहेर जाणाऱ्या लांब पल्ल्याच्या गाड्या सोडल्यास पुणे रेल्वे स्टेशनवर येणाऱ्या प्रवाशांची संख्या कमी होऊन पुणे स्टेशन वरील ताण कमी होण्यास मदत होणार आहे. याबाबत मी मागील काही वर्षे होणाऱ्या सर्व बैठकांमध्ये तसेच प्रशासनाकडे वेळोवेळी काही रेल्वे गाड्या शिवाजीनगर, खडकी आणि हडपसर स्टेशन येथून सुरु करण्यासाठी मागणी केली.
शिवाजीनगर, खडकी आणि हडपसर स्टेशनवर नागरिकांना मूलभूत सुविधा उपलब्ध देण्यासाठी लागणारा निधी उपलब्ध होण्यासाठी प्रयत्न केले आहे. त्यामुळे रेल्वे प्रशासन शिवाजीनगर ते लोणावळा या मार्गावर सध्या चार लोकल गाड्या शिवाजीनगर रेल्वे स्टेशन येथून सुरू करणार आहे. याबाबतची सर्व तयारी रेल्वे प्रशासनामार्फत पूर्ण करण्यात आली असून येत्या तीन चार दिवसांमध्ये खासदार बापट यांच्या हस्ते उद्घाटन होणार आहे.

पुणे  : एम्प्रेस बोटॅनिकल गार्डन तर्फे   २५ ते २९ जानेवारी दरम्यान पुष्प प्रदर्शनाचे आयोजन कारण्यात आले असून. प्रदर्शनाचे उद्‍घाटन आज  खासदार श्रीनिवास पाटील यांच्या  हस्ते करण्यात आले . या वेळी संस्थेचे मानद सचिव सुरेश पिंगळे आणि विश्वस्त अनुपमा बर्वे ,श्रीनाथ कवडे ,सुमन किलोस्कर , प्रशांत काळे , प्रशांत चव्हाण ,आदी मान्यवर उपस्थित होते . ॲग्री हॉर्टिकल्चर सोसायटी ऑफ वेस्टर्न इंडिया  या संस्थेच्या वतीने हे प्रदर्शन आयोजित करण्यात आले आहे..  या वर्षीचे प्रदर्शन संस्थेचे मा. अध्यक्ष स्व. श्री. राहुल बजाज यांच्या स्मृतीस अर्पित करीत आहोत.

पुष्पप्रदर्शन २६ ते २९ जानेवारी पर्यंत सकाळी ९ ते रात्री ८ पर्यंत सर्वांसाठी खुले राहणार आहे.
प्रदर्शनात विविध फुले, भाजीपाला, बोन्साय अशा स्पर्धा आयोजित केल्या आहेत. प्रदर्शनात कर्नाटक, आंध्र प्रदेश, सिक्कीममधून विक्रेते येणार आहेत. यामध्ये नर्सरी, शेतीची अवजारे, खते, कुंड्या, बागकामाचे साहित्य, खाद्यपदार्थ असे विविध स्टॉल असणार आहेत.

यावर्षी जपानी पद्धतीने साकारलेल्या विविध पुष्परचना तसेच बोन्साई वृक्षांचे विविध प्रकार या ठिकाणी पाहायला मिळणार आहेत. विविध झाडे, वेली नटलेले एम्प्रेस गार्डन पुष्प प्रदर्शनाच्या निमित्ताने फुललेली बहरलेले असून लवकरच पुणेकरांना यांचा आनंद घेता येणार आहे.
संस्थेमार्फत अगदी १०० वर्षापूर्वीपासून जनमानसात निसर्गाबद्दल आपुलकी निर्माण व्हावी या उद्देशाने पुष्पप्रदर्शने भरविली जात होती. मध्ये काही कालावधीचा खंड वगळता संस्थेने आजवर ती परंपरा कायम ठेवलेली आहे.

बागेमध्ये पुन्हा नव्याने पुष्पप्रदर्शन भरविण्यास जानेवारी, १९९८ सालापासून सुरूवात झाली. अगदी पहिल्या प्रदर्शनापासून पुणेकरांनी यास उस्फूर्त प्रतिसाद दिला.

पुष्पप्रदर्शनाच्या निमित्ताने पुण्यातूनच नव्हे तर अगदी कोल्हापूर, सांगली, नाशिक, आंध्र प्रदेश इ. ठिकाणाहून नर्सरी व्यावसायिक या पुष्पप्रदर्शना मध्ये सहभागी होण्याकरिता येत असतात.या पुष्पप्रदर्शनाचे वैशिष्ठ्य म्हणजे यामध्ये केवळ फुलांचा समावेश न करता निरनिराळ्या प्रकारच्या शोभिवंत झाडांच्या कुंड्या, भाजीपाला, पुष्परचना, बागेच्या प्रतिकृती इ. गोष्टींचा समावेश असतो.
पुष्पप्रदर्शनाच्या निमित्ताने दरवर्षी खास मुलांसाठी चित्रकला व हस्ताक्षर लेखन स्पर्धा देखील आयोजित करण्यात येतात. या स्पर्धेस निरनिराळ्या शाळांमधून सुमारे १००० विद्यार्थ्यांचा सहभाग असतो. यंदाच्या वर्षी देखील शालेय विद्यार्थ्यांसाठी चित्रकला स्पर्धा व हस्ताक्षर लेखन स्पर्धा रविवार दि. २२ जाने. २०२३ रोजी आयोजित करण्यात आलेली आहे.

पुष्पप्रदर्शनामध्ये मुख्य आकर्षण असते ते म्हणजे विविध प्रकारच्या पुष्परचना. यंदाच्या वर्षीदेखील) जपानी पध्दतीने साकारलेल्या विविध पुष्परचना तसेच बोन्साय वृक्षांचे विविध प्रकार स्पर्धकांनी साकारलेल्या विविध कलाकृती या पुष्पप्रेमींच्या पसंतीस नक्कीच उतरतील,

एरवी केवळ पानांनी, वेलींनी व हिरवाईने नटलेली एम्प्रेस गार्डन पुष्पप्रदर्शनाच्या निमित्ताने फुललेली पाहण्याची संधी पुणेकरांना मिळणार आहे.

…तोपर्यंत नदी सुधार प्रकल्पाचे काम बंद ठेवा सांगूनही आयुक्त ऐकत नाहीत -नेमके दडलंय तरी काय ?

पुणे : विशिष्ट लॉबी हाथी धरून महापालिकेचा कारभार फारच चांगला आहे अशी शोखी मिरवीत काम करणाऱ्या महापालिका आयुक्तांनी पुण्यातील खासदार ,आणि पर्यावरण क्षेत्रातील ,तसेच प्रसार माध्यम क्षेत्रातील अनेकांचा विरोध डावलून त्यांच्या शकांना उत्तरे देण्याऐवजी काही हजार कोटीचा नदी सुशोभीकरणाचा प्रकल्प रेटण्याचे काम सुरूच ठेवल्याने आयुक्त आणि त्यांच्या भवतालचे मधमोहोळ संशयाच्या भोवऱ्यात सापडत असल्याचे महापालिकेतील वर्तुळात बोलले जात आहे. त्यातच आज राष्ट्रवादी काॅंगेसच्या खासदार वंदना चव्हाण,नितीन कदम,प्रदीप देशमुख यांनी पत्रकार परिषद घेऊन या प्रकल्पाबाबत विविध मुद्दे पुन्हा एकदा उपस्थित केले आहेत .

राष्ट्रवादी काॅंगेसच्या खासदार वंदना चव्हाण यांनी महापालिका आयुक्तांना केली. प्रवक्ते प्रदीप देशमुख , नितीन कदम यासंदर्भात पत्रकार परिषदेत सांगितले कि,’सदोष असलेला मुळा मुठा नदी सुशोभीकरण प्रकल्पासाठी विद्यार्थ्यांना वेठीस धरण्यास राष्ट्रवादी अर्बन सेलचा आक्षेप असून प्रकल्प मुळात तांत्रिक दृष्ट्या सदोष असल्याने व त्यामुळे पुणेकरांवर गंभीर नैसर्गिक संकट ओढवण्याची शक्यता असल्याने हा प्रकल्प नागरिकांच्या पाठींब्याने होत आहे असे दर्शविण्याचा प्रशासनाचा अट्टहास दिसत आहे.” Pune re” ही मोहीम महानगरपालिकेने ताबडतोब मागे घ्यावी, अशी आमची मागणी आम्ही थेट आयुक्तांपर्यंत पोहोचविली आहे.

चव्हाण यांनी नमूद केले की, पुणे महापालिकेच्या वतीने राबविण्यात येत असलेल्या हजारो कोटी रुपयांच्या मुळा मुठा नदी सुधार व सुशोभीकरण योजनेसंदर्भातील त्रुटी व धोके राष्ट्रवादी अर्बन सेलच्या वतीने आपल्या निदर्शनास आणले होते. यासाठी पुणेकर नागरिक व पुणे मनपाच्या संबंधित अधिकाऱ्यांच्या उपस्थितीत तज्ञाकडून प्रकल्पाचे सादरीकरण देखील आयोजित केले होते. या प्रकल्पामुळे नदीची वहन क्षमता कमी होऊन पूर परिस्थिती निर्माण होऊ शकते असे आम्ही आपणास वारंवार सूचित करत आलो. राज्य शासनाच्या पातळीवर देखील अनेक तज्ञ पुणेकरांच्या वतीने या शंका मांडल्या गेल्या होत्या व जोपर्यंत या शंकाचे निरसन होत नाही तोपर्यंत नदी सुधार प्रकल्पाचे काम बंद ठेवावे असे ठरले. आता दुर्दैवाने पुणे मनपाच्या वतीने हा प्रकल्प पुढे रेटण्याचे काम सुरु आहे.

चव्हाण यांनी नमूद केले की काही नागरिकांनी आमच्या निदर्शनास आणून दिले आहे की पुणे महानगरपालिकेच्या वतीने विद्यार्थ्यांमार्फत योजनेस नागरिकांचा पाठिंबा असल्याचे दर्शवण्यासाठी नागरिकांचे प्रतिज्ञापत्र भरून घेण्यात येत आहे. असा प्रयत्न अत्यंत धक्कादायक व निंदनीय आहे. पुणे शहरातील इतर महत्वपूर्ण प्रकल्पासाठी नागरिकांच्या सूचना ऐकल्या जात नाहीत व त्यांच्या भावनेचा कुठेच आदर केला जात नाही. मात्र आता लहान मुलांना वेठीस धरून बक्षिसांची आमिष दाखवून, त्यांची दिशाभूल करून त्यांचा माध्यमातून त्यांच्या पालकांकडून प्रतिज्ञापत्र भरून घेण्यात येत असून ते चुकीचे व आक्षेपार्ह आहे.

पुणे दि.२५-जिल्हाधिकारी कार्यालयात १३ व्या राष्ट्रीय मतदार दिनानिमित्त आयोजित कार्यक्रमात मतदार नोंदणीत उत्कृष्ट कामगिरी करणाऱ्या अधिकारी-कर्मचारी, स्वयंसेवी संस्थांचा सत्कार करण्यात आला.

अपर जिल्हाधिकारी विजय मोरे यांच्या प्रमुख उपस्थितीत जिल्हाधिकारी कार्यालयात झालेल्या या कार्यक्रमाला निवासी उपजिल्हाधिकारी हिम्मत खराडे, २१४ पुणे कॅन्टोन्मेंट विधानसभा मतदार संघाचे मतदार नोंदणी अधिकारी सिद्धार्थ भंडारे, डॉ.पी.ए.इनामदार, तहसीलदार स्वाती रेडेकर आदी उपस्थित होते.

यावेळी बोलताना श्री.मोरे म्हणाले,लोकशाही व्यवस्थेत निवडणुकांना अनन्यसाधारण महत्व आहे. भारतात निवडणूका मुक्त आणि निष्पक्ष होण्याचे श्रेय निवडणूक यंत्रणा आणि सर्वसमावेशक मतदार यादीला आहे. देशात लोकशाही रुजल्याने देश जगातील पाचवी मोठी अर्थव्यवस्था झाला आहे. मतदार यादी प्रकाशित झाल्यानंतर प्रत्येक मतदाराने आपले नाव आणि तपशील तपासावा आणि पात्र युवकांनी मतदार यादीत नाव नोंदवावे असे आवाहन केले.

यावेळी राष्ट्रीय मतदार दिनानिमित्त शपथ घेण्यात आली. प्रास्ताविकात श्रीमती रेडकर यांनी राष्ट्रीय मतदार दिन कार्यक्रमाबाबत माहिती दिली. ‘मतदानाइतके अमूल्य नसे काही, बजावू हमखास मताधिकार आम्ही’ ही संकल्पना यावर्षी मतदार जागृतीसाठी घेण्यात आली असल्याचे त्यांनी सांगितले.

मान्यवरांच्या हस्ते नवमतदारांना प्रातिनिधिक स्वरूपात मतदार ओळखपत्राचे वाटप करण्यात आले. मतदार नोंदणी शिबिर आयोजनासाठी सहकार्य करणारी महाविद्यालये, स्वयंसेवी संस्थांचे प्रतिनिधी, अधिकारी यांना यावेळी गौरविण्यात आले. मतदार यादी संक्षिप्त पुनरीक्षण आणि छायाचित्र मतदार यादी तयार करण्यात चांगली कामगिरी करणारे मतदार नोंदणी अधिकारी, सहायक मतदार नोंदणी अधिकारी,नायब तहसीलदार, केंद्रस्तरीय अधिकारी, कर्मचारी यांचाही यावेळी सत्कार करण्यात आला.

पुणे दि. २०: पुणे जिल्ह्याने निवडणूक प्रक्रियेत उत्कृष्ट कल्पनांचा अवलंब केल्याबद्दल राष्ट्रपती श्रीमती द्रौपदी मुर्मु यांच्या हस्ते जिल्हाधिकारी डॉ. राजेश देशमुख यांना ‘बेस्ट इलेक्टोरल प्रॅक्टिसेस अवार्ड’ या राष्ट्रीय पातळीवरील पुरस्काराने आज सन्मानित करण्यात आले.

दिल्ली छावणी परिसरातील मानेकशॉ सभागृहात भारत निवडणूक आयोगाच्या वतीने १३ व्या राष्ट्रीय मतदार दिनानिमित्त पुरस्कार वितरण कार्यक्रमाचे आयोजन करण्यात आले. राष्ट्रपती द्रौपदी मुर्मु, केंद्रीय विधी व न्याय मंत्री किरेन रिजीजू, केंद्रीय विधी व न्याय राज्यमंत्री प्रा. एस. पी. बघेल, मुख्य निवडणूक आयुक्त राजीव कुमार, निवडणूक आयुक्त अनूप चंद्र पांडे उपस्थित होते. यावेळी देशातील विविध भागांमध्ये निवडणूक मतदान प्रक्रियेत उल्लेखनीय कामगिरी करणाऱ्या राज्यांना, जिल्हा स्तरावरील अधिकाऱ्यांना राष्ट्रीय पुरस्काराने सन्मानित करण्यात आले.

भारत निवडणूक आयोगाचा या वर्षाची संकल्पना ‘मतदानाइतके अमूल्य नसे काही, बजावू हमखास मताधिकार आम्ही’, अशी आहे. यावेळी प्रख्यात निर्देशक सुभाष घई द्वारा निर्मित ‘मैं भारत हॅुं’ या गाण्याचे सादरीकरण करण्यात आले.

पुरस्कार स्वीकारल्यानंतर डॉ. राजेश देशमुख यांनी पुरस्कार मिळाल्याचा आनंद व्यक्त केला. दिल्ली येथील महाराष्ट्र परिचय केंद्राशी संवाद साधताना ते म्हणाले, आजचा महत्वाचा दिवस आहे. तेरावा राष्ट्रीय मतदार दिवस आज आपण या ठिकाणी साजरा केला आणि सर्व देशामध्ये दहा लाख पेक्षा जास्त ठिकाणी आज आपण साजरा करत आहोत, मी आजच्या मतदार दिवसाच्या निमित्ताने महाराष्ट्रामधील आणि विशेष करून पुणे जिल्ह्यामधील ८० लाख मतदारांना शुभेच्छा देतो, त्यांचा अभिनंदन करतो. त्याचप्रमाणे भारत निवडणूक आयोगाचे आम्ही आभार मानतो. पुणे जिल्ह्यामधील आमच्या सर्व टीमने गेल्या दोन वर्षांमध्ये मतदार यादी आणि निवडणुकांच्या संदर्भात घेतलेल्या परिश्रमाची फलश्रुती आज मिळाली आणि आज आमच्या सगळ्या टीमला माझ्या माध्यमातून हा पुरस्कार प्रदान करण्यात आलेला आहे.

गेल्या दोन वर्षांमध्ये भारत निवडणूक आयोगाच्या निर्देशानुसार मतदार यादीचे शुद्धीकरण करण्यासाठी आणि त्यातील त्रूटी दूर करण्यासाठी परिश्रम घेतले आहे. यामध्ये जवळपास सात लाखापेक्षा जास्त जे निवासी मतदार आहेत त्यावर काम केले. त्याचप्रमाणे मतदार यादी सर्वसमावेशक करण्यासाठी निवडणूक आयोगाच्या निर्देशानुसार विशेष करून महिला मतदार, तृतीयपंथी मतदारांसाठी विशेष मोहीम राबविण्यात आली, विशेष शिबिरांचेही आयोजन करण्यात आले. १७ वर्षे पूर्ण झाल्यानंतर मतदारांची नोंदणी करण्यासाठी २५ नोव्हेंबर आणि ५ डिसेंबर या दोन दिवशी ४४२ महाविद्यालयात महाशिबिरांचे आयोजन करून मतदार नोंदणी करण्यात आली. यातून ४८ हजारावर युवकांची मतदार नोंदणी करण्यात आली, अशी प्रतिक्रिया त्यांनी व्यक्त केली.

पुणे जिल्ह्यात युवकांचा मतदार नोंदणीतील सहभाग वाढविणे, महिलांची मतदार नोंदणी याकडे त्यांनी विशेष लक्ष देण्यात आले. वंचित घटकांना निवडणूक प्रक्रियेत सहभागी करून घेण्याचे उद्दिष्ट ठेवताना तृतीयपंथी मतदार, दिव्यांग मतदार, देह विक्री व्यवसायातील महिला यांच्या मतदार नोंदणीसाठी विशेष मोहीम हाती घेण्यात आली. मतदार नोंदणीसाठी महाविद्यालयांमध्ये आयोजित शिबिरांनाही युवकांचा चांगला प्रतिसाद मिळाला. राज्याचे मुख्य निवडणूक अधिकारी यांच्यासह संयुक्त विद्यमाने शाळा व महाविद्यालयांमध्ये निवडणूक साक्षरता मंडळाच्या बळकटीकरणाचा कार्यक्रम घेण्यात आला.

जिल्हाधिकारी यांनी तृतीयपंथी मतदार नोंदणीसाठी तसेच दिव्यांग मतदारांसाठी घेतलेल्या पुढाकाराचा निवडणूक आयोगाने विशेष गौरव केला आहे. औद्योगिक क्षेत्रातील मतदार नोंदणीसाठी विशेष पुढाकार जिल्हाधिकाऱ्यांनी घेतला. जिल्ह्यातील औद्योगिक वसाहतीतील सुमारे अडीच हजार मोठे व लहान उद्योगांपर्यंत पोहोचून मतदार नोंदणी करण्यात आली. उद्योगांच्या ठिकाणी समन्वयक अधिकारी नेमून तसेच उद्योगांमध्ये मतदार जागृती संघ स्थापन करून मतदार नोंदणीसाठी प्रयत्न करण्यात आले.

जिल्हाधिकारी डॉ.देशमुख यांना यापूर्वीदेखील जिल्ह्यात पीएम किसान योजनेतील चांगल्या कामगिरीसाठी पुरस्काराने गौरविण्यात आले होते. तर सातारा येथे मुख्य कार्यकारी अधिकारी असतांना पीएम आवास योजना आणि स्वच्छ भारत अभियानातील चांगल्या कामगिरीसाठी पुरस्कार मिळाला होता.

यावेळी ‘इलेक्टिंग द फर्स्ट सिटिजन- एन इलेस्ट्रेटेड क्रॅानिकल ऑफ इंडियाज प्रेसिडेंशियल इलेक्शन’ पुस्तकाची पहिली प्रत राष्ट्रपती यांना भेट स्वरूपात देण्यात आली.  राष्ट्रपती महोदयांच्या हस्ते एकूण १३ राष्ट्रीय पुरस्कार वितरित करण्यात आले.