मुंबई, दि. २९ : – विश्वचष्क पटकावून भारतीय महिला युवा क्रिकेट संघाने भारतीय महिलांच्या कर्तबगारीवर मोहोर उमटवणारी कामगिरी केली आहे. त्यामुळे हा भारतीय महिला युवा क्रिकेट संघ कौतुकास पात्र आहे. या विजयामुळे नव्या वर्षात भारतीयांनी एक चांगली भेट मिळाली आहे, या कौतुकोद्गारांसह मुख्यमंत्री एकनाथ शिंदे यांनी महिला युवा विश्वचषकावर नाव कोरणाऱ्या १९ वर्षाखालील भारतीय महिला क्रिकेट युवा संघाचे अभिनंदन केले आहे.

भारतीय महिला संघाने केवळ ६७ धावांत इंग्लडच्या संघाचा धुव्वा उडवला. या दणदणीत विजयासाठी मुख्यमंत्री श्री. शिंदे यांनी भारतीय संघातील सर्वच खेळाडूंचे कौतुक केले आहे. हा विजय भारतातील क्रीडा क्षेत्रासह, सर्वच क्षेत्रात आघाडीवर असणाऱ्या  भगिनींचे मनोबल वाढवणारा ठरणार आहे. या विजयामुळे भारतीयांचा  क्रिकेटमधील कामगिरीचा लौकिकही उंचावला आहे, असे नमूद करून मुख्यमंत्री श्री. शिंदे यांनी संघातील सर्व क्रिकेटपटूंचे, त्यांचे प्रशिक्षक तसेच मार्गदर्शकांचेही अभिनंदन केले आहे.

भोपाळ – आमच्या खेळाडूंना सरावाच्या वेळी अतिशय आंतरराष्ट्रीय दर्जाच्या सुविधा आणि सर्वोत्तम मार्गदर्शन मिळाले असल्यामुळे येथे आयोजित करण्यात आलेल्या खेलो इंडिया गेम्स मध्ये महाराष्ट्राचा संघ सर्वसाधारण विजेतेपद मिळविणारच असा आत्मविश्वास महाराष्ट्र संघाचे पथक प्रमुख श्री. चंद्रकांत कांबळे यांनी येथे व्यक्त केला.

या स्पर्धेसाठी महाराष्ट्राच्या काही खेळाडूंचे येथे आगमन झाले असून हे खेळाडू येथील विविध क्रीडा संकुलांमध्ये सरावही करू लागले आहेत. स्पर्धेसाठी आलेल्या खेळाडूंना आणि संघाच्या इतर पदाधिकाऱ्यांना कोणतीही समस्या येऊ नये यासाठी येथील संयोजकांनी अतिशय चांगली व्यवस्था केली आहे.
महाराष्ट्र संघाच्या तयारीविषयी श्री. कांबळे पुढे म्हणाले,” गतवर्षी पंचकुला येथे आयोजित करण्यात आलेल्या खेलो इंडिया गेम्स मध्ये आम्ही शेवटपर्यंत यजमान हरियाणाच्या खेळाडूंना चांगली लढत दिली होती. यंदा हरियाणा व यजमान मध्य प्रदेश यांच्यापेक्षा आमच्या पथकात कमी खेळाडू असले तरीही आमचे खेळाडू या दोन्ही राज्यांच्या खेळाडूंपेक्षा अधिक उज्वल कामगिरी करतील आणि सर्वाधिक सुवर्णपदकांसह सर्वसाधारण विजेतेपदावर नाव कोरतील. आमचे खेळाडू भलेही संख्येने कमी असले तरी दर्जाबाबत ते कुठेही कमी नाहीत अशी मला खात्री आहे.”

ते पुढे म्हणाले की, स्पर्धेत असलेल्या २७ क्रीडा प्रकारांपैकी २२ क्रीडा प्रकारांमध्ये महाराष्ट्राचे पावणे चारशे खेळाडू सहभागी झाले आहेत. त्यांच्या मदतीसाठी सव्वाशेहून अधिक सपोर्ट स्टाफचा सहभाग असणार आहे. खो खो व कबड्डी इत्यादी सांघिक खेळांमध्ये आम्हाला विजेतेपदाची खात्री आहे. या संघांनी खूप चांगली तयारी केली आहे या खेळाडूंना नियमित मार्गदर्शकांबरोबरच अर्जुन पुरस्कार विजेत्या खेळाडूंचेही विशेष मार्गदर्शन लाभले आहे. त्यांना मेंटल ट्रेनर, फिजिओ, व्हिडिओ ॲनेलिसिस, मेडिटेशन इत्यादी बाबतही अनुभवी तज्ञांमार्फत प्रशिक्षण देण्यात आले आहे.”
महाराष्ट्र पथकाबरोबर नोडल अधिकारी म्हणून श्री. अनिल चोरमले तर व्यवस्थापक म्हणून श्री. अरुण पाटील यांच्याकडे जबाबदारी सोपवण्यात आली आहे. त्यांनीही महाराष्ट्राच्या कामगिरीविषयी आत्मविश्वास व्यक्त केला. महाराष्ट्राच्या खेळाडूंना सराव शिबिरात कोणतीही अडचण येणार नाही याची काळजी आम्ही घेतली असल्यामुळे आणि खेळाडूंनीही मनापासून एकाग्रतेने सराव केला आहे. हे लक्षात घेतले तर महाराष्ट्राचे खेळाडू या स्पर्धेत वर्चस्व गाजवतील अशी आम्हाला खात्री आहे.

: महाराष्ट्र पदकाच्या त्री-शतकासाठी सज्ज; खो-खो संघांना विजयी सलामीची संधी

आजपासून पाचव्या सत्रातील खेलो इंडिया युथ गेम्स

जबलपूर–
दोन वेळचा चॅम्पियन महाराष्ट्र संघ पाचव्या सत्रातील खेलो इंडिया युथ गेम्स मध्ये विक्रमी पदकांची कमाई करण्यासाठी सज्ज झाला आहे. आज सोमवारपासून पाचव्या सत्रातील खेलो इंडिया युथ गेम्स ला सुरुवात होत आहे. चार वेळच्या चॅम्पियन महाराष्ट्र महिला व पुरुष खो-खो संघांना पहिल्याच दिवशी विजय सलामीची मोठी संधी आहे. जानकी पुरस्कार विजेती जान्हवी पेठेच्या नेतृत्वात महाराष्ट्र महिला संघ जबलपूरच्या मैदानावर सलामी सामन्यात तामिळनाडू विरुद्ध मोठ्या विजयासाठी सज्ज झाला आहे. वीर अभिमन्यू पुरस्कार विजेता नरेंद्र आपल्या नेतृत्वात महाराष्ट्र संघाला तेलंगणा विरुद्ध विजय मिळवून देण्यासाठी उत्सुक आहे.

महाराष्ट्र खोखो संघ उघडणार विजयाचे खाते
आतापर्यंत खेलो इंडिया स्पर्धेत सोनेरी यशाचा पल्ला गाठणारा महाराष्ट्र महिला व पुरुष खो-खो संघ विजयाचे खाते उघडण्यासाठी सज्ज झाला आहे. मुख्य प्रशिक्षक मनीषा मानकर, प्रशांत पवार, संजय मुंडे आणि संतोष वाबळे यांच्या मार्गदर्शनाखाली या दोन्ही संघांनी पुण्याच्या बालेवाडीत कसून सराव केला आहे. त्यामुळे महाराष्ट्र संघाला सलामी सामन्यात मोठ्या विजयाची संधी आहे.

जान्हवी तिसऱ्यांदा स्पर्धेत, प्रिती, संपदामुळे महिला संघ मजबूत
जानकी पुरस्कार विजेती जान्हवी महाराष्ट्र महिला संघाचे नेतृत्व करणार आहे. तिच्यासोबतच संघामध्ये जानकी पुरस्कार विजेते प्रीती अश्विनी आणि संपदा मोरे यांचा समावेश आहे. त्यामुळे महिला संघाला किताबाचा प्रभाव दावेदार मानले जात आहे.

नरेंद्रची हॅट्रिक; आदित्य, किरण, सचिन फार्मात
वीर अभिमन्यू पुरस्कार विजेता नरेंद्र हा तिसऱ्यांदा या स्पर्धेत महाराष्ट्र संघाकडून खेळत आहे. त्यामुळे या हॅट्रिकच्या स्पर्धेत संघाला सोनेरी यश मिळवून देण्याचा त्याचा निर्धार आहे. सोबतच वीर अभिमन्यू पुरस्कार विजेता किरण वसावे, आदित्य आणि सचिन पवार यांचाही समावेश आहे. त्यामुळे संघाला निर्विवादपणे आपले वर्चस्व कायम ठेवत सोनेरीय संपादन करण्याची मोठी संधी आहे.

महाराष्ट्राचे ३७७ खेळाडू सहभागी
आतापर्यंत दोन वेळा २०० पेक्षा अधिक पदकांची कमाई करणाऱ्या महाराष्ट्र संघाची नजर आता मध्य प्रदेशातील स्पर्धेत पदकांचे तिहेरी शतक साजरे करण्यावर लागली आहे. या स्पर्धेमध्ये महाराष्ट्राचा ३७७ सदस्य संघ सहभागी होणार आहे.

दोन वेळा महाराष्ट्र संघ चॅम्पियन
महाराष्ट्राच्या युवा खेळाडूंची केंद्रीय क्रीडा मंत्रालयाच्या वतीने आयोजित खेलो इंडिया युथ गेम्स मधील कामगिरी उल्लेखनीय ठरलेली आहे. तळागाळातील गुणवंत युवा खेळाडूंनी २०१९ आणि २०२० मध्ये महाराष्ट्राला चॅम्पियन होण्याचा बहुमान मिळवून दिला. २०२० मध्ये गुवाहाटी येथे झालेल्या स्पर्धेदरम्यान महाराष्ट्र संघाने विक्रमी २५६ पदकांची कमाई केली होती. या दरम्यान महाराष्ट्र संघाने ७८ सुवर्णपदकांचा बहुमान पटकावला होता. तसेच २०१९ मध्ये पुणे येथील स्पर्धेत महाराष्ट्र संघ २२८ पदकांसह सर्वसाधारण विजेतेपदाचा मानकरी ठरला होता.

योगासन, मल्लखांब, कुस्ती, कबड्डीमध्ये प्रबळ दावेदार
पारंपारिक वारसा लाभलेल्या योगासन मल्लखांब या खेळ प्रकारात महाराष्ट्राचे खेळाडूंनी गुजरातीतील नॅशनल गेम्स मध्ये सोनेरी यशाचा पल्ला गाठला. त्यामुळे आता याच कामगिरीला उजाळा देण्यासाठी महाराष्ट्राचे खेळाडू सज्ज झाले आहेत. यातून महाराष्ट्र संघाला योगासन, मल्लखांब, कबड्डी, खो-खो आणि कुस्ती या खेळ प्रकारात सोनेरी ही यशाचा प्रबळ दावेदार मानले जात आहे. मल्लखांब आणि योगासन या खेळामध्ये महाराष्ट्राचे युवा खेळाडू निश्चितपणे मोठ्या संख्येत पदकांची कमाई करताना दिसतील.
निश्चितपणे महाराष्ट्र संघाला सर्वसाधारण विजेतेपद मिळेल: क्रीडा आयुक्त
गुजरात येथील नॅशनल गेम आणि महाराष्ट्र राज्य ऑलम्पिक स्पर्धेदरम्यान युवा खेळाडूंनी प्रचंड मेहनत करत मोठे यश संपादन केले आहे. त्यामुळे याच कामगिरीला उजाळा देत महाराष्ट्राचे खेळाडू मध्य प्रदेश येथील खेलो इंडिया युथ गेम्स गाजवतील. पुण्यात आयोजित करण्यात आलेल्या सराव शिबिरातून हे खेळाडू कसून मेहनत करत आहेत. तज्ञ प्रशिक्षक आणि अत्याधुनिक सुविधांच्या माध्यमातून हे खेळाडू आपल्या गुणवत्तेचा दर्जा उंचावत आहेत.यातून महाराष्ट्र संघ निश्चितपणे या स्पर्धेदरम्यान सर्वसाधारण विजेते पदाचा मानकरी ठरेल, असा विश्वास क्रीडा आयुक्त डॉ.सुहास दिवसे यांनी व्यक्त केला.

२२ खेळामध्ये महाराष्ट्राचे ३७७ खेळाडू
मध्यप्रदेश येथे आयोजित पाचव्या खेलो इंडिया युथ गेम्स मध्ये महाराष्ट्राचे ३७७ खेळाडू सहभागी होणार आहेत. हे खेळाडू २२ खेळ प्रकारात महाराष्ट्राचे प्रतिनिधित्व करतील. यामध्ये टेबल टेनिस, खो- खो, बॉक्सिंग, बास्केटबॉल, बॅडमिंटन, तिरंदाजी, नेमबाजी, कयाकिंग व कनोइंग, योगासन, गटका, सायकलिंग ट्रॅक, ॲथलेटिक्स, कबड्डी, वेटलिफ्टिंग, लॉन टेनिस, मल्लखांब, तलवारबाजी, कुस्ती आणि जलतरण या खेळ प्रकारांचा समावेश आहे.

मुंबई – भारताच्या अव्वल नेमबाजांपैकी एक आणि टोकियो पॅरालिम्पिक सुवर्णपदक विजेता मनीष नरवालने 2021 मध्ये नवा जागतिक विक्रम प्रस्थापित करत टोकियो पॅरालिम्पिकमध्ये भारताला सुवर्णपदक मिळवून देत इतिहास घडवला.

त्याच्या या पराक्रमाने त्याला प्रतिष्ठित खेलरत्न पुरस्कार तर मिळवून दिलाच पण शेकडो मुलांना नेमबाजी करायला आणि खेळाची आवड जोपासण्यासाठी प्रेरित केले.

पण 2021 च्या त्याच्या कामगिरीपूर्वी, मनीषने घरातल्या जवळच्या व्यक्तीला केवळ नेमबाजीच नाही तर त्याच्या पावलांवर पाऊल ठेवण्यासाठी आणि मैदानात स्वतःची छाप पाडण्यासाठी प्रेरित केले ती व्यक्ती म्हणजे त्याचा धाकटा भाऊ शिवा नरवाल

शिवाने, वर्ष 2020 च्या खेलो इंडिया युवा क्रीडा स्पर्धेमध्ये आणि त्यानंतर पुन्हा 2021 च्या युवा क्रीडा स्पर्धेमध्ये सुवर्णपदक जिंकले. 17 वर्षीय शिवाने, गेल्या वर्षी इजिप्त वर्ल्ड चॅम्पियनशिपमध्येही वरिष्ठ गटात पदार्पण केले होते आणि 10 मीटर एअर पिस्तूल स्पर्धेच्या अंतिम फेरीत पोहोचल्यानंतर आणि 8 व्या स्थानावर येत, पॅरिस ऑलिम्पिक कोटा जिंकण्याच्या अगदी जवळ पोहोचला होता.

त्यानंतर त्याने जागतिक अजिंक्यपद पदक गमावल्यानंतरच्या आलेल्या निराशेचा उपयोग आशियाई एअरगन चॅम्पियनशिपमध्ये केला आणि पुरुषांच्या एअर पिस्तूल स्पर्धेत सुवर्णपदक पटकावले.

मनीषने आता देशातील सर्वोत्कृष्ट पॅरा-शूटर म्हणून स्वत:ला प्रस्थापित केले आहे, तर शिवाचे सध्याचे ध्येय केवळ खेलो इंडिया युथ गेम्समध्ये आणखी एक पदक जिंकणे नाही तर त्याची सुवर्णपदकांची हॅट्ट्रिक पूर्ण करणे हे आहे.

“खेलो इंडिया युथ गेम्स 2022 साठी माझी पुन्हा निवड झाल्याबद्दल मला खरोखर आनंद झाला आहे. भूतकाळातल्या, केआयवायजी (KIYG) 2020 आणि केआयवायजी (KIYG) 2021 मधील माझी कामगिरी खरोखरच चांगली राहिली आहे आणि मला आशा आहे की मध्य प्रदेशातही माझी कामगिरी चांगली राहील आणि मी हरियाणासाठी पुन्हा एकदा सुवर्णपदक जिंकेन.”

मनीषचा भाऊ असल्याने काही अतिरिक्त दबाव आहे का असे शिवाला विचारले असता, ‘तो नेहमी माझ्या मदतीसाठी तत्पर असतो.’

“माझी मोठी बहीण आणि भाऊ दोघेही नेमबाज असून मनीषची एअर पिस्तुल इव्हेंटमध्येधली चांगली कामगिरी पाहून मी सुद्धा नेमबाजी सुरू केली,” असे शिव सांगतो.

त्यानंतर तो पुढे म्हणाला की, “मला शुटिंगमध्ये काही अडचण आली तर मनीष नेहमीच मला मदत करतो आणि मदतीसाठी तो नेहमीच तत्पर असतो.”

मागच्या खेलो इंडिया युवा क्रीडा स्पर्धेत शिवाने पात्रता फेरीत 588 गुण मिळवत वर्चस्व गाजवले होते, त्याच्यानंतर दुसऱ्या क्रमांकावर असलेल्या त्याचा सहकारी सम्राट राणापेक्षा तो पाच गुणांनी आघाडीवर होता. या स्पर्धेत त्याने नंतर सुवर्णपदक जिंकले होते, त्याचवेळी त्याची बहीण शिखा नरवाल हिने मुलींच्या 10 मीटर एअर पिस्तूल स्पर्धेत कांस्यपदक जिंकले होते.

मुंबई, दि.29 : शेतकरी हा आपला अन्नदाता आहे. कृषी महोत्सवाच्या माध्यमातून शेतकऱ्यांना योग्य मागदर्शन मिळत आहे. याठिकाणी लावण्यात आलेल्या स्टॉलमुळे  दुर्मिळ औषधी वनस्पतींची सर्वसामान्यांना माहिती मिळते आहे. या कृषी महोत्सवामुळे पारंपरिक शेतीसह आधुनिक शेतीला मोठे पाठबळ मिळत असून आपले  शासन शेतकऱ्यांना केंद्रबिंदू मानून काम करणारे शासन आहे, असे प्रतिपादन मुख्यमंत्री  एकनाथ शिंदे यांनी  केले.

नाशिक येथील डोंगरे वसतिगृह मैदानावर श्री स्वामी समर्थ कृषी व अध्यात्मिक विकास मार्ग व श्री स्वामी समर्थ कृषी विकास व संशोधन चॅरिटेबल ट्रस्टतर्फे आयोजित ‘जागतिक कृषी महोत्सव, 2023’ निमित्त महोत्सवाच्या चौथ्या दिवशी आयोजित कार्यक्रमाप्रसंगी मुख्यमंत्री एकनाथ शिंदे बोलत होते.

यावेळी बंदरे व खनिकर्म मंत्री तथा नाशिक जिल्ह्याचे पालकमंत्री दादाजी भुसे, खासदार हेमंत गोडसे, आमदार बबनराव लोणीकर, आमदार सुहास कांदे, आमदार सीमा हिरे, आमदार संजय शिरसाट, श्री स्वामी समर्थ केंद्राचे प्रमुख आण्णासाहेब मोरे, जिल्हाधिकारी गंगाधरन. डी., मनपा आयुक्त डॉ. चंद्रकांत फुलकुंडवार, पोलीस आयुक्त अंकुश शिंदे उपस्थित होते.

याप्रसंगी मुख्यमंत्री एकनाथ शिंदे म्हणाले, आपले शासन सर्वसामान्य जनतेचे आहे. कष्टकरी, कामगार, विद्यार्थी, समाजातील प्रत्येक घटकाचे हे शासन आहे. त्यामुळे आम्ही प्रत्येक निर्णय हा जनतेच्या कल्याणार्थ घेत आहोत. शेतीवर येणाऱ्या अतिवृष्टी, रोगराई आदी संकटांमध्ये देखील राज्य शासन आणि केंद्र सरकार शेतकऱ्यांच्या पाठिशी उभे राहिले आहे. एनडीआरएफच्या नियमांना डावलून यंदा नुकसानग्रस्त शेतकऱ्यांना दुप्पट मदत करण्यात आली आहे. शेतीचे जे नुकसान एनडीआरएफ च्या नियमात बसत नव्हते त्यावर योग्य निर्णय घेऊन शासनाने शेतकऱ्यांना मदतीचा हात दिला आहे. राज्यातील 6 लाख 90 हजार शेतकऱ्यांना तब्बल अडीच हजार कोटी रुपयांची मदत दिली आहे. याशिवाय  शेतकऱ्यांना चांगले उत्पन्न कसे घेता येईल, याबाबत प्रयत्नशील आहोत. ४५० महिला बचत गटांच्या माध्यमातून हजारो नागरिकांना रोजगार उपलब्ध करुन देण्यात आला आहे. राज्यातील जनता सुखी असली पाहिजे, हा राज्य व केंद्र सरकारचा अजेंडा आहे. गेल्या सहा महिन्यात राज्यात घेण्यात आलेल्या निर्णयांमुळे विकासाला मोठी चालना मिळाली आहे. सर्वत्र सकारात्मक वातावरणाची निर्मिती झाली आहे.

बाळासाहेब ठाकरे समृध्दी महामार्गाबाबत मुख्यमंत्री एकनाथ शिंदे म्हणाले की, समृद्धी महामार्ग हा ‘गेम चेंजर’ असा महामार्ग ठरणार आहे. या महामार्गामुळे शेतकऱ्यांचा शेतमाला अवघ्या काही तासात राज्यासह परदेशात पाठविणे अतिशय वेगवान झाले आहे. त्यामुळे शेतकऱ्यांच्या विकासाला अधिकाधिक चालना मिळाली आहे. याशिवाय नुकतीच केंद्रीय गृहमंत्री अमित शहा यांची उपमुख्यमंत्री देवेंद्र फडणवीस यांच्यासोबत भेट घेऊन राज्यातील साखर उद्योगांच्या अडचणी सोडविण्याबाबत चर्चा केली आहे. लवकरच राज्यातील साखर उद्योगांच्या अडचणी देखील सोडविण्यात येणार आहेत. राज्याकडून केंद्राकडे जाणाऱ्या प्रत्येक प्रस्तावाला केंद्र सरकार तत्काळ मंजुरी देत आहे. पंतप्रधान नरेंद्र मोदी यांनी महाराष्ट्र राज्यासाठी 2 लाख कोटी रुपयांची विशेष तरतूद केली असल्याचे याप्रसंगी मुख्यमंत्री श्री. शिंदे यांनी सांगितले.

मुख्यमंत्री एकनाथ शिंदे म्हणाले की, कृषी महोत्सवाचे हे 12 वे वर्ष आहे. याठिकाणी अनेक राज्यातील नागरिक, शेतकरी येवून भेटी देत शेती संदर्भातील योग्य माहिती जाणून घेतात. केंद्रीय मंत्री, राज्यमंत्री, कृषी विभागातील तज्ज्ञ मंडळी, शेतकरी यासोबत जोडले गेले आहेत. या कृषी महोत्सवात असलेल्या सातत्यामुळे शेतकऱ्यांना मोठे पाठबळ मिळत आहे. आयोजकांनी समाजाप्रती असलेली बांधिलकी, आपुलकी व आपण समाजाचे काहीतरी देणे लागतो या भूमिकेतून चालविलेला हा कृषी महोत्सव जगाच्या पोशिंदा असलेल्या शेतकऱ्यांना उर्जा देतो. याठिकाणी लावण्यात आलेल्या 250 हून अधिक स्टॉलच्या माध्यमातून प्रगती शेतीसह गटशेती, योग्य बियाणे कसे निवडावे याबाबत शेतकऱ्यांना माहिती मिळाली आहे. श्री स्वामी समर्थ केंद्रातर्फे सुरु असलेल्या जागतिक कृषी महोत्सवात अनेक समाजपयोगी कार्यक्रम पार पडले आहे. या कृषी महोत्सवात गुरुमाऊलींनी 11 सामूहिक विवाह लावून दिले आहेत. तसेच सरपंच, ग्रामसेवक यांच्या माध्यमातून नाशिक जिल्ह्यातील 51 गावे श्री स्वामी समर्थ ट्रस्टने वर्षभरासाठी दत्तक घेतल्यामुळे या सर्वांचे पुण्य गुरुमाऊली मोरे यांच्या पदरी पडत असून ते देखील हे पुण्य कृषी महोत्सवातून जनतेपर्यंन्त पोहचवित आहेत. या जागतिक कृषी महोत्सवाच्या माध्यमातून शेतकऱ्यांच्या विकासाला अधिकाधिक बळ मिळत असल्याचेही त्यांनी याप्रसंगी सांगितले.