पुणे, दि. ६: जिल्ह्यातील २१५- कसबा पेठ विधानसभा पोटनिवडणूकीसाठी निवडणूक निरीक्षक, निवडणूक पोलीस निरीक्षक आणि निवडणूक खर्च निरीक्षकाची नियुक्ती करण्यात आली असल्याची माहिती उप जिल्हा निवडणूक अधिकारी आरती भोसले यांनी दिली आहे.

निवडणूक निरीक्षक म्हणून निरज सेमवाल यांची नियुक्ती करण्यात आली असून त्यांचा निवासाचा पत्ता व्हीव्हीआयपी विश्रामगृह येथील कक्ष क्रमांक ए-१०५ असा आहे. त्यांचा संपर्क क्रमांक ९४०४५४२४०९ असा आहे.

निवडणूक पोलीस निरीक्षक म्हणून अश्विनीकुमार सिन्हा यांची नियुक्ती करण्यात आली असून त्यांचा निवासाचा पत्ता व्हीव्हीआयपी विश्रामगृह येथील कक्ष क्रमांक ए-२०६ असा आहे. त्यांचा संपर्क क्रमांक ८२७५९६९५०० असा आहे.

निवडणूक खर्च निरीक्षक म्हणून मंझरुल हसन यांची नियुक्ती करण्यात आली असून त्यांचा निवासाचा पत्ता व्हीव्हीआयपी विश्रामगृह येथील कक्ष क्रमांक ए-३०४ असा आहे. त्यांचा संपर्क क्रमांक ८२७५९६९५०४ असा आहे.

निवडणूक निरीक्षक कार्यालयाचा दूरध्वनी क्रमांक ०२०-२९९७२५४६ असा आहे. नागरिकांनी याची नोंद घ्यावी, असे जिल्हा निवडणूक शाखेतर्फे कळविण्यात आले आहे.

पुणे दि. ०६ : शिवाजीनगर रेल्वे स्टेशन येथून “पुणे शिवाजीनगर-तळेगाव-लोणावळा लोकल सेवा” आज सुरू करण्यात आली. या सेवेला खासदार गिरीश बापट यांनी ऑनलाईन उपस्थित राहून उद्घाटन केले. या प्रसंगी आमदार सिद्धार्थ शिरोळे, आमदार सुनील कांबळे, गौरव बापट व इतर पदाधिकारी तसेच रेल्वेचे अधिकारी शिवाजीनगर रेल्वे स्थानक येथे उपस्थित होते.

यावेळी बोलताना बापट यांनी सांगितले की पुणे शहरासह उपनगरेही झपाट्याने विकसित होत असून नागरिकांना रेल्वेने प्रवास करण्यासाठी शहराच्या मध्यवर्ती भागात असलेले केवळ पुणे रेल्वे स्टेशन आहे. त्यामुळे सध्या या स्टेशनवर प्रचंड ताण येत असल्याने या ठिकाणी वाहतूक कोंडी, रेल्वे व पोलीस प्रशासनावर ताण, तसेच नागरिकांना वेळेवर इच्छित स्थळी पोहचण्यास विलंब आणि आर्थिक व मानसिक त्रास सहन करावा लागतो. तसेच भविष्यातही पुणे स्टेशनवरील हा ताण असाच वाढत रहाणार असल्याने पुणे रेल्वे स्टेशनला शहरातच पर्यायी व्यवस्था म्हणून शहरातील खडकी, शिवाजीनगर, हडपसर ही रेल्वे स्थानके विकसित करून या स्थानकावरून नवीन पर्यायी रेल्वे सेवा सुरु कराव्यात अशी माझी सातत्याने आग्रहाची मागणी होती. यासंदर्भात मी संसदेतही अनेक वेळा प्रश्न उपस्थित केला होता. त्यामुळे शिवाजीनगर रेल्वे फलाटाचे रुंदीकरण व नवीन लोकल रेल्वे सेवेचे आज उद्घाटन करताना मला विशेष आनंद होत आहे.
शिवाजीनगर स्टेशन वरून तळेगाव-लोणावळा लोकल सेवा सुरु करण्यात आली असून येत्या काही दिवसात अजून ४ नवीन रेल्वे सेवा सुरु करण्यात येणार आहेत. तसेच स्टेशनवर प्रवाशांच्या सुविधेसाठी पिण्याचे पाणी, बसण्याची व्यवस्था, प्लॅटफॉर्म निवारा, टॉयलेट ब्लॉक, लाइटिंग, पंखे, FOB, वॉटर कुलर, घड्याळ, डस्टबिन, PAS, ट्रेन इंडिकेटर बोर्ड व इतर सुविधेसह प्लॅटफॉर्मच्या विस्ताराचे काम करण्यात आले आहे.

आंतरराष्ट्रीय कृष्णभावनामृत संघ – इस्कॉन, पुणे यांच्यातर्फे १० व्या वर्धापनदिनानिमित्त आयोजित उत्सवाचा समारोप
पुणे : जय जगन्नाथ, जय बलराम, जय सुभद्रा, हरे राम हरे कृष्णा… च्या जयघोषात व हजारो भाविकांच्या उपस्थितीत सोन्याची झळाळी असलेल्या तब्बल १ कोटी रुपयांच्या भव्य देव्हा-याचे अनावरण झाले. भगवान राधा-कृष्ण, भगवान जगन्नाथ, भगवान बलराम आणि सुभद्रा तसेच हरिनाम आंदोनलाचे प्रणेते चैतन्य महाप्रभू व नित्यानंद महाप्रभू यांच्या मूर्ती या उत्कृष्ट कोरीवकाम केलेल्या देव्हा-यांमध्ये कात्रज-कोंढवा रस्त्यावरील इस्कॉन मंदिरामध्ये विराजमान झाल्या. 
आचार्य भक्तिवेदांत स्वामी प्रभुपाद यांनी स्थापन केलेल्या आंतरराष्ट्रीय कृष्णभावनामृत संघ – इस्कॉनच्या पुणे मंदिरातर्फे श्री श्री राधा वृंदावनचंद्र मंदिराच्या १० व्या वर्धापनदिनानिमित्त आयोजित पाच दिवसीय उत्सवाचा समारोप इस्कॉनमध्ये आयोजित विशेष कार्यक्रमात झाला. यावेळी प.पू.लोकनाथ स्वामी, चंद्रमौली स्वामी महाराज, नरसिंह आनंद प्रभु, गौरांग प्रभु, आमदार श्रीकांत भारतीय, उद्योजक कृष्णकुमार गोयल, राजेश पांडे, माजी आमदार योगेश टिळेकर, इस्कॉन पुणेचे जयदेव प्रभू, रसविग्रह प्रभू, रेवतीपती प्रभू, श्वेतद्वीप प्रभू, नटवर प्रभू यांच्यासह मंदिरातील भाविक, साधुगण, ब्रह्मचारी मोठ्या संख्येने उपस्थित होते. 
भक्तांच्या देणगीतून उज्जैन येथून साकारलेल्या देव्हा-याचे अनावरण यावेळी मान्यवरांच्या उपस्थितीत करण्यात आले. विविध सामाजिक, धार्मिक संस्थांच्या माध्यमातून कार्यरत असलेले चरणजीतसिंग, महेश सूर्यवंशी, किशोर चव्हाण, अंकुश मेहता, किशोर येनपुरे, अशोक गुंदेचा आदींचा विशेष सन्मान देखील यावेळी करण्यात आला. तसेच मंदिर उभारणीत योगदान देणा-यांना गौरविण्यात आले. 
श्रीकांत भारतीय म्हणाले, कलियुगामध्ये ईश्वरी निर्माणात अनेक संकटे आहेत. मात्र, निश्चय असेल तर सर्व काही शक्य आहे. राजकारणात चरित्र चांगले ठेवायचे असेल, तर अध्यात्माशिवाय पर्याय नाही, असेही त्यांनी सांगितले. राजेश पांडे म्हणाले, पद, पैसा यापेक्षा देण्याची वृत्ती कशी असावी, याची शिकवण मंदिरातून मिळते. समाजात सेवाभाव निर्माण करण्याचे मोलाचे कार्य इस्कॉनकडून होत आहे. 
श्री राधा-कृष्णांचे नौका विहार उत्सव, अन्नकूट महोत्सवामध्ये ४५० प्रकारचे नैवेद्य, आकर्षक रोषणाई, उत्सवात दररोज सुमारे ५०  हजार भाविकांना महाप्रसाद देण्यात आला. तसेच अमेरिका, लंडन, बहारीन आणि जगभरातल्या अनेक मंदिरांमधून सुमारे २५ वेगवेगळे कीर्तन समूह येथे आले होते. मागील ५ दिवस रात्रंदिवस विविध प्रकारचे कीर्तन मंदिरामध्ये सुरु होते, असे संपर्क प्रमुख संजय भोसले, जर्नादन चितोडे यांनी सांगितले.

पुणे-संभाजी ब्रिगेडने कसबा विधानसभा पोटनिवडणूक लढवण्याचा निर्णय घेतला आहे. आता संभाजी ब्रिगेडचे अविनाश मोहिते यांना उमेदवारी जाहीर केली आहे.संभाजी ब्रिगेडच्या वतीने कसबा विधानसभा पोट निवडणुकीसाठी महासचिव सौरभ खेडेकर यांच्या नेतृत्वाखाली संभाजी ब्रिगेडचे अधिकृत उमेदवारअविनाश मोहिते पाटील यांनी आज उमेदवारी अर्ज भरला. यावेळी संभाजी ब्रिगेडचे मुख्य प्रवक्ते गंगाधर बनबरे , प्रदेश संघटक संतोष शिंदे व सहसंघटक मनोज गायकवाड उपस्थित होते.

बहुचर्चित ठरणाऱ्या कसबा पेठ आणि चिंचवड पोटनिवडणुकीसाठी भाजपने कसबा पेठ येथून हेमंत रासने यांना तर चिंचवडमध्ये लक्ष्मण जगताप यांच्या पत्नी अश्विनी जगताप यांना उमेदवारी जाहीर करण्यात आली. तर काँग्रेसने कसबा पेठ विधानसभा पोटनिवडणुकीसाठी रविंद्र धंगेकर यांची उमेदवारी निश्चित केली आहे.

संजय राऊत यांनी नुकतेच महाविकास आघाडीने जिंकणे हे एकमेव ध्येय असल्याचे वक्तव्य केले होते. आमच्यामध्ये कुठलेही मतभेद, रस्सीखेच नाही. कसबा, पिंपरी, चिंचवड याठिकाणी आम्ही स्पिरीटने लढू. असेही राऊत यांनी स्पष्ट केले होते. मात्र संभाजी ब्रिगेड आणि शिवसेनेची काही दिवसांपूर्वी युती झाली आहे. याबाबत मोठा सोहळा उद्धव ठाकरे आणि संभाजी ब्रिगेडचे अध्यक्ष मनोज आखरे यांच्या उपस्थितीत आयोजित करण्यात आला होता. अविनाश मोहिते आज उमेदवारी अर्ज दाखल केला आहे. यामुळे शिवसेना मात्र नक्कीच तोंडघशी पडण्याची शक्यता निर्माण झाली आहे.

वंचित बहुजन आघाडीनेही शिवसेनेसोबत युती केली आहे. मात्र संभाजी ब्रिगेडसोबतच वंचित बहुजन आघाडीनेही कसबा निवडणूत लढवण्याची शक्यता निर्माण झाली आहे. कसब्याची जागा लढायची की नाही याबाबत वंचितचे नेते प्रकाश आंबेडकर आज निर्णय घेणार आहेत.

गौरव गिरीश बापट ,आणि स्वरदा बापट दोघांची उपस्थिती

पुणे-कसबा विधानसभा पोटनिवडणुकीसाठी भाजप, शिवसेना (बाळासाहेब ठाकरे), रिपब्लिकन पार्टी ऑफ इंडिया (आठवले गट), राष्ट्रीय समाज पक्ष, शिवसंग्राम, रयत क्रांती संघटना आणि पतित पावन संघटना महायुतीचे अधिकृत उमेदवार हेमंत रासने यांनी आज हजारो कार्यकर्त्यांसह शक्ती प्रदर्शन करून उमेदवारी अर्ज दाखल केला.
आज सकाळी भाजपचे प्रदेशाध्यक्ष चंद्रशेखर बावनकुळे, पालकमंत्री चंद्रकांतदादा पाटील, शहराध्यक्ष जगदीश मुळीक, आमदार माधुरी मिसाळ, सिद्धार्थ शिरोळे, प्रदेश सरचिटणीस मुरलीधर मोहोळ, बाळासाहेबांची शिवसेना पक्षाचे शहर प्रमुख नाना भानगिरे, रिपब्लिकन पार्टी ऑफ इंडिया (आठवले गट) शहराध्यक्ष शैलेंद्र चव्हाण, शिवसंग्रामचे अध्यक्ष भारत लगड, शहर भाजप प्रभारी धीरज घाटे, संघटन सरचिटणीस राजेश पांडे, शहर उपाध्यक्षा स्वरदा बापट, डॉ. सिद्धार्थ धेंडे, अजय भोसले, किरण साळी, बाळासाहेब जानराव यांची प्रमुख उपस्थिती होती.

सकाळी ग्रामदैवत कसबा गणपतीची महाआरती करून पदयात्रेला सुरुवात झाली. पदयात्रेत महायुतीचे हजारो कार्यकर्ते, गणपती मंडळ, संस्था-संघटनांचे कार्यकर्ते मोठ्या संख्येने सहभागी झाले होते. त्यानंतर दगडूशेठ हलवाई गणपतीची महाआरती करण्यात आली. त्यापुर्वी रासने यांनी डॉ. बाबासाहेब आंबेडकर आणि लोकमान्य टिळकांच्या पुतळ्याला अभिवादन केले. रासने यांनी निवडणूक निर्णय अधिकारी नेहा कितवे यांच्याकडे उमेदवारी अर्ज दाखल केला.

विक्रमी मताधिक्याने विजयी होऊ!
हेमंत रासने यांचा विश्वास

गेल्या वीस वर्षांत कसबा विधानसभा मतदारसंघात भारतीय जनता पार्टीच्या माध्यमातून केलेली विविध विकासकामे, सेवा कार्याच्या माध्यमातून प्रस्थापित केलेला जनसंपर्क, महायुतीच्या कार्यकर्त्यांची भक्कम संघटनात्मक फळी, गणेशोत्सव मंडळाच्या कार्यकर्त्यांचा पाठींबा आणि कसब्यातील मतदारांचा दृढ विश्वास या बळावर विक्रमी मताधिक्याने ही निवडणूक जिंकू असा विश्वास हेमंत रासने यांनी व्यक्त केला.

रासने म्हणाले, मी भारतीय जनता पार्टी ही जगातील सर्वात मोठी संघटना आहे. गेल्या तीस वर्षांपासून मी पक्षाचा शिस्तबद्ध कार्यकर्ता म्हणून काम करत आहे. आजपर्यंत पक्षाने दिलेली प्रत्येक जबाबदारी मी प्रामाणिकपणे पार पाडली आहे. त्यामुळे पक्षाने माझ्यावर विश्वास दाखवून मला उमेदवारी दिली. भाजप, बाळासाहेबांची शिवसेना, आरपीआय, शिवसंग्राम, रयत क्रांती संघटना, पतित पावन संघटना आणि गणेश मंडळाच्या पूर्ण ताकदीसह ही निवडणूक मोठ्या मताधिक्क्याने जिंकू.

पुणे -कुलकर्णींचा मतदारसंघ गेला, टिळकांचा गेला, आता नंबर बापटांचा का? समाज कुठवर सहन करणार? असा सवाल विचारणारे बॅनर्स कसबा पेठेत लागले आहेत. कसबा, पिंपरी-चिंचवड मतदारसंघाच्या निवडणुकीत मुक्ता टिळक यांच्या कुटुंबीयांना उमेदवारी नाकारण्यात आली. तेव्हापासून भाजपमधील अंतर्गत कलह चव्हाट्यावर आले आहेत.

बहुचर्चित ठरणाऱ्या कसबा पेठ आणि चिंचवड पोटनिवडणुकीसाठी भाजपने शनिवारी उमेदवार जाहीर केले. कसबा पेठ येथून अपेक्षेप्रमाणे हेमंत रासने यांना तिकीट देण्यात आले, तर चिंचवडमध्ये लक्ष्मण जगताप यांच्या पत्नी अश्विनी जगताप यांना उमेदवारी जाहीर करण्यात आली. मात्र रासणे यांच्या नावाला हिंदू महासभेने विरोध केला आहे. आनंद दवे यांनी उमेदवारी अर्ज भरणार असल्याचे सांगितले.

एखाद्या लोकप्रतिनिधीचे निधन झाल्यास त्याच्या कुटुंबातील सदस्यालाच उमेदवारी देण्याची महाराष्ट्राची परंपरा आहे. चिंचवडमध्ये भाजपने ही परंपरा पाळली. मात्र, कसबापेठेत ही परंपरा पाळली नाही. त्यामुळे दिवंगत आमदार मुक्ता टिळक यांचे पती शैलेश टिळक यांनी नाराजी व्यक्त केली आहे. हिंदू महासभेनेही यावरुन टीका केली आहे.

पुण्यात कसबा मतदारसंघात भाजपला थेट प्रश्न विचारणारे बॅनर्स लागले आहेत. कुलकर्णींचा मतदारसंघ गेला. टिळकांचा मतदारसंघ गेला. आता नंबर बापटांचा का?, असा सवाल या बॅनर्समधून करण्यात आला आहे. त्यामुळे या बॅनर्सची पुण्यात जोरदार चर्चा सुरू आहे. या बॅनर्सवर एक जागरुक नागरिक असे लिहिण्यात आले आहे.

ब्राम्हण समाजात तीव्र नाराजी पसरल्याचे सांगितले जात आहे. भाजपकडून चिंचवडमध्ये न्याय तर कसब्यात अन्याय केल्याचा आरोप करण्यात येत आहे. आनंद दवे सोमवारी कसब्यातून उमेदवारी अर्ज भरणार आहेत. त्यांच्या उमेदवारीमुळे कसब्यात हिंदुत्ववादी मतांमध्ये फूट पडणार असल्याचे चित्र निर्माण झाले आहे.

मुक्ता टिळक यांचे पती शैलेश टिळक यांनी आपली प्रतिक्रिया दिली ते म्हणाले. मुक्ता यांचे स्वप्न पूर्ण करण्यासाठी आम्ही उमेदवारी मागितली होती. पण भाजपने दिली नाही. हा मुक्ता यांच्या कामावर अन्याय आहे. पुण्यात एकही ब्राह्मण उमेदवार नाही ही अन्यायाची भावना समाजातही आहे. पण आम्ही भाजपसोबत राहू, असेही ते म्हणाले.

पुणे | कसबा विधानसभा मतदार संघातील भाजपचे उमेदवार हेमंत रासने आज उमेदवारी अर्ज दाखल करीत आहेत. मात्र, भाजपचे प्रदेश उपाध्यक्ष व माजी खासदार संजय काकडे आणि खासदार गिरीश बापट यांना निमंत्रण नसल्याची जोरदार चर्चा आहे.

हेमंत रासने यांनी प्रसिद्ध केलेल्या पत्रकावर संजय काकडे यांचा फोटो नाही. तसेच, अर्ज भरण्यासाठी भाजपकडून जो मेसेज व्हॉट्सॲप वर पाठवला आहे त्यातही संजय काकडे यांचा उल्लेख नाही. आणि विशेष म्हणजे खासदार गिरीश बापट यांचेही नाव त्या मेसेज मध्ये नाही.भाजपकडून या दोन्ही वरिष्ठ नेत्यांना का डावलण्यात आले याविषयी जोरदार चर्चा सुरू आहे. गिरीश बापट आजारी असल्याने ते अनुपस्थित असणे समजू शकते परंतु, भाजपाचे उमेदवार हेमंत रासने यांच्या उमेदवारी अर्ज भरण्यासाठी संजय काकडेंच्या अनुपस्थितीची चांगलीच चर्चा रंगली आहे.

वास्तविक कसबा पेठ विधानसभा मतदार संघात माजी खासदार संजय काकडे यांना मानणारा मोठा मतदार आहे. काकडे यांचा जन्म घोरपडी पेठेतला आहे. वयाच्या 22 वर्षांपर्यंत काकडे यांचे घोरपडी पेठेत वास्तव्य होते. त्यामुळं घोरपडी पेठेबरोबरच 7 व 9 नंबर कॉलनी, गंज पेठ, शुक्रवार पेठ, कसबा पेठ, रविवार पेठ यामध्ये काकडेंना मानणारे कार्यकर्ते मोठ्या संख्येने आहेत. याशिवाय कसबा पेठेतील मुस्लिम व दलित समाज देखील काकडेंना मोठ्या प्रमाणात मानतो.

गिरीश बापट हे विद्यमान खासदार आहेत. शिवाय त्यांनी सलग पाच वेळा कसबा विधानसभा मतदार संघाचे प्रतिनिधित्व केले आहे. त्यामुळं त्यांना देखील मानणारे कार्यकर्ते मोठ्या संख्येने आहेत.असे असून देखील भाजपच्या उमेदवाराचा अर्ज भरण्यासाठी या दोन ज्येष्ठ नेत्यांना का डावलण्यात आले असा प्रश्न राजकीय वर्तुळात चर्चेला आहे. संजय काकडे आणि गिरीश बापट यांना डावलले तर त्याचा फटका भाजपला बसू शकतो अशी चर्चादेखील होत आहे. हाथी आलेल्या वृत्ताने रासने यांनी उमेदवारी अर्ज दाखला करण्यापूर्वी गणपतीची आरती केली यावेळी खासदार बापट यांचे पुत्र गौरव आणि सुनबाई स्वरदा हे दोघेही उपस्थित होते.

पुणे- माझं नाना पटोलेंना आव्हान आहे, की निवडणुकीला अजूनही ४८ तास बाकी आहेत, आम्ही जर टिळकांच्या घरात उमेदवारी दिली, तर काँग्रेसने ही पोटनिवडणूक बिनविरोध होईल हे घोषित करावं”, अशी प्रतिक्रिया आज भाजपचे कसबा उमेदवार हेमंत रासने यांचा उमेदवारी अर्ज भरण्यासाठी जोरदार शक्ती प्रदर्शन करत निघालेल्या मिरवणुकीत माध्यमांशी बोलताना पालकमंत्री चंद्रकांत पाटील यांनी दिली आहे .

कसबा मतदारसंघातून भाजपाने टिळक कुटुंबाला उमेदवारी न दिल्याने आम्ही पोटनिवडणूक लढवण्याचा निर्णय घेतला आहे, असं नाना पटोले म्हणाले या माध्यमांच्या प्रश्नावर ते म्हणाले,’“आम्ही जगताप यांच्या घरातही उमेदवारी दिली आहे. मग काँग्रेस तिथे ही पोटनिवडणूक बिनविरोध करण्यासाठी प्रयत्न करणार का? मुळात काँग्रेसला पुण्यातील दोन्ही जागांची पोटनिवडणूक बिनविरोध करायची नाही. त्यामुळेच नाना पटोले यांनी हे विधान केलं आहे. माझं नाना पटोलेंना आव्हान आहे, की निवडणुकीला अजूनही ४८ तास बाकी आहेत, आम्ही जर टिकळांच्या घरात उमेदवारी दिली, तर काँग्रेसने ही पोटनिवडणूक बिनविरोध होईल हे घोषित करावं”, अशी प्रतिक्रिया चंद्रकांत पाटील यांनी दिली. तसेच “नाना पटोले जे म्हणत आहे, ते न समजण्याइतके आम्ही दुधखुळे नाही. आम्ही या निवडणुकीसाठी तयारी केली आहे”, असा टोलाही त्यांनी लगावला.