पुणे- बाळासाहेब थोरात ,माजी मंत्री बागवे व त्यांचे पुत्र अविनाश ,तसेच रोहित टिळक असे कोणीही नाराज नाही ,या तर वावड्या आहेत, थोरातांचे पत्र तुमच्याकडे आहे काय ? असेल तर दाखवा ,आम्हाला फॉर्म भरायला जाऊ द्यात असे सांगून पत्रकारांच्या प्रश्नांना कॉंग्रेसचे प्रदेश अध्यक्ष नाना पटोले यांनी सहज बगल दिली तर थोरात हे नाराज आहेत कि नाहीत ते त्यांनाच विचारा असे विधान आज माजी प्रदेश अध्यक्ष अशोक चव्हाण यांनी येथे केले .
कसबा मतदारसंघाचे मविआचे उमेदवार रवींद्र धंगेकर यांचा उमेदवारी अर्ज भरण्यासाठी काँग्रेसतर्फे आज रॅली काढण्यात आली. रॅलीत काँग्रेसचे प्रदेशाध्यक्ष नाना पटोले, माजी मुख्यमंत्री अशोक चव्हाण, माजी केंद्रीय गृहमंत्री सुशीलकुमार शिंदे, राष्ट्रवादी काँग्रेसचे अंकुश काकडे, शिवसेनेचे गजानन थरकुडे उपस्थित होते. पुण्याचे ग्रामदैवत श्री कसबा गणपती मंदिर येथे दर्शन घेऊन रॅली काढण्यात आली. त्यावेळी अशोक चव्हाण बोलत होते.
बागवे ,टिळक गैरहजर
भाजप हेमंत रासने यांच्या रॅलीत दिवंगत आमदार मुक्ता टिळक यांचे पती शैलेश टिळक आणि मुलगा कुणाला टिळक गैरहजर राहिले. त्याच सोबत खासदार गिरीश बापट, संजय काकडे देखील गैरहजर राहिल्याने नाराजीची चर्चा रंगली आहे. काँग्रेसमध्येही असाच प्रकार घडला आहे. काँग्रेसचे उमेदवार रवींद्र धंगेकर यांच्या रॅलीत काँग्रेसचे नेते रोहित टिळक, काँग्रेसचे माजी शहराध्यक्ष आणि माजी मंत्री रमेश बागवे, त्यांचे पुत्र नगरसेवक अविनाश बागवे, शिवसेना नेते संजय मोरे, राष्ट्रवादी काँग्रेसच्या रूपाली पाटील ठोंबरे गैरहजर राहिल्याने दोन्ही पक्षातील नाराजीची चर्चा चांगलीच रंगली आहे.