उपांत्य सामन्यात हिमाचल प्रदेशवर मात

१२ गुणांनी महाराष्ट्राचा विजय

महाराष्ट्र-हरियाणा फायनल रंगणार

जबलपूर:फार्मात असलेल्या रेडर हरजित, यशिका पुजारी, मनीषा आणि समृद्धी यांनी अप्रतिम खेळीतून महाराष्ट्र महिला कबड्डी संघाला खेलो इंडिया यूथ गेम्सच्या फायनल चे तिकीट मिळवून दिले. युवा कर्णधार निकिताच्या कुशल नेतृत्वात महाराष्ट्र महिला संघाने अंतिम फेरीचा पल्ला गाठला. गत रौप्य पदक विजेत्या महाराष्ट्र महिला संघाने बुधवारी उपांत्य लढतीत हिमाचल प्रदेशवर १२ गुणांनी विजयाची नोंद केली. महाराष्ट्र संघाने ४४-३१ अशा फरकाने सेमी फायनल मध्ये एकतर्फी विजय संपादन केला.
या लक्षवेधी कामगिरीच्या बळावर महाराष्ट्र संघाला दुसऱ्यांदा फायनल मध्ये प्रवेश निश्चित करता आला. मुख्य प्रशिक्षक गीता साखरे यांचे मार्गदर्शन आणि निकिताच्या कुशल नेतृत्व यातून महाराष्ट्र संघ आता चॅम्पियन होण्यासाठी सज्ज झाला आहे. यासाठी महाराष्ट्राला अंतिम सामन्यात हरियाणा विरुद्ध विजय संपादन करावा लागणार आहे. गुरुवारी हरियाणा आणि महाराष्ट्र यांच्यात फायनल रंगणार आहे. सलग दुसऱ्यांदा हे दोन्ही संघ फायनल मध्ये समोरासमोर येत आहेत.
राष्ट्रीय खेळाडू हरजीत, यशिका आणि मनीषा यांनी आपल्या दर्जेदार कामगिरीत सातत्य ठेवत महाराष्ट्र संघाला मोठा विजय मिळवून दिला. आक्रमक खेळीतून महाराष्ट्र संघाने पहिल्या हाफ मध्येच आघाडी घेत विजयाचे संकेत दिले. यादरम्यान निकिता, समृद्धी आणि हरजीत यांनी अचूक पकडीतून हिमाचल प्रदेशचा विजयाचा प्रयत्न हाणून पाडला.

हरियाणाला पराभवाची परतफेड करत चॅम्पियन होणार महाराष्ट्र
महाराष्ट्र महिला संघाला आता किताब जिंकण्याची मोठी संधी आहे. याच सोनेरी यशापासून महाराष्ट्राचा संघ अवघ्या एका पावलावर आहे. आता महाराष्ट्र संघ फायनल मध्ये हरियाणाला नमवून चॅम्पियन होण्यासाठी सज्ज झाला आहे. गुरुवारी महिला गटाच्या फायनल मध्ये महाराष्ट्र आणि हरियाणा संघ समोरासमोर असतील. गत सत्रामध्ये हरियाणा संघाने फायनल मध्ये महाराष्ट्राचा पराभव केला होता.
संघाला सोनेरी यश मिळवून देणार: निकिता
महाराष्ट्र संघातील प्रत्येक खेळाडूने सर्वोत्तम कामगिरी करत संघाची किताब जिंकण्याची आशा कायम ठेवली आहे. या दरम्यान रेडर हरजित, यशिका, मनीषा यांची कामगिरी लक्षवेधी ठरली. त्यामुळे आम्हाला फायनल गाठण्याचा पराक्रम गाजवता आला. आता महाराष्ट्र संघाला ऐतिहासिक सुवर्णपदक मिळवून देण्यासाठी उत्सुक आहे, अशा शब्दात कर्णधार निकिताने आपला निर्धार व्यक्त केला.
डावपेच फत्ते करत गाठली फायनल: प्रशिक्षक गिता साखरे
पहिल्यांदाच चॅम्पियन होण्यासाठी उत्सुक असलेल्या महाराष्ट्र संघाने आखून दिलेले सर्व डावपेच फत्ते केले. त्यामुळे महाराष्ट्र संघाला अंतिम फेरीचा पल्ला गाठता आला. उपांत्य सामन्यातील धडाकेबाज विजयाने महाराष्ट्र महिला खेळाडूंचा आत्मविश्वास दुणावला आहे. त्यामुळे संघ आता निश्चितपणे किताबाचा बहुमान मिळेल, असा विश्वास मुख्य प्रशिक्षक गीता साखरे यांनी व्यक्त केला.

कबड्डीमध्ये महाराष्ट्राचे पदक निश्चित; आता सोनेरी यशाकडे वाटचाल

जबलपूर:
फार्मात असलेल्या सुपरस्टार रेडर अजित चौहान, पृथ्वीराज आणि साहिल पाटीलने गत कांस्य पदक विजेत्या महाराष्ट्र पुरुष कबड्डी संघाचा पाचव्या सत्रातील खेलो इंडिया युथ गेम्स सेमी फायनल मधील प्रवेश निश्चित केला. वैभव रबाडेच्या कुशल नेतृत्वात महाराष्ट्र संघाने गटातील शेवटच्या सामन्यात यजमान मध्य प्रदेश संघाला धूळ चारली. महाराष्ट्र संघाने ५०-३७ असा तेरा गुणांच्या आघाडीने दणदणीत विजय साजरा केला. या विजयासह महाराष्ट्र संघाचे स्पर्धेतील पदक निश्चित झाले आहे. मात्र महाराष्ट्र संघ आता सोनेरी यशाचा पल्ला गाठण्यासाठी सज्ज झाला आहे. आता महाराष्ट्र आणि हरियाणा यांच्यात सेमी फायनल रंगणार आहे.
महाराष्ट्र पुरुष संघाने गटातील तिसऱ्या सामन्यात सर्वोत्तम कामगिरी करत आपला दबदबा कायम ठेवला. यादरम्यान महाराष्ट्राकडून अजित, पृथ्वीराज आणि साहिल यांची कामगिरी लक्षवेधी ठरली. त्यामुळे दमदार सुरुवात करणाऱ्या महाराष्ट्र संघाने पहिल्या हात मध्येच १३ गुणांची लीड घेतली होती. आपली हीच मोहीम कायम ठेवत महाराष्ट्र संघाने मध्यंतरानंतरही सर्वोत्तम खेळी केली. यातून महाराष्ट्र संघाला धडाकेबाज विजयाची नोंद करता आली.
विजयाच्या प्रयत्नात असलेल्या यजमान मध्य प्रदेश संघाला दादासो पुजारी आणि अनुज गावडे यांनी रोखले. या दोघांनी अचूक पकडी करून यजमानांचा विजयाचा प्रयत्न हाणून पाडला.

यजमान संघ घरच्या मैदानावर अपयशी
यजमान मध्य प्रदेश संघाचा घरच्या मैदानावर कबड्डीत पदकाचा बहुमान मिळवण्याचा प्रयत्न अपुरा ठरला. घरच्या मैदानावरील सुमार कामगिरीमुळे यजमान संघाला लाजिरवाण्या पराभवाचा सामना करावा लागला. बलाढ्य महाराष्ट्राच्या सर्वोत्तम खेळीमुळे शेवटपर्यंत मध्यप्रदेश संघाची मोठी दमछाक झाली.

महाराष्ट्र गाठणार फायनल;आज हरियाणा विरुद्ध लढत
गत सत्रातील कांस्यपदक विजेता महाराष्ट्र संघ आता यंदाच्या स्पर्धेत चॅम्पियन होण्यासाठी उत्सुक आहे. सोनेरी यशाचा हाच पडला गाठण्यासाठी महाराष्ट्राचा संघ आज बुधवारी संध्याकाळी मैदानावर उतरणार आहे. यादरम्यान महाराष्ट्र आणि हरियाणा यांच्यात उपांत्य सामना रंगणार आहे. यातील विजयाने महाराष्ट्राला फायनल गाठण्याची संधी आहे.

दणदणीत विजयाने किताबाचा दावा मजबूत: दादासो आव्हाड ( प्रशिक्षक )
महाराष्ट्र संघाने दणदणीत विजय संपादन करून उपांत्य फेरी गाठली आहे. या सामन्यातील महाराष्ट्राच्या खेळाडूंची कामगिरी उल्लेखनीय ठरली.. त्यामुळे निश्चितपणे महाराष्ट्र संघ किताबाचा प्रबळ दावेदार मानला जात आहे. आता उपांत्य सामना जिंकून फायनल गाठण्यासाठी महाराष्ट्र संघाने कंबर कसली आहे. आम्ही सर्वोत्कृष्ट कामगिरी करत आलेले डावपेच यशस्वी करत आहोत. त्यामुळे निश्चितपणे महाराष्ट्राला यंदा किताबाचा बहुमान मिळवता येईल, असा विश्वास मुख्य प्रशिक्षक दादासो आव्हाड यांनी व्यक्त केला.

पु. ल. देशपांडे कला अकादमी येथेही येणाऱ्या काळात कला प्रदर्शन भरविले जाणार— सांस्कृतिक कार्य मंत्री सुधीर मुनगंटीवार

मुंबई, दि. 7: राज्यातील कलाकराना आपली कला सादर करण्याची संधी मिळावी, हक्काचे व्यासपीठ असावे यासाठी येणाऱ्या काळात पु. ल. देशपांडे कला अकादमी येथेही कला प्रदर्शन भरविले जाणार असल्याचे सांस्कृतिक कार्य मंत्री सुधीर मुनगंटीवार यांनी सांगितले.

बॉम्बे आर्ट सोसायटीच्या 131 व्या अखिल भारतीय वार्षिक कला प्रदर्शनाचे उद्घाटन आज सांस्कृतिक कार्य मंत्री सुधीर मुनगंटीवार यांच्या हस्ते करण्यात आले. यावेळी द बॉम्बे आर्ट सोसायटीचे अध्यक्ष राजेंद्र पाटील, नरेंद्र विचारे, विक्रांत मांजरेकर तसेच जीवनगौरव पुरस्कार विजेते प्रा. जी. एस. माजगांवकर, रामदास फुटाणे, चंद्रजीत यादव, यांच्यासह मान्यवर उपस्थित होते.

यावेळी ना.श्री. सुधीर मुनगंटीवार यांच्या हस्ते हस्ते कला शाखेतील योगदानासाठी प्रा. जी. एस. माजगांवकर यांना जीवनगौरव पुरस्काराने सन्मानित करण्यात आले.

श्री. मुनगंटीवार म्हणाले की, एकाद्या कलाकाराला आपली कला जहांगीर आर्ट गॅलरी येथे सादर करण्याची संधी मिळावी असे नेहमीच वाटत असते, परंतु या आर्ट गॅलरीमध्ये कला सादर करताना अनेकदा काही वर्षे थांबावे लागते. अशा वेळी कलाकाराचे मनोबल वाढण्यासाठी आणि व्यासपीठ उपलब्ध व्हावे यासाठी सांस्कृतिक कार्य विभाग पुढाकार घेईल. पु. ल. देशपांडे कला अकादमी येथे कलाप्रदर्शन भरल्यानंतर त्याची स्क्रीनिंग जहांगीर आर्ट गॅलरी येथे करण्यात येईल.

एकाद्या कलाकारासाठी कलेमध्ये आशय, भावना, भाव निर्माण करणे गरजेचे असते. आज महाराष्ट्रातील अनेक कलाकार कला, साहित्य, चित्रकला, संस्कृती यामध्ये आपला ठसा उमटवत आहेत. महाराष्ट्रातील या कलाकारानं हक्काचे व्यासपीठ सांस्कृतिक कार्य विभाग उबलब्ध करुन देण्यात येणार आहे जेणेकरुन आपले कलाकार आपली कला सादर करताना, सादरीकरण करताना कुठेही कमी पडणार नाही असेही श्री. मुनगंटीवार यांनी यावेळी सांगितले.

बॉम्बे आर्ट सोसायटी गेल्या तीन शतकापासून कलेची सेवा करत आहे असे पंतप्रधान नरेंद्र मोदी यांनी या सोसायटीचे वांद्रे येथील कार्यालयाचे उद्घाटन करताना सांगितले होते, पण मला असे वाटते आर्ट सोसायटी दोन सहस्त्रचंद्रकांत काम करत असून सोसायटीने हे काम असेच सुरु ठेवावे अशी अपेक्षा श्री. मुनगंटीवार यांनी व्यक्त केली.

सहजता, कल्पकता आणि सूचकता या गोष्टी कलाकारांनी अवगत करणे महत्त्वाचे

सत्कार स्वीकारल्यानंतर मार्गदर्शन करताना माजगावकर म्हणाले की, विद्यार्थ्यांनी आपले चित्र आज स्वीकारले गेले नाही म्हणून खर्चून न जाता पुढे जात राहणं आवश्यक आहे. काही कळत नाही हे जेव्हा कळते तेव्हाच आपल्याला सगळे कळण्यास सुरुवात होते आणि तेव्हा आपण पुढे जात आहोत असे आपण समजले पाहिजे. आकार, सौंदर्य, प्राविण्य,कलात्मक दृष्टिकोन यामुळेच आपलं कलेमधलं कलामूल्य वाढत असतं. सहजता, कल्पकता आणि सूचकता या तीन गोष्टी कलाकारांनी आपल्यामध्ये अवगत करणे अत्यंत महत्त्वाचे आहे.

आजच्या कार्यक्रमादरम्यान एकूण ४८ पुरस्कार उपस्थित मान्यवरांच्या हस्ते देण्यात आले. आजपासून जहांगीर आर्ट गॅलरी येथे 131 वे अखिल भारतीय कला प्रदर्शन भरविण्यात आलेजआहे. जहांगीर आर्ट गॅलरीच्या चारही दालनांमध्ये हे प्रदर्शन आयोजित करण्यात आले असून भारतभरातून आलेलया चित्राकृती, शिल्पाकृती, मुद्राचित्रे, छायाचित्रे अशा विविध कलाप्रकारांमधील कलाकृती असणार आहेत.
महाराष्ट्रात 134 वर्षे जुनी बॉम्बे आर्ट सोसायटी असून ही सोसायटी सातत्याने कलाविषयक उपक्रम राबवते याचा आनंद आहे. विशेष म्हणजे राज्य शासनाने वांद्रे येथे दिलेल्या जमिनीवर बॉम्बे आर्ट सोसायटीने बनविलेल्या भव्यसंकुलाचे उद्घाटन पंतप्रधान नरेंद्र मोदी यांनी 2016 मध्ये केले होते.

मुंबई, दि.७ राज्यात दिव्यांग विद्यापीठ स्थापन करण्यासाठी समिती गठीत करण्यात यावी, असे निर्देश उच्च व तंत्र शिक्षण मंत्री चंद्रकांत दादा पाटील यांनी दिले.
अमरावती जिल्ह्यात दिव्यांग विद्यापीठ स्थापन करण्यासंदर्भात उच्च व तंत्र शिक्षण मंत्री श्री. पाटील यांच्या अध्यक्षतेखाली मंत्रालयात बैठक संपन्न झाली.

राज्यात स्वतंत्र दिव्यांग विभाग स्थापन करण्याचा निर्णय शासनाने यापुर्वीच घेतला आहे. दिव्यांग बांधवांच्या शैक्षणिक सोयीसाठी राज्यात स्वतंत्र दिव्यांग विद्यापीठ होणे गरजेचे आहे. त्यासाठी राज्य शासन सकारात्मक असून या विद्यापीठाच्या कामाला गती यावी, यासाठी समिती गठीत करण्यात येईल.अशी माहिती उच्च व तंत्र शिक्षण मंत्री चंद्रकांत दादा पाटील यांनी दिली.

यावेळी माजी राज्यमंत्री आमदार बच्चूभाऊ कडू ,उच्च व तंत्र शिक्षण विभागाचे प्रधान सचिव विकासचंद्र रस्तोगी, उपसचिव अजित बाविस्कर, उच्च शिक्षण संचालक शैलेंद्र देवळाणकर संबंधित अधिकारी उपस्थित होते.

खारगांव –महाराष्ट्राला नवख्या असणाऱ्या स्लॅलम (कयाकिंग) या क्रीडा प्रकारात अमरावतीच्या जान्हवी राईकवारने मंगळवारी ब्रॉंझपदकाची कमाई केली. या स्पर्धा प्रकाराचा खेलो इंडिया स्पर्धेत प्रथमच समावेश करण्यात आला असून, महाराष्ट्रानेही अगदी ऐनवेळी या स्पर्धेत आपला सहभाग निश्चित केला. मुळ अमरावतीची असली, तरी भोपाळ येथे सराव करणाऱ्या जान्हवीने याच सरावाचा आपल्याला फायदा झाल्याचे सांगितले. पदार्पणातच पदकाला गवसणी घातल्याने आनंद झाला आहे. आता या खेळात अधिक प्रगती करण्याचे आपले उद्दिष्ट असल्याचे तिने सांगितले. 

“महाराष्ट्राने सहा महिन्याच्या अल्पशा तयारीनंतर पहिल्याच स्पर्धेत ब्रॉंझपदकापर्यंत मजल मारली. महाराष्ट्राकडे गुणवत्ता भरपूर आहे. पण, या खेळासाठी आवश्यक असलेले पोषक वातावरण आणि सुविधा उपलब्ध होणे गरजेचे आहे”, अशी प्रतिक्रिया जान्हवीच्या प्रशिक्षक पूजा पडोळे यांनी व्यक्त केली. 
सांगली जिल्ह्यात कृष्णा नदीच्या पात्रात सरावासाठी चांगली जागा असूनही केवळ सुविधे अभावी आपल्याला बाहेर जावे लागत आहे. जान्हवी याचे उत्तम उदाहरण आहे. सहा महिन्यापूर्वी तिने सरावाला सुरुवात केली. स्पर्धापूर्व तयारीसाठी एक महिना जान्हवीला भोपाळमध्ये जावे लागले. स्पर्धाही भोपाळमध्येच असल्यामुळे येथिल सरावाचा फायदा झाला, असेही प्रशिक्षक पूजा म्हणाल्या. कॅनॉइंग आणि कयाकिंग हा खेळ साहसी असून सर्वाधिक प्रमाणात पर्वतराजीत जास्त खेळला जातो. पण, आता महाराष्ट्रातही हा खेळ खेळला जाऊ शकतो. मर्यादित सुविधेतही महाराष्ट्राच्या खेळाडूंच्या कामगिरीचे येथे कौतुक झाले. या सुविधांमध्ये वाढ झाल्यास आणि चांगले प्रशिक्षण मिळाल्यास आपले खेळाडू भविष्यात नक्कीच पदकाचा रंग बदलू शकतील, असा विश्वासही पूजा यांनी व्यक्त केला.

मुंबई, दि. ७ : राज्य शासनाने पूर्वी खुल्या बाजारातून उभारलेल्या 8.62 टक्के महाराष्ट्र राज्य विकास कर्जाची 6 मार्च 2023 रोजी सममूल्याने परतफेड करण्यात येईल. या कर्जात गुंतवणूक केलेल्या गुंतवणूकदारांना कर्जाची परतफेड करण्यात येणार आहे, असे वित्त विभागाच्या सचिव शैला ए. यांनी कळविले आहे.

या कर्जाची अदत्त शिल्लक रकमेची दिनांक 5 मार्च 2023 पर्यंत देय असलेल्या व्याजासह दिनांक 6 मार्च 2023 रोजी सममूल्याने परतफेड करण्यात येईल. “परक्राम्य संलेख अधिनियम, 1881 अन्वये महाराष्ट्र शासनाने उपरोक्त दिनांकास सुटी जाहीर केल्यास, राज्यातील अधिदान कार्यालय, कर्जाची परतफेड अगोदरच्या कामाच्या दिवशी करेल. या कर्जावर दि. 6 मार्च 2023 पासून व त्यानंतर कोणतेही व्याज अदा करण्यात येणार नाही.

सरकारी प्रतिभूती विनियम, 2007 च्या उप-विनियम 24(2) व 24(3) अनुसार, दुय्यम सर्वसाधारण खातेवही लेखा किंवा रोखे प्रमाणपत्र यांच्या स्वरुपातील शासकीय रोख्यांच्या नोंदणीकृत धारकाकडील मुदत समाप्ती उत्पन्नाचे प्रदान हे, इलेक्ट्रॉनिक माध्यमामार्फत जमा निधीची सुविधा असलेल्या कोणत्याही बँकेतील धारकाच्या खात्यात जमा करून त्याच्या बँक खात्याचे संबंधित तपशिलांसह प्रदानादेशाद्वारे करण्यात येईल. रोख्यांच्या बाबतीतील प्रदान करण्यासाठी अशा रोख्यांचा मूळ वर्गणीदार किंवा यथास्थिती उत्तरवर्ती धारक, बँकेकडे किंवा कोषागाराकडे किंवा भारतीय स्टेट बँकेच्या शाखेच्या उप-कोषागाराकडे किंवा यथास्थिती त्यांच्या दुय्यम बँकांकडे जर त्यांना व्याज प्रदान करण्यासाठी मुखांकित करण्यात आले असल्यास त्यांची नोंदणी करण्यात आली असल्यास त्याच्याकडे त्यांच्या बँक खात्याचा संबंधित तपशील सादर करतील.

तथापि, बँक खात्याच्या संबंधित तपशिलाच्या/इलेक्ट्रॉनिक माध्यमामार्फत निधी जमा करण्याच्या आदेशाच्या अभावी नियत दिनांकास परतफेड करणे सुलभ व्हावे यासाठी, 8.62 टक्के महाराष्ट्र राज्य विकास कर्ज 2023 च्या धारकांनी, लोक ऋण कार्यालयात 20 दिवस अगोदर त्यांचे रोखे सादर करावेत. रोख्यांच्या मागील बाजूस “प्रमाणपत्रावरील देय मुद्दलाची रक्कम मिळाली.” असे यथोचितरीत्या नमूद करुन ते रोखे परतफेडीसाठी सादर करावेत.

भारतीय स्टेट बँकेच्या किंवा तिच्या कोणत्याही सहयोगी बँकांच्यामार्फत ज्या ठिकाणी कोषागाराचे काम केले जाते त्या ठिकाणी ते रोखे रोखा प्रमाणपत्राच्या स्वरुपात असल्यास, ते संबंधित बँकेच्या शाखेत सादर करावेत आणि ते कोषागार किंवा उपकोषागार येथे सादर करू नयेत, याची विशेष नोंद घेतली पाहिजे.

रोख्यांची रक्कम प्रदान करण्यासाठी ठिकाणे मुखांकित करण्यात आली असतील त्या ठिकाणांखेरीज अन्य ठिकाणी ज्या रोखेधारकांना रक्कम स्वीकारायची असेल, त्या रोखेधारकांनी ते रोखे नोंदणीकृत व विमाबद्ध डाकेने संबंधित लोक ऋण कार्यालयात यथोचितरित्या पाठवावेत, लोक ऋण कार्यालय हे, महाराष्ट्र राज्यात शासकीय कोषागाराचे काम करणाऱ्या भारतीय स्टेट बँकेच्या किंवा तिच्या सहयोगी बँकेच्या कोणत्याही शाखेत कोषागारात/उपकोषागारात देय असलेल्या धनाकर्षाद्वारे त्याचे प्रदान करील असे वित्तीय सुधारणा विभागाच्या सचिव शैला ए. यांनी प्रसिद्धीपत्रकाद्वारे कळविले आहे.

यशवंतराव चव्हाण राज्य वाड्मय पुरस्कारांच्या नियमावलीत सुधारणा

मुंबई, दि. ७ : मराठी भाषेतील उत्कृष्ट वाड्मय निर्मितीसाठी प्रकाशन वर्ष २०२२ करीता राज्य शासनाच्या वतीने देण्यात येणाऱ्या स्व. यशवंतराव चव्हाण राज्य वाड्मय पुरस्कार स्पर्धेसाठीच्या प्रवेशिका पाठविण्यास २ मार्च २०२३ पर्यंत मुदतवाढ देण्यात आली आहे. तसेच या स्पर्धेच्या नियमावलीतील नियम क्रमांक २४ मध्ये बदल करण्यात आला असून या नियमात ‘महाराष्ट्र राज्य साहित्य आणि संस्कृती मंडळावरील शासन नियुक्त सदस्य वगळता इतरांना या पुरस्कारांसाठी पुस्तके सादर करता येतील’, अशी सुधारणा करण्यात आली आहे, अशी माहिती महाराष्ट्र राज्य साहित्य आणि संस्कृती मंडळाच्या सचिव मीनाक्षी रा. पाटील यांनी दिली आहे.

मराठी भाषेतील उत्कृष्ट वाड्मय निर्मितीसाठी प्रकाशन वर्ष २०२२ करीता राज्य शासनाच्या वतीने देण्यात येणाऱ्या स्व. यशवंतराव चव्हाण राज्य वाड्मय पुरस्कार स्पर्धेसाठी जिल्हाधिकारी कार्यालय (मुंबई शहर व मुंबई उपनगर वगळून), महाराष्ट्र परिचय केंद्र, नवी दिल्ली व पणजी, गोवा येथे तसेच महाराष्ट्र राज्य साहित्य आणि संस्कृती मंडळाच्या कार्यालयात १ ते ३१ जानेवारी २०२३ पर्यंत पाठविता येणार होत्या. मात्र, या पुरस्कार स्पर्धेसाठी प्रवेशिका व पुस्तके सादर करण्याच्या कालावधीस एक महिना अधिकची मुदतवाढ देण्यात आली असून आता या पुरस्कार स्पर्धेसाठी प्रवेशिका व पुस्तके स्वीकारण्याचा अंतिम दिनांक २ मार्च २०२३ असा आहे.

२ फेब्रुवारी २०२३ रोजीच्या शासन निर्णयान्वये गतवर्षीच्या स्व. यशवंतराव चव्हाण राज्य वाड्मय पुरस्कार स्पर्धेच्या नियमावलीतील नियम क्रमांक २४ मध्ये बदल करण्यात आला असून या नियमात महाराष्ट्र राज्य साहित्य आणि संस्कृती मंडळावरील शासन नियुक्त सदस्य वगळता इतरांना या पुरस्कारांसाठी पुस्तके सादर करता येतील, अशी सुधारणा करण्यात आली आहे. या सुधारित नियमाची अंमलबजावणी सन २०२२ च्या स्व. यशवंतराव चव्हाण राज्य वाड्मय पुरस्कार स्पर्धेपासून करण्यात येत आहे. या योजनेची सन २०२२ च्या पुरस्कार स्पर्धेसाठीची सुधारित नियमावली व प्रवेशिका जिल्हाधिकारी कार्यालय (मुंबई शहर व मुंबई उपनगर वगळून), महाराष्ट्र परिचय केंद्र नवी दिल्ली व पणजी, गोवा येथे, महाराष्ट्र शासनाच्या www.maharashtra.gov.in या संकेतस्थळावर व महाराष्ट्र राज्य साहित्य आणि संस्कृती मंडळाच्या http://sahitya.marathi.gov.in या संकेतस्थळावर व कार्यालयात उपलब्ध आहेत, असेही सचिव श्रीमती पाटील यांनी म्हटले आहे.