पुणे-कोथरुड मधील वाहतूक कोंडी सोडविण्यासाठी सिद्धार्थ पॅलेस ते मृत्यूंजयेश्वर मंदिर रोडला मंजुरी मिळाली आहे. यासाठी पालकमंत्री चंद्रकांतदादा पाटील यांनी विशेष पुढाकार घेतला होता. त्यामुळे हा रस्ता लवकरच तयार होऊन कोथरूडकरांची वाहतूककोंडीच्या त्रासातून मुक्तता होणार आहे.

कोथरूड मधील वाहतूक कोंडी सोडविण्यासाठी विविध उपाययोजना करण्यात येत असून, त्यासाठी विविध पर्याय महापालिकेच्या माध्यमातून समोर आले होते‌. त्यातील सिद्धार्थ पॅलेस ते मृत्यूंजयेश्वर मंदिर रोड मार्गावरील वाहतूक कोंडी सोडविण्याची मागणी सातत्याने होत होती. मात्र, सदर रस्त्याच्या कामात अनेक अडथळे होते. या मार्गावरील बहुतांश जागा ही किर्लोस्कर कमिन्सच्या मालकीची असल्याने, जमीन अधिग्रहणाचा मोठा प्रश्न होता.

हा प्रश्न सोडविण्यासाठी पालकमंत्री चंद्रकांतदादा पाटील यांचे विशेष प्रयत्न सुरू होते.अखेर या प्रयत्नांना यश आले असून, सिद्धार्थ पॅलेस ते मृत्यूंजयेश्वर मंदिरच्या विकास आराखड्यास मंजूरी मिळाली आहे. सदर रस्ता किर्लोस्कर कमिन्सच्या मदतीने आणि सार्वजनिक बांधकाम विभागाच्या माध्यमातून उभारण्यात येणार आहे. या रस्त्याचे रुंदीकरण होऊन २० मीटर होणार आहे. त्यासाठी १५ कोटी खर्च अपेक्षित आहे. जुलै २०२३ पर्यंत सदर रस्त्याचे काम पूर्ण करण्याचे बांधकाम विभागाचे नियोजन आहे. या मार्गावरील वाहतूक कोंडीचा प्रश्न सुटणार आहे.

‘फॅसिझम नको असेल तर   कॉर्पोरेटायझेशन नियंत्रित  ठेवा ‘:डॉ.मायकेल सनलाईटनर
पुणे :’भारतासह जगभर कॉर्पोरेट जगताच्या हितासाठी फॅसिझम बोकाळला आहे,लोकशाही व्यवस्था नष्ट करण्याचे काम चालू आहे. भावनात्मक मारा,राष्ट्रवादाची ठेकेदारी ,सैन्याचे उदात्तीकरण,ऐतिहासिक सत्याचे विकृतीकरण आणि सतत कोणता तरी शत्रूची भीती दाखवून द्वेष निर्माण करणे, ही फॅसिझमची  लक्षणे असून ती सहज ओळखू येतात. फॅसिझम(हुकूमशाही) नको असेल तर महाकाय कॉर्पोरेट कंपन्यांच्या वस्तू,सेवा घेणे कमी करून त्यांची पैशाची ताकद कमी करणे हा एकमेव उपाय आहे,’ असे प्रतिपादन अमेरिकेतील गांधीवादी अभ्यासक डॉ.मायकेल सनलाईटनर यांनी केले. 

अमेरिकेतील  ‘पोर्टलॅंड कम्युनिटी कॉलेज चे विश्वस्त, ‘गांधी अँड किंग :सोल फोर्स अँड सोशल चेंज’  या पुस्तकाचे लेखक आणि गांधीवादी अभ्यासक  डॉ.मायकेल सनलाईटनर यांच्याशी संवादाचा कार्यक्रम महाराष्ट्र गांधी स्मारक निधी (कोथरूड) येथे गुरुवारी सायंकाळी आयोजित करण्यात आला होता. त्यावेळी  डॉ.मायकेल सनलाईटनर बोलत होते. डॉ. कुमार सप्तर्षी यांनी  डॉ.मायकेल यांचा शाल,स्मृतिचिन्ह  देऊन सत्कार केला.डॉ.मायकेल यांनी गांधीजींच्या पुतळ्याला अभिवादन केले. यावेळी भारतीय समाज विकास व संशोधन संस्थेचे विश्वस्त डॉ. प्रवीण सप्तर्षी, लेखिका डॉ. अंजली सोमण, महाराष्ट्र गांधी स्मारक निधीचे सचिव संदीप बर्वे, प्रा. नीलम पंडित, प्रकाश बुरटे, भारत जोडो यात्री प्रकाश ढोबळे उपस्थित होते. 
 डॉ.मायकेल सनलाईटनर म्हणाले,’लोकशाही तत्व आणि गांधी तत्व मारून टाकण्याचे काम भारतात सुरु आहे.त्यामुळे माझ्यासारखे अनेक जण अस्वस्थ आहेत.लष्करी प्रकारची हुकूमशाही,लोकशाहीच्या आवरणातील हुकूमशाही आणि कॉर्पोरेट हुकूमशाही असे हुकूमशाहीची प्रकार जगभर दिसतात.भारतात लोकशाहीच्या आवरणात हुकूमशाही येताना दिसत आहे. त्यासाठी राष्ट्रवादाचा मुखवटा  घेतला जातो.जे राष्ट्रीय विचारांचे नाहीत,तेच त्याची प्रमाणपत्रे इतरांना मागत सुटतात.मोठ्या कॉर्पोरेट कंपन्यांना अनुकूल अर्थव्यवस्था तयार केली जाते. त्यांच्यासाठी विकासाचे मोठ मोठे प्रकल्प उभारले जातात. त्यालाच विकास म्हणावे अशी त्यांची अपेक्षा असते. त्यात समाजाचे हित पाहिले जात नाही’. 
     देव,देश,धर्म ,जात अशा मुद्द्यांवर सतत भावनात्मक मारा केला जातो. राष्ट्रवादाची ठेकेदारी केली जाते.सैन्याचे सतत उदात्तीकरण केले जाते. संरक्षण साहित्यावर अफाट खर्च केला जातो. ऐतिहासिक सत्याचे विकृतीकरण करून सत्य मारून टाकले जाते. सतत कोणत्या  तरी शत्रूची भीती दाखवून द्वेष निर्माण करणे,मॉब लिंचिंग सारख्या गोष्टी घडवून आणणे अशा गोष्टी होतात. ही फॅसिझमची  लक्षणे असून ती सहज ओळखू येतात. फॅसिझम ( हुकूमशाही ) नको असेल तर महाकाय कॉर्पोरेट कंपन्यांच्या वस्तू , सेवा घेणे कमी करून त्यांची पैशाची ताकद कमी करणे हा एकमेव उपाय आहे. मी वैयक्तिक पातळीवर त्यासाठी प्रयत्न करीत आहे. एकूण लोकसंख्येच्या २० टक्के लोकसंख्या जरी निर्भीड झाली तरी हुकूमशाहीचा धोका टाळता येतो,असेही डॉ मायकेल यांनी सांगितले.     
डॉ.मायकेल सनलाईटनर :गांधी विचाराचे अभ्यासक,लेखक 
  अमेरिकेतील  ‘पोर्टलॅंड कम्युनिटी कॉलेज चे विश्वस्त, ‘गांधी अँड किंग :सोल फोर्स अँड सोशल चेंज’  या पुस्तकाचे लेखक आणि गांधीवादी अभ्यासक    डॉ.मायकेल सनलाईटनर हे सत्तरच्या दशकापासून भारतात येत आहेत. गांधीजींचे सचिव प्यारेलाल यांच्या मार्गदर्शनाखाली त्यांनी आपला प्रबंध पुर्ण केला. विनोबा भावे, खान अब्दूल गफारखान, मोरारजी देसाई, जयप्रकाश नारायण, प्यारेलाल नायर, नारायणभाई देसाई या गांधीवादी नेत्यांच्या त्यांनी भेटी घेतल्या आहेत.गांधीविचारांचा आजचा संदर्भ, स्वदेशी, स्वराज, मोक्ष, अहिंसा आणि सत्याग्रह, लोकशाही, विनोबा भावे, अमेरिकन राजकारण, दहशतवाद या आणि इतर सामाजिक – राजकीय विषयांवर त्यांची व्याख्याने होत असतात. २०२० साली दांडी यात्रेच्या अमृतमहोत्सवी यात्रेत प्रा. सनलाईटनर यांनी सहभाग घेतला होता.

पुणे- कसबा विधानसभा निवडणुकीतून आमआदमी पार्टीचे उमेदवार किरण कद्रे यांनी पक्ष श्रेष्ठींच्या आदेशानुसार माघार घेतली आहे.आम आदमी पार्टीच्या राष्ट्रीय प्रवक्ता प्रीती शर्मा मेनन यांच्या कडून याबाबतचे निवेदन प्रसिद्धीसाठी पाठविल्याचे स्थानिक प्रवक्ते डॉ. अभिजित मोरे यांनी सांगितले .

प्रीती मेनन यांनी या निवेदनात असे म्हटले आहे कि,’ आम आदमी पार्टी महाराष्ट्र राज्यातील शहरी व ग्रामीण भागातील स्थानिक स्वराज्य संस्थांच्या निवडणुका लढवण्यासाठी सज्ज होत आहे. महाराष्ट्रातील खोक्या – बोक्याच्या राजकारणाला सामान्य जनता कंटाळलेली आहे. मागच्या तीन वर्षांमध्ये महाराष्ट्रातील राजकीय पक्षांची संगीत खुर्ची राज्यातील जनतेने उघड्या डोळ्यांनी बघितली आहे. कोणताही प्रस्थापित पक्ष कोणत्याही इतर प्रस्थापित पक्षासोबत सत्ता स्थापन करू शकतो. कोणतीही वैचारिक भूमिका नाही, हे राज्यातील जनतेला कळून चुकले आहे. आमदारांनी राजकीय पक्ष बदलण्यासाठी अथवा सत्तेत भागीदार होण्यासाठी मोठ्या प्रमाणावर पैसे घेतल्याच्या चर्चा जनसामान्यांमध्ये दररोज घडत आहेत. लोक या प्रकाराला कंटाळले आहेत.दिल्लीतील वीज, पाणी, आरोग्य, शिक्षण, रोजगार, उत्तम व भ्रष्टाचार रहित प्रशासकीय सेवा यांचे विकासाचे मॉडेल लोकांना मनापासून आवडले आहे. पंजाबमध्ये देखील याच मॉडेलच्या धर्तीवर आम आदमी पक्षाच्या सरकारचं काम सुरू आहे.या पार्श्वभूमीवर अरविंद केजरीवाल हे महाराष्ट्रातील जनतेमध्ये लवकरच येतील आणि याची सुरुवात स्थानिक स्वराज्य संस्थांच्या निवडणुकीपासून होईल. सद्या आम आदमी पार्टीने महाराष्ट्रातील विधानसभा पोटनिवडणूक न लढवण्याचा निर्णय घेतला आहे. त्यानुसार पक्ष श्रेष्ठींच्या आदेशानुसार किरण कद्रे यांनी कसबा विधानसभा निवडणुकीतून माघार घेतली आहे. आम्ही स्थानिक स्वराज्य संस्थेच्या निवडणुका ताकतीनिशी लढू आणि त्यानंतर आगामी लोकसभा व विधानसभा निवडणुका देखील जोमाने लढवणार आहोत.

पुणे, दि.९: जिल्हाधिकारी तथा जिल्हा निवडणूक अधिकारी डॉ.राजेश देशमुख यांच्या उपस्थितीत जिल्ह्यातील २१५- कसबा पेठ आणि २०५- चिंचवड विधानसभा मतदारसंघ पोटनिवडणूकीसाठी नियुक्त करण्यात आलेल्या समन्वयक अधिकाऱ्यांच्या आढावा बैठकीचे आयेाजन करण्यात आले.

जिल्हाधिकारी कार्यालयात झालेल्या या बैठकीस पोलीस उपायुक्त आर. राजा, संदीप सिंह गिल, निवासी उपजिल्हाधिकारी हिम्मत खराडे, उपजिल्हा निवडणूक अधिकारी आरती भोसले आदी उपस्थित होते.

जिल्हाधिकाऱ्यांनी स्ट्रॉंगरूमची तयारी, सुरक्षा व्यवस्था, मतमोजणी केंद्राची व्यवस्था, ईव्हीएम यंत्र व्यवस्थापन, स्वीप कार्यक्रम, ईव्हीएमसाठी मतपत्रिका मुद्रण, पोस्टल मतदान आदी विविध विषयांचा आढावा घेण्यात आला.

ते म्हणाले, संपूर्ण निवडणूक प्रक्रियेत पारदर्शकता राहील यावर विशेष लक्ष द्यावे. ईव्हीएम यंत्र निर्धारित स्थळी नेताना जीपीएस प्रणाली असलेल्या वाहनांचा उपयोग करावा आणि या प्रक्रियेचे व्हिडीओ चित्रीकरण करावे. दोन्ही मतदारसंघात निर्धारित वेळापत्रकानुसार प्रशिक्षणाचे आयोजन करावे.

यापूर्वीच्या निवडणुकीत कमी मतदान झालेल्या मतदान केंद्र परिसरात मतदार जागृतीचे उपक्रम राबवावे. मतदारांना मतदान करण्यास प्रोत्साहित करण्यासाठी नाविन्यपूर्ण उपक्रम राबवावे. मतमोजणी केंद्रावरील आवश्यक सुविधांचे आतापासूनच नियोजन करावे. दिव्यांग मतदारांसाठी अधिक संख्येने व्हीलचेअरची व्यवस्था आणि त्यासाठी स्वयंसेवकांची नियुक्ती करावी.

• राज्य सहकारी निवडणूक प्राधिकरण आयुक्त डॉ. जगदीश पाटील

पुणे, दि.9 : राज्य सहकारी निवडणूक प्राधिकरणाने उच्च न्यायालयाच्या निर्देशानुसार राज्यातील कृषि उत्पन्न बाजार समित्यांच्या निवडणुकांसाठी सुधारित प्रारुप मतदार यादी तयार करण्याच्या सूचना जिल्हा निवडणूक अधिकाऱ्यांना दिल्या असून त्यानुसार 27 फेब्रुवारी 2023 रोजी सुधारित प्रारुप मतदार यादी प्रसिद्ध करण्यात येईल, अशी माहिती प्राधिकरणाचे आयुक्त डॉ. जगदीश पाटील यांनी दिली आहे.

प्राधिकरणाने राज्यातील निवडणूकीस पात्र कृषि उत्पन्न बाजार समित्यांची निवडणूक प्रकिया सुरू केली असून जिल्हा निवडणूक अधिकाऱ्यांनी 245 बाजार समित्यांच्या अंतिम मतदार याद्या प्रसिद्ध केल्या होत्या. त्यापूर्वी प्रारुप मतदार याद्या तयार करण्यासाठी 1 सप्टेंबर 2022 हा अर्हता दिनांक निश्चित केला होता. तथापि, शासनाच्या 7 फेब्रुवारी 2023 रोजीच्या अधिसूचनेनुसार नव्याने निवडून आलेल्या प्राथमिक सहकारी पतसंस्था, बहुद्देशीय सहकारी संस्था व ग्रामपंचायत यांच्या सदस्यांना अंतिम मतदार यादीमध्ये समाविष्ट करणे आवश्यक असल्याने पूर्वी प्रसिद्ध करण्यात आलेल्या मतदार याद्यामध्ये या नवीन सदस्यांना समाविष्ट करुन सुधारित प्रारुप मतदार यादी प्रसिद्ध करण्यात येणार आहे.

1 सप्टेंबर 2022 या अर्हता दिनांकानंतर राज्यातील 9 हजार 525 ग्रामपंचायतींच्या निवडणूक प्रक्रिया पूर्ण झाल्या आहेत. उच्च न्यायालयाने नव्याने निवडून आलेल्या सदस्यांना कृषि उत्पन्न बाजार समितीच्या निवडणूकीत सहभागी होता यावे यासाठी 30 एप्रिल 2023 अथवा त्यापूर्वी निवडणूक प्रक्रिया पूर्ण करण्याबाबत प्राधिकरणास आदेश दिले आहेत. पूर्वीच्या अंतिम यादीत समावेश असलेले परंतु या कालावधीत निवडणूक न लढवलेले आणि पराभूत झालेले सदस्य अपात्र झालेले आहेत.

सुधारित मतदार यादी कार्यक्रमानुसार 10 ते 24 फेब्रुवारी या कालावधीत 1 सप्टेंबर 2022 नंतर नव्याने निवडून आलेल्या सदस्यांची नावे समाविष्ट करुन व प्रतिनिधीत्व संपुष्टात आलेल्या सदस्यांची नावे वगळून अंतिम मतदार यादीत सुधारणा करण्याच्या सूचना जिल्हा निवडणूक अधिकाऱ्यांना दिल्या आहेत. त्यानुसार सुधारीत प्रारुप मतदार यादी 27 फेब्रुवारी 2023 रोजी प्रसिद्ध करण्यात येणार आहे. प्रारुप मतदार यादीमध्ये 27 फेब्रुवारी ते 8 मार्च 2023 या कालावधीत आक्षेप/ हरकती घेता येतील. प्राप्त झालेल्या हरकतींवर 17 मार्च 2023 पर्यंत निर्णय घेऊन 20 मार्च 2023 रोजी अंतिम मतदार यादी प्रसिद्ध करण्यात येईल.

20 मार्च 2023 रोजी प्रसिद्ध होणाऱ्या अंतिम मतदार यादीमध्येही नव्याने निवडून आलेल्या सदस्यांचा समावेश नसल्यास त्यांना बाजार समितीच्या निवडणूकीकरीता नामनिर्देशनाची प्रक्रिया सुरू होण्यापूर्वी जिल्हा निवडणूक अधिकारी यांच्याकडे अर्ज करता येईल, असेही आयुक्तांनी कळवले आहे.

पुणे, दि. ९: आज नेहरू युवा केंद्र पुणे यांच्यावतीने व्यापक मतदान जनजागृती अभियानास शेठ ताराचंद रुग्णालय परिसरातून मोठ्या उत्साहात सुरुवात झाली. याप्रसंगी वरप्रभ शिरगावकर यांनी चार्ली चॅप्लिनच्या वेषामध्ये मतदार जनजागृती केली.

निवडणूक विभागामार्फत कसबा पेठ तसेच चिंचवड विधानसभा मतदार संघात मतदार जनजागृतीसाठी कलापथके, सांस्कृतिक कार्यक्रम करणारे समूह, महाविद्यालयीन विद्यार्थी स्वयंसेवक यांचा सहभाग घेण्यात येत आहे. सार्वजनिक इमारती, रुग्णालये, महाविद्यालये, शासकीय कार्यालयांच्या परिसरात तसेच विविध सोसायट्यांमधून छोट्या- छोट्या कार्यक्रमाद्वारे, पथनाट्याद्वारे मतदानाचे महत्व पटवून देण्यात येत आहे.

नेहरु युवा केंद्राच्यावतीने आज ताराचंद रुग्णालयात मतदार जनजागृती करण्यात आली. रुग्णालयाच्या परिसरातील डॉक्टर, रुग्ण, रुग्णांच्या नातेवाईकांचे लक्ष मदानाचा संदशे देणाऱ्या ‘चार्ली’ले वेधून घेतले. नागरिकांनी त्यांच्या कलेलाही दाद दिली.

९ व्या जागतिक ज्ञान-विज्ञान, अध्यात्म आणि तत्त्वज्ञान परिषदेचे उद्घाटन.

पुणे,९ फेब्रुवारीः वसुधैव कुुटुंबूकम्, एकम सत विप्रा बहुधा वदन्ति आणि बहुजन हिताय बहुजन सुखाय हे नवीन समाज आणि नवीन जग निर्माण करण्यासाठी सर्वात महत्त्वाचे भारतीय तत्त्व आहेत. त्यामुळे  संपूर्ण  मानव जातीचे कल्याण होणार आहे. असे विचार पद्माविभूषण डॉ. करण सिंह यांनी व्यक्त केले.
माईर्स एमआयटी वर्ल्ड पीस युनिव्हर्सिटी, पुणे, भारत तर्फे श्री काशी विश्वनाथ कॉरिडॉर, वाराणशी येथे आयोजित करण्यात आलेल्या ९व्या जागतिक ज्ञान-विज्ञान, अध्यात्म आणि तत्त्वज्ञान परिषदेच्या उद्घाटन प्रसंगी प्रमुख पाहुणे म्हणून ते बोलत होते.
यावेळी नवी दिल्लीच्या मुस्लिम राष्ट्रीय मंचाचे अध्यक्ष इंद्रेश कुमार, स्वामी योगी अमरनाथ, बिहारचे माजी मंत्री प्रमोद कुमार, डॉ. योगेंद्र मिश्रा हे प्रमुख पाहुणे म्हणून उपस्थित होते. अध्यक्षस्थानी प्रा. डॉ. विश्वनाथ  कराड हे होते. तसेच, परमपूज्य श्री. श्रीकृष्ण कर्वे गुरूजी, एमआयटी डब्ल्यूपीयूचे कार्याध्यक्ष राहुल विश्वनाथ कराड, एमआयटी शिक्षण समुहाच्या सचिव प्रा. स्वाती कराड-चाटे व प्रकुलगुरू डॉ. मिलिंद पांडे उपस्थित होते.
डॉ. करणसिंग म्हणाले, ज्ञान योग, भक्ती योग, कर्मयोग आणि राजयोग या तत्त्वाचे पालन केल्यास संपूर्ण मानव जातीचा उद्धार होईल. विश्वातील सर्वच धर्मांमध्ये कुठे ना कुठे तरी मानवहिताचा विचार आलेला आहे. राजयोग ही अध्यात्मिक शक्तींची गुरूकिल्ली आहे.  त्याच्या सहाय्याने मानवजातीच्या कल्याणासाठी कार्य करीत असताना सर्व भारतीय ऋषीमुनी आणि तत्त्वज्ञांनी एक नवा मार्ग दाखवला आहे. त्यामुळे नवे जग निर्माण होण्यास वेळ लागणार नाही.
इंद्रेश कुमार म्हणाले, जागतिक शांततेचे स्वप्न साकार करायचे असेल तर भारतीय तत्त्वे जाणून घेऊन वसुधैव कुटुंबकम् या तत्त्वाचे कटाक्षाने पालन केले पाहिजे. प्रत्येक धर्मात काही ना काही तरी चांगले दडलेले आहे. त्या चांगुलपणाचा सर्वांनाच फायदा होऊन वाईट विचारांचा र्हास होईल.
प्रा.डॉ. विश्वनाथ कराड म्हणाले, विज्ञान आणि आद्यात्माच्या समन्वयानेच जगात शांतता नांदू शकते. या कॉरिडॉरचे आता नॉलेज कॉरिडॉर  मध्ये रूपांतर झाले पाहिजे. धार्मिक  ग्रंथ हे जीवन ग्रंथ आहेत. आपल्याला अंतिम सत्याचा शोध सुरू करावा लागेल. आपली भारत माताच आता संपूर्ण जगाला सुख, समाधान आणि शांतीचा मार्ग  दाखवेल.
योगी अमरनाथ म्हणाले, जिथे ज्ञान आहे तिथे विद्वत्ता आहे. प्राचीन काळापासून शतकानुशतके संशोधन करून मिळविलेले ज्ञान आता जगासमोर मांडण्याची वेळ आली आहे. विज्ञान त्याच्या आधारे नवीन शोध लावत आहे. मंथनातून जे ज्ञान बाहेर पडेल त्यातून मानवाचे कल्याणच होणार आहे. म्हणूनच आध्यात्मिक विचारांची कास धरण्याची गरज आहे.
डॉ. योगेंद्र मिश्रा म्हणाले, पुण्याच्या एमआयटी वर्ल्ड पीस युनिव्हर्सिटीतर्फे जागतिक शांततेचे कार्य सुरू आहे. प्रत्येक माणुस सुखाच्या शोधात आहे.  मानव जातीच्या  कल्याणाकरीता संपूर्ण जग भारताच्या पाठीशी आहे. जीवनात चांगल्या गोष्टींपुढे नतमस्तक होऊन वाईट विचारांना थारा न देता, वेळेचा सदुपयोग करावा.

डॉ. मिलिंद पांडे यांनी प्रास्ताविक केले. 

प्रा. डॉ. गौतम बापट यांनी सूत्रसंचालन केले. प्रा. स्वाती कराड-चाटे यांनी आभार मानले.

पुणे दि.९- जिल्ह्यातील २१५-कसबा विधानसभा मतदारसंघ आणि २०५-चिंचवड विधानसभा मतदारसंघाच्या पोटनिवडणूकीसाठी निवडणूक निरीक्षक नीरज सेमवाल, एस.सत्यनारायण आणि २१५-कसबा विधानसभा मतदारसंघाचे पोलीस निरीक्षक अश्विनीकुमार सिन्हा यांच्या उपस्थितीत मतदान यंत्रांची प्रथम स्तरीय सरमिसळ (रँडमायझेशन) करण्यात आली.

जिल्हाधिकारी कार्यालयात झालेल्या या सरमिसळ प्रक्रियेच्यावेळी जिल्हाधिकारी डॉ.राजेश देशमुख, उप जिल्हा निवडणूक अधिकारी आरती भोसले, ईव्हीएम व्यवस्थापन समन्वयक अधिकारी सुभाष भागडे, जिल्हा सूचना विज्ञान अधिकारी प्रमोद बोरवले आदी उपस्थित होते.

एकूण १ हजार ५८६ बॅलेट युनिट, १ हजार ५३९ कंट्रोल युनिट आणि १ हजार ५४२ व्हीव्हीपॅट यंत्रांची सरमिसळ (रँडमायझेशन) संगणकीय प्रणालीच्या माध्यमातून करण्यात आली. यापैकी ३३८ बॅलेट युनिट, ३३८ कंट्रोल युनिट आणि ३५१ व्हीव्हीपॅट कसबा पेठ मतदारसंघासाठी आणि ६३८ बॅलेट युनिट, ६३८ कंट्रोल युनिट आणि ६६३ व्हीव्हीपॅट यंत्र चिंचवड मतदारसंघासाठी वितरित करण्यात येतील.

सरमिसळ प्रक्रियेच्या वेळी उमेदवार, त्यांचे प्रतिनिधी आणि निवडणूक प्रक्रियेशी संबंधित अधिकारी उपस्थित होते.