पुणे- दोन वर्षापूर्वी लोणीकंद पोलीस ठाण्याच्या हद्दीत झालेल्या खुनाच्या गुन्ह्यातील फरार आरोपीला लोणीकंद पोलिसांच्या सायबर तपास पथकाने अटक केली आहे. आरोपी दोन वर्षापासून खेड तालुक्यातील बहुळ या गावात राहत होता. पथकाने बहुळ गावात सापळा रचून त्याला ताब्यात घेतले.सचिन बाळु वरघडे (वय-30 रा. ढेरंगे वस्ती, कोरेगाव-भिमा ता. शिरुर) असे अटक करण्यात आलेल्या आरोपीचे नाव आहे. लोणीकंद पोलीस ठाण्यात 2020 मध्ये खुनाचा गुन्ह्यासह आर्म अॅक्ट , महाराष्ट्र पोलीस कायद्यांतर्गत गुन्हा दाखल करण्यात आला होता. या गुन्ह्यात फरार आरोपी सचिन वरघडे याचा सायबर तपास पथकाकडून चाकण, आळंदी भागात शोध घेतला जात होता. त्यावेळी आरोपी खेड तालुक्यातील बहुळ गावात लपुन बसल्याची माहिती पोलिसांना मिळाली. ही कारवाई पोलीस आयुक्त रितेश कुमार , पोलीस सह आयुक्त संदीप कर्णिक
, अपर पोलीस आयुक्त पूर्व प्रादेशिक विभाग रंजनकुमार शर्मा,पोलीस उपायुक्त परिमंडळ-4 शशिकांत बोराटे
,सहायक पोलीस आयुक्त किशोर जाधव ,वरिष्ठ पोलीस निरीक्षक गजानन पवार),पोलीस निरीक्षक गुन्हे मारुती पाटील यांच्या मार्गदर्शनाखाली सायबरपोलीस स्टेशन तपास पथकाचे पोलीस उपनिरीक्षक सुरज किरण गोरे, पोलीस अंमलदार बाळासाहेब सकाटे, समीर पिलाणे, सचिन चव्हाण, मल्हारी सपुरे सागर पाटील, महिला पोलीस अंमलदार किर्ती नरवडे, कोमल भोसले, वृंदावनी चव्हाण यांच्या पथकाने केली.

पुणे :एसीबी अधिकारी आणि पत्रकार असल्याचे सांगत एका टोळक्याने महिलेला लुटले होते. त्यांनी महिलेच्या घरात घुसून ती वेश्याव्यवसाय करत असल्याचा आरोप करुन महिलेकडून 70 हजार रुपये किंमतीचे सोन्याचे दागिने व 14 हजार रुपये रोख असा एकूण 84 हजार रुपयांचा मुद्देमाल लुटून नेला होता. हा प्रकार बालाजीनगर येथील एका सोसायटीमध्ये 18 फेब्रुवारी 2023 रोजी रात्री घडला होता. याप्रकरणी 40 वर्षीय महिलेने सहकारनगर पोलीस ठाण्यात फिर्याद दिली होती. याप्रकरणी पोलिसांनी पाच जणांना ताब्यात घेतले आहे.

सिमा शशिकांत शिंदे (वय-30 रा. इंदिरानगर चाळ, बिबवेवाडी), रमेश सिताराम कंक (वय-35 रा. मानाजीनगर, नऱ्हे), स्वप्नील संतोष काळे (वय-19 रा. आंबेगाव बुद्रुक, पुणे), कार्तीक संतोष कांबळे (वय-21 रा. जांभुळवाडी रोड, आंबेगाव बुद्रुक) यांना अटक केली आहे. तर एका अल्पवयीन मुलाला ताब्यात घेतले आहे. तर त्यांच्या इतर पाच साथीदारांचा पोलीस शोध घेत आहेत.

ही कारवाई पोलीस आयुक्त रितेश कुमार , पोलीस सह आयुक्त संदीप कर्णिक, अपर पोलीस आयुक्त राजेंद्र डहाळे ,पोलीस उपायुक्त परिमंडळ 2 स्मार्तना पाटील , सहायक पोलीस आयुक्त सुषमा चव्हाण, वरिष्ठ पोलीस निरीक्षक सावळाराम साळगांवकरयांच्या मार्गदर्शनाखालीसहायक पोलीस निरीक्षक समीर शेंडे , पोलीस अंमलदार बापु खुटवड, भुजंग इंगळे,
सुशांत फरांदे, बजरंग पवार, महेश मंडलिक, नवनाथ शिंदे, सागर सुतकर, सागर कुंभार, विशाल वाघ, शिंदे,
महिला पोलीस अंमलदार रामगुडे यांच्या पथकाने केली.

पुणे-उरुळी कांचन परीसरातील गावठी हातभट्टी दारू अड्ड्यावर पुणे पोलिसांच्या गुन्हे शाखेच्या सामाजिक सुरक्षा विभागाने छापा टाकला. ही करवाई शिंदेवणे काळेश्वर गावातील राठोड वस्ती येथे करण्यात आली. या कारवाईत 3 लाख 4 हजार 650 रुपयांचा मुद्देमाल जप्त करुन तीन जणांवर गुन्हा दाखल करण्यात आला आहे.

राठोड वस्ती येथे गावठी हातभट्टी दारुचा साठा करुन त्याची विक्री केली जात असल्याची माहिती सामाजिक सुरक्षा विभागाला मिळाली. त्यानुसार पथकाने पाळत ठेवून छापा टाकला. पोलिसांनी विनापरवाना विक्रीसाठी साठवून ठेवलेली 3 लाख 2 हजार 500 रुपयांची 2,750 लिटर गावठी हातभट्टीची दारु, रोख रक्कम जप्त केली. तर याप्रकरणी तीन जणांवर लोणी काळभोर पोलीस ठाण्यात महाराष्ट्र प्रोव्हिजन कायद्यांतर्गत गुन्हा दाखल केला आहे. पुढील तपास लोणी काळभोर पोलीस करीत आहेत.

पुणे, दि. २८ : अनुसूचित जाती तसेच इतर मागास वर्ग, ज्येष्ठ नागरिक, आर्थिक, सामाजिक, शैक्षणिकदृष्ट्या मागास घटकांच्या विकासासाठी सरकार कटीबद्ध असून राज्यांच्या सहभागातून या घटकांपर्यंत योजना अधिक प्रभाविपणे पोहोचवण्यासाठी प्रयत्न करण्यात येत आहेत, असे केंद्रीय सामाजिक न्याय व सक्षमीकरण राज्यमंत्री रामदास आठवले यांनी सांगितले.

केंद्र शासनाच्या सामाजिक न्याय व विशेष अधिकारीता मंत्रालय व राज्याच्या सामाजिक न्याय विभागाच्या संयुक्त विद्यमाने हॉटेल दी रिट्झ कार्लट्न येरवडा येथे आयोजित देशपातळीवरील दोन दिवसीय क्षेत्रीय कार्यशाळेच्या उद्घाटनप्रसंगी राज्यमंत्री श्री. आठवले बोलत होते. यावेळी राज्याचे बहुजन कल्याण विभागाचे मंत्री अतुल सावे, पंजाबच्या सामाजिक न्याय मंत्री श्रीमती बलजीत कौर, केंद्रीय सामाजिक न्याय व सक्षमीकरण मंत्रालयाचे अतिरिक्त सचिव सुरेंद्र सिंग, सहसचिव इंदिरा मूर्ती, आर.पी. मीना, राज्याचे समाज कल्याण आयुक्त डॉ. प्रशांत नारनवरे, सामाजिक न्याय विभागाचे सहसचिव दिनेश डिंगळे आदी उपस्थित होते.

केंद्रीय राज्यमंत्री श्री. आठवले म्हणाले, अनुसूचित जाती तसेच अन्य मागास घटकांसाठीच्या शिष्यवृत्तीचा लाभ लाभार्थ्यांपर्यंत वेळेत पोहोचवण्याला विभागाने प्राधान्य दिले आहे. शिष्यवृत्तीमध्ये केंद्र शासनाचा आणि राज्य शासनाचा हिस्सा ६०:४० चे गुणोत्तरानुसार निश्चित करण्यात आला असून थेट विद्यार्थ्यांच्या खात्यात जमा करण्यात येत असल्याने पारदर्शकता निर्माण करण्यात आली आहे. अनुसूचित जातींसाठी अर्थसंकल्पात १ लाख ५९ हजार कोटी रुपयांची तरतूद करण्यात आली आहे.

केंद्र शासनामार्फत तसेच विविध राज्यांमध्ये अनुसूचित जाती, अन्य मागास घटकांसाठी राबवण्यात येत असलेल्या योजनांची अंमलबजावणी, अस्तित्वातील योजनांमध्ये सुधारणा, नव्या योजना सुरू करणे, योजनांच्या अंमलबजावणीमधील अडथळे दूर करणे आदींच्या अनुषंगाने या कार्यशाळेमध्ये विचारमंथन होणार असून त्यातील सूचनांचा विचार भविष्यातील धोरणांसाठी केला जाईल, असेही त्यांनी सांगितले.

राज्याचे बहुजन कल्याण मंत्री श्री. सावे म्हणाले, स्वतंत्र सामाजिक न्याय विभागाची स्थापना करणारे महाराष्ट्र पहिले राज्य आहे. केंद्र शासनाच्या योजनांच्या प्रभावी अंमलबजावणीबरोबरच राज्य शासनाच्याही शिष्यवृत्ती, मागास घटकांसाठी निवासी शाळा, वसतिगृहे, अनुसूचित जातींसाठी रमाई आवास योजना, कृषिसह अन्य विभागाच्या योजना, दिव्यांग, ज्येष्ठ नागरिक आदींसाठी योजना राबवण्यात येत आहेत.

बार्टी, सारथी, महाज्योती या समर्पित प्रशिक्षण संस्थांची स्थापना राज्यात करण्यात आली. राज्यात स्वतंत्र बहुजन कल्याण विभाग स्थापन करण्यात आला. याअंतर्गत ९७७ आश्रमशाळा चालवण्यात येत आहेत. ५ वी ते ८ वी पर्यंतच्या विद्यार्थ्यांच्या शिक्षणासाठी ३० हजार टॅब वितरीत केले आहेत. केंद्र व राज्य शासनाच्या शिष्यवृत्ती, परदेशी शिक्षणासाठी शिष्यवृत्ती आदींचा लाभ देण्यात येत आहे, असेही श्री. सावे म्हणाले.

यावेळी केंद्रीय सामाजिक न्याय व सक्षमीकरण मंत्री डॉ. वीरेंद्र कुमार यांचा दृकश्राव्य संदेश दाखवण्यात आला. पंजाबच्या सामाजिक न्यायमंत्री श्रीमती कौर यांनी पंजाबमध्ये अनुसूचित जाती व अन्य घटकांसाठी राबवण्यात येत असलेल्या योजनांची माहिती दिली.

सुरेंद्र सिंग यांनी कार्यशाळा आयोजनामागील भूमिका स्पष्ट केली. डॉ. नारनवरे यांनी आभार मानले.

कार्यक्रमात ‘प्रधानमंत्री आदर्श गाव योजना’ पुस्तिका तसेच राज्य शासनाच्या सामाजिक न्याय विभागाच्या ‘स्टँडिंग आऊट’ या पुस्तिकेचे प्रकाशन करण्यात आले.

या कार्यशाळेत पंजाब, हरियाणा, जम्मू-काश्मीर, दिल्ली, राजस्थान, मध्य प्रदेश, छत्तीसगड, गुजरात, महाराष्ट्र, दीव दमन, दादर नगर हवेली व गोवा अशा १२ राज्यांनी सहभाग नोंदवला आहे. यामध्ये सामाजिक न्याय विभागाच्या योजना, नियम व कायदे तसेच समाजातील शेवटच्या घटकापर्यंत विविध राज्यांच्या व केंद्र शासनाच्या योजना पाहोचविण्यासाठी करावयाच्या उपाययोजना यावर चर्चा करुन मसुदा तयार करण्यात येणार आहे.

पुणे: दि. २८ : ससून सर्वोपचार रूग्णालय पुणे येथील समाजसेवा अधिक्षक विभागाचे विभागप्रमुख म्हणून डॉ. शंकर मुगावे यांची नुकतीच नियुक्ती करण्यात आली आहे.

डॉ. मुगावे यांनी सलग १८ वर्षे ससून रुग्णालयातील रक्तपेढीमध्ये समाजसेवा अधिक्षक या पदांवर सेवा केली आहे. बी. जे. वैद्यकीय महाविद्यालय, ससून रुग्णालय व पुणे महानगरपालिका अंतर्गत नागरी आरोग्य शिक्षण आणि प्रशिक्षण केंद्र पुणे येथे समाजसेवा अधिक्षक पदाची जबाबदारी त्यांनी सहा वर्षे पाहिली. कोरोना संकटकाळात डॉ.मुगावे यांनी पश्चिम महाराष्ट्रातील विभागीय स्तरावरील रक्तपेढीत मुख्य समन्वयक म्हणून तीन वर्षे यशस्वीपणे कार्य केले.

डॉ. शंकर मुगावे यांनी रक्तदान क्षेत्रात विशेष कार्य केले आहे. त्यांनी आजपर्यत ९९ वेळा ऐच्छिक रक्तदान केले असून साडे तीन लाख रक्तदात्यांचे ऐच्छिक रक्त संकलन केले आहे. रक्तपेढींच्या समाजशास्त्रीय दृष्टिकोनातून संशोधनात्मक अभ्यास करून त्यांनी या विषयावर पीए.डी.पदवी संपादन केली. ते महाराष्ट्र राज्य समाजसेवा अधिक्षक संघटनेचे राज्य उपाध्यक्ष आहेत.

वाघोली परिसरातील सुरळीत वीजपुरवठ्यासाठी दोन नवीन उपकेंद्र लवकरच कार्यान्वित होणार

पुणे, दि. २८ फेब्रुवारी २०२२:वाघोली व परिसरातील वीजग्राहकांना सुरळीत व दर्जेदार वीजपुरवठ्यासाठी वाघोली येथे नवीन २२०/२२ केव्ही क्षमतेचे अतिउच्चदाब उपकेंद्र महावितरणकडून प्रस्तावित करण्यात आले आहे. त्याचा आराखडा तयार करण्यात आला आहे. या उपकेंद्रासाठी गेल्या दोन वर्षांपासून वाघोली येथे जागेचा युद्धपातळीवर शोध सुरु आहे. केवळ जागेअभावी या उपकेंद्राचे काम सध्या रखडलेले आहे. दरम्यान महावितरणकडून २२/११ केव्ही गेरा उपकेंद्र व एडब्लूएचओ स्विचिंग स्टेशन लवकरात लवकर कार्यान्वित करण्यासाठी तांत्रिक कामे वेगाने सुरु आहेत. त्याचा सुमारे २८ हजार वीजग्राहकांना फायदा होणार आहे.

वाघोली परिसरात सर्व वर्गवारीतील महावितरणचे एकूण ७३ हजार वीजग्राहक आहेत. या सर्व ग्राहकांना २२ केव्ही आयव्ही इस्टेट, गंगावाटिका, रोहन अभिलाषा व पूर्वरंग या २२ केव्ही स्विचिंग स्टेशन्मधून वीजपुरवठा केला जातो. या चारही स्विचिंग स्टेशन्सला महापारेषणच्या लोणीकंद ४००/२२०/२२ केव्ही अतिउच्चदाब उपकेंद्रातून वीजपुरवठा होतो. मात्र वीजपुरवठा करणाऱ्या सर्व वीजवाहिन्यांची सरासरी लांबी १५ ते १६ किलोमीटर आहे. त्यामुळे विविध कारणांमुळे सुरळीत वीजपुरवठ्यात व्यत्यय निर्माण होत आहेत.

वाघोलीमध्ये नवीन अतिउच्चदाब उपकेंद्राची गरज- महापारेषणच्या लोणीकंद अतिउच्चदाब उपकेंद्रातील वीजभाराची क्षमता ही ९० टक्क्यांपेक्षा अधिक झाली आहे. त्यामुळे वाघोली परिसरातील विजेची वाढती मागणी पूर्ण करण्यासाठी व सर्व वर्गवारीच्या नवीन वीजजोडण्या देण्यासाठी महावितरणकडून वाघोली येथे नवीन २२०/२२ केव्ही अतिउच्चदाब प्रस्तावित करण्यात आले आहे. तथापि केवळ जागेअभावी या उपकेंद्राचे काम गेल्या दोन वर्षांपासून रखडलेले आहे. वाघोली अतिउच्चदाब उपकेंद्र उभारल्यास तब्बल १२ उपकेंद्र व स्विचिंग स्टेशन्सला तसेच ३३ व २२ केव्ही क्षमतेच्या १९ वाहिन्यांना या उपकेंद्रातून वीजपुरवठा होणार आहे. त्यामुळे वाघोली परिसरच नव्हे तर नगररोड व मुळशी विभागातील सुमारे दीड लाख ग्राहकांना दर्जेदार व सुरळीत वीजपुरवठ्याचा फायदा होणार आहे. तसेच पर्यायी स्वरुपाच्या वीजपुरवठ्याची सोय उपलब्ध होऊ शकणार आहे.

वाघोलीसाठी दोन नवीन उपकेंद्र लवकरच– वाघोलीमधील वीजग्राहकांसाठी २२/११ केव्ही क्षमतेचे गेरा उपकेंद्र मंजूर करण्यात आले आहे. त्याची उभारणी सुरु असून या उपकेंद्राला १३२/२२ केव्ही खराडी व २२/२२ केव्ही मार्व्हल झफायर स्विचिंग स्टेशनमधून वीजपुरवठा करण्यात येणार आहे. येत्या ६ महिन्यांमध्ये हे काम पूर्ण होईल. या उपकेंद्रामुळे उबाळेनगर, चोखीदाणी परिसर, बायफ रस्ता, बायफ कंपनी परिसर, प्रियांकानगरी, रेणुका पार्क, खांदवेनगर, अनसूया पार्क आदी परिसरातील २० हजार वीजग्राहकांना फायदा होणार आहे. तसेच महावितरणकडून AWHO (आर्मी वेलफेअर हाऊसिंग ऑर्गनायझेशन) २२ केव्ही स्विचिंग स्टेशनची उभारणी पूर्ण झाली आहे. या उपकेंद्राला लोणीकंद अतिउच्चदाब उपकेंद्रातून दोन नवीन २२ केव्ही भूमिगत वीजवाहिन्यांद्वारे वीजपुरवठा करण्यात येणार आहे. १६ किलोमीटर लांबीच्या या वीजवाहिन्यांचे ९५ टक्के काम पूर्ण झाले आहे. त्यामुळे लोहगाव रस्ता, जाधववस्ती, गोरेवस्ती, बहिरटवस्ती, सुयोगनगर, वाघोली गावठाण, भावडी रस्ता या परिसरातील १८ हजार वीजग्राहकांना सुरळीत वीजपुरवठ्याचा फायदा होणार आहे.

सिमेंट रस्त्यामुळे वीजयंत्रणेच्या दुरुस्तीला विलंब- रविवारी (दि. २६) वाघोली परिसरात एकामागे एक तीन वीजवाहिन्यांमध्ये बिघाड झाल्यामुळे महावितरणच्या अभियंता व कर्मचाऱ्यांनी रात्रभर वीजपुरवठा सुरळीत ठेवण्याचे अथक परीश्रम केले. यात फक्त साईसत्यम २२ केव्ही वीजवाहिनीला पर्यायी स्वरुपात वीजपुरवठा करणे शक्य झाले नाही. परिणामी ९ हजार ५०० ग्राहकांचा वीजपुरवठा बंद राहिला. यासाठी सिमेंट काँक्रीटकरणाचा रस्ता कारणीभूत ठरल्याचे दिसून आले आहे. अतिरिक्त स्वरुपात असलेल्या २२ केव्ही करोला-२ वाहिनीद्वारे साईसत्यम वाहिनीला पर्यायी वीजपुरवठ्याची सोय आहे. मात्र ही वाहिनी पूर्वरंग सोसायटीजवळ सिमेंट काँक्रीटच्या रस्त्याखाली गेल्याचे दिसून आले. जेसीबी व ब्रेकरने सिमेंट रस्त्याचे खोदकाम केल्यानंतर सोमवारी (दि. २७) रात्री ८.३० वाजताच्या सुमारास करोला-२ वाहिनीच्या दुरुस्तीचे काम पूर्ण झाले. त्यापूर्वीच वाघोली वीजवाहिनीवरून साईसत्यम वाहिनीवरचा वीजपुरवठा सोमवारी सकाळी ८ वाजता टप्प्याटप्प्याने सुरळीत करण्यात आला.