पुणे, दि.२४: पुणे शहरात पर्वती येथील सैनिकी मुलांच्या वसतिगृहात सहायक वसतिगृह अधीक्षक, सफाई कर्मचारी, माळी या पदांसाठी इच्छुक व पात्र माजी सैनिक व इतर नागरीक यांनी ५ डिसेंबर २०२३ पर्यंत आपले अर्ज सैनिकी मुलांचे वसतिगृह पर्वती पायथा, पुणे येथे सादर करावेत, असे जिल्हा सैनिक कल्याण कार्यालयाने कळविले आहे.

या तात्पुरत्या अशासकीय पदासाठी प्रत्येकी एक जागा भरण्यात येणार आहे. सहायक वसतिगृह अधीक्षक पदासाठी २४ हजार ७९ रुपये तर सफाई कर्मचारी व माळी पदावर निवड होणाऱ्या उमेदवाराला प्रत्येकी १२ हजार ४६५ रुपये मानधन देण्यात येणार आहे.

अधिक माहितीसाठी वसतिगृह अधीक्षक शेख अब्दुल यांना भ्रमणध्वनी क्रमांक ७०२०४१०९५४ वर उमेदवारांनी संपर्क साधावा, असे आवाहनही जिल्हा सैनिक कल्याण अधिकारी लेफ्टनंट कर्नल हंगे एस. डी. (निवृत्त) यांनी केले आहे.

पुणे, दि. २४ : अन्न व औषध प्रशासनाच्यावतीने पुणे जिल्ह्यात गेल्या तीन दिवसात ९ ठिकाणी विविध छापे टाकून ८ लाख ५७ हजार ३५५ रुपये किंमतीचा प्रतिबंधित असलेला तंबाखूजन्य गुटखा, पानमसाला, सुगंधित तंबाखू, सुगंधित सुपारी आदींचा साठा जप्त करण्यात आला असून पदार्थ साठवणूक करणाऱ्या आस्थापना सील व वाहतूक करणारे एक वाहन जप्त करण्यात आल्याची माहिती अन्न व औषध प्रशासन विभागाने दिली आहे.

गेल्या तीन दिवसात पुणे विभागात ३८ ठिकाणी विविध छापे टाकुन ९ लाख ३२ हजार ३८२ रुपये किमतीचा प्रतिबंधित पदार्थाचा साठा जप्त करण्यात आला आहे. पुणे जिल्ह्यात ८ आस्थापना सिल करण्यात आल्या असून ९ गुन्हे दाखल केले आहेत. पुणे विभागात ३६ आस्थापना सिल करण्यात आल्या असून २४ गुन्हे दाखल केले आहेत.

नागरिकांचे जनहित व जनआरोग्याच्या दृष्टिकोनातून १८ जुलै २०२३ च्या आदेशानुसार राज्यात गुटखा, पान मसाला, सुगंधित तंबाकु, सुगंधित सुपारी इत्यादी तंबाखु जन्य पदार्थावर उत्पादक, साठा, वितरण व विक्री यावर १ वर्षाकरिता बंदी घातलेली आहे.

प्रतिबंधीत गुटखा, पान मसाला इत्यादीच्या विक्रीबाबतची माहिती असल्यास नागरिकांनी प्रशासनाच्या टोल फ्री क्रमांक १८००२२२३६५ वर संपर्क साधण्याचे आवाहन सह आयुक्त (अन्न) सुरेश अन्नपुरे यांनी केले आहे.

मानाचा चौथा महागणपती श्री तुळशीबाग गणपती मंडळ आणि हुतात्मा बाबूगेनु मंडळ
यांच्या संयुक्त विद्यमाने सफाई कर्मचारी आणि विद्युत कर्मचारी यांचा दिवाळीनिमित्त कृतज्ञता सन्मान
पुणे :पुण्यात सार्वजनिक उत्सव साजरे होताना काही कार्यकर्ते समोर दिसतात आणि काही पडद्यामागून काम करत असतात. जे कार्यकर्ते दिसत नाहीत त्यांचे काम मोठे आहे. उत्सव यशस्वी होतो तेव्हा सफाई कर्मचारी आणि विद्युत कर्मचारी यांची भूमिका महत्त्वाची असते.  त्यांचा सन्मान करून तुळशीबाग गणेशोत्सव मंडळाने मोठे काम केले आहे, असे मत अप्पर पोलीस आयुक्त प्रविण कुमार पाटील यांनी व्यक्त केले.
मानाचा चौथा महागणपती श्री तुळशीबाग गणपती मंडळ आणि हुतात्मा बाबूगेनु मंडळ यांच्या संयुक्त विद्यमाने पुणे महापालिकेच्या सफाई कर्मचारी,आणि  विद्युत कर्मचारी यांचा दिवाळीनिमित्त कृतज्ञता सन्मान आयोजित करण्यात आला होता. यावेळी पुणे महापालिका अतिरिक्त आयुक्त डाॅ. कुणाल खेमनार,  परिमंडळ १ चे पोलीस उपायुक्त संदीप सिंह गिल, श्रीमंत दगडूशेठ हलवाई गणपती मंडळ ट्रस्टचे सरचिटणीस हेमंत रासने, श्री तुळशीबाग गणपती मंडळाचे अध्यक्ष विकास पवार, हुतात्मा बाबूगेनु मंडळाचे अध्यक्ष सोमनाथ पवार, नितीन पंडित विनायक कदम,दुर्गेश नवले,नितीन खेडेकर, मिलिंद होनराव गणेश घम, प्रदीप इंगळे, चकोर सुबंध, साई डोंगरे उपस्थित होते. हुतात्मा बाबुगेनू वाहनतळ येथे कार्यक्रमाचे आयोजन करण्यात आले होते.
डॉ. कुणाल खेमनार म्हणाले, सफाई कर्मचारी आणि विद्युत विभागातील कर्मचारी हे केवळ कर्तव्य म्हणून आपले काम करत नाहीत, तर हे आपले काम आहे असे समजून मनापासून त्यांचे काम करतात. त्यांचा सन्मान आणि कौतुक केल्यामुळे कामाला उत्साह येतो.

संदीप सिंह गिल म्हणाले, सार्वजनिक रस्त्यावर आपली जबाबदारी विसरून जो कचरा आपण टाकतो, तो कचरा सफाई कर्मचाऱ्याद्वारे उचलला जातो. त्यामुळे रस्ते स्वच्छ दिसतात आणि आपल्या सर्वांचे आरोग्य देखील चांगले राहते. आपण विचार करतो की चांगला आहार आणि व्यायामामुळे आपले आरोग्य चांगले राहते, परंतु आपले आरोग्य चांगले राहण्यास सफाई कर्मचाऱ्यांचे खूप मोठे योगदान आहे. सफाई कर्मचाऱ्यांनी जर कचरा उचलला नाही तर सामाजिक आरोग्य धोक्यात येऊ शकते. त्यामुळे त्यांच्या कार्याचा आपण योग्य सन्मान केला पाहिजे.

हेमंत रासने म्हणाले, गणेशोत्सव कार्यकर्त्यांमुळे उत्सव चांगला होतो परंतु त्याही पेक्षा महत्वाचे सफाई कर्मचारी, विद्युत विभागातील कर्मचारी यांच्यामुळे सर्वांनाच उत्सव चांगल्या पद्धतीने साजरा करता येतो. कर्मचाऱ्यांच्या भूमिकेतून ते काम करत नाहीत, तर कार्यकर्त्यांसारखे आपले काम पार पडतात. आज त्यांचा केलेला सन्मान हा कार्यकर्त्यांनी कार्यकर्त्यांचा केलेला सन्मान आहे.  नितीन पंडित यांनी प्रास्ताविक दुर्गेश नवले यांनी आभार व्यक्त केले. मिलिंद होनराव यांनी सूत्रसंचालन केले

 अथलेटिक्स स्पर्धांच्या पहिल्या दिवशी एकूण २०७४ सहभागींनी असामान्य कौशल्य दाखवले. त्यामध्ये १०० मीटर, २०० मीटर, ४०० मीटर, लांब उडी आणि मेडले रिले यांचा समावेश होता.

●   चौथ्या दिवशी बुद्धीबळ स्पर्धेत २०५ खेळाडूंचा सहभाग

●   पुण्याला लवकरच मिळणार क्रीडा क्षेत्रात ‘पहिल्या क्रमांकाची शाळा’

पुणे, २४ नोव्हेंबर २०२३ – एसएफए चॅम्पियनशीपच्या चौथ्या दिवशी श्री शिव छत्रपती स्पोर्ट्स कॉम्प्लेक्समध्ये अथलेटिक्स आणि बुद्धीबळाची उत्सुकता अनुभवण्यास मिळाली. आज मैदानावर सात खेळांमध्ये मिळून २०७४ खेळाडूंनी भाग घेतला. बॅडमिंटन, बास्केटबॉल, कबड्डी, कराटे, थ्रोबॉल, अथलेटिक्स आणि बुद्धीबळ या खेळांचा त्यात समावेश होता. वैविध्यपूर्म खेळांच्या या पार्श्वभूमीवर अनुभवी बास्केटबॉल प्रशिक्षक फैझान शेख यांनी एसएफए चॅम्पियनशीपचा लक्षणीय प्रभाव पडत असल्याचे सांगितले. ते म्हणाले, ‘एसएफएने क्रीडा क्षेत्रासाठी उत्तम प्लॅटफॉर्म मिळवून दिला आहे, जो शालेय विद्यार्थ्यांमध्ये स्पर्धा आणि आवड निर्माण करेल. लहान वयातच खेळाची आवड निर्माण करून, झोनल, राज्य आणि राष्ट्रीय स्तरावर खेळण्यासाठी त्यांचा विकास केला जाईल.’

पाचवा दिवस #SheisGold चं स्पिरीट साजरा करणारा आहे. #SheisGold हा एसएफए चॅम्पियनशीप्सचा खास उपक्रम असून त्याअंतर्गत क्रीडा क्षेत्रातील कुशल मुलींना उद्याचे (२५ नोव्हेंबर जी) चॅम्पियन्स बनवण्यासाठी सक्षम केले जाणार आहे. क्रीडा स्पर्धा नव्या उंचीवर पोहोतत असतानाच जिमनॅस्टिक आणि व्हॉलीबॉल स्पर्धांनाही सुरुवात झाली, तर बुद्धीबळप्रेमी अंतिम फेरीच्या उत्सुकतेमध्ये आहेत.

एसएफए चॅम्पियनशीप्स देशातील तरुण खेळाडूंसाठी खेळ सहजपणे उपलब्ध करण्यासाठी प्रयत्नशील असून आजच्या गुणवत्तेचे उद्याच्या विजेत्यांमध्ये रुपांतर करण्याचे ध्येय आहे. स्पोर्ट्स फॉर ऑल (एसएफए) आणि व्हायकॉम१८ यांनी देशभरातील क्रीडा चाहत्यांसाठी शालेय क्रीडा स्पर्धा सहज उपलब्ध करून देण्यासाठी भागिदारी केली आहे. व्हायकॉम१८ एसएफए चॅम्पियनशीपमधील सर्वात चांगले क्षण ३ डिसेंबरपासून जिओसिनेमा, स्पोर्ट्स१८-२ आणि स्पोर्ट्स१८ खेळ वर दाखवणार आहे.

दैनंदिन वेळापत्रक, पुण्याच्या दुसऱ्या एसएफए चॅम्पियनशीपमधील प्रत्येक क्रीडा स्पर्धेचा तपशीलवार निकाल आमच्या www.sfaplay.com अधिकृत संकेतस्थळावर उपलब्ध आहे. रियल टाइम अपडेट्स, हायलाइट्स आणि एक्सक्लुसिव्ह बिहाइंड द सीन्स क्षणांसाठी फेसबुक, इन्स्टाग्राम आणि ट्विटरवरील आमची सोशल मीडिया चॅनेल्स फॉलो करा.

चौथ्या दिवसाचे निकाल

पुणे-पुणे-वाहतुकीच्या नियमांचे पालन न करणाऱ्या चालक – वाहक सेवकांवर कडक कारवाई केली जाणार असल्याचा इशारा आज येथे PMPML च्या व्यवस्थापनाकडून देण्यात आला आहे. यासंदर्भात PMPML प्रसिद्धीस दिलेल्या निवेदनात म्हटले आहे कि,’परिवहन महामंडळाकडुन पुणे, पिंपरी-चिंचवड शहरालगतच्या ग्रामीण भागात व पी.एम.आर.डी.ए.कार्यक्षेत्रा पर्यंत
बससेवा पुरविली जात आहे. त्यामध्ये पी.एम.पी.एम.एल. व खाजगी ठेकेदाराच्या बसेसवरील चालक सेवक हे वाहतुकीच्या
नियमांचे पालन करीत नसल्याबाबत प्रवाशी नागरिक, सामाजिक संस्था व लोकप्रतिनिधी यांचेकडुन तक्रारी व सुचना प्राप्त
होत असतात या तक्रारीमध्ये प्रामुख्याने मोबाईलवर बोलुन बसेस चालविणे, झेब्रा क्रॉसिंगवर बस थांबविणे, धुम्रपान करणे,
रूट बोर्ड न बदलणे, लेनच्या शिस्तीचे पालन न करणे, सिग्नल तोडणे इ. तक्रारीचा समावेश आहे.
महामंडळाकडील चालक-वाहक सेवकांच्या गैरवर्तनाबाबत प्राप्त होणाऱ्या तक्रारीचे निराकरण होणाच्या द्दष्टीने
महामंडळाने कार्यालय परिपत्रकाद्वारे चालक-वाहकांना सुचना दिल्या आहेत कि, बस संचलन करतांना मोबाईल फोनचा वापर
करू नये, वाहतुकीच्या नियमांचे पालन योग्यरित्या करणे, धुम्रपान करण्यात येऊ नये, बसेस बस स्टॉपवर लगत उभ्या
करण्यात याव्यात, लेनच्या शिस्तीचे पालन करणे, भरधाव वेगाने बसेस संचलन करू नये अशा विविध प्रकारच्या सुचना
दिलेल्या आहेत.तरी यापुढे वरील नियमांचे पालन न केल्यास सदरील तक्रारीचे शहानिशा करून संबंधित चालक-वाहकांवर
निलंबनाची कारवाई करण्यात येईल असे महामंडळाकडुन कर्मचाऱ्यांना निर्देश दिलेले आहेत.

पुणे : “शरीर व मनाची शक्ती सदासचेतन ठेवण्यासाठी साधना महत्वाची आहे. समतोल आहार, योग्य व्यायाम व ध्यानधारणा, स्वतःच्या शरीरसंपत्तीचे रक्षण करत मन आणि मेंदूचा विकास झाला, तर निरोगी व आनंदी जीवनाचा मार्ग सापडतो. त्यातून आपले जीवन अधिक सुंदर होते. आपल्या जगण्याचे नेमके ध्येय काय, याचा शोध आपण घेतला पाहिजे,” असे प्रतिपादन पूज्य आचार्य परम आलय जी यांनी केले.
सन टू ह्युमन फाउंडेशनच्या वतीने वर्धमान सांस्कृतिक भवन येथे सहा दिवसीय ‘नए दृष्टीकोन वाला शिबीर’ आयोजित करण्यात आले होते. या शिबिरात हजारो पुणेकरांनी सहभाग घेत गुरुजींच्या मार्गदर्शनाचा लाभ घेतला. या शिबिराच्या समारोपाप्रसंगी सूर्यदत्त एज्युकेशन फाउंडेशनच्या वतीने पूज्य परम आलय यांना ‘दी सेंट ऑफ मॉडर्न इंडिया-२०२३’ प्रदान करण्यात आला. प्राचीन संस्कृती आणि आधुनिक शास्त्राचा मेळ घालत समाजपरिवर्तन, मनःशक्तीचा प्रसार करण्यासाठी दिलेल्या अतुलनीय योगदानाबद्दल सूर्यदत्त एज्युकेशन फाउंडेशनचे संस्थापक अध्यक्ष प्रा. डॉ. संजय बी. चोरडिया व उपाध्यक्षा सुषमा चोरडिया यांनी परम आलाय गुरुजींचा सन्मान करत त्यांचे आशीर्वाद घेतले. प्रसंगी माँ मैत्रेयी, उद्योजक राजकुमार सांकला, रमेश गांधी, साधक तारिणी दीदी आदी उपस्थित होते.
परम आलय जी म्हणाले, “सूर्यकिरणे, पृथ्वीची प्रदक्षिणा, सौरमंडळात होणारे विविध बदल आपल्या जीवनाला दिशा व ऊर्जा देणारे आहेत. आपल्या नाश्त्यात, जेवणात स्वयंशिस्त असायला हवी. मुलाच्या बालपणापासूनच आपण त्यांना ऐहिक सुखाचें शिक्षण देतो व भरमसाठ संपत्ती गोळा करतो. हा हव्यास कशासाठी, हा प्रश्न स्वतःला विचारायला हवा. सुविधा आणि साधना यातला फरक समजून घ्यायला हवा. मन आणि मेंदू यांच्यातील संबंध उलगडून दोन्हीचा विकास करण्यावर भर दिला पाहिजे. त्यासाठी साधना करणे गरजेचे आहे. तणाव, दडपण, चिडचिड, भय, कामवासना, क्रोध, शारीरिक व्याधी, झोपमोड, विचारमग्नता यापासून सुरू राहण्यास साधना उपयोगी ठरते.”

माँ मैत्रेयी म्हणाल्या, “भगवान कृष्ण, ऋषी पतंजली यांनी जीवनाचे मूलाधार सूत्र दिले आहे. मात्र, आपण भौतिक सुखांच्या मागे लागून जीवनाचा मूळ उद्देश विसरलो आहोत. आपण केवळ पैसे कमवण्याच्या मागे लागलो असून, स्वतःच्या शरीरसंपत्तीचा विसर पडला आहे. संसाराच्या गाड्यात इतके बुडत चाललोय की, आपल्याला स्वतःसाठी जगायला वेळ नाही. बदलती व चुकीची जीवनशैली अंगीकारल्याने देहरूपी संपत्तीला अनेक आजार, व्याधी व समस्यांनी ग्रासले आहे. यातून सुटका करून व्याधीमुक्त, आनंदी जीवन जगण्यासाठी स्वतःला वेळ देण्यासह ऊर्जादायी आहार घेण्याची गरज आहे.”
प्रा. डॉ. संजय बी. चोरडिया म्हणाले, “जीवनाकडे एका वेगळ्या दृष्टिकोनातून पाहण्याची दृष्टी परम आलयजी यांनी दिली आहे. त्यांच्या शिबीरात सहभागी झाल्यापासून माझ्या शारीरिक व मानसिकतेत आमूलाग्र बदल झाला आहे. ‘सूर्यदत्त’ यंदा रौप्य महोत्सव साजरा करत आहे. गेल्या २५ वर्षांत ‘सूर्यदत्त’ने विद्यार्थ्यांच्या सर्वांगीण विकासाचे, सकारात्मक जीवनाचे शिक्षण दिले आहे. या शिबिरामुळे विद्यार्थ्यांना पाठ्यक्रमासह जीवनमूल्यांचे, परिवर्तनाचे शिक्षण देण्याची दिशा मिळाली आहे. भविष्यात विद्यार्थ्यांचा वेळ वाया न घालवता, त्यांना त्यांचा आत्मपरिचय करून देत त्यांचे शरीर व मन चांगल्या रीतीने विकसित करण्यासाठी विविध प्रकारची सत्रे आयोजिली जाणार आहेत.”
“गुरुजींचे मार्गदर्शन हे प्रवचन नव्हे, तर प्रयोगातून सिद्ध केलेला विचार आहे. व्यवहार्य मार्गात शारीरिक आणि मानसिक समस्यांवर मात देण्यासाठी काय काय करावे, यासाठी हे शिबीर उपयुक्त ठरले. निवासी शिबिरात स्वतः सहभागी होणार असून, इतरांना सहभागी होण्यासाठी प्रोत्साहन देणार आहे. सत्रानंतर दिलेल्या साध्या आरोग्यदायी अल्पोपहारातून शरीराला आवश्यक प्रथिने, कर्बोदके, ऊर्जा आदी घटक मिळतात. प्रेम व आनंदमय वातावरणात झालेल्या या शिबिरातून जीवनाला सकारात्मक ऊर्जा मिळाली आहे. तसेच विद्यार्थ्यांना घडवताना कोणत्या गोष्टी कराव्यात, याचाही मार्ग सापडला आहे. त्यासाठी सन टू ह्युमन फाउंडेशनसोबत सामंजस्य करण्यात आला आहे. ५० मुलांना घेऊन गुरुजींच्या आश्रमात निवासी शिबिरासाठी जाणार आहोत,” असेही प्रा. डॉ. संजय बी. चोरडिया यांनी नमूद केले.————————–आजवरचे ‘दी सेंट ऑफ मॉडर्न इंडिया-२०२३’ 
यापूर्वी ‘दी सेंट ऑफ मॉडर्न इंडिया-२०२३’ हा पुरस्कार राजयोगिनी दीदी जानकीजी, राजयोगिनी दिदी हरिदया मोहिनीजी, स्वामी दयानंद सरस्वतीजी, परमपूज्य श्री ऋषीप्रभाकर गुरुजी, योगगुरू डॉ. बीकेएस अय्यंगार, आचार्य डॉ. लोकेश मुनीजी, सद्गुरू जगदीश वासुदेवजी, अध्यात्मिक गुरु श्री श्री रविशंकरजी, योगगुरू बाबा रामदेव, पूज्य गुरूदेव श्री राकेश भाई, गुरुदेव श्री नयपरमसागरजी महाराज, ब्रह्मर्षी गुरुवानंद स्वामीजी, सुधांशु महाराज जी, परमपूज्य डॉ. विष्णू महाराज पारनेरकरजी, स्वामी चिदानंद सरस्वतीजी, पूज्य आचार्य चंदना जी माँ, आचार्य स्वामी श्री शिव मुनीजी, सुंदरलाल बहुगुणा, डॉ. मोहन धारियाजी, मधू पंडित दासजी, बाबा आमटे, शिव शाहीर बाबासाहेब पुरंदरे, डॉ. सत्यवृत शास्त्री, गुरुजी ज्ञानवत्सल स्वामीजी यांना प्रदान करण्यात आला आहे.

श्री सद्गुरू साईबाबा सेवा संस्थेचा साई उत्सव २०२३  : विविध सामाजिक आणि धार्मिक कार्यक्रमांचे आयोजन

पुणे : कर्वेनगर मधील श्री सद्गुरू साई बाबा सेवा संस्थेच्या वतीने साई उत्सव २०२३  चे आयोजन करण्यात आले आहे. दरवर्षी प्रमाणे यंदाही श्री साईबाबा पालखीचे आयोजन करण्यात आले होते. यावेळी साईबाबांच्या पादुकांचे दर्शन घेण्यासाठी भक्तांनी गर्दी केली होती. भक्ती पूर्ण वातावरणात साईबाबा पालखीची नगर प्रदक्षिणा संपन्न झाली. उत्सवाचे यंदा १५  वे वर्ष आहे. 

संस्थापक अध्यक्ष तुषार कैलास झेंडे, कुमार लांडे , कैलास जाधव,  अमोल शिंदे , ओंकार लांडगे, उमेश झेंडे, वैभव नवसे ,  राजू  पलमाटे, राहुल ढमाले ,साई धंगेकर, विजय मोरे, योगेश झेंडे , दिनेश गालफाडे, विजय साळवी , भारत भगत आणि नगरसेवक श्री सुशीलभाऊ मेंगडे, विठ्ठल बराटे,विजय  खळदकर,संतोष  बराटे, गिरीश खत्री,अमोल कांबळे,अंकित वाघमारे आणि मित्र परिवार उपस्थित होते.  दिनांक २३ ते २६ नोव्हेंबर दरम्यान साई उत्सव होणार आहे.

तुषार झेंडे म्हणाले, साई उत्सवानिमित्त विविध सामाजिक आणि धार्मिक कार्यक्रमांचे आयोजन करण्यात आले आहे. यामध्ये साई मूर्तीचे मंगल स्नान, साई पादुकांची महापूजा व अभिषेक श्री साई सत्यनारायण महापूजा व तीर्थप्रसाद साईबाबांची सांज आरती व महाप्रसाद आदी धार्मिक कार्यक्रमांचे आयोजन करण्यात आले आहे. शिवाय हा जल्लोष महाराष्ट्राचा या सांस्कृतिक कार्यक्रमाचे आयोजन करण्यात आले आहे. याशिवाय दिनांक   २६ नोव्हेंबर  रोजी भव्य रक्तदान शिबिराचे आयोजन करण्यात आले आहे.

पुणे, दि.२४ नोव्हेंबर: उर्जेचा वापर करून रोग व्यवस्थापन आणि निरोगीपण आयुष्य जगण्यासाठी समाजला दिलेल्या अतुलनीय योगदानाबद्दल यशकल्याणी ग्रामीण सेवाभावी संस्थेतर्फे ग्लॅमोवेल संस्थाच्या संस्थापक संचालक व मिसेस युनिव्हर्स डॉ. प्रचिती पुंडे यांना पहिला ‘यशकल्याणी राष्ट्रीय विज्ञान रत्न पुरस्कार’ २०२३ ने गौरविण्यात आले आहे. त्यांना हा पुरस्कार पुणे येथील सी मेटचे संचालक व प्रसिद्ध शास्त्रज्ञ डॉ. भारत काळे यांच्या हस्ते प्रदान करण्यात आला. सन्मान पत्र, स्मृती चिन्ह आणि रोख पारितोषिक असे पुरस्काराचे स्वरूप होते.
वसंतराव दिवेकर स्मृतिदिन व यशकल्याणी परिवाराच्या दशकपूर्ती वाटचाली निमित्त या पुरस्कार प्रदान सोहळ्याचे आयोजन करण्यात आले होते. यावेळी ज्येष्ठ विचारवंत व विज्ञान संशोधक पद्मश्री अरिवंद गुप्ता, भारतीय नौसेनेचे रिअर अ‍ॅडमिरल रविंद्र नाडकर्णी, ज्येष्ठ शास्त्रज्ञ  डॉ. के.जी कानडे, आयसरचे विज्ञान संशोधक प्रा. अशोक रुपनेर, ज्येष्ठ स्त्री रोग तज्ञ डॉ. वसंतराव पुंडे आणि संशोधक डॉ. प्रवीण देशमुख हे प्रमुख पाहुणे म्हणून उपस्थित होते.
शास्त्रज्ञ अरविंद गुप्ता म्हणाले,” निसर्गातील प्रत्येक गोष्टीत खेळणी लपलेली आहेत. झाले, पालापाचोळा, कचरा हा खेळणी बनवण्याचा कच्चा माल आहे. त्यातून निर्माण झालेली वैज्ञानिक खेळणी गरिबांच्या चेहर्‍यावरील हास्य फुलवतील व भविष्यातले शास्त्रज्ञ घडवितील.”
पुरस्काराला उत्तर देताना डॉ. प्रचिती पुंडे म्हणाल्या,” विज्ञान क्षेत्रातील राष्ट्रीय स्तरावरील विज्ञान संशोधक पद्मश्री अरिवंद गुप्ता व आयसरचे विज्ञान संशोधक प्रा. अशोक रुपनेर यांच्या बरोबर मझा जो सन्मान करण्यात आला ते शब्दात सांगता येणार नाही. माझे सौभाग्य आहे की यामुळे मला उजबेगिस्थान येथे एप्रिल व स्न्ड येथे मे महिन्यात विज्ञान परिषदेत भाग घेऊन पेपर प्रेझेंटेशनची संधी मिळाली आहे.”
शैक्षणिक व सामाजिक क्षेत्राला वाहून घेतलेल्या डॉ.प्रचिती पुंडे यांनी विज्ञान क्षेत्रात तब्बल २५ संशोधन ग्रंथ लिहिले आहे. त्यांनी आपल्या जीवनात चित्रकार, पत्रकार, किर्तनकार, कलाकार, डॉक्टर, लेखक, गायक, समाजसेवा, संशोधन, मिसेस इंडिया व मिसेस युनिव्हर्स ऑस्ट्रेलिया, मिसेस युनिव्हर्स वॅलरन्स पर्यंतची मजल मारली आहे. तसेच प्रोलेक्स वेलनेस अँड प्रोडक्शन्सची स्थापना करून स्वःला उद्योजिका म्हणून प्रस्थापित केले आहे. या सर्व क्षेत्रात असतांना त्यांनी समाजसेवेचे धोरण कधीही सोडले नाही.
यशकल्याणी ग्रामीण सेवा भावी संस्थेचे अध्यक्ष प्रा. गणेश करे पाटील यांनी प्रास्ताविक केले आणि सचिव अमृत खरे पाटील यांनी आभार मानले.

पुणे –

पुणे महानगर परिवहन महामंडळ लि. कडील स्वमालकीच्या डेक्कन, हडपसर, स्वारगेट, मार्केटयार्ड,
न.ता.वाडी (शिवाजीनगर) येथील संकुलातील जागा लीजने देणेकामी www.eauction.gov.in या
पोर्टलवर ई-लिलाव प्रक्रिया सुरु केली असून या मोक्याच्या ठिकाणी असलेल्या जागा बँका,
शासकीय/खासगी कार्यालय, खासगी संस्था / व्यक्तींना लीज तत्वावर ई-लिलावाचे माध्यमातून मिळू
शकतील असे पुणे महानगर परिवहन महामंडळ लि. कडून स्पष्ट करण्यात आले आहे.

पुणे-झिकाचा प्रसार रोखण्यासाठी विशेष टास्क फोर्सची निर्मिती करण्याची मागणी माजीमहापौर मुरलीधर मोहोळ यांनी महापालिका आयुक्तांकडे केली आहे.

महापालिका आयुक्तांना दिलेल्या पात्रात मोहोळ यांनी म्हटले आहे कि,’पुणे महानगरपालिका हद्दीत झिका विषाणूचे रुग्ण आढळत असल्याचे स्पष्ट झाले असून झिका व्हायरसचा प्रसार रोखण्यासाठी, त्यावर उपाययोजनांची दिशा ठरवण्यासाठी एका विशेष टास्क फोर्सची निर्मिती करणे आवश्यक आहे. कोरोनासारख्या संसर्गजन्य विषाणूची पार्श्वभूमी पाहता, यावर योग्यवेळी आवर घालणे आणि नागरिकांमध्ये जागृती होणे आवश्यक आहे.
येरवडा येथील प्रतीकनगर येथे राहणाऱ्या ६४ वर्षीय महिलेला झिका विषाणूची चाचणी पॉझिटिव्ह आली आहे. यामुळे बाधित भागात प्रतिबंधात्मक उपाययोजना राबवून, या विषाणूचा प्रादुर्भाव रोखण्यासाठी विशेष टास्क फोर्स नियुक्त करावी. यासोबतच या संसर्गजन्य विषाणूसंदर्भात नागरिकांमध्ये जागरूकता निर्माण होण्यासाठी, प्रतिबंधात्मक उपाययोजना करण्यात याव्या. सदर विषय गांभीर्याने घेऊन याबाबत तातडीने आवश्यक उपाययोजना कराव्यात, ही विनंती !

पुणे–पुणे प्रादेशिक परिवहन-कार्यालय येथे लवकरच दुचाकी वाहनांसाठी नवीन मालिका सुरु करण्यात येत आहे. या मालिकेतील आकर्षक नोंदणी क्रमांक तीनपट शुल्क भरून खासगी चारचाकी वाहनांसाठी राखून ठेवण्यासाठी तसेच उर्वरित क्रमांकाबाबत दुचाकींसाठी आगाऊ अर्ज स्वीकारण्याची व लिलाव कार्यपद्धतीची प्रक्रिया सुरू करण्यात आली आहे.

नव्याने सुरु होणाऱ्या दुचाकी मालिकेतील आकर्षक तसेच पसंतीचे क्रमांक चारचाकींसाठी हवे असलेल्या वाहन मालकांनी विहित तीनपट शुल्कासह 28 नोव्हेंबर रोजी सकाळी 10.30 ते दुपारी 2.30 वाजेपर्यंत विहित नमुन्यात अर्ज करावा. एकाच क्रमांकाकरीता एकापेक्षा जास्त अर्ज आल्यास त्याची यादी कार्यालयाच्या सूचना फलकावर प्रसिद्ध करण्यात येईल. लिलावाचे धनाकर्ष (डीडी) 29 नोव्हेंबर रोजी दुपारी 2.30 वाजेपर्यंत स्वीकारले जातील. त्याच दिवशी दुपारी 4 वाजता सहकार सभागृहामध्ये लिलाव करण्यात येईल.

दुचाकी वाहन मालकांनी आकर्षक तसेच पसंतीचे क्रमांक विहित शुल्क भरून हवे असल्यास 29 नोव्हेंबर रोजी सकाळी (Pune) 10.30 ते दुपारी 2.30 वाजेपर्यंत अर्ज करावा. एकाच क्रमांकाकरीता एकापेक्षा जास्त अर्ज असल्यास त्याची यादी कार्यालयाच्या सूचना फलकावर प्रसिद्ध करण्यात येईल. लिलावाचे डीडी 30 नोव्हेंबर रोजी दुपारी 2.30 वाजेपर्यंत स्वीकारले जातील. त्याच दिवशी दुपारी 4 वाजता सहकार सभागृहामध्ये लिलाव करण्यात येईल.

अर्ज कार्यालयाच्या खासगी वाहन नोंदणी विभागात डीडी, पत्त्याचा पुरावा, आधारकार्ड, ओळखपत्र, पॅनकार्डच्या साक्षांकित प्रतीसह आधारकार्डला लिंक असलेल्या मोबाईल क्रमांकासह जमा करावा. हा डीडी ‘आर.टी.ओ.,पुणे’यांच्या नावे राष्ट्रीयकृत, अनुसूचित बँकेचा पुणे येथील असावा.

एकदा राखून ठेवलेला नोंदणी क्रमांक बदलून देता येणार नाही. नोंदणी क्रमांक राखून ठेवलेल्या दिनांकापासून 30 दिवसांच्या आत नोंदणीसाठी वाहन सादर न केल्यास राखून ठेवलेला नोंदणी क्रमांक आपोआप रद्द होईल व शुल्क सरकारजमा होईल. कोणताही विशिष्ट नोंदणी क्रमांक राखीव ठेवण्यासाठी प्रदान केलेले शुल्क परत करता येणार नाही. प्रादेशिक परिवहन कार्यालय पुणेच्या कार्यक्षेत्रातील वाहनधारकांनीच अर्ज सादर करावेत, कार्यक्षेत्राबाहेरील अर्ज बाद ठरविण्यात येतील.