पुणे – पिंपरी-चिंचवड मध्ये पहिल्यांदाच ऑटो, टॅक्सी व असंघटित कष्टकरी जनतेचे राष्ट्रीय अधिवेशन होणार आहे. पिंपरीतील डॉ. बाबासाहेब आंबेडकर पुतळा परिसरात 1 व 2 डिसेंबर 2023 रोजी हे अधिवेशन होणार आहे. यामध्ये महाराष्ट्र राज्यासह संपूर्ण देशभरातून प्रतिनिधींचा सहभाग असणार आहे. यामध्ये ऑटो, रिक्षा, टॅक्सी, बस, टेम्पो, ट्रक व सर्व प्रकारचे ड्रायव्हर वाहतूकदार व फेरीवाले, घरकाम करणार्‍या महिला, साफसफाई कामगार, बांधकाम मजूरांसह असंघटित कामगार कष्टकऱ्यांचा सहभाग असणार आहे, अशी माहिती ऑटो, टॅक्सी, बस, ट्रान्सपोर्ट फेडरेशन व कष्टकरी जनता आघाडीचे राष्ट्रीय अध्यक्ष बाबा कांबळे यांनी दिली आहे.

पुणे येथे आयोजित रिक्षा रिक्षा चालकांच्या बैठकीत मार्गदर्शन करताना बाबा कांबळे यांनी माहिती दिली.
परिषदेच्या तयारीसाठी पुणे कॅम्प येथे पुणे शहरातील रिक्षा स्टँड प्रमुखांची बैठक आयोजित करण्यात आली होती यावेळी अधिवेशनाच्या पत्रकाचे वाटप देखील करण्यात आले यावेळी रिक्षा चालकांना व रिक्षा स्टॅन्ड प्रमुखांना मार्गदर्शन करताना बाबा कांबळे बोलत होते,
अधिवेशनात दिल्ली, जम्मू, कश्मीर, उत्तर प्रदेश, आंध्रप्रदेश, तेलंगणा, मध्यप्रदेश, आसाम, ओडिसा, बिहार, राजस्थान, पंजाब, हिमाचल प्रदेशसह देशभरातील सर्व राज्यातील प्रतिनिधी उपस्थित राहणार आहेत.

बाबा कांबळे म्हणाले की, देशभरात 25 कोटी ऑटो, टॅक्सी, बस, टेम्पो, ट्रक व सर्व प्रकारचे ड्रायव्हर आहेत. 45 कोटी पेक्षा अधिक बांधकाम मजूर, फेरीवाले, घरकाम महिला यांच्यासह संघटित कामगार कष्टकरी आहेत. या सर्व घटकांना एकत्र करण्यासाठी जनजागृती मोहिम राबवली. राज्यानिहाय बैठका घेतल्या. सर्वांना संघटित करण्यासाठी नुकताच देशातील 17 राज्यांचा व महाराष्ट्रातील सर्व जिल्ह्यांचा दौरा केला आहे. आगामी काळात कष्टकर्‍यांच्या मागण्यांसाठी मोठा लढा उभारू, असा निर्धार बाबा कांबळे यांनी व्यक्त केला.

अधिवेशनातील मुद्दे –
या अधिवेशनात विविध मागण्यांवर चर्चा करून आंदोलनाची पुढील दिशा ठरविण्यात येणार आहे. या मागण्यांमध्ये ऑटो, टॅक्सी, बस, ट्रक, टेम्पो व सर्व प्रकारच्या ड्रायव्हर साठी राष्ट्रीय आयोग स्थापन करण्यात यावा. केंद्र सरकारने सर्व प्रकारच्या ड्रायव्हरसाठी वेल्फेअर बोर्ड स्थापन करून देशातील 25 कोटी ड्रायव्हर यांना सामाजिक सुरक्षा, म्हातारपणी पेन्शन द्यावी. महाराष्ट्रातील 20 लाख ऑटो, टॅक्सी, चालक-मालकांसाठी तातडीने कल्याणकारी महामंडळ घटित करण्यात यावे. महाराष्ट्रातील रिक्षाचा मुक्त परवाना तातडीने बंद करून देशभरातील सर्व इलेक्ट्रिक रिक्षांना परमिट सक्ती करण्यात यावी. फेरीवाले, बांधकाम मजूर, सफाई कामगार, घरकाम महिला, कंत्राटी कामगारांसह महाराष्ट्रातील तीन कोटी व देशभरातील 45 कोटी पेक्षा अधिक असंघटित कामगार कष्टकरी जनतेला सामाजिक सुरक्षा, आरोग्य विमा, मुलांना उच्च शिक्षण, म्हातारपणी पेन्शन देणारा कायदा तातडीने करून त्याची अंमलबजावणी करावी.

पुणे : प्रभू श्रीरामांची चित्ररंगावली….विविधरंगी पणत्यांसह दिव्यांची आकर्षक आरास…  नानाविध फुलांची सजावट व विद्युतरोषणाईने उजळलेल्या श्री महालक्ष्मी मंदिराचे विलोभनीय दृश्य त्रिपुरारी पौर्णिमेला पहायला मिळाले. दरवर्षीप्रमाणे यंदाही मंगलमय, धार्मिक वातावरणात जय श्रीराम… श्री महालक्ष्मी माता की जय… च्या नामघोषात तब्बल ११ हजार पणत्यांचा दीपोत्सव मंदिरामध्ये करण्यात आला.

श्री बन्सीलाल रामनाथ अग्रवाल धार्मिक व सांस्कृतिक ट्रस्ट, श्री महालक्ष्मी मंदिर सारसबागतर्फे या सोहळ्याचे आयोजन करण्यात आले होते़ यावेळी ट्रस्टचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड.प्रताप परदेशी, प्रवीण चोरबेले, तृप्ती अग्रवाल, भरत अग्रवाल, हेमंत अर्नाळकर यांसह विश्वस्त, पदाधिकारी उपस्थित होते.

विश्वकर्मा युनिव्हर्सिटी व विश्वकर्मा विद्यालय यांनी दीपोत्सवातील पणत्यांची आरास केली. महिलांनी विविधरंगी वेशभूषेत दीपोत्सवात सहभाग घेतला. सुगंधी फुलांद्वारे आणि दिव्यांच्या प्रकाशातून अयोध्येतील श्रीराम मंदिर उजळून निघू देत, अशी शुभेच्छा व प्रार्थना यानिमित्ताने देवीचरणी करण्यात आली.

ट्रस्टचे संस्थापक विश्वस्त राजकुमार अग्रवाल म्हणाले, त्रिपुरारी पौर्णिमेला आम्ही दरवर्षीप्रमाणे उत्साहाने दीपोत्सव साजरा करीत आहोत. दिव्यांच्या प्रकाशाने ज्याप्रमाणे अंधकार दूर होतो, त्याप्रमाणेच समाजातील वंचित व गरजू घटकाच्या आयुष्यातील  अंधकार दूर व्हावा, अशी प्रार्थना देखील करीत असल्याचे त्यांनी सांगितले.

पुणे- भारतरत्न डॉ. बाबासाहेब आंबेडकर यांच्या नेतृत्वात संविधान सभेने भारतीय संविधान निर्माण केले. दिनांक २६ नोव्हेंबर १९४९ रोजी संविधान सभेने हे संविधान देशाला अर्पण केले. या ऐतिहासिक घटनेचे स्मरण म्हणून दर वर्षी संविधान दिन साजरा केला जातो.
यावर्षीही संविधान दिनाच्या निमित्ताने राष्ट्रवादी काँग्रेस पार्टीच्या पुणे शहर मध्यवर्ती कार्यालयात माजी आमदार ऍड. जयदेवराव गायकवाड यांच्या हस्ते भारतरत्न डॉ. बाबासाहेब आंबेडकर यांच्या प्रतिमेस पुष्पहार अर्पण करून अभिवादन करण्यात आले. त्यानंतर राष्ट्रवादी काँग्रेस पार्टीचे पुणे शहराध्यक्ष प्रशांत जगताप यांच्या नेतृत्वात संविधानाच्या उद्देशिकेचे सामूहिक वाचन करण्यात आले.
यावेळी मनोगत व्यक्त करताना प्रशांत जगताप यांनी उपेक्षित सर्व पदाधिकारी, कार्यकर्ते व नागरिकांना लोकशाही मूल्यांचे जतन करून संविधानाचे रक्षण करण्याचे आवाहन केले. याप्रसंगी मा. जयदेवराव गायकवाड़, भगवानराव सालुंखे, डॉ. सुनील जगताप, किशोर काम्बले, रोहन पायगुड़े, सुवर्णाताई माने संजय गाड़े आदि मान्यवर उपस्थित होते.

संविधान प्रास्ताविकेचे सामूहिक वाचन

पुणे (दि. २६ नोव्हेंबर २०२३-) राष्ट्रवादी काँग्रेसचे ज्येष्ठ नेते आझमभाई पानसरे यांच्या नेतृत्वाखाली रविवारी (दि.२६) भारतीय संविधान दिननिमित्त पिंपरीतील भारतरत्न डॉ. बाबासाहेब आंबेडकर यांच्या पुतळ्यास पुष्पहार अर्पण करून अभिवादन करण्यात आले. तसेच राष्ट्रवादी काँग्रेस पार्टीचे शहर अध्यक्ष तुषार कामठे यांच्या नेतृत्वाखाली संविधान प्रास्ताविकेचे सामूहिक वाचन करण्यात आले. सामाजिक न्याय विभागाचे शहर अध्यक्ष
मयूर जाधव यांच्या वतीने पानसरे यांच्या हस्ते संविधान पुस्तिकेचे आणि कामठे यांच्या हस्ते प्रास्ताविकेचे वाटप करण्यात आले.
यावेळी माजी नगरसेविका सुलक्षणा शिलवंत – धर, जेष्ठ नेते शिरीष जाधव, देवेंद्र तायडे, राजन नायर, ज्योती निंबाळकर, काशिनाथ जगताप, प्रशांत सपकाळ, भारत कुंभार, राजेंद्र कडू, सुहास देशमुख, के. डी. वाघमारे, बिरुदेव मोटे, कमलेश वाळके, रेखा मोरे, अनिल भोसले, सुगंधा जाधव, सुवर्णा वाळके, संगीता जाधव, सुदाम शिंदे, विनोद वाघमारे, विशाल क्षीरसागर, सुभाष गालफाडे आदी उपस्थित होते.

परभन्ना फाउंडेशनतर्फे सेवाकार्य कृतज्ञता पुरस्कारांचे वितरण
पुणे : “समाजाच्या सर्वांगीण विकासासाठी सेवाभावी वृत्तीने काम करणाऱ्या व्यक्त्ती व संस्थांना प्रोत्साहन दिले, तर मोठ्या स्वरूपात विधायक कार्य उभा राहते. निःस्वार्थ भावनेने काम करणाऱ्यांच्या पाठीवर कौतुकाची थाप पडली, तर त्यांनाही आणखी जोमाने काम करण्याची उर्मी मिळते,” असे मत श्रीनिवास पाटील फाउंडेशनच्या उपाध्यक्षा रचना पाटील यांनी व्यक्त केले. सेवाकार्यासाठी जिद्द, इच्छाशक्तीची गरज असल्याचेही त्यांनी नमूद केले.

परभन्ना फाउंडेशन, ॲग्रो टुरिझम विश्व यांच्यातर्फे आयोजित सेवाकार्य कृतज्ञता पुरस्कारांचे वितरण रचना पाटील यांच्या हस्ते झाले. महाराष्ट्र साहित्य परिषदेच्या माधवराव पटवर्धन सभागृहात झालेल्या या सोहळ्यावेळी अभिनेत्री गौरी रत्नपारखी, यशदाचे अधिकारी डॉ. बबन जोगदंड, संयोजक परभन्ना फाउंडेशनचे अध्यक्ष गणेश चप्पलवार, मनिषा उगले, अँन्डी जाधव आदी उपस्थित होते.  कला, सामाजिक, प्रशासकीय, पर्यटन, पर्यावरण, पत्रकारिता, आरोग्य, सांस्कृतिक, संशोधन, स्टार्टअप, राजकीय, विज्ञान-तंत्रज्ञान या क्षेत्रात उल्लेखनीय कार्य करणाऱ्या व्यक्ती आणि संस्थांना ‘सेवाकार्य कृतज्ञता पुरस्कार’ देण्यात आला.

नितीन सोनावणे (गांधी शांती पदयात्रा), पुंडलिकराव थोटवे (सेवानिवृत्त अभियंता), विनोद साळवी (अध्यक्ष पेट्स फोर्स), भगवान खोकले (सरपंच, अहमदनगर) यांना ‘विशेष सेवाकार्य पुरस्कार’, तर माधव पाटील (आंघोळीची गोळी संस्था), वैशाली नगराळे (शोभा गर्ल्स पी.जी.), राधिका कुलकर्णी (एस्पायर एंटरटेनमेंट), मुग्धा पंडित (विश्वरंग टुर), डॉ. रोहित बोरकर (फर्स्ट एड डॉक्टर्स असोशिएशन), व्यंकटेश कल्याणकर (वल्लरी प्रकाशन), अक्षय बनसोडे (कार्डझ टेकनोलोजि प्रा.लि.), ऋषिकेश आंधळकर (नंदा फॉउंडेशन), संदीप भिंगारे (बालविकास प्रकल्प अधिकारी, सातारा), डॉ. इलियास बेपारी (आठवले समाजकार्य महाविद्यलय, भंडारा) यांना ‘सेवाकार्य कृतज्ञता पुरस्कार’ प्रदान करण्यात आला.
गणेश चप्पलवार यांनी पुरस्कार सोहळ्याच्या आयोजनामागील भूमिका विषद केली. अशोक हिरवे यांनी आभार मानले.

पुणे :पुणे पोलीस आयुक्तालयातील भरोसा सेलच्या सहायक पोलीस निरीक्षक अर्चना कटकेयांना बालकांच्या क्षेत्रात उत्कृष्ट कार्य केल्याबद्दल महाराष्ट्र राज्य बाल हक्क संरक्षण आयोग आणि महिला व बालविकास आयुक्तालय, युनिसेफ यांच्या वतीने ‘बाल स्नेही 2023’ पुरस्कार प्रदान करण्यात आला आहे.

विशेष पोलीस महानिरीक्षक, महिला व बाल अपराध प्रतिबंध विभाग, मुंबई दिपक पाण्डेय, अध्यक्षा बाल हक्क संरक्षण आयोग अॅड. सुसीबेन शहा, बाल हक्क संरक्षण आयोगाचे सचिव शिवराज पाटील, महिला व बाल विकास आयुक्तालय पुणे आयुक्त प्रशांत नारनवरे यांच्या हस्ते मुंबईतील नरिमन पॉईंट येथील यशवंतराव चव्हाण सभागृहात प्रदान करण्यात आला. यावेळी महिला व बाल विकास मंत्री आदिती तटकरे, विधानसभेचे विरोधी पक्षनेते विजय वडेट्टीवार उपस्थित होते.

बालकांच्या सर्वांगीण विकास, बाल हक्क संरक्षण त्यांची सुरक्षा, आरोग्य इत्यादीसाठी पुणे शहर पोलीस आयुक्तालयातून एकूण 716 विधीसंघर्षित बालकांचे समुपदेशन करण्यात आले आहे. तर 2023 मध्ये 29 पीडितांना मनोधैर्य योजनेचा लाभ मिळवून दिला आहे. पोलीस आयुक्तालयामार्फत पोक्सो मधील पीडित बलके तसेच विधीसंघर्षग्रस्त बालकांना बाल कल्याण समिती, बाल न्याय मंडळ, संस्थेत दाखल करणे किंवा त्यांची वैद्यकीय तपासणी करण्यासाठी वाहने उपलब्ध करुन दिली आहेत.याशिवाय दोन अल्पवीन मुलांना नोकरीसाठी आवश्यक असलेले चारित्रय पडताळणी प्रमाणपत्र प्राप्त करुन दिले आहे.

तसेच कम्युनिटी पोलिसिंग अंतर्गत पोलीस काका/दिदी या योजनेकरिता एक नोडल अधिकारी व अंमलदार, दामिनी मार्शल यांची नेमणूक केली आहे. पोलीस ठाण्याच्या हद्दीतील शाळा, कॉलेजमध्ये जाऊन विद्यार्थांना गुड टच बॅड टच, सायबरचे वाढते प्रमाण व गुन्हेगारी, व्यसनाधीनता, प्रेम-मैत्री-आकर्षण, पोक्सो गुन्ह्यांबाबत मार्गदर्शन केले आहे. पुणे शहर पोलीस व होप फॉर दी चिल्ड्रेन फाउंडेशन यांच्या संयुक्त विद्यमाने पोलीस आयुक्ताल्यातील 32 पैकी 24 पोलीस ठाण्यात ‘बालस्नेही कक्ष’ तयार करण्यात आला आहे. यामध्ये मोलाचा कार्य केल्याने गुन्हे शाखेच्या विशेष बाल सुरक्षा पथक, भरोसा सेल सहायक पोलीस निरीक्षक अर्चना कटके यांना ‘बाल स्नेही 2023’ पुरस्काराने सन्मानित करण्यात आले आहे.

पोलीस आयुक्त रितेश कुमार, तत्कालीन पोलीस सह आयुक्त संदिप कर्णिक,अपर पोलीस आयुक्त गुन्हे रामनाथ पोकळे, पोलीस उपायुक्त गुन्हे अमोल झेंडे,सहायक पोलीस आयुक्त गुन्हे-2 सतिश गोवेकर यांच्या मार्गदर्शनाखालीभरोसा सेलचे वरिष्ठ पोलीस निरीक्षक अनिता मोरे, वरिष्ठ पोलीस निरीक्षक संगिता जाधवयाच्या सुचनेप्रमाणे सहायक पोलीस निरीक्षक अर्चना कटके यांनी ही कामगिरी केली आहे.

नामदेव समजन्नती परिषदे पुणे शहर व पिंपरी चिंचवड शहर तर्फे श्री संत शिरोमणी नामदेव महाराज जयंती निमित्त भावार्थ देखणे यांच्या “बहुरूपी भारुड” कार्यक्रमाचे आयोजन
पुणे :  वासुदेवाची वाणी, कडकलक्ष्मीची गाणी आणि संत महतांची भजन अशा सूर आणि तालाने नटलेल्या भावार्थ देखणे यांच्या बहुरूपी भारुड या कार्यक्रमात महाराष्ट्राची संत परंपरा आणि लोककलेची परंपरा उलगडली.

श्री संत शिरोमणी नामदेव महाराज यांच्या ७५३ व्या जयंतीनिमित्त नामदेव समाजोन्नती परिषद शाखा पुणे शहर व पिंपरी चिंचवड शहर यांच्या वतीने साहित्य कला प्रतिष्ठान प्रस्तुत ‘बहुरूपी भारुड’ या कार्यक्रमाचे आयोजन करण्यात आले. राज्य साहित्य आणि संस्कृती मंडळाचे अध्यक्ष डॉ. सदानंद मोरे, मॉडर्न महाविद्यालयाचे प्राचार्य डाॅ. राजेंद्र झुंजारराव, नामदेव समाजोन्नती परिषदेचे मुख्य विश्वस्त राजेंद्र पोरे, वृषाली तुपसाखरे यांच्या हस्ते दीप प्रज्वलन व नामदेव महाराज मुर्ती पुजन करण्यात आले

यावेळी पुणे परिमंडळ १ चे पोलीस उपायुक्त संदिप सिंह गिल, भा.ज.पा. शहर अध्यक्ष धीरज घाटे यांची प्रमुख उपस्थिती होती. कार्यक्रमात डॉ. भावार्थ देखणे यांच्यासह अवधूत गांधी, अभय नलगे यांसारखे ३५ हून अधिक कलाकार कार्यक्रमात सहभागी झाले होते.

ज्ञानोबा माऊली च्या गजरात रंगमंचावर सादर झालेले वारकरी, कमरेवर हात ठेवून उभा असलेला विठ्ठल, संत नामामध्ये दंग होऊन फेर धरणारे वारकरी अशा भक्तिमय वातावरणात कार्यक्रमाची सुरुवात झाली. अवधूत गांधी यांनी संत नामदेव महाराज यांच्या वेशात रंगमंचावर प्रवेश करताच प्रेक्षकांनी टाळ्या वाजवून त्यांचे स्वागत केले.

त्यानंतर भावार्थ देखणे हे वासुदेवाच्या भूमिकेमध्ये प्रेक्षकांसमोर आले. त्यांनी विविध गाण्यांच्या माध्यमातून वासुदेवाची गाणी आणि महाराष्ट्रतून लुप्त होत चाललेली वासुदेव परंपरा यांचे महत्त्व सांगितले. त्यानंतर कडकलक्ष्मीच्या वेशात पारंपारिक गोंधळ सादर करून प्रेक्षकांना अक्षरशः खिळवून ठेवले. पसायदानाने कार्यक्रमाची सांगता झाली.
संदीप लचके म्हणाले, सध्याची तरूण पिढी सोशल मीडिया आणि इंटरनेटच्या विळख्यात गुरफटलेली असून संतसाहित्य व लोककला लोप पावत चालली आहे. हीच सामाजिक बांधिलकी ओळखून पिंपरी चिंचवड शहर शाखेचे अध्यक्ष एकनाथ सदावर्ते यांचे संयुक्त विद्यमाने श्री संत शिरोमणी नामदेव महाराज यांच्या ७५३ व्या जयंती निमित्त बहुरूपी भारुड या कार्यक्रमाचे आयोजन करण्यात आले आहे.

ना.स.प. पुणे शहर शाखेचे सचिव सुभाष मुळे, कार्याध्यक्ष रणजीत माळवदे, उपाध्यक्ष कुंदन गोरटे, अक्षय मांढरे, सुभाष पांढरकामे, सोमनाथ मेटे, खजिनदार विजय कालेकर तर पिंपरी चिंचवड शहर शाखेचे उपाध्यक्ष कैलास नेवासकर, सचिव रेखा गाडेकर, सर्व महिला कार्यकर्त्यांनी कार्यक्रमाचे संयोजन केले. प्रशांत सातपुते यांनी सूत्रसंचालन केले.

पुणे, दि. २६ : भारतरत्न डॉ. बाबासाहेब आंबेडकर यांनी लिहिलेले देशाचे संविधान हे जगातील अनेक नवनिर्मित देशांना आपल्या संविधान निर्मितीमध्ये मार्गदर्शक ठरले आहे. संविधान दिन साजरा करण्याबरोबरच संविधानाबद्दल जागरूकता निर्माण करणे अधिक महत्वाचे आहे, असे प्रतिपादन उच्च व तंत्र शिक्षण मंत्री चंद्रकांतदादा पाटील यांनी केले.

संविधान दिनानिमित्त सावित्रीबाई फुले पुणे विद्यापीठ येथे आयोजित ‘संविधान सन्मान दौड २०२३’ ला मंत्री श्री. पाटील आणि कुलगुरू डॉ. सुरेश गोसावी यांच्या हस्ते ध्वज दाखवून शुभारंभ करण्यात आला. यावेळी ते बोलत होते. या मिनी मॅरेथॉन स्पर्धेचे आयोजन सावित्रीबाई फुले पुणे विद्यापीठ, डॉ. बाबासाहेब आंबेडकर संशोधन व प्रशिक्षण संस्था (बार्टी ), डॉ. बाबासाहेब आंबेडकर सांस्कृतिक महोत्सव समिती पुणे आणि पुणे जिल्हा हौशी ॲथलेटीक्स असोसिएशन यांच्या संयुक्त विद्यमाने करण्यात आले.

यावेळी पुणे शहर पोलीस आयुक्त रितेश कुमार, विद्यापीठाच्या व्यवस्थापन परिषदेचे सदस्य राजेश पांडे, विद्यापीठाचे प्रभारी कुलसचिव डॉ.विजय खरे, डॉ. बाबासाहेब आंबेडकर सांस्कृतिक समितीचे अध्यक्ष व स्पर्धेचे मुख्य संयोजक परशुराम वाडेकर, राहुल डंबाळे यांच्यासह विविध मान्यवर उपस्थित होते.

मंत्री श्री. पाटील म्हणाले, आपल्या संसदेने संविधान स्वीकारले याला ७५ वर्ष पूर्ण होत आहेत. दरवर्षी संविधान सन्मान दौड आयोजित करण्यासह विविध कार्यक्रमाद्वारे सर्व देशभर हा दिवस साजरा केला जातो. डॉ.बाबासाहेब आंबेडकर यांचे समस्त भारतीयांवर खूप मोठे उपकार आहेत. संविधानाच्या माध्यमातून भारताची लोकशाही सदृढ करण्याचे काम त्यांनी केले. हजारो वर्षे बदलावेच लागणार नाही असे परिपूर्ण संविधान त्यांनी लिहिले, असेही श्री. पाटील यांनी सांगितले.

स्पर्धेत सहभागी नागरिकांचे अभिनंदन करून, सदृढ आणि सक्षम समाजासाठी खेळ महत्वाचे आहेत, असे पोलीस आयुक्त रितेश कुमार म्हणाले.

या ‘संविधान सन्मान दौड’ मध्ये तब्बल ३१ देशातील विद्यार्थ्यासह एकूण सात हजार स्पर्धक सहभागी झाले होते. स्पर्धेच्या सुरवातीला भारतीय संविधानाच्या उद्देशीकेचे सामूहिक वाचन करण्यात आले.

दरम्यान,  या स्पर्धेत धावू शकल्या नाही अशा महिलांनी  ‘वॉक फॉर संविधान’ रॅली काढली होती. या उपक्रमाची सुरुवात सावित्रीबाई फुले पुणे विद्यापीठातील सावित्रीबाई फुले यांच्या पुतळ्याला अभिवादन करून झाली.  विद्यापीठातील भारतरत्न डॉ. बाबासाहेब आंबेडकर आणि छत्रपती शिवाजी महाराजांच्या पुतळ्याला अभिवादन करून रॅलीचा समारोप झाला.