मुस्लिम आरक्षण व संरक्षण हक्क समितीची स्थापना

पुणे (दि.१५ डिसेंबर २०२३) महाराष्ट्र सरकारने २०१४ मध्ये मुस्लिम समुदायाला दिलेले पाच टक्के आरक्षण पुन्हा देण्यात यावे व यासाठी आवश्यक तो कायदा करावा, अशी मागणी मुस्लिम समाजाच्या विविध पक्ष संघटनेच्या प्रतिनिधींच्या वतीने आयोजित करण्यात आलेल्या बैठकात केली आहे, अशी माहिती नॅशनल कॉन्फरन्स फॉर मायनॉरिटीचे राष्ट्रीय अध्यक्ष राहुल डंबाळे यांनी पत्रकार परिषदेत दिली.
नॅशनल कॉन्फरन्स फॉर मायनोरिटीच्या वतीने मुस्लिम आरक्षणांच्या संदर्भामध्ये काम करीत असलेल्या विविध पक्ष, संघटना व संस्थांच्या प्रतिनिधींची पिंपरी येथे शुक्रवारी पत्रकार परिषद आयोजित करण्यात आली होती. यावेळी राहुल डंबाळे, मौलाना नय्यर नूरी, अजीज शेख, हाजी युसुफ कुरेशी, शहाबुद्दीन शेख, हाजी दस्तगीर मणियार, हाजी गुलाम रसूल सय्यद, शहाजी पटेल अत्तार, शाकीर शेख, जैद शेख, युनूस पानडीवाले, नियाज देसाई, सालर शेख, जाफर मुल्ला, इम्रान विजापुरे, असद पटेल, नसीर शेख, जुबेर खान, जुबेर मेमन, ॲड. फारुख शेख, ॲड. मोहित पिरंगुठे यांच्यासह शहरातील मुस्लिम समाजाचे विविध पक्षांचे पदाधिकारी, सामाजिक संघटनांचे प्रतिनिधी व प्रतिष्ठीत नागरिक सहभागी झाले होते.
या बैठकीत मुस्लिम आरक्षण व संरक्षणासाठी सर्व पातळीवरील पाठपुरावा करण्यासाठी सर्वपक्षीय “मुस्लिम आरक्षण व संरक्षण हक्क समितीची“ स्थापना करण्यात आली आहे. यावेळी व्यापक चर्चा व सर्व शक्यतांची पडताळणी करून मुस्लिम समुदायाला मागील सरकारने दिलेले पाच टक्के आरक्षण पुन्हा मिळण्यास कोणतीही कायदेशीर अडचण नाही. केवळ विद्यमान राज्य सरकारने आरक्षणांबाबत कायदा करणे गरजेचे आहे. नॅशनल कॉन्फरन्स फॉर मायनॉरिटी व मुस्लिम आरक्षण व संरक्षण हक्क समिती, पिंपरी चिंचवडचे पदाधिकारी यांचे नेतृत्वाखाली महाराष्ट्राचे मुख्यमंत्री व मुस्लिम आरक्षणांसाठी अनुकुल असलेल्या कॉंग्रेस, राष्ट्रवादी कॉंग्रेस, समाजवादी पक्ष, एमआयएम यांसह शिवसेना उद्धव बाळासाहेब ठाकरे पक्ष यांचे सुमारे शंभर आमदारांची नागपूर आधिवेशन कालावधीत दि. १९-२१ डिसेंबर दरम्यान नागपूर येथे समक्ष भेट घेवून निवेदन देणार आहे. राज्य विधीमंडळाच्या हिवाळी आधिवेशन कालावधीतच मुस्लिम आरक्षण कायदा मंजूर करावा अशी विनंती करण्यात येणार आहे. मुस्लिमांसाठी ॲट्रोसिटीसारखा मजबूत कायदा हवा. मुस्लिम समुदायावर देशभरात विशेषत: महाराष्ट्र राज्यात देखील धार्मिक अत्याचाराच्या घटना, हल्ले वाढलेले आहेत. या हल्ल्यामुळे मुस्लिम समाजामध्ये भितीचे वातावरण पसरलेले आहे. सक्षम कायदा नसल्यामुळे धर्मांध व दंगलखोर वृत्तीच्या लोकांवर कोणताही धाक राहिलेला नसून ते सातत्याने समाजाला डिवचण्याचे व त्यांच्यावर हल्ले करण्याचे दुष्कर्म करीत आहेत. ‘हेट स्पिच’ संदर्भामध्ये सर्वोच्च तसेच उच्च न्यायालयाने वेळोवेळी चिंता व्यक्त केली असून, अशा प्रकारची चिथावणीखोर व्यक्तव्य करणाऱ्यांवर कठोर कारवाईचे आदेश दिलेले आहेत. न्यायालयांच्या आदेशांची अंमलबाजवणी होत नाही. त्यामुळे महाराष्ट्र राज्याने या संदर्भात स्वत: पुढाकार घेत मुस्लिम समाजाच्या अन्याय, आत्याचारास प्रतिबंध करणारा कडक कायदा ॲट्रोसिटी ॲक्टच्या धर्तीवर करावा, अशी मागणी मुख्यमंत्र्यासह इतर शंभर आमदारांकडे करण्यात येणार आहे, असेही डंबाळे यांनी सांगितले.

महापालिकेत कोट्यवधींचा टीडीआर घोटाळा, घोटाळ्याची सखोल चौकशी करा, अन्यथा जन आंदोलनाचा महाविकास आघाडीचा इशारा

पुणे (दि. १५ डिसेंबर २०२३) पिंपरी चिंचवड महानगरपालिकेमध्ये कोट्यवधींचा टीडीआर घोटाळा झाला असल्याचा गौप्यस्फोट विधान सभेचे विरोधी पक्षनेते विजय वडेट्टीवार यांनी नुकताच केला. टीडीआर प्रकरणांमध्ये मोठा आर्थिक गैरव्यवहार झाला असून पुणे – बेंगळुरू महामार्गा लगत वाकड परिसरातील मोक्याची दोन हेक्टर जागा केवळ २०० रुपये कोटींना महापालिकेने विकासकाला दिली. आजच्या बाजार मूल्याचा विचार केला तर यामध्ये सुमारे दीड हजार कोटींहून अधिक रकमेचा टीडीआर घोटाळा झाला आहे. महापालिका आयुक्त शेखर सिंह हे शहरातील तिन्ही आमदारांच्या घरचे घरगडी आहेत का, असा सवाल राष्ट्रवादी काँग्रेसचे शहराध्यक्ष तुषार कामठे यांनी पत्रकार परिषदेत केला.
महाविकास आघाडीतील घटक पक्षातील शिवसेना माजी आमदार ॲड. गौतम चाबुकस्वार, शिवसेना उद्धव बाळासाहेब ठाकरे पक्षाचे शहराध्यक्ष ॲड. सचिन भोसले, काँग्रेसचे शहराध्यक्ष डॉ. कैलास कदम, माजी नगरसेविका सुलक्षणा शीलवंत – धर, गणेश भोंडवे, अनंत कोऱ्हाळे तसेच संतोष सौंदणकर आदी यावेळी उपस्थित होते.
आमदार ॲड. गौतम चाबुकस्वार म्हणाले की, पिंपरी चिंचवड शहरांमध्ये तीन आमदार आहेत. परंतु या घोटाळ्यावर त्यांनी विधिमंडळात आवाज उठवला नाही. ते गप्प का आहेत, त्यांच्या संशयास्पद भूमिकेमुळे नागरिकांमध्ये संतापाची भावना असून आमदार या घोटाळ्यात सहभागी आहेत का असा प्रश्न जनता विचारत आहे. महापालिकेने २२ क्रमांकाचे आरक्षण बाहेरच्या विकासकाकडून विकसित करण्यापेक्षा महापालिकेने आपल्या ताब्यातील जागेचा विकास स्वतः करावा. त्यामुळे पालिकेच्या उत्पन्नामध्ये भर पडेल. पालिकेने अनेक आरक्षणे ठेकेदारांना विकासासाठी दिली आहेत. महापालिकेचे आणि प्रशासनाचे याकडे दुर्लक्ष होत आहे. शहरात मोठ्या प्रमाणावर भ्रष्टाचार सुरू आहे. गेल्या दोन वर्षापासून महापालिकेची निवडणूक खोळंबली असल्यामुळे प्रशासकीय राज सुरू आहे. आयुक्तांचा भ्रष्टाचाराचा सुसाट कार्यक्रम सुरू आहे. सरकारने याची चौकशी चौकशी करून भ्रष्ट अधिकाऱ्यांवर कारवाई करावी, वेळ पडल्यास अटक करावी. महापालिकेचे जे आर्थिक नुकसान होत आहे याकडे लक्ष दिले नाही तर महाविकास आघाडीतील सर्व पक्षांच्या वतीने आंदोलन उभे केले जाईल, असा इशारा चाबुकस्वार यांनी दिला.
ॲड. सचिन भोसले म्हणाले, निवडणूक डोळ्यासमोर ठेवून हे घोटाळे होत आहेत. हा घोटाळा आत्ताच कसा होतो हे त्यामुळे सर्वसामान्य जनतेच्या लक्षात आले आहे. यापूर्वीही पिंपरी चिंचवड शहरांमध्ये टीडीआर घोटाळा झाल्याचे आपण पाहिले आहे सरकारने घोटाळ्याची सखोल चौकशी करून कारवाई करावी. पालकमंत्री, आमदार या घोटाळ्याकडे जाणीवपूर्वक दुर्लक्ष करत आहे. सरकारने कारवाई केली नाही तर जनआंदोलन करू, गरज पडल्यास न्यायालयात जाऊ, असे ॲड. सचिन भोसले यांनी सांगितले.
डॉ.कैलास कदम म्हणाले, भाजपच्या मागील पाच वर्षांच्या सत्ता काळात स्थायी समिती अध्यक्षाला लाच घेताना रंगेहात पकडले होते. गल्लीपासून ते दिल्लीपर्यंत भ्रष्टाचाराचा एक कलमी कार्यक्रम सुरू आहे. भाजपचे हात भ्रष्टाचाराने बरबटलेले आहेत. दीड हजार कोटींच्या टीडीआर घोटाळ्यामध्ये शहरातील तिन्ही आमदारांचा सहभाग आहे. नुकत्याच झालेल्या तळवडेतील दुर्घटनेमध्ये निष्पाप महिलांना प्राण गमवावे लागले. तळवडे परिसराची दुरवस्था पाहता नियोजन शून्य कारभारामुळे आग शमविण्यासाठी अग्निशमन दलाला कसरत करावी लागली, हे समोर आले. जनतेच्या पैशाची लूट सुरू आहे. गेल्या सात वर्षात जे घोटाळे झाले आहेत त्याची सखोल चौकशी केली पाहिजे. दोषी अधिकार्‍यांवर कारवाई झालीच पाहिजे, अशी मागणी कदम यांनी केली.

कै. श्रीमती लक्ष्मीबाई दगडूशेठ हलवाई दत्तमंदिर ट्रस्ट तर्फे आयोजन ; लोकमंगल वर्धक घोरात्कष्टात स्तोत्राच्या सामुदायिक पठणाने होणार उत्सवाला प्रारंभ

पुणे : बुधवार पेठेतील कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे १२६ व्या वर्षी दत्त जयंती सोहळ्यांतर्गत विविध कार्यक्रम दिनांक १७ ते २६ डिसेंबर दरम्यान मंदिरासमोरील श्री दत्त कलामंच येथे आयोजित करण्यात आले आहेत. तसेच लक्ष्मीबाई स्मृती पुरस्कार प्रदान सोहळा शिवाजीनगर येथील प्रोग्रेसिव्ह एज्युकेशन सोसायटीच्या सभागृहात आयोजित करण्यात आला आहे, अशी माहिती ट्रस्टचे अध्यक्ष युवराज गाडवे यांनी पत्रकार परिषदेत दिली. पत्रकार परिषदेला कार्यकारी विश्वस्त डॉ.पराग काळकर, खजिनदार अ‍ॅड.रजनी उकरंडे, उत्सवप्रमुख अक्षय हलवाई, उत्सव उप प्रमुख सुनिल रुकारी, विश्वस्त अ‍ॅड.प्रताप परदेशी, महेंद्र पिसाळ, अ‍ॅड.शिवराज कदम जहागिरदार, राजू बलकवडे उपस्थित होते. उत्सवाची सुरुवात सामाजिक पर्यावरण शुद्धीचा सिद्ध वेदघोष असलेल्या प.पू.वासुदेवानंद सरस्वती टेंबेस्वामी रचित लोकमंगल वर्धक घोरात्कष्टात स्तोत्राचे सामुदायिक पठण दत्तभक्त करणार आहेत. कै.लक्ष्मीबाई दगडूशेठ हलवाई दत्तमंदिर ट्रस्ट आणि प.पू. नाना महाराज तराणेकर प्रणीत अखिल भारतीय त्रिपदी परिवार, इंदोर तर्फे या कार्यक्रमाचे आयोजन दत्तमंदिरासमोरील श्री दत्त कलामंच येथे रविवार, दिनांक १७ डिसेंबर रोजी सकाळी ७ वाजता करण्यात आले आहे. यावेळी प्रमुख अतिथी म्हणून विधानपरिषदेच्या उपसभापती डॉ.नीलम गो-हे, सावित्रीबाई फुले पुणे विद्यापीठाचे कुलगुरु डॉ.सुरेश गोसावी हे सपत्नीक उपस्थित राहणार आहेत. तर, अध्यक्षस्थानी अखिल भारतीय त्रिपदी परिवार, इंदोरचे प.पू. बाबा महाराज तराणेकर असणार आहेत. रविवारी सायंकाळी ५ वाजता प्रोग्रेसिव्ह एज्युकेशन सोसायटीच्या सभागृहात लक्ष्मीबाई स्मृती पुरस्कार वितरण सोहळा होणार आहे. लोकसभेच्या १६ व्या अध्यक्षा पद्मभूषण सुमित्रा महाजन, पद्मश्री बीजमाता राहीबाई पोपेरे आणि पुण्यातील सामाजिक कार्यकर्त्या व ज्येष्ठ शिक्षिका शुभांगी भालेराव यांना प्रदान करण्यात येणार आहे. दत्त महाराजांची प्रतिकृती, रुपये २५ हजार रोख, महावस्त्र असे पुरस्काराचे स्वरुप असणार आहे. याशिवाय प.पू. बाबामहाराज तराणेकर यांचा मानपत्र व आचार्य पगडी देऊन विशेष गौरव केला जाईल. तसेच सावित्रीबाई फुले पुणे विद्यापीठाच्या प्र-कुलगुरुपदी निवड झाल्याबद्दल डॉ.पराग काळकर यांचा देखील सत्कार करण्यात येणार आहे. पुरस्कार वितरण सोहळ्याला खासदार श्रीनिवास पाटील, माजी आमदार उल्हास पवार, भाजपचे माजी राष्ट्रीय सचिव सुनील देवधर, वेदमूर्ती मोरेश्वर घैसास गुरुजी, श्रीमंत दगडूशेठ हलवाई सार्वजनिक गणपती ट्रस्टचे अध्यक्ष माणिकदादा चव्हाण आदी मान्यवर उपस्थित राहणार आहेत. तसेच रविवारी, सकाळी ९ ते दुपारी ४ यावेळेत तर्पण रक्तपेढीच्या सहकार्याने मंदिरासमोरील श्री दत्त कलामंच येथे  रक्तदान शिबीराचे आयोजन करण्यात आले आहे. गुरुवार, दिनांक २१ डिसेंबर रोजी पं. गजानन वाईकर लिखित गुरुचरित्र प्रकाशन श्री दत्त कलामंच येथे सायंकाळी ६.३० वाजता होईल. यावेळी वासुदेव निवासाचे प्रधान विश्वस्त  डॉ.शरद जोशी, प्रोग्रेसिव्ह एज्युकेशन सोसायटीचे अध्यक्ष डॉ.गजानन एकबोटे उपस्थित राहणार आहेत. शनिवार, दिनांक २३ डिसेंबर रोजी सायंकाळी ६.३० वाजता श्री दत्त कलामंच येथे विद्यार्थी अर्थसहाय्य प्रदान कार्यक्रम होणार आहे. यावेळी गरजू विद्यार्थ्यांनी आर्थिक मदत देण्यात येणार असून धर्मादाय सहआयुक्त सुधीरकुमार बुक्के, डी.वाय.पाटील ग्रुप कोल्हापूरचे अध्यक्ष डॉ. संजय पाटील आदी मान्यवर उपस्थित राहणार आहेत. रविवार, दिनांक २४ डिसेंबर रोजी सकाळी ७ ते ९ यावेळेत लघुरुद्र होणार असून श्रीमंत दगडूशेठ हलवाई सार्वजनिक गणपती ट्रस्टचे उपाध्यक्ष सुनील रासने व संगीता रासने हे यजमान असणार आहेत. यावेळी १०१ महिला पारंपरिक वेशात रुद्रपठण करणार आहेत, तर केशव शंखनाद पथकातर्फे शंखनाद देखील होईल. रविवारी सायंकाळी ६.३० वाजता श्री दत्त कलामंच येथे गुरुदत्त दिनदर्शिका प्रकाशन सोहळा पार पडेल. यावेळी ज्येष्ठ संपादक श्रीराम पवार व माजी उपमहापौर दीपक मानकर उपस्थित राहणार आहेत. उत्सवांतर्गत मंदिरासमोरील श्री दत्त कलामंच येथे दिनांक १७ ते २६ डिसेंबर दरम्यान सांस्कृतिक कार्यक्रमांचे आयोजन करण्यात आले आहे. यामध्ये दररोज दुपारी १ ते सायंकाळी ५ यावेळेत भजन आणि सायंकाळी ५ ते १० यावेळेत सांस्कृतिक कार्यक्रम होणार आहेत. सर्व कार्यक्रमांना भाविकांनी मोठया संख्येने उपस्थित रहावे, असे आवाहन ट्रस्टतर्फे करण्यात आले आहे.

प्राचार्य डॉ. सुधाकरराव जाधवर कला, वाणिज्य व विज्ञान महाविद्यालय : जानेवारी २०२४ मध्ये आयोजन
पुणे : प्राचार्य डॉ. सुधाकरराव जाधवर कला, वाणिज्य आणि विज्ञान महाविद्यालय, इन्स्टिटयूट आॅफ नर्सिंग विज्ञान विभाग आणि राष्ट्रीय सेवा योजनेच्या सहयोगाने ‘पाचव्या जाधवर सायन्स फेस्टिव्हल’ या राज्यस्तरीय विज्ञान महोत्सवाचे आयोजन करण्यात आले. शनिवार, दिनांक ६ जानेवारी २०२४ रोजी सकाळी न-हे येथील डॉ. सुधाकरराव जाधवर शैक्षणिक संकुलात महोत्सवाचे उद्घाटन होणार आहे, अशी माहिती संस्थेचे उपाध्यक्ष अ‍ॅड. शार्दुल जाधवर यांनी पत्रकार परिषदेत दिली. 
सावित्रीबाई फुले पुणे विद्यापीठ, विद्यार्थी विकास मंडळाच्या सहकार्याने हा कार्यक्रम होणार आहे. महोत्सवामधील स्पर्धा शालेय (इयत्ता ८ वी ते १० वी) , कनिष्ठ (इयत्ता ११ वी व १२ वी), वरिष्ठ महाविद्यालय  (पदविका शिक्षण) आणि पदव्युत्तर व खुल्या अशा चार गटात होणार आहे. सायन्स सोसायटी आणि टेक्नॉलॉजी या मुख्य संकल्पनेंंतर्गत पॉल्युशन कंट्रोल, फ्री एनर्जी जनरेशन, वेस्ट टू वेल्थ, झिरो गारबेज सिस्टिम, इलेक्ट्रिसिटी जनरेशन, डिझास्टर मॅनेजमेंट, पर्यावरणाच्या समस्या व उपाय, टेक्नॉलॉजी इन बायो मेडिकल एरिया, रोबोटिक्स, इनोव्हेशन स्किल इन हेल्थ, विशेष व्यक्तींसाठी तंत्रज्ञान आणि टेक्नॉलॉजी इन इंडस्ट्री अशा विविध संकल्पनांवर विद्यार्थी प्रकल्पाचे सादरीकरण करणार आहेत. विजेत्यांना एकूण १ लाख रुपयांची पारितोषिके व ट्रॉफी देण्यात येणार आहेत. 
अ‍ॅड. शार्दुल जाधवर म्हणाले, ‘जाधवर सायन्स फेस्टिवल’ या  राज्यस्तरीय विज्ञान महोत्सवाचे आयोजन करण्यात आले असून विद्यार्थ्यांसाठी हा एक अभिनव व आदर्श उपक्रम असणार आहे. या महोत्सवात विद्यार्थ्यांच्या कल्पनाशक्तीला व्यासपीठ मिळणार आहे. विज्ञान विषयाची विद्यार्थ्यांना आवड निर्माण व्हावी, यासाठी विविध उपक्रम संस्थेतर्फे राबविण्यात येतात. स्पर्धेत सहभागी प्रत्येक विद्यार्थ्याला प्रशस्तीपत्रक देण्यात येणार आहे. नोंदणीची अंतिम तारीख ४ जानेवारी असून गटाप्रमाणे अनुक्रमे ७७९८१०११२२, ९३२५३०८११३, ७९७२४८३५७५, ९०६७९०९०७५ या क्रमांकावर संपर्क साधावा. तरी विद्यार्थ्यांनी मोठया संख्येने सहभागी व्हावे, असे आवाहनही त्यांनी केले. 
* संशोधन करणा-या विद्यार्थ्यांना १० लाख रुपयांची शिष्यवृत्ती
भारताबाहेरील इतर देशांमध्ये संशोधन करुन पेटंट मिळविण्याचे प्रमाण अधिक आहे. भारतामध्ये संशोधन व पेटंटचे प्रमाण कमी असून विद्यार्थ्यांना प्रोत्साहन देण्याकरिता जाधवर ग्रुप आॅफ इन्स्टिटयूटने अभिनव योजना सुरु केली आहे. इन्स्टिटयूटमधील संशोधन करणा-या विद्यार्थ्याला विनातारण १० लाख रुपयांची शिष्यवृत्ती देण्यात येणार आहे. याद्वारे विद्यार्थ्यांमध्ये विज्ञान व तंत्रज्ञान विषयाची गोडी निर्माण होत अधिकाधिक संशोधनास युवावर्ग प्रवृत्त होईल, असे अ‍ॅड. शार्दुल जाधवर यांनी सांगितले.

पुणे :
पूना ऑफ्थल्मॉलॉजिकल सोसायटीचा जीवनगौरव पुरस्कार ज्येष्ठ नेत्ररोगतज्ज्ञ डॉ.अरविंद लाभशेटवार यांना जाहीर झाला असून पूना ऑफ्थल्मॉलॉजिकल सोसायटीच्या १६ डिसेंबर २०२३ रोजी सायंकाळी ६ वाजता हॉटेल शेरेटन ग्रँड येथे होणाऱ्या १६ व्या  वार्षिक परिषदेत हा पुरस्कार ज्येष्ठ शास्त्रज्ञ डॉ. रमण गंगाखेडकर तसेच डॉ.संतोष होनावार,डॉ.संतोष अगरवाल यांच्याहस्ते देण्यात येणार आहे. डॉ.अरविंद लाभशेटवार हे गेली ४५ वर्षे नेत्रशल्य चिकित्सा क्षेत्रात कार्यरत आहेत. बी.जे. मेडिकल कॉलेज (ससून हॉस्पिटल)चे  अधिष्ठाता म्हणून तसेच स्वामी रामानंद तीर्थ विद्यापीठ (नांदेड) मध्ये  वेगवेगळ्या पदांवर म्हणून त्यांनी काम पाहिले आहे. ३५ हजारहुन अधिक शस्त्रक्रिया त्यांनी यशस्वी केल्या आहेत. त्यात मोतीबिंदू तसेच  बुबळ नेत्ररोपण शस्त्रक्रियांचा समावेश आहे. 
पूना ऑफ्थल्मॉलॉजिकल सोसायटीचे अध्यक्ष डॉ.मंदार परांजपे,सचिव डॉ. सागर वर्धमाने,खजिनदार डॉ.पंकज बेंडाळे यांनी पत्रकाद्वारे ही माहिती दिली. डॉ.अरविंद लाभशेटवार यांनी पूना ऑफ्थल्मॉलॉजिकल सोसायटीचे अध्यक्षपदाची जबाबदारीही यापूर्वी सांभाळली असून अनेक राष्ट्रीय ,आंतरराष्ट्रीय पुरस्कार त्यांना मिळाले आहेत. त्यात ‘असोसिएशन ऑफ इंटरनॅशनल असेम्ब्ली कम्युनिटी ऑफ्थल्मॉलॉजि’ च्या  प्रोफेसर ईश्वरचंद्र मेमोरियल बेस्ट टीचर इन ऑफ्थल्मॉलॉजी अवॉर्ड चा समावेश आहे . 

पुणे : तब्बल वीस वर्षानंतर सलग दुसऱ्यांदा राष्ट्रीय मोटो क्रॉस स्पर्धेत महाराष्ट्राने प्रथम स्थान पटकाविले आहे. मैसूर येथे ही स्पर्धा झाली. या स्पर्धेमध्ये पुण्याच्या २३ वर्षीय ऋग्वेद बारगुजे याला सलग दुसऱ्यांदा बेस्ट रायडर व राष्ट्रीय चॅम्पियनशिप हा किताब देऊन गौरविण्यात आले.

या स्पर्धेसाठी ऋग्वेदचे वडील आणि आंतरराष्ट्रीय मोटो क्रॉस विजेते ज्ञानेश्वर बारगुजे यांनी मार्गदर्शन केले. गॉडस्पीड चे शाम कोठारी, प्रायोजक एमआरएफ मोग्रीप राष्ट्रीय सुपर क्रॉस चॅम्पियनशिप, मुख्य प्रायोजक संरक्षक टीव्हीएस रेसिंग आणि एम एक्स स्टोअर एफएक्सआर यांचे सहकार्य ऋग्वेदला मिळाले.

या राष्ट्रीय स्पर्धेसाठी टीव्हीएस कारखान्यात सराव करताना ऋग्वेदचा उजव्या हाताचा अंगठा निखळला होता. परंतु वेदनाशामक औषध घेऊन त्याने ही शर्यत जिंकली.

स्पर्धेमध्ये एकूण सहा फेऱ्या झाल्या. कोइंबतूर, वडोदरा, नाशिक, बेंगलोर, मंगळूर, मैसूर या ठिकाणी या फेऱ्या झाल्या. या सर्व फेऱ्यांमध्ये ऋग्वेद अव्वल ठरला.

मागील वर्षी कोइंबतूर येथे झालेल्या राष्ट्रीय स्पर्धेत ऋग्वेद अव्वल ठरला होता. त्यानंतर यावर्षीही त्यांनी सर्वोत्तम रायडरचा मान मिळवला.

ऋग्वेद बारगुजेने २०१२ पासून रेसिंग ला सुरुवात केली. तो पहिल्याच शर्यतीत तिसऱ्या क्रमांकावर राहिला, हे बक्षीस त्याचा आत्मविश्वास उंचावणारे आणि पुढील दिशा निश्चित करणारे ठरले. यानंतर ऋग्वेदने सरावावर भर दिला. तो श्रीलंका ज्युनिअर चॅम्पियनशिप आणि इंडियन ज्युनिअर नॅशनल चॅम्पियनशिप मध्ये सहभागी झाला, यात त्याने बाजी मारली. येथेच त्याच्या कारकिर्दीने वेग पकडला. २०१६ मध्ये ऋग्वेद एस एक्स टू प्रकारात एमआरएफ प्रायव्हेट फॉरेन ओपन चॅम्पियनशिप स्पर्धेत सहभागी झाला. यात ही त्याने विजेतेपद पटकावले. यानंतर २०१७ मध्ये त्यांनी एस एक्स वन डर्ट ट्रॅक नॅशनल चॅम्पियनशिप मध्ये भाग घेतला, यातही तो करंडक पटकावून मायदेशी परतला. २०१८ मध्ये त्याच्या प्रगतीचा आलेख चढता असताना त्याच्या कारकीर्दीला अपघातामुळे ब्रेक लागला यामध्ये तो गंभीर जखमी झाला. त्यामुळे रेसिंग पासून तो दोन वर्षे बाजूला पडला. अखेर २०२२ मध्ये त्याने एमआरएफ एसएक्स वन इंडियन नॅशनल चॅम्पियनशिप मध्ये बाजी मारली. त्याच्या या यशामुळे तब्बल २१ वर्षानंतर या शर्यतीत महाराष्ट्राला जेतेपद मिळाले होते.

पुणे, प्रतिनिधी: हॉटेल वैशालीचे मूळ मालक जगन्नाथ शेट्टी यांची मुलगी आणि वैशाली हॉटेलच्या मालक निकिता शेट्टी यांच्या नावे  बनावट सह्या, कोरे धनादेश आणि कागदपत्रांच्या आधारे तब्बल पाच कोटी रुपयांचे कर्ज काढून त्यांची आर्थिक फसवणूक केल्याप्रकरणी आरोपी पतीसह बँक अधिकाऱ्यांचा अटकपूर्व जामीन अर्ज अतिरिक्त सत्र न्यायालयाने  फेटाळून लावला आहे. फिर्यादी यांच्यावतीने ॲड. निखिल मालाणी यांनी केलेला युक्तिवाद ग्राह्य धरत न्यायालयाने या तिघांचा जामीन अर्ज फेटाळून लावला. अतिरिक्त सत्र न्यायाधीश व्ही. डी. निंबाळकर यांच्या न्यायालयात या जामिन अर्जाची सुनावणी झाली. त्यामुळे आरोपींच्या अटकेचा मार्ग मोकळा झाला आहे.

वैशाली हॉटेलच्या मालकिन निकिता जगन्नाथ शेट्टी (वय ३४, रा. मोदीबाग, शिवाजीनगर) यांनी डेक्कन पोलीस ठाण्यात दिलेल्या फिर्यादीनुसार त्यांचे पती विश्वजीत विनायक जाधव (वय ४१) यांच्यासह कोटक महिंद्रा बँकेच्या येरवडा शाखेचे व्यवस्थापक राजेश देवचंद्र चौधरी, डीएसए आर. आर. फायनान्सचे रवी परदेशी यांच्याविरुद्ध गुन्हा दाखल करण्यात आला होता. ही घटना ७ डिसेंबर २०२२ रोजी फर्ग्युसन रस्त्यावरील निकिता यांच्या नावावर असणाऱ्या “निकीता हॉस्पिटॅलिटी एलएलपी” या फर्मच्या ऑफीसमध्ये बसुन त्यांचे पती विश्वजीत जाधव यांनी कोटक महिंद्रा बँकेतील अधिकारी राजेश चौधरी, डीएसए रवि परदेशी यांच्या मदतीने संगनमत करुन परस्पर त्यांच्या नावावर ५ कोटीचे कर्ज घेतले. यासाठी त्यांच्या को-या चेकचा वापर करुन स्वतः च्या नावावर ट्रान्स्फर  करुन अपहार केला होता. या कर्ज प्रक्रियेसाठी फिर्यादी मालकीचा फ्लॅट परवानगीशिवाय तारण ठेऊन त्या बदल्यात कर्ज देखील घेतले.

न्यायालयाने आरोपींचा जामीन अर्ज फेटाळताना निरीक्षण नोंदवले की,  निकिता यांनी कोटक महिंद्रा बँकेतुन कर्जासंदर्भात सादर केलेल्या कागदपत्रांची प्रत्यक्षात पाहणी केली. कर्जाच्या अर्जावर त्यांची सही नसुन अर्धवट माहिती भरल्याचे समोर आले. या कर्ज प्रकरणामध्ये कोटक महिंद्रा बँकेचे कोणीही अधिकारी अथवा बँकेने नेमलेल्या एजंटनी त्यांची चौकशी केली नाही. या  कर्जप्रकरणातील कागदपत्रावर त्यांची स्वाक्षरी नव्हती. कोणत्याही प्रकारची पडताळणी करण्यात आली नाही. मुलाखत देखील घेतली नाही अगर शहानिशा केली नाही. कोणत्याही प्रकारची परवानगी घेतली नाही. हे कर्ज प्रकरणाच्या अर्जावर ‘निकीता हॉस्पिटॅलिटी एलएलपी’चा बनावट शिक्का मारण्यात आल्याचे निदर्शनास आले. बँक मॅनेजरने त्याच्या अर्जात उल्लेख केलेला की मी निकिता यांना कर्ज प्रकरणावेळी एकदाही भेटलो नाही, त्यांच्याच पतीने सर्व गोष्टींची पूर्तता केली. त्यामुळे या प्रकरणाशी माझा काहीही संबंध नाही. त्यामुळे कर्जदाराची मुलाखत न घेताच कर्ज कशे दिले गेले? यावर प्रश्न उभे राहते. विश्वजितच्या इतर गुन्ह्यातील आरोपी वकील इरफान शेख यांनी मोदिबाग को-ऑप हौसिंग सोसायटीचा ना-हरकत दाखला घेताना निकिता यांच्या बनावट सह्या केल्या तसेच लोन अर्जावर ह्या सह्या निकिताच्याच आहेत हे भासविण्यासाठी ऍक्सिस बँकेचे एक बनावट पत्र देखील आरोपींनी कोटक महिंद्रा बँकेत सादर केले. मात्र या ऍक्सिस बँकेच्या पत्रावर कोणत्याही शाखेचा किंवा शाखा व्यवस्थापकाचे नाव अथवा शिक्का नमूद नव्हता.

कर्ज घेतल्याची रकमेचा एसएमस निकिताच्या मोबाईल नंबरवर आलाच नाही कारण आरोपीने कर्ज घेतेवेळी वेगळाच मोबाईल नंबर बँकेत नोंदवला होता. तसेच विश्वजीत यांनी त्यांच्या ॲक्सीस बँकेच्या प्रभात रोड शाखेवर आरटीजीएसद्वारे निकिता यांच्या संमतीशिवाय स्वतःच्या सहीने वळती करुन घेतले. यावरून आरोपींचा उद्देश हा फसवणूक करण्याचा होता हे दिसून येते. कर्ज घेतलेले पाच कोटी रुपये हे विश्वजित याने बँकेत फिक्स डिपॉजिट करून ठेवलेले होते त्यामुळे आरोपींकडून निकिता यांचे पैसे व मालमत्ता हडपण्याचा उद्देश होता हे सिद्ध होते. फिर्यादी यांना माहिती न देता आरोपीने बँक अधिकाऱ्यांशी संगनमत करून त्यांचा फ्लॅट तारण ठेवत कर्ज मंजूर करून घेतले त्यामुळे अधिक चौकशी कामी न्यायालयाने त्यांचा जामीन अर्ज फेटाळला.

सदर प्रकरणी ए. पी.आय. स्वप्नील नेवसे, आर्थिक गुन्हे शाखा, सरकारी वकील ॲड. प्रेमकुमार अगरवाल तर मूळ फिर्यादी यांचे वतीने ॲड. निखिल अनिल मालाणी व ॲड. उज्वला पवार यांनी काम पाहिले.

आदर्श मित्र मंडळचे उदय जगताप यांची संकल्पना आदर्श मित्र मंडळ आणि रोटरी क्लब ऑफ पुणे वेस्ट एंड यांच्या संयुक्त विद्यमाने लायब्ररी
पुणे : महाराष्ट्रातील व पुण्यातील पहिली आर्टिफिशियल इंटेलिजन्स बुक लायब्ररी आणि इ लायब्ररी कर्मवीर भाऊसाहेब हिरे हायस्कूल मध्ये तयार करण्यात आली आहे. या आर्टिफिशियल इंटेलिजन्स लायब्ररीचे उद्घाटन शाळेतील विद्यार्थी आणि मान्यवरांच्या उपस्थितीत करण्यात आले. आदर्श मित्र मंडळ आणि रोटरी क्लब ऑफ पुणे वेस्ट एंड यांच्या संयुक्त विद्यमाने ही लायब्ररी तयार करण्यात आली आहे.

या लायब्ररीच्या उद्धाटनप्रसंदी अखिल भारतीय मराठा शिक्षण परिषदेच्या सरचिटणीस प्रमिला गायकवाड, डेक्कन मराठा एज्युकेशन असोसिएशनचे सचिव अजय पाटील, हिरे हायस्कूलचे मुख्यधापक अजित माने, रोटरी क्लब ऑफ  वेस्ट एंडच्या सुनिता चांदवणकर,उदय कुलकर्णी, रसिक साहित्यचे शैलेश नांदुरकर, आदर्श मित्र मंडळचे अध्यक्ष उदय जगताप उपस्थित होते.

उदय जगताप म्हणाले, आर्टिफिशियल इंटेलिजन्स चा प्रसार खूप मोठ्या प्रमाणात आणि वेगाने होत आहे. याची माहिती शिक्षक आणि विद्यार्थी या दोघांनाही होणे गरजेचे आहे.जगातील चालू घडामोडी विद्यार्थ्यांना माहीत असायला हव्यात. यासाठी या लायब्ररीची सुरुवात करण्यात आली.
तंत्रज्ञानामुळे अनेक बदल घडत आहेत, अनेक क्षेत्रात त्याचा चांगला प्रभाव देखील पडत आहे. याबद्दल माहिती असणे ही काळाची गरज आहे. या लायब्ररीमध्ये एआय अभ्यासक डॉ. अमेय पांगारकर, एआय तज्ञ डॉ. भूषण केळकर यांचे मार्गदर्शन असणार आहे.