पुणे जिल्हा अग्रवाल समाजातर्फे आयोजित ‘अपने अपने राम’ कार्यक्रमाच्या दुस-या दिवशी उद्बोधन 

पुणे : आपण पूजा करतो, परमेश्वराची प्रार्थना करतो, ती प्रत्येकाने मनापासून करायला हवी. जेवढी मनापासून प्रार्थना करू, त्यापेशा जास्त श्रद्धेने ईश्वर आपला स्वीकार करेल. समुद्रमंथानातून १४ रत्ने निघाली ही आपली आस्था आहे. जशी समुद्राची खोली काळात नाही, तशी ह्रदयाची खोली देखील कळत नाही. त्यामुळे आपण या ह्रदयरुपी समुद्राचे मंथन करत राहायला हवे, त्यातून शेवटी नक्कीच अमृतकलश प्राप्त होईल, अशी आशा प्रख्यात कवी डॉ. कुमार विश्वास यांनी पुणेकरांशी बोलताना व्यक्त केली. 

पुणे जिल्हा अग्रवाल समाजातर्फे  ‘अपने अपने राम’ या कार्यक्रमाचे आयोजन आरटीओ जवळील एसएसपीएमएस च्या मैदानात करण्यात आले आहे. त्याच्या दुस-या  दिवशी (शनिवार, दि.१६ डिसेंबर) डॉ. कुमार विश्वास यांनी उपस्थितांना मार्गदर्शन केले. या संगीतमय राम ऊर्जा सत्राकरिता पुणे, पिंपरी-चिंचवड सह जिल्ह्यातून ५ हजार हून अधिक समाज बांधव उपस्थित होते. 

श्रीराम कथा आणि वर्तमानात प्रभू श्रीरामांच्या जीवनातील मूल्यांचे महत्व अत्यंत सोप्या शब्दात मांडत तरुणाईला धर्माशी जोडण्याचा प्रयत्न या कार्यक्रमातून करण्यात आला आहे. कार्यक्रमाच्या सुरुवातीला रामनामाचा जयघोष करण्यात आला. तर, रामा रामा रटते रटते…बिती रे उमरिया, जो सुख पायो राम भजन मै, बोलो जय हनुमान यांसह विविध गीतांच्या सादरीकरणाने सूरमयी प्रारंभ झाला. कविता तिवारी यांनी कार्यक्रमाचे निवेदन केले. 

डॉ. कुमार विश्वास म्हणाले, समुद्रमंथनाच्या सुरुवातीला ‘विष’ बाहेर आले. त्याप्रमाणे आजच्या काळात सुरुवातीला प्रत्येकाला विषरुपी अपमानाला सामोरे जावे लागते. त्यानंतरच आपल्याला प्रतिभारूपी गाय म्हणजे ‘कामधेनू’ प्राप्त होते. त्यानंतर हळूहळू आपल्या संकल्पाना गती देणारा ‘उच्चैश्रवा’हा घोडा मिळतो. त्यावर बसून संघर्ष करणा-या आणि दृष्ट्या भावाने जगाकडे पाहणा-या व्यक्तीस ‘ऐरावत’ हत्ती मिळतो. 

ते पुढे म्हणाले, अशा यशस्वीतेच्या हत्तीवर बसून मार्गक्रमण करताना जग आपल्या कपाळावर ‘कौस्तुभ मणी’ रुपी विजय तिलक लावते. त्यानंतर आपण जी इच्छा मागू, ती पूर्ण करणारा ‘कल्पवृक्ष’ आपल्याला प्राप्त होतो. याच वेळी अनेकदा अप्सरा रुपी असलेली ‘रंभा’वासनेच्या रूपात येण्याची शक्यता देखील असते. त्या अप प्रवृत्तीवर विजय मिळविला, तर ‘लक्ष्मी’ माता आपल्यावर प्रसन्न होते आणि ‘चंद्र’ शीतलतेच्या माध्यमातून विराजमान होतो. त्याचवेळी आपल्या विजयाचा घोष ‘पांचजन्य’ च्या माध्यमातून जगात दुमदुमतो. अंतिम टप्प्यात जगातील दु;खावर उपचार करणारा ‘धन्वतरी’ प्राप्त होतो आणि शेवटी ‘अमृत’ मिळवून आपण मृत्यूनंतरही जिवंत राहतो, हे समुद्रमंथन, १४ रत्ने आणि मानवी जीवनातील संबंधाचे सार आहे. 

पुण्यामध्ये गणेशोत्सवात आनंद व दु:खाचा मिलाफ हीच खरी आस्था 

गणेशोत्सवात पुण्यामध्ये मातीच्या गणपतीचे आगमन होते, त्यानंतर उत्साहात पूजन आणि विसर्जन होते. यावेळी आगमन होताना पुणेकरांच्या चेह-यावर आनंद असतो आणि विसर्जनाच्या वेळी पाणावलेल्या डोळ्यांच्या कडा दिसतात, तेथे दु:ख असते. त्यामुळे पुण्यात आस्था प्रत्येकामध्ये दिसून येते. लोकमान्य टिळकांनी तुरुंगामध्ये गीतारहस्य सारखा ग्रंथ लिहिला. त्यांच्यामध्ये महत्वाकांक्षा होतो. ती ठेवणे चुकीचे नाही, मात्र त्यामागे वेडे होणे चुकीचे आहे. महत्वाकांक्षा अमृत आहे, तर त्यातून काहीतरी मिळविण्याची हावरटपणाची वृत्ती ही विष आहे. हेच आजच्या युवकांना अध्यात्माद्वारे पोहोचविण्याचा आमचा प्रयत्न आहे. 

मानवता, बंधुभावाचा विचार समाजाला सक्षम बनवेल-परमवीर चक्र विजेते योगेंद्रसिंग यादव

पुणे : “मानवता, बंधुभावाचा विचार समाजाला सक्षम बनवतो. समाजातील प्रत्येकाने कर्तव्य हाच धर्म मानून मानवी कल्याणाचे काम केले, तर देशात, समाजात शांततेचे वातावरण नांदेल. जीवनात यशस्वी होण्यासाठी ध्येयनिश्चिती व त्याच्या पूर्तीसाठी कर्तव्यनिष्ठा, कठोर परिश्रम आणि सातत्यपूर्ण प्रयत्नांची जोड उपयोगी ठरते,” असे मत  कारगिलच्या लढ्यातील शौर्याबद्दल १९ व्या वर्षी परमवीर चक्र हा सर्वोच्च पुरस्कार मिळवलेल्या ग्रेनेडीयर योगेंद्रसिंग यादव यांनी व्यक्त केले. तरुणाईने तंत्रज्ञानाच्या आहारी न जाता त्याचा गरजेपुरता चांगला वापर करायला हवा, असे आवाहनही त्यांनी केले. 
सामाजिक जाणीवेतून वैभव सुनंदा पंडित वाघ लिखित व न्यू ईरा पब्लिशिंग हाऊस प्रकाशित ‘#व्हायरल_माणुसकी’, निगेटिव्ह काळातील पॉजिटीव्ह गोष्ट पुस्तकाचे प्रकाशन योगेंद्रसिंग यादव यांच्या हस्ते झाले. प्रसंगी न्यू ईरा पब्लिशिंग हाऊसचे संचालक शरद तांदळे, वैभव वाघ आदी व्यासपीठावर उपस्थित होते. कोरोनाच्या काळात आपल्या जीवाची पर्वा न करता अनेक लोकांना सर्व प्रकारची मदत करणाऱ्या योद्ध्यांची कथा वाघ यांनी या पुस्तकातून मांडली आहे. प्रसंगी या लढवय्यांच्या पाठीशी खंबीरपणे उभ्या राहणाऱ्या त्यांच्या मातांचा, तसेच कोरोना काळात कार्यरत विविध संस्थांचा सन्मान यादव यांच्या हस्ते करण्यात आला.
योगेंद्रसिंग यादव म्हणाले, “शिवाजी महाराजांच्या पावन भूमीवर येणे, हे माझे भाग्य समजतो. कोरोना काळात वाघ यांनी केलेले कार्य कौतूकास्पद आहे. आपल्या आयुष्यात आईला अनन्यसाधारण महत्व आहे. आईच आपल्याला जीवन जगत असताना प्रेरित करते. भारत देशाला आपण माता संबोधतो. आईच्या प्रेरणेतून हे कार्य करण्याची ऊर्जा वाघ आणि त्यांच्या सहकाऱ्यांना मिळाली. वाघ यांनी आपल्या सामाजिक जाणिवेतून समाजाप्रती कर्तृत्वाचे जबाबदारीचे, केलेल्या कार्याचे शब्दांमधून बंधुतेचे, मानवतेचे उत्तम दर्शन घडवले आहे.”
“मानवता हाच धर्म समजून आपले कर्तव्य पार पाडले पाहिजे. मानवतेचे कल्याण व आपल्या संस्कृतीचे संरक्षण करायचे असेल, तर आपण सर्वानी एकत्र येऊन समाजाप्रती असणारी कर्तव्ये, भारतीय संस्कृती प्रत्येक भारतीयांमध्ये रुजवायला हवीत. जीवनात यशस्वी व्हायचे असेल स्वतःला एक सूत्रामध्ये बांधायला हवे. भारतीय म्हणून संरक्षण करायचे असेल, तर प्रत्येकाला सैन्यात जायची गरज नाही. आपण आपली सामाजिक कर्तव्ये पार पाडूनही राष्ट्रभक्ती करता येते,” असेही योगेंद्रसिंग यादव म्हणाले.
योगेंद्रसिंग यादव पुढे म्हणाले, “देशाची प्रगती साधायची असेल, तर शांतता प्रस्थापित करणे आवश्यक आहे. सामाजिक शांततेप्रमाणे वैयक्तिक शांतताही महत्वाची आहे. जीवनात यशस्वी व्हायचे, तर स्वप्न बघा, ती पूर्ण करण्यासाठी प्रयत्नशील राहा. प्रत्येक गोष्टीकडे सकरात्मकतेच्या दृष्टीने पाहायला हवे. नकारात्मक विचार दूर ठेवून स्वतःला आत्म्याशी जोडून घ्यावे. नैराश्यातून बाहेर येण्यास ‘#व्हायरल_माणुसकी’ हे पुस्तक उपयुक्त ठरते. तंत्रज्ञानाची माहिती असणे आवश्यक आहे. परंतु त्याचा अत्याधिक वापर आपल्यासाठी घातक आहे, हे समजायला हवे. जेव्हा आपण एखाद्या अधिकाराविषयी बोलतो तेव्हा त्यासोबतच येणाऱ्या कर्तव्यांची जाण असायला हवी. ध्येयपूर्तीसाठी उद्दिष्ट, आवड आणि प्रयत्न करत रहाणे आवश्यक आहे.”
वैभव वाघ म्हणाले, “कोरोना काळातील चळवळीतून ‘#व्हायरल_माणुसकी’ पुस्तकाची सुरुवात झाली. आज अनेकदा युवा पिढी नैराश्याने ग्रासलेली दिसते. हेच नैराश्य दूर करायचे असेल, तर प्रत्येक गोष्टीकडे सकारात्मकतेने पाहावे. या दोन वर्षांच्या कठीण काळातील नकारात्मक वातावरणात घडलेल्या अनेक सकारात्मक गोष्टींचा हा लेखाजोखा आहे. कोरोना काळात जीवाची पर्वा न करता अनेक योद्ध्यांनी केलेल्या कार्याची कथा यातून मांडली आहे.”
सूत्रसंचालन प्रसाद भारदे यांनी केले. शरद तांदळे यांनी आभार मानले.

उच्च व तंत्रशिक्षण मंत्री चंद्रकांतदादा पाटील यांची कर्वेनगर येथे उपस्थिती

पुणे दि.१६- प्रधानमंत्री नरेंद्र मोदी यांनी विकसित भारत संकल्प यात्रेद्वारे दुरदृश्य प्रणालीच्या माध्यमातून देशातील नागरिकांशी संवाद साधला. राज्याचे उच्च व तंत्रशिक्षण मंत्री चंद्रकांतदादा पाटील यांनी कर्वेनगर चौक येथे उपस्थित राहून या कार्यक्रमात सहभाग घेतला.

कार्यक्रमाला खासदार प्रकाश जावडेकर, माजी महापौर मुरलीधर मोहोळ, पुणे महानगरपालिकेचे आयुक्त विक्रम कुमार, उपायुक्त नितीन उदास आदी उपस्थित होते.

मंत्री श्री.पाटील यांनी यात्रेबद्दल अधिकाऱ्यांकडून माहिती घेतली. केंद्र शासनाच्या विविध कल्याणकारी योजनांचा लाभ सामान्य गरजू नागरिकांना देण्यासाठी योजनांची माहिती अधिकाधिक नागरिकांपर्यंत पोहीचवावी, अशा सूचना त्यांनी दिल्या. यात्रेच्या माध्यमातून अनेक नागरिकांना लाभ होत असल्याबद्दल त्यांनी समाधान व्यक्त केले.

विधान परिषदेच्या उपसभापती डॉ.नीलम गोऱ्हे यांच्या हस्ते ‘पुणे पुस्तक महोत्सवा’चे उद्घाटन

पुणे दि.२३: विधान परिषदेच्या उपसभापती डॉ.नीलम गोऱ्हे यांच्या हस्ते आणि उच्च व तंत्रशिक्षण मंत्री चंद्रकांतदादा पाटील यांच्या प्रमुख उपस्थितीत भारत सरकारचे शिक्षण मंत्रालय आणि राष्ट्रीय पुस्तक न्यास तर्फे आणि महाराष्ट्र शासन, सावित्रीबाई फुले पुणे विद्यापीठ आणि पुणे महानगरपालिकेच्या सहकार्याने आयोजित पुणे पुस्तक महोत्सवाचे उद्घाटन करण्यात आले. पुस्तक महोत्सवाच्या आयोजनाने सांस्कृतिक, शैक्षणिक राजधानी म्हणून पुण्याची मान उंचावली आहे, अशा शब्दात डॉ. गोऱ्हे यांनी आयोजनाबद्दल समाधान व्यक्त केले.

कार्यक्रमाला राष्ट्रीय पुस्तक न्यासचे अध्यक्ष मिलिंद मराठे, संचालक कर्नल युवराज मलिक, महानगरपालिका आयुक्त विक्रम कुमार, अतिरिक्त आयुक्त विकास ढाकणे, विद्यापीठाचे कुलगुरू डॉ. सुरेश गोसावी, माजी महापौर मुरलीधर मोहोळ, डेक्कन शिक्षण संस्थेचे अध्यक्ष शरद कुंटे, शहीद भगतसिंह यांचे पणतू यादवेंद्रसिंग संधू, पुणे पुस्तक महोत्सवाचे मुख्य संयोजक राजेश पांडे आदी उपस्थित होते.

पुणे पुस्तक महोत्सवासारखा जनतेचा सोहळा इतरत्र पाहिला नसल्याचे नमूद करून डॉ.गोऱ्हे म्हणाल्या, पुस्तक प्रदर्शनाच्या निमित्ताने पुस्तकांशी संवाद घडतो. पुस्तक मार्गदर्शन करतात, सांत्वन करतात, विचार देतात, समाजातील एकोपा वाढवितात. त्यामुळे पुस्तक वाचनाला प्रोत्साहन देणे गरजेचे आहे. उदारीकरणाचा फायदा मध्यमवर्गाला होत असल्याने शिक्षणाचे प्रमाणही वाढत आहे. मात्र, डिजिटल माध्यमांमुळे वाचन संस्कृतीला धक्का पोहोचतो आहे, असेही त्या म्हणाल्या.

मंत्री श्री.पाटील म्हणाले, वाचन संस्कृती रुजविण्यासाठी आणि पुण्याच्यादृष्टीनेही महत्वाचा असा हा पुस्तक महोत्सव आहे. महोत्सवात प्रधानमंत्री नरेंद्र मोदी यांनी लिहिलेले ‘एक्झाम वॉरियर्स’ हे पुस्तक विद्यार्थी आणि पालकांना मोफत देण्यात येणार आहे. चांगल्या गोष्टींमध्ये सहभाग ही पुण्याची संस्कृती असल्याने महोत्सवाला चांगला प्रतिसाद लाभेल, असा विश्वास त्यांनी व्यक्त केला.

श्री.मराठे म्हणाले, पुणे पुस्तक महोत्सव साहित्य , कला आणि खाद्य संस्कृतीचा महोत्सव असून २४ डिसेंबरपर्यंत चालणार आहे. ग्रंथ चळवळीशी संबंधित सर्व घटकांना एका ठिकाणी आणून ही चळवळ पुढे नेण्याचा प्रयत्न आहे. भांडारकर संशोधन संस्थेतील ज्ञानभांडार अनुवादित करून देशभरात पोहोचविण्याचा प्रयत्न राष्ट्रीय पुस्तक न्यास करेल, असे त्यांनी सांगितले.

श्री.संधू म्हणाले, शहीद भगतसिंग यांनी ‘मेरा रंग दे बसंती चोला’ हे गीत लिहिल्यावर महाराष्ट्र आणि त्यांच्या कुटुंबाचे नाते जोडले गेले. त्यांनी कारागृहात असताना शंभरपेक्षा अधिक पुस्तकांचे वाचन केले. त्यांनी लिहिलेली जेल डायरी पुणेकरांना पाहता यावी यासाठी महोत्सवात ठेवण्यात येत आहे. या डायरीच्या दर्शनाने युवकांना प्रेरणा मिळेल, असा विश्वासही त्यांनी व्यक्त करतानाच पुणे पुस्तकांचे केंद्र म्हणून ओळखले जावे अशी अपेक्षा त्यांनी व्यक्त केली.

राष्ट्रीय पुस्तक न्यासचे संचालक श्री.मलिक म्हणाले, देशातील कोणत्याच पुस्तक महोत्सवात स्थापित झाले नाहीत असे चार विश्वविक्रम पुण्याच्या महोत्सवात होत आहे. पुण्याला जगातील पुस्तकांची राजधानी म्हणून स्थापित करण्यात राष्ट्रीय पुस्तक न्यास सहकार्य करेल असे त्यांनी सांगितले. महोत्सवासाठी राज्य शासनाचे विशेष सहकार्य मिळल्याचेही ते म्हणाले.

कार्यक्रमाचे प्रास्ताविक श्री.पांडे यांनी केले. पुस्तक प्रदर्शनातील २५० दालनात २० पेक्षा अधिक भाषांमधील २० लाख पुस्तके उपलब्ध आहे. महोत्सवात १०० पुस्तकांचे प्रकाशन होणार आहे. अनेक सांस्कृतिक कार्यक्रमांची मेजवानी रसिकांना या महोत्सवाच्या माध्यमातून मिळणार आहे.

श्री. संधू यांच्या हस्ते ‘हिंदवी स्वराज्य स्थापना- शिवराय छत्रपती झाले’ या पुस्तकाचे प्रकाशन करण्यात आले. ही पुस्तके महोत्सवाला भेट देणाऱ्या विद्यार्थ्यांना भेट देण्यात येणार आहे. पहिल्याच दिवशी सकाळपासून १० हजार पुस्तक प्रेमींनी प्रदर्शनाला भेट दिली.

कार्यक्रमपूर्वी विद्यापीठाच्या परदेशी विद्यार्थ्यांनी त्या-त्या देशाचे नृत्य आणि संगीत सादर केले. पुस्तक महोत्सवाच्या निमित्ताने प्रधानमंत्री नरेंद्र मोदी यांनी लिहिलेले ‘एक्झाम वॉरियर्स’ या १८ हजार ७५१ पुस्तकांनी ‘जयतू भारत’ हे जगातील पुस्तकांनी बनलेले सर्वात मोठे वाक्य बनवून विश्वविक्रम साकार करण्यात आला. यापूर्वीचा विक्रम ११ हजार १११ पुस्तकांचा असल्याचे यावेळी सांगण्यात आले.

गिनीज वर्ल्ड रेकॉर्डचे स्वप्नील डांगोरीकर यांनी याबद्दलचा निकाल जाहीर केला व आयोजकांना प्रमाणपत्र प्रदान करण्यात केले.
000

पुणे : जोहर बाहरू- मलेशिया येथे झालेल्या आशियाई पॉवरलिफ्टिंग स्पर्धेत पुण्याच्या शर्वरी इनामदार यांनी स्ट्रॉंग वुमन ऑफ एशिया किताब पटकावला.  १३४ किलोच्या आशियाई स्कॉट रेकॉर्ड सह ३५६.५ किलो एकूण वजन उचलत  शर्वरी इनामदार यांनी भारतासाठी विजयश्री खेचून आणली.

कझाकिस्तान, जपान, चायना, कुवेत, मंगोलिया, पाकिस्तान, कतार, फिलिपिन्स, इंडोनेशिया, हॉंगकॉंग, सिंगापूर, श्रीलंका, ऑस्ट्रेलिया, थायलंड इत्यादी २६ देशांचे सुमारे ४५० स्पर्धक सहभागी झाले होते.  

बेस्ट लिफ्टर होण्यासाठी त्यांना ऑस्ट्रेलियाची फाम थाओ आणि हॉंगकॉंगची जेनिफर मेकॉंमबी यांच्याशी कडवी झुंज द्यावी लागली. महिलांच्या ५७ किलो वजनी गटात सुवर्णपदकासह त्यांनी मानाचा “स्ट्रॉंग वुमन एशिया” हा किताबही पटकावला. २०२३ मधील क्लासिक व इक्विप्ड या दोन्ही वर्ल्ड चॅम्पियनशिप जिंकल्यानंतर लगेचच झालेल्या या आशियाई स्पर्धेत त्यांनी आपले निर्विवाद वर्चस्व टिकवून ठेवले. आशियाई रेकॉर्ड, टोटलचे गोल्ड मेडल, स्कॉट गोल्ड मेडल, डेडलिफ्ट सिल्व्हर मेडल, बेंचप्रेस सिल्व्हर मेडल, “स्ट्रॉंग वुमन ऑफ एशिया” टायटल असे चौफेर यश मिळवत त्यांनी स्पर्धा गाजवली. “आहार “आयुर्वेद क्लिनिक व “कोड ब्रेकर” जिम च्या संचालिका डॉ. शर्वरी यांचे या अतुलनीय कामगिरीसाठी सर्वत्र कौतुक होत आहे. आपले कुटुंबीय, आप्तेष्ट व देशासाठी खेळण्याची जिद्द यामुळे सतत न थकता प्रयत्न करण्याची ऊर्जा मिळते असे त्यांनी सांगितले.

पुणे- १०० कारवायात साडेसहाशे आरोपींना मकोका चा झटका दिल्यानंतर आता पुण्याचे पोलीस आयुक्त रितेश कुमार यांनी हे शतक पार करत मकोका ची १०१ वी कारवाई पूर्ण केली आहे. धायरीगाव चा नितीन दत्तात्रय रणझुंजार (टोळी प्रमुख) व त्याचे इतर दोन साथीदार यांचेवर मकोका कारवाई करण्यात आल्याची माहिती पोलिसांनी येथे दिली आहे.
या संदर्भात पोलिसांनी सांगितले कि,’ दिनांक २८/११/२०२३ रोजी फिर्यादी यांचे अंबाईमाता मंदीराजवळ धायरी पुणे येथील दुचाकी व चारचाकी वाहनाचे गॅरेज व वॉशिंग सेंटर असुन त्याठिकाणी असलेल्या बिल्डींग बांधकामाच्या वादातुन टोळी प्रमुख आरोपी नामे नितीन दत्तात्रय रणझुंजार व त्याचे टोळीतील त्याचे साथीदार नामे १. किरण युवराज भिलारे वय २१ वर्षे, रा. सई बिल्डींगच्या मागे, प्लॉट नं.०१, जय महाराष्ट्र मंडळ चव्हाटा, मारुती मंदिराजवळ, धायरी पुणे व २. हर्षद नामदेव खोमणे, वय २३ वर्षे, रा. भैरवनाथ मंदीरामागे, नाईक आळी, नं ३६ धायरी, पुणे यांनी दुचाकी वरुन येवुन गॅरेजमध्ये घुसुन तेथे असलेल्या वॉचमनला धारदार हत्याराने जीवे ठार मारण्याचा प्रयत्न केला व त्यांचे कुटुंबास धारदार हत्याराचा धाक दाखवुन गॅरेजच्या शेड मध्ये लावलेल्या सहा दुचाकी वाहनांना व चार चारचाकी वाहनाना पेट्रोल ओतुन आग लावुन गॅरेज परिसरात पार्क केलेल्या इतर सहा वाहनांचे काचा फोडुन नुकसान केले. तसेच गॅरेजच्या ऑफिसची काच फोडुन आत मध्ये प्रवेश करुन सर्व सामानाची तोडफोड करुन टेबलच्या ड्रॉवरमध्ये ठेवलेला एक सॅमसंग कंपनीचा मोबाईल व एक टॅब तसेच ड्रॉवर मध्ये ठेवलेले ४ हजार रुपये आणि टेबलावरील एक सीपीयु ची जबरी चोरी करुन हातातील धारदार शस्त्र हवेत फिरवुन मी एक मर्डर करुन जेलमधुन बाहेर आलो आहे, असे म्हणुन परीसरात दहशत पसरविण्याचा प्रयत्न केला. त्याबाबत फिर्यादी यांनी दिलेल्या फिर्यादीवरुन सिंहगड रोड पोलीस स्टेशन येथे गु.र.नं. ५८१/२०२३ भादवि कलम ३९७,४३५,५०६(२),३४ क्रिमीनल अमेन्टमेंट अॅक्ट कलम ७, आर्म अॅक्ट कलम ४ (२५) सह मुंबई पोलीस अॅक्ट कलम ३७(१) सह १३५ प्रमाणे गुन्हा दाखल करण्यात आला आहे.
दाखल गुन्ह्याचा तपासादरम्यान आरोपी नामे १) नितीन दत्तात्रय रणझुंजार, वय ३३ वर्षे,रा.२७८, नाईक आळी, भैरवनाथ मंदिराजवळ, धायरीगाव, पुणे (टोळी प्रमुख) २) किरण युवराज भिलारे वय २१ वर्षे, रा. सई बिल्डींगच्या मागे, प्लॉट नं.०१, मारुती मंदिराजवळ, धायरी पुणे व ३) हर्षद नामदेव खोमणे, वय २३ वर्षे, रा. भैरवनाथ मंदीरामागे, नाईक आळी, धायरी, पुणे यांना अटक करण्यात आली असुन सध्या जेलमध्ये आहेत.
नमुद आरोपी नितीन दत्तात्रय रणझुंजार, वय ३३ वर्षे, रा.२७८, नाईक आळी, भैरवनाथ मंदिरा जवळ, धायरीगाव, पुणे (टोळी प्रमुख) याने स्वतःचे तसेच टोळीचे वर्चस्व निर्माण व्हावे व अवैध मार्गाने इतर फायदा व्हावा म्हणुन संयुक्तपणे संघटीत गुन्हेगारी कृत्य करणार गट तयार केला. असुन टोळी प्रमुख याचेवर मागील १० वर्षामध्ये खुन, मृत्यु किंवा जबर दुखापत घडवुन आणण्याचा प्रयत्नासहित जबरी चोरी किंवा दरोडा, जबरी चोरी, बलाद्ग्रहण करण्यासाठी क्षती पोहाचविण्याची भिती घालणे, किंवा भिती घालण्याचा प्रयत्न करणे, मालमत्तेचे नुकसान करण्याच्या उद्देशाने स्फोटक पदार्थाने आग लावणे अशा प्रकारचे गंभिर गुन्हे केले आहेत, टोळी प्रमुख याने आपले वर्चस्व सिंहगड रोड, दत्तवाडी पोलीस स्टेशन या परिसरामध्ये प्रस्थपित व्हावे, दहशत निर्माण व्हावी व आर्थिक फायदा व्हावा यासाठी आपल्या संघटीत टोळीच्या वतीने एकट्याने व टोळीतील सदस्यांनी संयुक्तपणे दहशत पसरवून ते आपली चेनबाजी, शोकबाजी करीत आहेत.

त्याच्या टोळीच्या अशा कृत्यामुळे सदर परिसरात सार्वजनिक सुव्यवस्थेस बाधा निर्माण झालेली आहे. त्याचेवर वेळोवेळी प्रतिबंधक कारवाई करुन देखील त्यांनी पुन्हा पुन्हा गंभिर स्वरुपाचे गुन्हे केले आहेत.
नमुद गुन्हयाच्या तपासादरम्यान टोळी प्रमुख व त्याचे साथीदार यांनी संघटीतपणे दहशतीचे मार्गाने स्वताःचे टोळीचे फायदयासाठी प्रस्तुत गुन्हा केला असल्याचे दिसुन आलेने प्रस्तुत गुन्हयास महाराष्ट्र संघटित गुन्हेगारी नियंत्रण कायदा सन १९९९ चे कलम ३ (१) (ii), ३ (२), ३ (४) चा अंतर्भाव होण्यासाठी सिंहगड रोड पोलीस स्टेशनचे वरिष्ठ पोलीस निरीक्षक अभय महाजन व पोलीस निरीक्षक, गुन्हे जयंत राजुरकर यांनी मा. पोलीस उप आयुक्त परि ३, पुणे शहर सुहेल शर्मा, यांचे मार्फतीने अपर पोलीस आयुक्त पश्चिम प्रादेशिक विभाग, पुणे प्रविणकुमार पाटील, यांना सादर केला होता.
सदर प्रकरणाची छाननी करुन सिंहगड रोड पोलीस स्टेशन येथे गु.र.नं.५८१/२०२३ भादवि कलम ३९७,४३५,५०६(२),३४ क्रिमीनल अमेन्टमेंट अॅक्ट कलम ७, आर्म अॅक्ट कलम ४(२५) सह मुंबई पोलीस अॅक्ट कलम ३७(१) सह १३५ अन्वये दाखल असलेल्या गुन्ह्यामध्ये महाराष्ट्र संघटित गुन्हेगारी नियंत्रण कायदा सन १९९९ चे कलम ३ (१) (ii) ३(४) चा अंतर्भाव करण्याची मा.अपर पोलीस आयुक्त, पश्चिम प्रादेशिक विभाग, पुणे प्रविणकुमार पाटील, यांनी मान्यता दिलेली आहे.
दाखल गुन्ह्याचा पुढील तपास सहा. पोलीस आयुक्त सिंहगड रोड विभाग पुणे अप्पासाहेब शेवाळे, हे करीत आहेत.
सदरची कामगिरी पोलीस आयुक्त रितेश कुमार, अपर पोलीस आयुक्त, गुन्हे शाखा, पुणे, (पोलिस सह आयुक्त अतिरिक्त कार्यभार) श्री. रामनाथ पोकळे मा. अपर पोलीस आयुक्त, पश्चिम प्रादेशिक विभाग, पुणे शहर श्री. प्रविणकुमार पाटील, मा. पोलीस उप आयुक्त, परि.३, पुणे शहर, श्री. सुहेल शर्मा, मा. सहाय्यक पोलीस आयुक्त, सिंहगड रोड विभाग, पुणे शहर श्री. अप्पासाहेब शेवाळे, यांनी दिलेल्या सुचनांप्रमाणे वरिष्ठ पोलीस निरीक्षक, सिंहगड रोड पोलीस स्टेशनचे अभय महाजन, पोलीस निरीक्षक (गुन्हे) जयंत राजुरकर, यांचे मार्गदर्शनाखाली सपोनि प्रविण जाधव यांचेसह सव्र्व्हेलन्स पथकाचे पोउनि गणेश
मोकाशी, स्मित चव्हाण, प्रथमेश गुरव यांनी केली आहे.
पोलीस आयुक्त, रितेश कुमार यांनी पोलीस आयुक्तालयाचा कार्यभार स्विकारल्या नंतर गुन्हेगारी नियंत्रणावर बारकाईन लक्ष देवुन, शरिराविरुध्दचे व मालमत्तेविरुध्द गुन्हे करणारे व समाजा मध्ये दहशत निर्माण करणारे सराईत गुन्हेगार यांचे हालचालीवर बारकाईने लक्ष ठेवुन, गुन्हेगारीचे समुळ उच्चाटन होईल यावर भर देण्याबाबत सर्व पोलीस अधिकारी व अंमलदार यांना निर्देश देण्यात आले आहेत. त्यांचे मार्गदर्शनाखाली मोक्का अंतर्गत केलेली ही १०१ वी कारवाई आहे.

आता पर्यंत एकूण ६४९ आरोपीवर मकोका अंतर्गत कारवाई

पुणे – पोलीस आयुक्त रितेश कुमार यांनी कार्यभार स्वीकारल्या नंतरची मकोका अंतर्गत १०० वी कारवाई केली आहे.
सौरभ शरद शिंदे (टोळी प्रमुख) व त्याचे इतर ४ साथीदार यांचे वरील मकोका कारवाई हि १०० वी कारवाई ठरली आहे.
या संदर्भात पोलिसांनी सांगितले कि,’दि.०८/११/२०२३ रोजी कुसळकर किराणा मालाचे दुकानाचे गल्लीतुन आत, तीन मंदिराचे मोकळ्या मैदानात, अप्पर बिबवेवाडी, पुणे. येथे यातील फिर्यादी यांचा मुलगा हा रात्रौ १२.३० वा चे सुमारास जेवण करुन घरी परत येत असताना त्याचे ओळखीचे आरोपी नामे १) सौरभ शिंदे, २) तेजस जगताप, ३) चंदर राठोड, ४) अनिकेत काटकर व ५) पंकज दिवेकर सर्व अप्पर बिबवेवाडी पुणे यांनी आपआपसात संगनमतकरुन फिर्यादी यांचा मुलास पकडुन त्यास कुसळकर किराणा मालदुकानाचे गल्लीतुन आत तीन मंदिराचे मोकळ्या मैदानात अप्पर बिबवेवाडी येथे घेवुन जावुन पुर्वी झालेल्या वादावरुन सदर आरोपींनी त्यांच्या कडील लोखंडी रॉड व बांधकामासाठी वापरण्यात येणारी लाकडाची फळीने त्याचे दोन्ही हाताचे मनगटावर, दोन्ही पायाचे गुडघा व नडग्यांवर, पोटावर व डोक्यात वार करुन गंभीर जखमी करुन त्यास जिवे ठार मारण्याचा प्रयत्न केला. म्हणुन फिर्यादी यांनी दिलेल्या फिर्यादी वरुन बिबवेवाडी पोलीस स्टेशन येथे
गु.र.नं. २३९/२०२३, भा.दं. वि. कलम ३०७,३२३,१४३,१४७,१४८,१४९, महाराष्ट्र पोलीस अधि. कलम ३७ (१) सह १३५ अन्वये गुन्हा दाखल करणेत आला आहे.
दाखल गुन्हयांचे तपासा दरम्यान आरोपी नामे १) तेजस शंकर जगताप, वय २० वर्षे, रा. बी/३५/१२, अप्परइंदिरानगर, बिबवेवाडी, पुणे. (टोळी सदस्य) २) अनिकेत सुधीर काटकर, वय २२ वर्षे, रा. बी/३६/०३, अप्पर इंदिरानगर बिबवेवाडी, पुणे. (टोळी सदस्य) यांना दाखल गुन्हयात अटक करण्यात आली असुन ते सद्या येरवडा जेल पुणे येथे आहेत. तसेच आरोपी नामे १) सौरभ शरद शिंदे वय २२ वर्षे, रा.बी ३५/१२ अप्परइंदिरानगर बि. वाडी पुणे. (टोळी प्रमुख) २) चंदर उन्नप्पा/हुन्नप्पा राठोड, वय २२ वर्षे, रा. चैत्रबन वसाहत, बिबवेवाडी पुणे. (टोळी सदस्य) व ३) पंकज संजय दिवेकर वय १९ वर्षे, रा. स.नं. ६४९, गणपतीमंदिरा जवळ, खडकेवस्ती, अप्पर बिबवेवाडी पुणे (टोळी सदस्य) हे सदर गुन्हयामध्ये WANTED आरोपी आहेत.
आरोपी सौरभ शिंदे (टोळी प्रमुख) याने टोळीमधील वरील सदस्यांना बरोबर घेवुन दखलपात्र गुन्हा करुन, टोळीची दहशत व वर्चस्व निर्माण करुन, त्यायोगे बेकायदेशीर मार्गाने स्वतःसाठी अथवा टोळीतील अन्य सदस्यांसाठी अवैध मार्गाने आर्थिक फायदा मिळविण्याच्या उद्देशाने संघटीत गुन्हेगारी संघटनेचा प्रमुख म्हणुन किंवा संघटनेच्या वतीने एकट्याने किंवा संयुक्तपणे, हिंसाचाराचा वापर करुन किंवा हिंसाचाराची धमकी देवुन किंवा जुलुग जबरदस्ती करुन किंवा अन्य अवैद्य मार्गाने बेकायदेशीर खुनाचा प्रयत्न, गंभीर दुखापत, मारामारी, बेकायदेशीर घातक शस्त्रे जवळ बाळगणे, दरोडा या गुन्हयाद्वारे सर्वसामान्य जनतेमध्ये दहशत निर्माण केली असुन, असे गंभीर स्वरुपाचे गुन्हे त्याने संघटीतपणे केले आहेत. यातील नमुद आरोपी यांचे विरुध्द वेळोवेळो प्रतिबंधात्मक कारवाई करुन देखील त्यांनी पुन्हा पुन्हा गंभीर स्वरुपाचे गुन्हे केलेले आहेत.

यातील आरोपी यांनी संघटीत पणे दहशतीच्या मार्गाने स्वतःच्या आर्थिक फायदयाकरीता सदरचा गुन्हा केल्याचे दिसुन आल्याने प्रस्तुत गुन्हयास महाराष्ट्र संघटित गुन्हेगारी नियंत्रण कायदा १९९९ चे कलम ३(१) (ii),३(२), ३(४)प्रमाणे अंतर्भावकरणे कामी. वरिष्ठ पोलीस निरीक्षक, बिबवेवाडी पोलीस स्टेशन, पुणे शहर, श्रीमती सविता ढमढेरे यांनी पोलीस उप आयुक्त परिमंडळ ०५, पुणे शहर, श्री. आर. राजा यांचे मार्फतीने अपर पोलीस आयुक्त पुर्व प्रादेशिक विभाग, पुणे शहर रंजनकुमार शर्मा यांना प्रस्ताव सादर केला होता.
सदर प्रकरणाची छाननी करून बिबवेवाडी पोलीस ठाणे, गुन्हा नोंदक्र.२३९/२०२३ भा.दं. वि. कलम ३०७,३२३,१४३,१४७,१४८,१४९, महाराष्ट्र पोलीस अधि. कलम ३७ (१) सह १३५ अन्वये दाखल असलेल्या गुन्हयांत महाराष्ट्र संघटित गुन्हेगारी नियंत्रण कायदा १९९९ चे कलम ३(१) (ii), ३ (२), ३ (४) प्रमाणेचा अंतर्भाव करण्याची अपर पोलीस आयुक्त पुर्व प्रादेशिक विभाग, पुणे शहर रंजनकुमार शर्मा यांनी मान्यता दिलेली आहे.
दाखल गुन्हयाचा पुढील तपास सहा. पोलीस आयुक्त, वानवडी विभाग, पुणे शहर, शाहुराजे साळवे, हे करीत आहेत.
सदर कामगिरी पोलीस आयुक्त रितेशकुमार, अपर पोलीस आयुक्त, गुन्हे शाखा, (पोलिस सह आयुक्त अतिरिक्त कार्यभार). रामनाथ पोकळे,अपर पोलीस आयुक्त पूर्व प्रादेशिक विभाग, रंजनकुमार शर्मा,पोलीस उप आयुक्त परि.०५, पुणे शहर, श्री. आर राजा, सहा. पोलीस आयुक्त वानवडी विभाग,. शाहुराजे साळवे यांचे मार्गदर्शनाखाली, बिबवेवाडी पोलीस स्टेशनचे वरिष्ठ पोलीस निरीक्षक, श्रीमती सविता ढमढेरे, पोलीस उप-निरीक्षक बाळु शिरसट, तसेच सर्व्हेलन्स पथकातील पोलीस अंमलदार दैवत शेडगे, अनिल डोळसे व कृष्णा फुले यांनी केली आहे.
पोलीस आयुक्त, रितेशकुमार यांनी पुणे शहर पोलीस आयुक्तालयाचा कार्यभार स्विकारल्यानंतर गुन्हेगारी नियंत्रणावर बारकाईने लक्ष देवुन, शरीराविरुध्द व मालमत्तेविरुध्द गुन्हे करणारे व समाजामध्ये दहशत निर्माण करणारे सराईत गुन्हेगार यांचे हालचालीवर बारकाईने लक्ष ठेवुन, गुन्हेगारीचे समुळ उच्चाटन होईल, यावर भरदेण्याबाबत सर्व पोलीस अधिकारी व अंमलदार यांना निर्देश दिले आहेत. त्यांचे मार्गदर्शनाखाली मकोका अंतर्गत केलेली सन २०२३ या चालू वर्षातीस एकूण १०० वी कारवाई आहे. आता पर्यंत एकूण ६४९ आरोपीवर मकोका अंतर्गत कारवाई करण्यात आलेली आहे.