पुणे :  पी. पी. रॉयल्स आणि आर. आर. स्पार्टन्स संघाने महेश सेवा संघ युवा समितीतर्फे आयोजित न्याती माहेश्वरी फुटबाॅल लीग स्पर्धेत  आपापल्या प्रतिस्पर्ध्यावर मात करून विजयी सलामी दिली. गरवारे महाविद्यालयाजवळील सेंट्रल माॅल मधील फुटबाॅल ग्राऊंड  येथे ही स्पर्धा सुरू आहे. 
सुप्रसिद्ध सनदी लेखापाल ललित पोफलीया व उद्योजक संजय बिहाणी मुख्य प्रायोजक न्याती ग्रुपचे डॉ नितीन न्याती यांच्या उपस्थितीत  स्पर्धेचे उद्घाटन झाले. महेश सेवा संघ युवा समितीचे अध्यक्ष विशाल राठी, सचिव केतन जाजू, रजत दरक, वेदांत कारवा, परम जखोटिया, जय मालपाणी यावेळी उपस्थित होते. 
पहिल्या लढतीत रॉयल्स संघाने एमजेएम ग्लॅडिएटर्स संघावर ४-० ने मात केली. ही लढत अगदीच एकतर्फी झाली. रॉयल्सच्या खेळाडूंनी सुरुवातीपासूनच आक्रमक खेळ केला. लढतीच्या अकराव्या मिनिटाला सर्वेश कारवाने गोल करून रॉयल्स संघाला आघाडी मिळवून दिली. यानंतर लढतीच्या १९व्या मिनिटाला नवल मालपाणीने गोल करून रॉयल्सची आघाडी २-०ने वाढवली. श्रावण राठीने (२१, २५ मि.) एकापाठोपाठ दोन गोल करून रॉयल्सला ४-०ने विजय मिळवून दिला.

दुसऱ्या लढतीत स्पार्टन्स संघाने दुबई एक्स्पर्ट डायनामोज संघावर ४-१ने विजय मिळवला. लढतीच्या दुसऱ्याच मिनिटाला अंकित मुंदडाने गोल करून स्पार्ट्न्स संघाला आघाडी मिळवून दिली. पुढच्याच मिनिटाला अभिनंदन भुतडाने स्वयंगोल केल्याने स्पार्टन्सची आघाडी २-० ने वाढली. लढतीच्या १३व्या मिनिटाला ओंकार राठीने मैदानी गोल करून स्पार्टन्सची आघाडी ३-०ने भक्कम केली. परम जाखोटियाने २३व्या मिनिटाला गोल करून स्पार्टन्सला ४-० अशी आघाडी मिळवून दिली. पुढच्याच सेकंदांत पार्थ लाहोटीने गोल करून डायनामोज संघाचे खाते उघडले. स्पार्टन्सने ४-१ अशी आघाडी अखेरपर्यंत कायम राखून बाजी मारली.
तिसऱ्या लढतीत अक्षत मुंदडा (११ मि.) आणि स्वराज नवंदरच्या (१६ मि.) गोलच्या जोरावर श्री गणेश वॉरिअर्स संघाने एनपीएव्ही निन्जास संघावर २-०ने मात केली.
यानंतर निहार झंवरच्या दोन गोलच्या जोरावर एमजेएम ग्लॅडिएटर्स संघाने मॉवरिक्स  संघावर २-०ने मात केली. यात निहार झंवरने १७व्या मिनिटाला गोल ग्लॅडिएटर्स संघाला आघाडी मिळवून दिली. यानंतर २४व्या मिनिटाला निहारने दुसरा गोल करून संघाला विजयी केले. 

निकाल – श्री गणेश वॉरिअर्स – २ (अक्षत मुंदडा ११ मि., स्वराज नवंदर १६ मि.) वि. वि. एनपीएव्ही निन्जास -०.
पी. पी. रॉयल्स – ४ (सर्वेश कारवा ११ मि., नवल मालपाणी १९ मि., श्रावण राठी २१, २५ मि.) वि. वि. एमजेएम ग्लॅडिएटर्स – ०.
आर. आर. स्पार्टन्स – ४ (अंकित मुंदडा २ मि., अभिनंदन भुतडा स्वयंगोल ३ मि., ओंकार राठी १३ मि., परम जखोटिया २३ मि.) वि. वि. दुबई एक्स्पर्ट डायनामोज – १ (पार्थ लाहोटी २३ मि.)
श्री माव्हरिक्स – ३ (अंकीत झव्हर १७ मि., क्षीतिज लोहिया २२, २५ मि.) वि. वि. ट्रुव्हिव्ह विकिंग्ज – ०.
किअॅक किकर्स – २ (श्रेष्ठ माहेश्वरी १६, २० मि.) – वि. वि. तपाडिया थंडर्स – ०
सीएनजी राठी रॉयल्स- २ (शशांक अटल २० मि., संकेत कारवा २२ मि.) वि. वि. मालपाणी पँथर्स- १ (अर्पित मंत्री ९ मि.)
………
१२ ते १६ वर्षांखालील मुले – एनपीएव्ही निन्जास – २ (दर्श जाजू ७ मि., कियान भन्साली ११ मि.) वि. वि. लारा लान्सर्स – १ (कुंज नवंदर २ मि.).
एबीएल विकिंग्ज – १ (कैरव हेदा १६ मि.) वि. वि. महारथी सटोना -०.

संविधानाच्या कलम 19 चे महापालिकेकडून उल्लंघन; महापालिका आवारात नागरिकांना आंदोलनाचा अधिकार नसल्याचा लावला फलक

पुणे -महानगरपालिकेला भारतीय संविधानाच्या कलम 19 मध्ये सर्वसामान्य नागरिकांसाठी दिल्या गेलेल्या आंदोलनाच्या मौलिक अधिकाराचा विसर पडल्याचे दाखवून देत आम आदमी पक्षाने आज पुणे महानगरपालिकेच्या नवीन इमारती बाहेर आंदोलन करत नागरिकांच्या आंदोलनाचा अधिकार काढून घेणारा फलक लावल्याच्या कृतीचा निषेध करत हा फलक काढून टाकण्याची मागणी केली. पुणे महानगरपालिकेच्या नवीन इमारती च्या प्रवेशद्वारावर महापालिकेतर्फे *भारतीय संविधानाचे जनक
डॉ. बाबासाहेब आंबेडकर यांचा अर्ध पुतळा लावण्यात आला आहे, या पुतळ्यासमोरच महापालिका प्रशासनाकडून महापालिकेच्या आवारात कोणत्याही प्रकारचे आंदोलन केले जाऊ नये अशा प्रकारचा सूचना देणारा फलक लावला होता. वास्तविक पाहता विधानसभा असो किंवा भारतीय संसद अनेक लोकप्रतिनिधी हे सभागृहाच्या पायऱ्यांवर तसेच सभागृहाच्या आवारात निषेध आंदोलन करत असतात. त्याच अनुषंगाने महापालिकेच्या आवारातही निषेध आंदोलन करण्याची परवानगी सर्वसामान्य नागरिकांना तसेच राजकीय पक्षांना मिळाली पाहिजे, जेणेकरून राजकीय पक्ष तसेच सर्वसामान्य नागरिक महापालिका प्रशासनापुढे त्यांना भेडसावणाऱ्या समस्या मांडू शकतात. परंतु असे न होता महापालिकेतील प्रशासनाने महापालिकेत कोणत्याही प्रकारचे राजकीय अथवा सामाजिक आंदोलन करू नये असा फतवा जारी केला होता व तशा आशयाचा फलक महापालिका आवारात लावला होता. याला आम आदमी पक्षाकडून तीव्र आक्षेप घेण्यात आला व अशा प्रकारे बाबासाहेब आंबेडकरांच्या पुतळ्यासमोरच भारतीय संविधानाच्या कलम 19 ची पायमल्ली होत असल्याचे प्रशासनाच्या निदर्शनास आणून दिले तसेच हा फलक तात्काळ काढून टाकावा अशी मागणी केली गेली.

याप्रसंगी आम आदमी पक्षाच्यावतीने मुकुंद किर्दत, सुदर्शन जगदाळे, अमित म्हस्के, सुरेखा भोसले, अक्षय शिंदे, सतीश यादव, ॲड.अमोल काळे, निलेश वांजळे, अमोल मोरे, संजय कोणे,निरंजन अडागळे, ॲनी अनिश, अनिश वर्गीसे, सेंन्थिल अय्यर, प्रीती निकाळजे, ऋषिकेश मारणे, अल्ताफ शेख, शंकर थोरात, सचिन कोतवाल, रवी लाटे,निखिल खंदारे,मिलिंद सरोदे, अनिकेत सोनवणे, शिवराम ठोंबरे, मायकल मस्केरेनस इत्यादी पदाधिकारी व कार्यकर्ते उपस्थित होते.

पुणे, दि. २३:स्वारगेट ते कात्रज मेट्रोचे काम लवकर सुरू करण्याचे नियोजन करावे, या मार्गाला केंद्र शासनाची मान्यता मिळाल्यावर राज्य सरकारच्या हिश्श्यातील निधी त्वरित उपलब्ध करून देण्यात येईल, असे प्रतिपादन उपमुख्यमंत्री अजित पवार यांनी केले.

मेट्रो मार्ग आणि अहमदनगर रस्त्यावरील वाहतूक कोंडीबाबत आयोजित बैठकीत ते बोलत होते. उद्योग मंत्री उदय सामंत, आमदार सुनील टिंगरे, भीमराव तापकीर, पुणे महानगरपालिका आयुक्त विक्रम कुमार, जिल्हाधिकारी डॉ.राजेश देशमुख, पीएमआरडीए आयुक्त राहुल महिवाल, जिल्हा परिषदेचे मुख्य कार्यकारी अधिकारी रमेश चव्हाण, महानगरपालिकेचे अतिरिक्त आयुक्त विकास ढाकणे, महामेट्रोचे संचालक अतुल गाडगीळ आदी उपस्थित होते.

उपमुख्यमंत्री श्री.पवार म्हणाले, स्वारगेट ते कात्रज मेट्रो मार्गासाठी केंद्र शासन स्तरावर आवश्यक मान्यतेसाठी पाठपुरावा करण्यात येईल. या मेट्रो मार्गावरील स्थानके अत्याधुनिक सुविधांनी युक्त करावी. रामवाडी येथून विमानतळापर्यंत मेट्रो लाईन सुविधा देण्याचा विचार व्हावा.

अहमदनगर रस्त्यावरील वाहतूक कोंडी दूर करण्यासाठी तेथील रस्ते आणि पुलांच्या कामांना गती द्यावी. संगमवाडी ते खराडी रस्त्याचे भूसंपादन करण्याची कार्यवाही लवकर करावी. नगररोड परिसरातील अतिक्रमण काढण्याची कार्यवाही करावी. पोलीस विभागाने या भागात वाहतूक कोंडी होणार नाही याची दक्षता घ्यावी, असे निर्देश त्यांनी दिले.

मंत्री श्री.सामंत म्हणाले, नगर रस्त्यावरील खड्ड्यांची दुरुस्ती करण्याची कार्यवाही तातडीने करावी. या मार्गावरील वाहतूक कोंडी टाळण्यासाठी आवश्यक उपाययोजना कराव्यात.

बैठकीत महामेट्रोचे व्यवस्थापकीय संचालक श्रावण हर्डीकर यांनी उपमुख्यमंत्री पवार यांच्याशी दूरध्वनीवरून चर्चा करतांना स्वारगेट ते कात्रज मेट्रो मार्गाच्या प्रगतीबाबत माहिती दिली. या मार्गाचा प्रस्ताव अंतिम मान्यतेसाठी पब्लिक इन्व्हेस्टमेंट बोर्डाकडे विचाराधीन आहे. लवकरच त्यास मान्यता मिळाल्यावर केंद्रीय मंत्रिमंडळाची त्याला मान्यता मिळेल, यानंतर या मार्गावरील काम सुरू करण्यात येईल, असे त्यांनी सांगितले.

पुणे, दि. २३: पिंपरी चिंचवड येथे होणाऱ्या शंभराव्या अखिल भारतीय मराठी नाट्य संमेलनासाठी जिल्हा नियोजन समितीच्या माध्यमातून २० लाखाचा निधी देण्यात येईल, असे प्रतिपादन उपमुख्यमंत्री अजित पवार यांनी केले.

यावेळी उद्योग मंत्री उदय सामंत, पुणे महानगरपालिका आयुक्त विक्रम कुमार, पिंपरी चिंचवड महानगरपालिका आयुक्त शेखर सिंह, जिल्हाधिकारी डॉ.राजेश देशमुख, जिल्हा परिषदेचे मुख्य कार्यकारी अधिकारी रमेश चव्हाण, महानगरपालिकेचे अतिरिक्त आयुक्त विकास ढाकणे, अखिल भारतीय नाट्य परिषदेचे पिंपरी चिंचवड शाखेचे अध्यक्ष भाऊसाहेब भोईर, पुणे शाखेचे अध्यक्ष मेघराज भोसले आदी उपस्थित होते.

उपमुख्यमंत्री श्री.पवार म्हणाले, १०० व्या अखिल भारतीय मराठी नाट्य संमेलनासाठी शासनातर्फे १० कोटी रुपये देण्यात येणार आहे. या संमेलनासाठी आमदार निधीतून प्रस्ताव आल्यास मान्यता देण्यात येईल. नाट्य संमेलनासाठी मंडप अत्यंत उत्तम दर्जाचा असावा. नाट्य कलावंतांना आवश्यक सर्व सुविधा पुणे आणि पिंपरी चिंचवड महानगरपालिकेने उपलब्ध करून द्याव्यात. सर्वांच्या स्मरणात राहील असे आयोजन करावे, अशी सूचना त्यांनी केली.

मंत्री श्री.सामंत म्हणाले, संमेलनासाठी आवश्यक पूर्वतयारी करण्यात आली आहे. सामाजिक उत्तरदायित्व निधीतूनही संमेलनाला सहकार्य करण्यात येईल.

यावेळी श्री.भोईर यांनी नाट्य संमेलनाविषयी माहिती दिली.

पुणे दि.२३-क्रांतिज्योती सावित्रीबाई फुले यांनी भिडेवाडा येथे मुलींसाठी पहिली शाळा सुरू केली. या स्थळाचे महत्व लक्षात घेता मुलींना सावित्रीबाई फुले यांच्या जीवनकार्यातून शिक्षणाची प्रेरणा मिळेल असे स्मारक भिडेवाडा येथे उभारण्यात येईल, असे प्रतिपादन राज्याचे उपमुख्यमंत्री अजित पवार यांनी केले.

उपमुख्यमंत्री श्री.पवार यांनी सकाळी राष्ट्रीय स्मारक भिडेवाडा, महात्मा फुले वाडा आणि क्रांतिज्योती सावित्रीबाई फुले स्मारकाच्या जागेस भेट दिली. यावेळी ते बोलत होते. त्यांच्यासमवेत राज्य महिला आयोगाच्या अध्यक्षा रुपाली चाकणकर, पुणे महानगरपालिका आयुक्त विक्रम कुमार, जिल्हाधिकारी डॉ.राजेश देशमुख, महानगरपालिकेचे अतिरिक्त आयुक्त विकास ढाकणे, दीपक मानकर आदी उपस्थित होते.

श्री.पवार म्हणाले, भिडेवाडा येथे जागेची मर्यादा लक्षात घेता तज्ज्ञांशी चर्चा करून स्मारकाचा आराखडा तयार करण्यात येईल. पुढच्या पिढीला क्रांतिज्योती सावित्रीबाई फुले यांचे कार्य लक्षात रहावे आणि याठिकाणी मुलींची पहिली शाळा सुरू झाली हे कळावे या पद्धतीने सर्व स्मारकाची रचना करण्याचा प्रयत्न आहे. बाहेरून पुरातन वास्तू दिसावी आणि आतल्या बाजूस विद्यार्थीनी आणि शिक्षक-शिक्षकेतर कर्मचाऱ्यांना सर्व सुविधा असाव्यात असा प्रयत्न राहील. वाहनतळासाठीदेखील व्यवस्था करण्याबाबत परिसरातील जागेचा उपयोग करता येतो का याबाबतही विचार सुरू असल्याचे त्यांनी सांगितले.

क्रांतिज्योती सावित्रीबाई फुले यांचे जागतिक दर्जाचे स्मारक उभारणार

महात्मा फुले वाडा आणि क्रांतिज्योती सावित्रीबाई फुले यांच्या स्मारकासंदर्भात श्री.पवार म्हणाले, अडीच एकर क्षेत्रावर क्रांतिज्योती सावित्रीबाई फुले स्मारक उभारण्यात आले आहे. याठिकाणी महिलांना प्रशिक्षण देण्याचे काम सुरू आहे. महात्मा फुले वाडा १९९३ मध्ये उभारण्यात आला आहे. दोन्ही भाग एकत्र करून विस्तृत स्वरुपाचे जागतिक दर्जाचे स्मारक उभारण्याचा शासनाचा मनोदय आहे. त्यासाठी काही कुटुंबांना स्थलांतरीत करावे लागेल. यापूर्वीदेखील काही कुटुंबांना स्थलांतरीत करण्यात आले आहे. स्थानिक रहिवाशांचा यासाठी विरोध नाही. मात्र त्यांचे चांगले पुनर्वसन व्हावे, त्यांना त्रास होणार नाही याची दक्षता घेण्यात येईल. रहिवाशांना आवश्यक सुविधा आणि पर्यायी जागा देण्याचा महानगरपालिकेचा प्रयत्न आहे. राज्य शासन आणि महानगरपालिका मिळून पुण्याच्या मध्यवर्ती भागात एकूण पाऊणेचार एकर क्षेत्रात जागतिक दर्जाचे स्मारक उभारेल, अशी ग्वाही त्यांनी दिली.

तत्पूर्वी श्री.पवार यांनी दोन्ही स्मारकाच्या जागेस भेट देऊन तेथील कामांबाबत अधिकाऱ्यांना सुचना केल्या. त्यांनी स्थानिक रहिवाशांशी चर्चादेखील केली.

पुणे : जिल्ह्यात पौड, लोणावळा व हवेली पोलीस ठाणे हद्दीत नववर्षाचे स्वागत करण्यासाठी पर्यटकांची मोठ्या प्रमाणात होणारी गर्दी तसेच १ जानेवारी २०२४ रोजी विजयस्तंभ पेरणे फाटा येथे मानवंदना देण्यासाठी विविध ठिकाणाहून बहुसंख्य अनुयायी मानवंदना देण्यासाठी विविध ठिकाणाहून येत असल्याच्या पार्श्वभूमीवर जिल्हा पोलीस अधिक्षक अंकित गोयल यांनी २५ डिसेंबर रोजी ००.१० वाजेपासून ते ७ जानेवारी २०२४ रोजी २४.०० वाजेपर्यंतच्या कालावधीत महाराष्ट्र पोलीस अधिनियम १९५१ चे कलम ३६ अन्वये प्राप्त झालेल्या अधिकाराअंतर्गत सर्व उप विभागीय पोलीस अधिकारी, बंदोबस्ताचे अधिकारी यांना अधिकार प्रदान केले आहेत.

रस्त्यावरील किंवा रस्त्याने जाणाऱ्या मिरवणुकीतील किंवा जमावातील लोकांनी कशारितीने चालावे त्यांनी वर्तणुक किंवा वागणूक कशी ठेवावी. कोणत्याही मिरवणुका या कोणत्या मार्गाने, कोणत्या वेळात काढाव्यात किंवा काढू नयेत असे मार्ग व अशा वेळा विहित करणे, सर्व मिरवणुकीच्या व जमावांच्या प्रसंगी व उपासनेच्या वेळी व कोणत्याही रस्त्याहून किंवा सार्वजनिक जागी किंवा सार्वजनिक स्थळी गर्दी होणार असेल किंवा अडथळा होण्याचा संभव असेल अशा सर्व प्रसंगी अडथळा न होवू देणे यासाठी योग्य ते आदेश देणे, सर्व रस्त्यावर व रस्त्यामध्ये घाट किंवा घाटावर सर्व धक्यावर व धक्यामध्ये आणि सार्वजनिक स्नानांच्या, कपडे धुण्याच्या व उतरणेच्या जागांच्या ठिकाणी व जागामध्ये, देवालय आणि इतर सर्व सार्वजनिक स्थळी सुव्यवस्था राखणेसाठी योग्य ते आदेश देणे, कोणत्याही रस्त्यात किंवा रस्त्याजवळ ढोल, ताशे व इतर वाद्ये वाजविण्याचे व गाणी गाण्याचे, शिंगे वइतर कर्कश्श वाद्ये वाजविण्याचे विनियमन करणे व त्यावर नियंत्रण ठेवणेसाठी योग्य ते आदेश देणे, कोणत्याही सार्वजनिक जागेत किंवा जागेजवळ किंवा कोणत्याही सार्वजनिक करमणुकीच्या ठिकाणी लोकांना उपद्रव होऊ नये म्हणून ध्वनिपेक्षकाचा (लाऊडस्पीकर) उपयोग करणे व त्यावर नियंत्रण ठेवणेसाठी योग्य ते आदेश देणे याबाबत हे अधिकार प्रदान करण्यात आले आहेत.

सक्षम प्राधीकाऱ्यांनी या अधिनियमांची कलमे ३३, ३५, ३७ ते ४०,४२, ४३ व ४५ अन्वये दिलेल्या कोणत्याही आदेशास अधीन असलेले व त्यास पुष्टी देणारे योग्य आदेश देण्याचेही आदेशात नमूद केले आहे.

पुणे : पुस्तक महोत्सवाच्या माध्यमातून वाचनसंस्कृतीला चालना देऊन विचार, संस्कृती आणि विज्ञान शेवटच्या माणसापर्यंत पोहोचवता येईल; म्हणून राष्ट्रीय पुस्तक न्यासाने राज्यात विभागनिहाय पुस्तक महोत्सव आयोजित करावा, अशी सूचना राज्याचे उपमुख्यमंत्री देवेंद्र फडणवीस यांनी केली.

भारत सरकारचे शिक्षण मंत्रालय आणि राष्ट्रीय पुस्तक न्यासतर्फे आणि महाराष्ट्र शासन, सावित्रीबाई फुले पुणे विद्यापीठ व पुणे महानगरपालिकेच्या सहकार्याने आयोजित पुणे पुस्तक महोत्सवाला दिलेल्या भेटी प्रसंगी ते बोलत होते.

कार्यक्रमाला विधान परिषदेच्या उपसभापती डॉ.नीलम गोऱ्हे, उच्च व तंत्रशिक्षण मंत्री चंद्रकांतदादा पाटील, आमदार श्रीकांत भारतीय, सुनिल कांबळे, राहुल कुल, राष्ट्रीय पुस्तक न्यासचे  संचालक युवराज मलिक, सावित्रीबाई फुले पुणे विद्यापीठाचे कुलगुरू डॉ.सुरेश गोसावी, यशवंतराव चव्हाण महाराष्ट्र मुक्त विद्यापीठाचे कुलगुरू प्रा.संजीव सोनवणे, पुणे महानगरपालिकेचे आयुक्त विक्रम कुमार, पिंपरी चिंचवड पोलीस आयुक्त विनयकुमार चौबे, पुणे महोत्सवाचे मुख्य संयोजक राजेश पांडे उपस्थित होते.

पुस्तके ज्ञान प्रवाह सर्वदूर पोहोचविण्याचे कार्य करतात, असे सांगून उपमुख्यमंत्री श्री.फडणवीस म्हणाले, ज्ञान संकुचित ठेवल्यास समाज प्रगती करू शकत नाही. पुस्तकामुळे  विचार आणि व्यक्ती घडतात, व्यक्तीला जीवनाची दिशा सापडते, आपल्या विचारांच्या कक्षा रुंदवतात. पुस्तके आपल्यात सामाजिक जाणिवा निर्माण करतात.

समाजात कोणते साहित्य वाचले जाते यावरून समाजाचे प्रतिबिंब पाहायला मिळते. ऐतिहासिक पुस्तकांच्या माध्यमातून आपली स्वतःची ओळख, स्वातंत्र्याचे मोल समजते. त्यामुळे पुस्तके मोलाचा ठेवा आहे. राष्ट्राकडे संपत्तीपेक्षा पुस्तकरूपी विचारांचा खजिना किती मोठा आहे यावरून राष्ट्राचे वैभव ठरते, असे त्यांनी सांगितले.

पुस्तकांच्या रूपाने पुढच्या पिढीपर्यंत ज्ञान पोहोचविणारा पुस्तक महोत्सव समाजनिर्मिती आणि राष्ट्रनिर्मितीचे महत्वाचे साधन आहे, असे नमूद करून ते पुढे म्हणाले, पुणेकरांमध्ये ज्ञानसंपादान करण्याची लालसा जास्त असल्याने पुस्तक प्रदर्शनासाठी पुणे हे योग्य ठिकाण आहे, हे महोत्सवातून दिसून आले. विशेषतः तरुणांचा प्रतिसाद वाखाणण्यासारखा आहे. तरुणाई महोत्सवाकडे आकर्षित करणे ही सर्वांसाठी आनंदाची गोष्ट असल्याचे सांगून त्यांनी महोत्सवाच्या आयोजनाचे कौतुक केले.

हा देशाचा सर्वश्रेष्ठ पुस्तक महोत्सव असल्याचे नमूद करून श्री.मलिक म्हणाले, दिल्ली वगळता एवढा मोठा पुस्तक महोत्सव कुठेच होत नाही. महोत्सव यशस्वी करण्यासाठी महाराष्ट्र शासन आणि प्रशासनाने चांगले सहकार्य लाभले. लोकसहभागातून भव्य आयोजन शक्य होते हे पुण्याने दाखवून दिले, असे त्यांनी सांगितले.

यावेळी श्री.पांडे यांनी प्रास्ताविकात पुस्तक महोत्सवाविषयी माहिती दिली. पुस्तक महोत्सवात चार विश्वविक्रम साकारले असून अशा स्वरूपाचा हा एकमात्र पुस्तक महोत्सव आहे. तरुणांनी पुस्तक खरेदीला दिलेला प्रतिसाद हे महोत्सवाचे वेगळे वैशिष्ट्य आहे. अशी माहिती त्यांनी दिली. महोत्सवात पुणेकरांचा उत्स्फूर्त प्रतिसाद मिळाल्याचे त्यांनी सांगितले.

कार्यक्रमापूर्वी श्री.फडणवीस यांनी पुस्तक प्रदर्शनाला भेट दिली. त्यांच्या हस्ते ‘पुस्तकवारी’ या वार्तापत्राचे प्रकाशन करण्यात आले. पुणे श्रमिक पत्रकारसंघाच्या पदाधिकारी, बासरीवादक अमर ओक आणि ‘श्रीमंतयोगी’ प्रयोगाचे अभिषेक जाधव यांचा यावेळी सत्कार करण्यात आला.

भारती विद्यापीठाच्या कल्पेश पाटील, संकेत नस्कुलवार, स्वप्नाली बिरुंगी आणि गणेश चव्हाण या विद्यार्थ्यांनी कार्यक्रमस्थळी उपमुख्यमंत्री श्री. फडणवीस यांचे  व्यंगचित्र रेखाटून त्यांना भेट दिले.

यावेळी पुणे महानगरपालिकेचे अतिरिक्त आयुक्त विकास ढाकणे, माजी राज्यमंत्री बाळा भेगडे, माजी महापौर मुरलीधर मोहोळ, धीरज घाटे, हेमंत रासने आदी उपस्थित होते.

000