नागरिकांना उत्सवात सहभागी होण्याचे आवाहन

पुणे दि.२३- राज्याचे उच्च व तंत्रशिक्षण मंत्री चंद्रकांतदादा पाटील यांनी पुणे शहर पोलीस आयुक्तालयातर्फे शिवाजीनगर येथील पोलीस मुख्यालयात आयोजित तरंग उत्सवाला भेट दिली. हा उत्सव खऱ्या अर्थाने ‘मैत्रीचा उत्सव’ असून पोलीस आणि नागरिकांमध्ये विश्वासाचे नाते निर्माण करणारा असल्याने नागरिकांनी उत्सवात आवर्जून सहभाग घ्यावा, असे आवाहन श्री.पाटील यांनी यावेळी केले.

यावेळी पुणे शहर पोलीस आयुक्त रितेश कुमार, सहआयुक्त रामनाथ पोकळे, उपायुक्त संदीप गिल आदी उपस्थित होते.

मंत्री श्री.पाटील यांनी उत्सवातील विविध दालनांना भेट दिली आणि दहशतवाद विरोधी पथकाचे प्रात्यक्षिक पाहिले. ते म्हणाले, या उत्सवाच्या माध्यमातून स्थानिक कला, संस्कृतीला प्रोत्साहन मिळण्यासोबत पोलीस दलाविषयी माहितीदेखील मिळते. पोलीस हा आपला खऱ्या अर्थाने मित्र आहे ही भावना दृढ होऊन परस्पर सहकार्याला चालना मिळते. यातूनच नागरिकांच्या सुरक्षेसाठी आवश्यक असलेले विश्वासाचे वातावरण निर्माण होण्यास मदत होईल. नागरिकांनी आवर्जून या उत्सवात सहभागी होत सुट्टीच्या दिवसाचा आनंद घ्यावा आणि पोलीस दलाविषयी जाणून घ्यावे, असे आवाहन त्यांनी केले.

दामिनी पथकाचे कौतुक

मंत्री श्री.पाटील यांनी दामिनी दलविषयीच्या दालनाला भेट देऊन माहिती घेतली. या पथकाची कामगिरी मोलाची असून अशी पथके वाढविण्याची गरज असल्याचे ते म्हणाले. दुसऱ्या महायुद्धातील विविध शस्त्राविषयीदेखील त्यांनी जाणून घेतले. हा उपक्रम मनोरंजनासोबत लोकशिक्षण करणारा असल्याची प्रतिक्रिया त्यांनी व्यक्त केली.

असा आहे ‘तरंग-२०२३’ उत्सव
पोलीस दलातील विविध शाखा, घटक यांची परिपूर्ण माहिती उत्सवात देण्यात आली आहे. ‘तरंग -२०२३’ कार्यक्रम २४ डिसेंबर पर्यंत सकाळी ११ ते रात्री १० वाजेपर्यंत नागरिकांसाठी खुला राहणार आहे.

या सोहळ्याचे मुख्य आकर्षण हे पोलीस घटकांचे प्रदर्शन असून त्यामध्ये पोलीस दलातील विविध शाखा व त्या शाखांमधील चालणारे कामकाज याविषयी ऑडीयो, व्हिडीओच्या माध्यमांतुन माहिती सांगण्यात येत आहे.

सांस्कृतिक कलेचा वारसा असलेल्या पुणे शहरातील स्थानिक कलाकार यांची कलाकृती (आर्टिसन गॅलरी) या शिर्षकाखाली सर्व सामान्यांसाठी प्रदर्शित करण्यात आले आहे. त्यामध्ये पुण्यातील स्थानिक कलाकारांची मातीची भांडी कलाकृती, पर्यावरणपूरक प्लास्टिक पदार्थाचे पुर्नप्रकल्पाने तयार केलेल्या उपयोगी वस्तु, तांबे पितळ या भांड्याचे प्रदर्शन, फुलझाडे, रोपवाटीका यांचे प्रदर्शन आयोजित केले आहे.

नविन पिढी, लहान बालके यांना विज्ञानाची आवड निर्माण व्हावी म्हणुन विज्ञात प्रदर्शन, मुलांसाठी खेळप्रकार, व्हिडीओचे माध्यमांतुन लहान बालकांसाठी गुड टच, बॅड टच यासारखे प्रबोधनपर प्रदर्शन ‘किड्स झोन’ चे माध्यमांतुन प्रदर्शित करण्यात आले आहे. विविध मनोरंजनाचे कार्यक्रमदेखील आयोजित करण्यात येत आहेत. खाद्य संस्कृतीचेही स्टॉल प्रदर्शनात ठेवण्यात आले आहेत. भारतातील विविध कलाकुसर, खादी, दाग-दागिने, देशी पदार्थ, कपड्यांसह विविध वस्तू प्रदर्शनात आहेत.

शास्त्रीनगर चौकात उड्डाणपुल आणि ग्रेड सेपरेटर होणार
पालकमंत्री अजित पवार अध्यक्षतेखाली झालेल्या बैठकीत निर्णय

मेट्रो मार्गिका विमानतळापर्यंत करा – पवारांच्या सूचना
नगर रस्त्यावर रामवाडीपर्यंत असलेला मेट्रो मार्ग थेट पुणे विमानतळापर्यंत जोडा असे आदेश पालकमंत्री पवार यांनी मेट्रोच्या अधिकाऱ्याना दिले. याबाबत तातडीने कार्यवाही करावी असेही त्यांनी सांगितले.

पुणे –एनएच आयच्या माध्यमातून शिरूर ते वाघोलीपर्यंत जो दुमजली उड्डाणपुल प्रस्तावित आहे. तो थेट विमाननगर- रामवाडीपर्यंत करण्याचा निर्णय घेण्यात आला.नगर रस्त्यावरील वाहतूक कोंडी सोडविण्यासाठी सातत्याने पाठपुरावा करणाऱ्या आमदार सुनिल टिंगरे यांच्या प्रयत्नांना अखेर यश आले आहे. नगर रस्त्यावर एनएचआयच्या माध्यमातून होणारा दुमजली उड्डाणपूल आता वाघोलीऐवजी थेट रामवाडीपर्यंत करण्याचा आणि त्यापुढे शास्त्रीनगर चौकात महापालिकेच्या माध्यमातून उड्डाणपूल आणि ग्रेड सेपरेटर करण्याचा निर्णय पालकमंत्री अजित पवार यांच्या अध्यक्षतेखाली झालेल्या बैठकीत घेण्यात आला.
नागपुर हिवाळी अधिवेशनात पुण्यातील वाहतूक कोंडीच्या प्रश्नावरील लक्षवेधीत वडगाव शेरीचे आमदार सुनिल टिंगरे यांनी नगर रस्ता सिग्नल फ्री करण्यासाठी बैठक घेण्याची मागणी केली होती. मंत्री उदय सामंत यांनी सभागृहात ही बैठक घेण्याचे आश्वासन दिले होते. त्यानुसार शनिवार पालकमंत्री अजित पवार यांच्या अध्यक्षतेखाली बैठक झाली. या बैठकीला उद्योगमंत्री उदय सामंत, आमदार सुनिल टिंगरे, आयुक्त विक्रम कुमार, पुणे जिल्हाधिकारी डॉ राजेश देशमुख, अतिरिक्त आयुक्त विकास ढाकणे, एनएचआयचे वरिष्ठ अधिकारी अभिजित आवटे, वाहतूक पोलिस सहआयुक्त श्री खाडे उपस्थित होते. या बैठकीत नगर रस्त्यावरील वाहतुक कोंडी फोडण्यासाठी एनएच आयच्या माध्यमातून शिरूर ते वाघोलीपर्यंत जो दुमजली उड्डाणपुल प्रस्तावित आहे. तो थेट विमाननगर- रामवाडीपर्यंत करण्याचा निर्णय घेण्यात आला. त्यानुसार सविस्तर प्रकल्प आराखडा तयार करण्यात आलाय अशा सूचना एनएच आयला करण्यात आले. तसेच शास्त्रीनगर चौकातील कोंडी सोडविण्यासाठी याठिकाणी महापालिकेच्या माध्यमातून उड्डाणपूल आणि भुयारी मार्ग ( ग्रेड सेपरेटर) उभारण्यात येणार असून त्यासंबंधीची निविदा प्रक्रिया तातडीने राबविण्यात यावी असे आदेश पालकमंत्री पवार यांनी महापालिका आयुक्तांना दिले.
यावेळी रखडलेल्या शिवणे- खराडी रस्ताबाबतही चर्चा झाली. हा रस्ता तातडीने मार्गी लावण्यासाठी तातडीने भूसंपादनाची कार्यवाही पूर्ण करावी आणि या रस्त्याचे काम मार्गी लावावे अशी सुचना पवार यांनी महापालिकेच्या अधिकाऱ्याना दिल्या. तसेच वडगाव शेरी विधान सभा मतदार संघातील धानोरी, संतनगर, फाईव्ह नाईन चौक ते धानोरी, विश्रांतवाडी येथील पर्यायी रस्ते मार्गी लावण्यासाठी अतिरिक्त आयुक्तांनी जागेवर जाऊन पाहणी करावी आणि त्यासंदर्भात कार्यवाही करावी अशा सूचनाही पवार यांनी बैठकीत केल्या.

महाविकास आघाडीला मराठा आरक्षणाची कायदेशीर लढाई लढण्यात स्वारस्य नव्हते– मविआवर घणाघाती टीका

पुणे-मराठा आरक्षणासाठी राज्य सरकारने दाखल केलेली पुनर्विचार याचिका ऐकण्याच्या सुप्रीम कोर्टाच्या निर्णयाचा मराठा आरक्षणासाठी काम करणारा प्रामाणिक कार्यकर्ता म्हणून प्रचंड आनंद होत आहे. महाविकास आघाडीने मराठा आरक्षणाची कायदेशीर लढाई लढण्यात स्वारस्य नव्हते. त्यामुळे मराठा समाजाचे प्रचंड नुकसान झाले, अशी घणाघाती टीका नामदार चंद्रकांतदादा पाटील यांनी केली. तसेच, महायुती सरकार मराठा आरक्षणाची पुनर्विचार याचिका पूर्ण ताकदीनिशी लढवेल, असा विश्वास ही यावेळी व्यक्त केला.

नामदार चंद्रकांतदादा पाटील म्हणाले की, मराठा आरक्षणासाठी राज्य सरकारने दाखल केलेल्या पुनर्विचार याचिका ऐकण्याचा निर्णय प्रचंड आनंद देणारा आहे. या याचिकेमुळे मराठा समाजाचे विविध कारणाने झालेले मागासलेपण सिद्ध करुन, त्यांना आरक्षण मिळवून देण्याची आशा निर्माण झाली आहे. राज्य सरकार आता वकिलांची मोठी फौज उभी करुन ही याचिका पूर्ण ताकदीनिशी लढवेल, अन् मराठा समाजाला हक्काचे आरक्षण मिळवून देईल.

नामदार पाटील पुढे म्हणाले की, माननीय देवेंद्रजी फडणवीस सरकारने मराठा आरक्षणासाठी नेमलेल्या समितीच्या अहवालाच्या आधारे आरक्षण मिळवून दिले होते. माननीय उच्च न्यायालयात मराठा समाज मागास असल्याची बाजू तत्कालीन राज्य सरकारने प्रभावी पणे मांडून माननीय न्यायालयाला पटवून दिले. त्यामुळे उच्च न्यायालयाने मराठा आरक्षणावर मोहोर उमटवली.

ते पुढे म्हणाले की, दुर्दैवाने राज्यात मविआ सरकार स्थापन झाल्यानंतर, या सरकारला मराठा आरक्षणासाठीची सुप्रीम कोर्टातील लढाई लढण्यात कोणतेही स्वारस्य नव्हते. आरक्षणाची ५० टक्क्यांची मर्यादा ओलांडत असताना जर राज्यात असाधारण स्थिती असेल, तर आरक्षण देता येतं; हे न्यायालयाला पटवून देता आलं नाही. त्यामुळे सुप्रिम कोर्टाने हे आरक्षण फेटाळले. यामुळे मराठा समाजाचे प्रचंड नुकसान झाले.

नामदार पाटील पुढे म्हणाले की, माननीय एकनाथजी शिंदे यांच्या नेतृत्वात आम्ही सर्वजण कायदेतज्ज्ञांची फौज उभी करु‌; अन् सुप्रिम कोर्टाच्या निदर्शनास काही बाबी आणून देऊ. यात प्रामुख्याने जमिनीच्या विभागणीमुळे आणि निसर्गाच्या लहरीपणामुळे शेती करणे अवघड झाले. त्यामुळे मराठा समाज कालांतराने मागास होत गेला. त्यामुळे पुनर्विचार याचिकेमुळे सुप्रीम कोर्टाने दिलेल्या संधीचे महायुती सरकार सोनं करुन, मराठा समाजाला हक्काचे आरक्षण मिळवून देऊ, असा विश्वास व्यक्त केला.

पुणे (दि.२३ डिसेंबर २०२३) शतकोत्सवी अखिल भारतीय मराठी नाट्य संमेलन सहा आणि सात जानेवारी रोजी २०२४ ला पिंपरी चिंचवड शहरात होत आहे. राजकीय जोडे बाजूला ठेवून आम्ही सर्वपक्षीय या नाट्यसंमेलनाचे नियोजन करीत आहोत. नाट्य संमेलन ही एक सांस्कृतिक चळवळ आहे; अशा भावनेतून आम्ही याकडे पाहतो. हे नाट्य संमेलन यशस्वी करण्यासाठी पिंपरी चिंचवडकरांनी सहकार्य करावे, असे आवाहन उद्योग मंत्री आणि मुख्य निमंत्रक उदय सामंत यांनी केले.
चिंचवड भोईर नगर येथील कामगार कल्याण मैदानावर नाट्य संमेलनाच्या मंडपाचे पूजन शनिवारी करण्यात आले. यावेळी सामंत यांनी माध्यम प्रतिनिधींशी संवाद साधला. तत्पूर्वी अखिल भारतीय मराठी नाट्य परिषद, पिंपरी चिंचवड शाखा अध्यक्ष भाऊसाहेब भोईर यांच्या निवासस्थानी सामंत यांच्या उपस्थितीत नाट्य परिषदेचे पदाधिकारी व प्रतिनिधी यांची आढावा बैठक झाली. यावेळी भाऊसाहेब भोईर, आमदार उमा खापरे, बांधकाम व्यावसायिक राजेश साकला, चित्रपट महामंडळाचे माजी अध्यक्ष मेघराज भोसले, नियामक मंडळाचे सदस्य सतीश लोटके, तळेगाव नाट्य परिषदेचे अध्यक्ष सुरेश धोत्रे, शिरूर नाट्य परिषदेचे अध्यक्ष दिपाली शेळके, सचिन इटकर, माजी नगरसेवक राहुल कलाटे, अजित गव्हाणे, मयूर कलाटे, अनंत कोऱ्हाळे तसेच संतोष पाटील, राजेंद्र शिंदे, सुदाम परब, संतोष रासने, राजू बंग, आकाश थिटे, प्रणव जोशी आदी उपस्थित होते.
नाट्य संमेलनाच्या अध्यक्षपदी प्रसिद्ध चित्रपट निर्माते डॉ. जब्बार पटेल, राष्ट्रवादी काँग्रेसचे अध्यक्ष शरद पवार स्वागताध्यक्ष तर स्वागत समिती अध्यक्ष उपमुख्यमंत्री अजित दादा पवार, प्रमुख निमंत्रक म्हणून उद्योग मंत्री उदय सामंत काम पाहणार आहेत. पिंपरी चिंचवड शहरातील महासाधू मोरया गोसावी क्रीडांगणावर मुख्य नाट्य संमेलन होईल. प्रा. रामकृष्ण मोरे प्रेक्षागृह, ग. दि. माडगूळकर सभागृह, आचार्य अत्रे रंगमंदिर, नटसम्राट निळू फुले नाट्यगृह, कै.अंकुशराव लांडगे नाट्यगृह तसेच भोईर नगर कामगार कल्याण मैदानावर बालनाट्य आयोजित केली जाणार आहेत. या नाट्य संमेलनात १६ व्यवसायिक पेक्षा अधिक नाटके, सुमारे एक हजार अधिक कलाकार सहभागी होतील आणि स्थानिक कलाकारांनाही संधी मिळेल, असे भाऊसाहेब भोईर यांनी सांगितले.

आयसीएआय’तर्फे सीए विद्यार्थ्यांच्या दोन दिवसीय राष्ट्रीय परिषदेचे उद्घाटन
पुणे : “सनदी लेखापाल ज्ञान आणि सत्य याचा संगम आहे. भारतीय अर्थव्यवस्थेला सक्षम बनवण्यात आपण मोलाचे योगदान देत आहात. युवाशक्तीचा सदुपयोग, शहरीकरणाचा विस्तार, अक्षय ऊर्जेचा वाढता वापर, डिजिटल अर्थव्यवस्थेला चालना आणि चांगल्या पायाभूत सुविधांची उभारणी यातून भारतीय अर्थव्यवस्था पाच ट्रिलियन डॉलरचे उद्दिष्ट्य गाठेल,” असे प्रतिपादन गोखले इन्स्टिट्यूट ऑफ पॉलिटिक्स अँड इकॉनॉमिक्सचे कुलगुरू डॉ. अजित रानडे यांनी केले.

दि इन्स्टिट्यूट ऑफ चार्टर्ड अकाउंटंट्स ऑफ इंडियाच्या (आयसीएआय) बोर्ड ऑफ स्टडीज ऑपरेशन्स, आयसीएआय पुणे शाखा आणि ‘विकासा’ पुणे शाखेच्या वतीने आयोजित ‘ज्ञानगम्य : सीए विद्यार्थ्यांसाठी दोन दिवसीय राष्ट्रीय परिषद’चे उद्घाटन डॉ. अजित रानडे यांच्या हस्ते झाले. या परिषदेत देशभरातून जवळपास २००० सीए विद्यार्थी सहभागी झाले होते.
वर्धमान सांस्कृतिक केंद्रात झालेल्या सोहळ्यात ‘आयसीएआय’चे केंद्रीय समिती सदस्य सीए चंद्रशेखर चितळे, सीए मंगेश किनरे, सीए दयानिवास शर्मा, विभागीय समिती सदस्य सीए यशवंत कासार, सीए ऋता चितळे, आयसीएआय पुणेचे अध्यक्ष सीए राजेश अग्रवाल, उपाध्यक्षा सीए अमृता कुलकर्णी, ‘विकासा’ पुणेचे अध्यक्ष सीए सचिन मिणियार, उपाध्यक्ष साईराम खोंड, कार्यकारिणी सदस्य सीए प्रणव आपटे, सीए काशिनाथ पठारे, सीए प्रितेश मुनोत, ‘विकासा’ पुणेचे सचिव माधविक शहा, खजिनदार समीक्षा सिरसाठ, सहसचिव ओंकार फाफळ, सहखजिनदार सुहास सावंत, संपादकीय प्रमुख स्नेहा वेदपाठक आदी उपस्थित होते.
डॉ. अजित रानडे म्हणाले, “सनदी लेखापाल हा अर्थव्यवस्थेचा महत्वाचा दुवा आहे. उद्योगांसह अन्य आर्थिक व्यवहारांना शिस्त लावण्याचे काम आपण करत असतो. सध्याचे युग हे ज्ञान अर्थव्यवस्थेचे (नॉलेज इकॉनॉमी) आहे. भारतीय उत्पादन व सेवा निर्यातीचे प्रमाण मोठ्या प्रमाणात वाढले आहे. विकासाच्या मार्गावर झपाट्याने चाललेल्या भारतीय अर्थव्यवस्थेला ज्ञानक्रांतीमुळे चालना मिळेल. तंत्रज्ञानयुक्त या नव्या युगात सीए होऊ इच्छिणाऱ्या विद्यार्थ्यांनी उपलब्ध संधींचा लाभ घेत अर्थव्यवस्थेचे आधारस्तंभ बनावे. प्रामाणिकपणा व सखोल ज्ञानाच्या आधारे हा व्यवसाय वृद्धिंगत करावा.”
सीए चंद्रशेखर चितळे म्हणाले, “सनदी लेखापाल बनू इच्छिणाऱ्या विद्यार्थ्यांना सर्वांगीण ज्ञान देण्यासाठी सीए इन्स्टिट्यूट नेहमीच अग्रेसर आहे. पाठ्यक्रमासह अवांतर उपक्रमातून सीए करणारा विद्यार्थी सर्वार्थाने घडतो. सीए देशाच्या अर्थव्यवस्थेला आकार देणारे शिल्पकार आहेत.”
सीए मंगेश किनरे म्हणाले, “सीए अभ्यासक्रम डिस्टन्स लर्निंग नसून, तो रोजच्या अनुभवातून शिकण्याचा आहे. अधिकाधिक ज्ञान, बदलते तंत्रज्ञान आत्मसात करा. पुणे शाखेच्या वतीने राष्ट्रीय परिषदांचे उत्तम आयोजन होत आहे. देशभरातील २००० पेक्षा अधिक विद्यार्थी सहभागी झाले आहेत.” सीए दयानिवास शर्मा म्हणाले, “कोणत्याही क्षेत्रात काम करताना यशस्वितेचा आत्मविश्वास बाळगला पाहिजे. विपुल ज्ञानग्रहण करून उत्तीर्ण होण्याला महत्व आहे. यशस्वी झाल्यानंतर अपयशाला कोणी विचारत नाही. परंतु, अपयशातून चुका सुधारत यशाकडे वाटचाल करणे महत्वाचे असते.”

सीए ऋता चितळे यांनी पुनर्वापर व प्रदूषण कमी करण्याविषयी मार्गदर्शन केले. उपलब्ध संसाधनांचा वापर जपून करण्यासह पाणी व अन्य गोष्टींसाठी प्लास्टिकचा वापर टाळायला हवा, असे आवाहन केले. शाश्वत मानकांचा अवलंब करणे गरजेचे असल्याचे त्यांनी नमूद केले.

सीए यशवंत कासार म्हणाले, “तंत्रज्ञान झपाट्याने बदलत आहे. त्याचा अंतर्भाव सीए व्यवसायात होत आहे. त्यामुळे सीए करणाऱ्या विद्यार्थ्यांनी हे नवे बदल, तंत्रज्ञान आत्मसात करावे. सतत नवीन गोष्टी शिकत राहाव्यात. शिकण्यात प्रामाणिकपणा जपावा.”
सीए राजेश अग्रवाल म्हणाले, “यशासाठी सातत्य, चिकाटी, कष्ट करण्याची तयारी आणि त्याला स्वयंप्रेरणेची जोड हवी. आयसीएआय भवनमध्ये सीए सभासद व विद्यार्थ्यांकरिता कार्यशाळा, चर्चासत्रे, परिषदा सातत्याने आयोजित करण्यात येतात.”
सीए सचिन मिणियार यांनी स्वागत केले. सांची होनराव व अभिषेक पुराणिक यांनी सूत्रसंचालन केले. सीए अमृता कुलकर्णी यांनी आभार मानले.