पुणे- महानगरपालिकेच्या विकास आराखड्यात मैदानासाठी दर्शविण्यात ३.५९१ हेक्टरचा भूखंड पुणे जिल्हा सहकारी दूध उत्पादक संघाला (कात्रज डेअरी) देण्याचा निर्णय झाला आहे. ही जागा मुलांना खेळासाठीच राहू द्यावी अशी मागणी आज महाविकास आघाडीच्या वतीने पुणे महानगरपालिकेसमोर आंदोलन करून करण्यात आली. कात्रज येथील क्रीडागंणाचे आरक्षण उठवून दूध डेअरी व प्रक्रियेसाठी आरक्षण टाकणार असल्याच्या निषेधार्थ पुण्याचे पालकमंत्री व पुणे महानगरपालिका आयुक्त यांच्या निषेधार्थ महाविकास आघाडीच्या वतीने  महानगरपालिकेसमोर आंदोलन घेण्यात आले. ह्या वेळी वेगवेगळे खेळ रस्त्यावर खेळण्यात आले. बरेच खेळाडू तिथे उपस्थित होते. त्यानंतर कात्रज येथील डीपीतील मैदानाचे आरक्षण उठवू नये याबाबत पुणे महानगरपालिका आयुक्त विक्रम कुमार यांना निवेदन देण्यात आले.

     यावेळी पुणे शहर जिल्हा काँग्रेस कमिटीचे अध्यक्ष अरविंद शिंदे म्हणाले की, ‘‘दूध डेअरी व प्रक्रिया उद्योग हा ग्रामीण भागाशी संबंधित आहे. महापालिकेच्या डीपीमध्ये या प्रकारचे आरक्षण नाही. शहरात खेळासाठी मैदानाची कमतरता भासत असताना ही जागा कात्रज डेअरीच्या व्यावसायिक वापरासाठी काढूण घेणे योग्य नाही.

     पुणे शहरामधे मुलांना खेळण्यासाठी पुरेसे क्रीडांगण नाही असे असताना जी जागा क्रीडांगणसाठी आरक्षित आहे आणि जर त्या जागेवरच आरक्षण काढून कात्रज डेरीला ती जागा पुणे महानगरपालिका देणार असेल तर ते पुणेकरांच्या हिताचे नाही. तसेच कात्रज, धनकवडी या भागात दाट लोकवस्ती आहे. येथे मुलांना खेळण्यासाठी हक्काचे मैदान हक्काचे मैदान आवश्यक आहे त्यामुळे महाविकास आघाडी पुणेकरांच्या हितासाठी आज रस्त्यावर उतरुन आपला विरोध दर्शवत आहे.’’यावेळी पुणे शहराध्यक्ष माननीय अरविंद शिंदे, शिवसेना गटाचे (उध्दव ठाकरे गट) गजानन थरकुडे, संजय मोरे, माजी आमदार दिप्ती चवधरी, ॲड. अभय छाजेड, संगीता तिवारी, गोपाळ तिवारी, लता राजगुरू, शिवा मंत्री, अजित दरेकर, रजनी त्रिभुवन, ब्लॉक अध्यक्ष सुजित यादव, अक्षय माने, राजू ठोंबरे, कृष्णा सोनकांबळे, संतोष पाटोळे, NSUI अध्यक्ष अभिजित गोरे, प्रियंका रणपिसे, द. स. पोळेकर, सचिन आडेकर, सतिश पवार, यशराज पारखी, बाळासाहेब मारणे, लतेंद्र भिंगारे, मुन्नाभाई शेख, यासीन शेख, अभिजीत महामुनी, आशुतोष शिंदे, आकाश माने, ओम भंवर, उषा राजगुरू, रेखा घेलोत, नलिनी दोरगे, छाया जाधव, सुंदर ओव्हाळ, मोतीबाई उडते, सिमा महाडिक, शारदा विर, अश्विनी गवारे, ज्योती परदेशी, दिलीप लोळगे, सेल्वराज ॲन्थोनी, नागेश खडके, संजय कवडे, दत्ता जाधव आदींसह महाविकास आघाडीचे कार्यकर्ते उपस्थित होते

महावितरणकडून पश्चिम महाराष्ट्रातील वीजचोरांना दणका

वीजचोरीच्या गुन्ह्यासाठी दंड व ३ वर्षांपर्यंत कैदेची तरतूद

पुणे, दि. ०९ जानेवारी २०२४: वितरण व वाणिज्यिक हानी कमी करण्यासाठी महावितरणकडून एकाच दिवशी पश्चिम महाराष्ट्रात वीजचोरीविरोधी मोहीम राबविण्यात आली. यामध्ये १२७६ ठिकाणी सुमारे १ कोटी ५९ लाख रुपयांच्या अनधिकृत वीज वापराचे प्रकार उघडकीस आले. वीजतारेच्या हूकद्वारे किंवा मीटरमध्ये फेरफार करून ८६९ ठिकाणी ९६ लाख ५८ हजार रुपयांची थेट वीजचोरी झाल्याचे आढळून आले.

पुणे प्रादेशिक विभाग अंतर्गत पुणे, सोलापूर, सातारा, कोल्हापूर, सांगली जिल्ह्यांत पुणे प्रादेशिक संचालक श्री. अंकुश नाळे यांच्या निर्देशानुसार शनिवारी (दि. ६) एकाचवेळी दिवसभर वीजचोरीविरुद्ध मोहीम राबविण्यात आली. त्याप्रमाणे सकाळी ९ वाजता सर्वच जिल्ह्यांमध्ये या मोहीमेला सुरवात झाली व सायंकाळी उशिरापर्यंत घरगुती, वाणिज्यिक, औद्योगिक, कृषी आदी वर्गवारीतील वीजजोडण्यांची तपासणी करण्यात आली. यामध्ये (कंसात रक्कम) पुणे जिल्हा- ६५३ (१ कोटी २१ लाख ८४ हजार), सातारा- १५१ (१२ लाख ३४ हजार), सोलापूर- १७० (८ लाख २९ हजार), कोल्हापूर- १३४ (७ लाख ३ हजार) व सांगली जिल्ह्यात १६८ (९ लाख ६१ हजार) अशा एकूण १२७६ ठिकाणी १ कोटी ५९ लाख ११ हजार रुपयांचा अनधिकृतपणे वीजवापर उघडकीस आला.

वीजचोरी व अनधिकृतपणे वीजवापर केल्याप्रकरणी संबंधितांना दंड व नवीन वीजबिल देण्यात येत आहे. या बिलाचा ताबडतोब भरणा करावा अन्यथा नियमानुसार कारवाई करण्यात येणार असल्याचे महावितरणकडून सांगण्यात आले. वीजचोरी केल्यास विद्युत अपघाताचा मोठा धोका असतो. त्यामुळे विजेची चोरी करण्याऐवजी अधिकृत वीजजोडणी घेऊन सुरक्षित वीजपुरवठा घ्यावा असे आवाहन महावितरणने केले आहे. भारतीय विद्युत कायदा २००३ च्या कलम १३५ नुसार वीजचोरीच्या गुन्ह्यासाठी दंड व तीन वर्षांपर्यंत तुरुंगवासाच्या शिक्षेची तरतूद आहे.

सध्या वीजबिलांच्या थकबाकीदारांचा वीजपुरवठा खंडित करण्याची मोहीम सुरु आहे. थकबाकीमुळे वीजपुरवठा खंडित केलेल्या वीजजोडण्यांची तपासणी सुरू आहे. यामध्ये अन्य ठिकाणाहून थकबाकी असलेल्या ठिकाणी वीजवापर होत असल्याचे आढळून आल्यास कारवाई करण्यात येत आहे. तसेच वीजचोरी प्रकरणात ज्यांनी दंडात्मक रकमेसह वीजचोरीच्या संपूर्ण बिलाची रक्कम भरली नाही तर त्यांच्याविरुद्ध कलम १३५ नुसार फौजदारी कारवाई करण्यात येत आहे.

पुणे:महापालिकेने कनिष्ठ अभियंता पदासाठी भरती प्रक्रिया सुरू केली आहे. आता ११३ पदांसाठी भरती करण्यात येणार आहे. यापैकी १३ पदे माजी सैनिक अनुशेष भरून काढण्यासाठी ठेवली आहेत. सर्व संवर्गासाठी १०० पदे असणार आहेत.

महापालिकेने कनिष्ठ अभियंता (स्थापत्य), पदासाठी जाहिरात प्रसिद्ध केली आहे. या पदासाठी आवश्यक अटी आणि शर्ती उमेदवारांना महापालिकेच्या वेबसाइटवर १६ जानेवारीपासून उपलब्ध होतील, अशी माहिती सामान्य प्रशासन विभागाचे उपायुक्त सचिन इथापे यांनी दिली.

कनिष्ठ अभियंतासाठी ३ वर्षांची अनुभवाची अट ठेवली होती. याबाबत बऱ्याच दिवसांपासून ही अट रद्द करण्याची मागणी करण्यात येत होती. त्यानुसार महापालिका प्रशासनाने अट रद्द करण्याबाबतचा प्रस्ताव राज्य सरकारकडे पाठवला होता. सरकारने त्याला नुकतीच मंजुरी दिली आहे. अनुभवाची अट कमी करण्यात येऊन पदवी किंवा पदविका उत्तीर्ण असण्याची अट ठेवली आहे. पदवी किंवा पदविका घेतलेल्या उमेदवारांना त्याचा फायदा होईल.

पुणे-भाजपचे शहर चिटणीस लहू बालवडकर यांच्या वाढदिवसानिमित्त लहू बालवडकर सोशल वेलफेअर तर्फे चैतन्यस्पर्श हा देशातल्या १२ शक्तिपीठांच्या पादुकादर्शनाचा अभूतपूर्व सोहळा आयोजित करण्यात आला होता.यादरम्यान भव्य भजन स्पर्धेचे आयोजनदेखील संस्थेतर्फे करण्यात आले होते. या सोहळ्यासाठी राज्याचे उच्च व तंत्रशिक्षण मंत्री चंद्रकांतदादा पाटील उपस्थित होते.

लहू बालवडकर यांना यावेळी चंद्रकांत पाटील यांनी वाढदिवसाच्या शुभेच्छा दिल्या. यावेळी मंत्री पाटील म्हणाले, लहू बालवडकर दरवर्षीप्रमाणे भजन स्पर्धा आयोजित करत आहेत. दोन ते तीन दिवस चालणाऱ्या भजन स्पर्धेत खूप दूरवरून मंडळी येतात. लहू बालवडकर यांची लोकप्रियता इतकी आहे की, त्यांच्या कार्यक्रमाला लोक आवर्जून उपस्थित राहतात. तसेच लहू बालवडकर यांची प्रतिमा अशीच वाढत जावो आणि त्याचा कुठेतरी सामाजिक लाभ झाला पाहिजे, असेही चंद्रकांत पाटील यावेळी म्हणाले.

दरम्यान, आज दुपारी भाजपचे प्रदेशाध्यक्ष चंद्रशेखर बावनकुळे यांनी देखील पादुकांचे दर्शन घेतले. यावेळी त्यांनी लहू बालवडकर यांच्या कामाचे भरभरून कौतुक केले. यावेळी भाजपचे महासचिव विक्रांत पाटील, उपाध्यक्ष राजेश पांडे, आध्यात्मिक आघाडीचे तुषार भोसले, उपाध्यक्ष गणेश कळमकर, माजी नगरसेवक अमोल बालवडकर हे उपस्थित होते. सर्व मान्यवरांना यावेळी लहू बालवडकर यांनी राम मंदिराची प्रतिकृतीही भेट दिली.

स्पर्धेतील विजेत्या आणि सहभागी भजनी मंडळाला योग्य ति पारितोषिक वितरण करण्यात आली. पुरूष भजन स्पर्धा पहिले बक्षिस – आषाढी वारी भजनी मंडळ पापळवाडी, राजगुरूनगर आणि स्वरांजली भजनी मंडळ मारुंजी ( विभागून )द्वितीय पुरस्कार- ताजुबाई भजनी मंडळ ताजे मावळ आणि विठ्ठल प्रासदिक भजनी मंडळ शुक्रवार पेठ ( विभागून )तृतीय पुरस्कार – संत ज्ञानेश्वर भजनी मंडळ शेटेवाडी तळेगाव दाभाडे, आणि माऊली संगीत भजनी मंडळ, घरकुल, चिखलीचुतरार्थ पुरस्कार- स्वरागिनी भजनी मंडळ, आळंदी पाचवा पुरस्कार – विजय कांबळे भजनी मंडळ खरपुडी राजगुरुनगर

शहराला स्वच्छतेसाठी सेव्हन स्टार मिळसाठी प्रयत्न करणार-अतिरिक्त आयुक्त डॉ. कुणाल खेमणार

पुणे-शहराला स्वच्छतेसाठी राष्ट्रीय पुरस्कार जाहीर झाला आहे तसेच पहिल्यांदाच फाईव्ह स्टार प्रमाणपत्र मिळाले आहे. आगामी काळात आपण सेव्हन स्टार मिळसाठी प्रयत्न करणार आहोत. फाईव्ह स्टारमध्ये देशातील ८ ते ९ शहरे आहेत. त्यामध्ये आपला समावेश असणे, ही पुणे महापालिकेच्या दृष्टीने मोठी गोष्ट आहे. महापालिकेने केलेल्या चांगल्या कामगिरीवर केंद्र सरकारने मोहोर उमटवली आहे. मागील वर्षीपेक्षा खूप सुधारणा आपण केल्या आहेत. महापालिका आपल्या कामगिरीत आणखी सुधारणा करण्यासाठी प्रयत्नशील आहे.असे येथे अतिरिक्त आयुक्त डॉ. कुणाल खेमणार यांनी सांगितले.

शहर स्वच्छ शहर ही संकल्पना ठेवून चांगले काम करणाऱ्या पुणे शहराला ‘स्वच्छ सर्वेक्षण २०२३’ स्पर्धेत राष्ट्रीय पुरस्कार जाहीर झाला आहे. तसेच शहराला स्वच्छतेचे फाईव्ह स्टार रेटिंगदेखील मिळाले आहे. शहराला हा राष्ट्रीय पुरस्कार येत्या गुरूवारी (दि. ११) देशाची राजधानी दिल्लीत होणाऱ्या कार्यक्रमात महापालिकेला दिला जाणार आहे. स्वच्छतेसंदर्भात पुणे महापालिकेकडून सुरू असलेल्या प्रयत्नांमुळे शहराला यश मिळाले आहे, अशी माहिती महापालिकेच्या घनकचरा व्यवस्थापन विभागाचे उपायुक्त संदीप कदम यांनी दिली

केंद्र सरकारच्या स्वच्छ भारत अभियानांतर्गत आयोजित केले जाणाऱ्या ‘स्वच्छ सर्वेक्षण २०२३’ या स्पर्धेत पुणे महापालिकेने सहभाग घेतला होता. या स्पर्धेत महापालिकेला पहिल्या पाच क्रमांकामध्ये आणण्याचे ध्येय ठेवण्यात आले आहे. त्यासाठी महापालिका प्रशासनाने कंबर कसली असून विविध उपक्रम आणि उपाययोजना राबविल्या जात आहेत. या स्पर्धेसाठीचा सर्वे सप्टेंबरच्या शेवटच्या आठवड्यात केंद्राकडून करण्यात आला होता. यामध्ये स्वच्छतेच्या बाबतीचे निकष तपासण्यात आले. त्यानुसार घरोघर कचरा जमा करणे, कचऱ्याचे वर्गीकरण करणे यासह २४ प्रकारच्या विविध घटकांचा समावेश होता.
या सर्व गोष्टीत महापालिकेने चांगली कामगिरी केल्याने पुणे शहराला राष्ट्रीय पुरस्कार जाहीर झाला आहे. या पुरस्कारामुळे प्रशासनाचा आत्मविश्वास वाढला आहे. त्यामुळे आता प्रशासनाची जबाबदारी वाढली असून शहराला अधिक स्वच्छ व सुंदर कसे करता येईल यासाठी अधिक जोमाने काम करावे लागणार आहे.

केंद्र सरकारकडून दिल्लीमध्ये येत्या गुरूवारी एका कार्यक्रमाचे आयोजन करण्सात आले असून यात या पुरस्काराचे वितरण केले जाणार आहे. यासाठी केंद्र सरकारने महाराष्ट्रातून पुणे, पिंपरी-चिंचवड आणि नवी मुंबई या‌ तीन शहरांनाच निमंत्रित केले आहे. यामध्ये शहराची स्वच्छ सर्वेक्षणमधील रँकिंगदेखील कळणार आहे. पुणे महापालिका याआधीच ‘ओपन डिफिकेशन’मुक्त झाले आहे. याबाबत महापालिकेला मानांकनदेखील मिळाले आहे. मात्र महापालिका अजून कामगिरीत सुधारणा करत असून रँकिंग पहिल्या पाचमध्ये ठेवण्यासाठी प्रयत्न करत असल्याचे कदम यांनी सांगितले.

पुणे शहराला यापूर्वीच देशातील राहण्यायोग्य सर्वोत्तम शहर म्हणून नावलौकिक प्राप्त झाला आहे. त्यात आणखी एक भर पडली आहे. आजपर्यंत थ्री स्टारमध्ये असलेल्या पुण्याला महापालिकेने केलेल्या उत्तम कामगिरीमुळे पहिल्यांदाच फाईव्ह स्टार शहराचा मान मिळाला आहे. महापालिका आणि पुणे शहरासाठी ही मोठी उपलब्धी मानली जात आहे. फाईव्ह स्टार मिळवण्यासाठी महापालिका २०१९ पासूनच प्रयत्न करत होती. मात्र काही ना काही कारणाने हे मानांकन हातून सुटत होते. तरीही सातत्याने प्रयत्न करीत अखेर महापालिकेने ही उपलब्धी मिळवली आहे. पुणे महापालिका आगामी काळात सेव्हन स्टार आणि वॉटर प्लस मानांकन मिळवण्यासाठी प्रयत्न करणार आहे. जायका प्रकल्पांतर्गत जलशुद्धीकरण केंद्राची कामे पूर्ण झाल्यावर महापालिका यासाठी पात्र क़रू शकते.

पुणे : मार्केट यार्ड पोलीस ठाण्यात नेमणुकीस असलेल्या एका पोलीस उपनिरीक्षकावर बलात्कार आणि अनुसूचित जाती अनुसूचित जमाती अन्याय प्रतिबंधक कायद्यानुसार गुन्हा दाखल करण्यात आला आहे. एका दलित महिलेला लग्नाचे आमिष दाखवून तिला लॉजवर नेऊन तिच्यासोबत जबरदस्तीने शारीरिक संबंध प्रस्थापित करण्यात आले. तसेच, तिला जातीवरून अश्लील शिवीगाळ करण्यात आल्याचे फिर्यादीमध्ये नमूद करण्यात आले आहे. हा प्रकार १० जुलै २०२३ ते ४ डिसेंबर २०२३ या कालावधी दरम्यान नंदनवन लॉज या ठिकाणी घडला.

युवराज शिंदे आणि त्यांची पत्नी काजल शिंदे अशी गुन्हा दाखल झालेल्यांची नावे आहेत. युवराज शिंदे हे मार्केट यार्ड पोलीस ठाण्यामध्ये उपनिरीक्षक म्हणून नेमणुकीस आहेत. याप्रकरणी ३२ वर्षीय महिलेने फिर्याद दिली आहे. ही महिला बाणेर येथे राहण्यास आहे. तिची आणि उपनिरीक्षक शिंदे यांची ओळख झाली होती. त्या ओळखीतूनच पुढे शिंदे यांनी या महिलेला लग्नाचे आमिष दाखवले. तिचा विश्वास संपादन केला गोड बोलून तिला नेहमी महागड्या वस्तू देण्यास भाग पाडले. 

तिला वेळोवेळी सातारा रोड येथील नंदनवन लॉज मध्ये घेऊन जाऊन तिच्यासोबत जबरदस्तीने शारीरिक संबंध प्रस्थापित केले. कालांतराने त्याने तिच्यासोबत संपर्क ठेवण्यास आणि बोलण्यास टाळाटाळ सुरू केली. याबाबत तिने त्याच्याकडे जाब विचारला असता शिंदे यांची पत्नीने त्यांना जातीवाचक शिवीगाळ केली. तिच्या जातीचा उल्लेख करून तो टाकून दिलेल्या जातीची आहेस असे बोलून शिवीगाळ करून जीवे मारण्याची धमकी दिली. तसेच अंगावर धावून जात झटापट केल्याचे फिर्यादीमध्ये नमूद करण्यात आले आहे.

याप्रकरणी मार्केट यार्ड पोलीस ठाण्यामध्ये गुन्हा दाखल करण्यात आला होता. हा गुन्हा तपासासाठी स्वारगेट पोलिसांकडे वर्ग करण्यात आला असून पुढील तपास स्वारगेट विभागाचे सहाय्य पोलीस आयुक्त नारायण शिरगावकर करीत आहेत.