आद्य क्रांतीगुरू लहुजी वस्ताद साळवे यांचे स्मारक तरुण पिढीला ऊर्जा देणारे ठरेल-मुख्यमंत्री एकनाथ शिंदे

पुणे दि.२: मुख्यमंत्री एकनाथ शिंदे यांच्या हस्ते आद्य क्रांतीगुरू लहुजी वस्ताद साळवे यांच्या स्मारकाचे आणि उरळी देवाची येथील नगर रचना परियोजनेअंतर्गत विकासकामांचे भूमिपूजन करण्यात आले. स्वातंत्र्य लढ्यामध्ये महत्वाचे योगदान देणाऱ्या आद्य क्रांतीगुरू लहुजी वस्ताद साळवे यांचे स्मारक तरुण पिढीला ऊर्जा देणारे ठरेल, असे प्रतिपादन यावेळी मुख्यमंत्री श्री.शिंदे यांनी केले.

संगमवाडी परिसरात आयोजित या कार्यक्रमास उपमुख्यमंत्री देवेंद्र फडणवीस, उपमुख्यमंत्री तथा जिल्ह्याचे पालकमंत्री अजित पवार, उच्च व तंत्रशिक्षण मंत्री चंद्रकांतदादा पाटील आदी उपस्थित होते.

छत्रपती शिवाजी महाराजांच्या पराक्रमाचा वारसा पुढे नेणाऱ्या आद्य क्रांतीगुरू लहुजी वस्ताद साळवे यांचे भव्य स्मारक उभारले जात असल्याबद्दल आनंद व्यक्त करून मुख्यमंत्री श्री.शिंदे म्हणाले, क्रांतीगुरू लहुजी वस्ताद यांच्या आदर्शानुसार चालणारे सरकार असल्याने सर्वसामान्यांसाठी अनेक प्रकल्पांचे उद्घाटन आज करण्यात आले आहे. मातंग समाज प्रामाणिक आणि कष्टाळू आहे, दिलेला शब्द पाळणारा आहे. बार्टीच्या धर्तीवर अण्णा भाऊ साठे संशोधन व प्रशिक्षण संस्थेची (आर्टी) स्थापना करून सर्वसामान्य माणसाला न्याय देण्याचे कार्य केले आहे. त्यामुळे मातंग समाजातील मुलांना आता उच्च शिक्षण घेता येईल. स्पर्धेच्या युगात या समाजाला इतर समाजाच्या बरोबर विकासात सहभागी करून घेण्यासाठी शासन कटिबद्ध आहे.

शासनाने नुकत्याच सादर केलेल्या अर्थसंकल्पात गड किल्ले, महापुरुषांच्या स्मारकासाठी तरतूद ठेवली आहे. नव्या पिढीला महापुरुषांच्या कार्य, बलिदानापासून प्रेरणा मिळावी यासाठी स्मारके उभारण्यात येत आहेत. भिडेवाडा येथे देखील सावित्रीबाई फुले यांचे स्मारक होत आहे. लहुजी वस्ताद यांच्या हातातील दांडपट्ट्याला शासनाने राज्य शस्त्राचा दर्जा दिला आहे. आद्य क्रांतीगुरू लहुजी वस्ताद साळवे यांच्या स्मारकाच्या माध्यमातून मातंग समाजातील नव्या पिढीला प्रेरणा मिळण्यासोबत उच्च पदावर जाता येईल, असा विश्वास त्यांनी व्यक्त केला.

आद्य क्रांतीगुरू लहुजी वस्ताद साळवे यांनी क्रांतीची ज्योत हजारो मनात पेटवली असे सांगून उपमुख्यमंत्री श्री.फडणवीस म्हणाले, आज छत्रपती शिवाजी महाराजांचे स्वराज्य वाढविणाऱ्या छत्रपती संभाजी महाराज यांच्या स्मारकाच्या भूमीपूजनानंतर छत्रपतींच्या मावळ्याच्या स्मारकाचे भूमिपूजन होत आहे याचा आनंद आहे. क्रांतीगुरू लहुजी वस्ताद यांनी शस्त्राने पारंगत वीर तयार करण्यासाठी देशातील शस्त्राचे प्रशिक्षण देणारी पहिली शाळा काढली म्हणून त्यांना आद्य क्रांतीगुरू म्हटले जाते. आद्य क्रांतीगुरू लहुजी वस्ताद यांनी क्रांतिकारक वासुदेव बळवंत फडके, लोकमान्य टिळक, महात्मा ज्योतिबा फुले यांना प्रशिक्षण दिले.

समाजातील विषमता दूर करण्याचे कार्य करणाऱ्या महात्मा फुले यांच्या पाठीशी ते भक्कमपणे उभे राहिले. १८५७ च्या स्वातंत्र्य समरात लहुजी वस्ताद साळवे यांनी प्रशिक्षित केलेले क्रांतिकारक लढत होते. देह ठेवण्यापर्यंत त्यांनी देशाची सेवा केली. अशा थोर क्रांतिकारकाचे स्मारक रूपाने स्मरण करणे आवश्यक आहे. ही प्रेरणा सर्वांपर्यंत पोहोचविण्यासाठी स्मारक उभारण्यात येत आहे. आता आर्टीची स्थापना करण्यासोबत आरक्षणात होणारा अन्याय दूर करण्यासाठी शासनाने समिती स्थापन केली आहे. येत्या काळात चिरागनगर मध्ये लोकशाहीर अण्णा भाऊ साठे यांचे स्मारक उभारण्यात येईल, अशी ग्वाही त्यांनी दिली.

उपमुख्यमंत्री श्री.पवार म्हणाले, आद्य क्रांतीगुरू लहुजी वस्ताद साळवे यांच्या स्मारकासाठी अनेकांनी प्रयत्न केले. बहुजन समाजातून आलेल्या आणि आपल्या कर्तृत्वाने समाजाला दिशा देणाऱ्यांमध्ये लहुजी वस्ताद साळवे यांचे कार्य मोठे आहे. लहुजी वस्ताद साळवे यांचे घराणे पराक्रमी घराणे म्हणून प्रसिद्ध होते. लहुजी वस्ताद साळवे यांनी ही परंपरा राखत इंग्रजी सत्तेला आव्हान देण्याचे कार्य केले आणि तरुणांना शस्त्रास्त्रांचे प्रशिक्षण दिले. इंग्रजी सत्तेला उलथवून टाकण्यासाठी तरुणांच्या मनात विद्रोहाची ज्योत पेटवली. अशा थोर पुरुषाचे त्यांच्या कार्याला साजेसे स्मारक उभे राहणार आहे. पुढच्या पिढीला अभिमान वाटेल असे स्मारक उभारण्यात येईल.

लहुजी वस्तादांच्या कार्याची आठवण ठेवत तरुणांनी त्यांचा विचार स्विकारावा, स्मारक विचाराचे केंद्र असतात. तरुणांनी महापुरुषांपासून चांगला विचार घ्यायला हवा. व्यायाम, शिस्त, सचोटी आणि शिक्षणाने मेंदू बळकट करीत अन्यायाविरुद्ध लढण्याची तयारी ठेवावी. क्रांतीवीर लहुजी वस्तादांसारख्यांच्या कार्यातून महाराष्ट्र उभा राहीला आहे. स्मारकाच्या रूपाने त्यांच्या कार्याचा ठेवा जपला जाईल, येणाऱ्या पिढ्यांना त्यातून प्रेरणा मिळत राहील. मातंग समाजाच्या कल्याणासाठी आर्टीसाठी तातडीने पाऊले उचलले जातील, अशी ग्वाही त्यांनी दिली. उरुळी देवाची नगर रचना परियोजनेद्वारे ५-६ एकरात गरिबांसाठी घरे मिळतील,असेही ते म्हणाले.

मंत्री श्री.पाटील म्हणाले,आद्य क्रांतीगुरू लहुजी वस्ताद साळवे यांच्या स्मारकाची २० वर्षाची प्रतीक्षा पूर्ण झाली आहे. येत्या दोन वर्षात निधीची कोणतीही कमतरता पडू न देता स्मारकाचे काम पूर्ण करण्यात येईल. स्मारक पूर्ण झाल्यावर लहुजी वस्ताद साळवे यांचे कार्य लक्षात घेऊन उपक्रम राबवावेत. नुकतेच अंदाजपत्रकात आर्टीची घोषणा करण्यात आली आहे, त्यामुळे मातंग समाजाच्या प्रगतीला गती मिळेल. समाजातील सुशिक्षित व्यक्तींनी शासनाच्या योजना शेवटच्या व्यक्तीपर्यंत पोहोचवाव्यात, असे आवाहन त्यांनी केले.

स्मारक समितीचे अध्यक्ष अशोक लोखंडे यांनीही यावेळी विचार व्यक्त केले.

प्रास्ताविक पुणे मनपा आयुक्त विक्रम कुमार यांनी केले. स्मारकासाठी साडेपाच एकर जागा आरक्षित करण्यात आली असून या कामावर ११५ कोटी रुपये खर्च होणार आहे. त्यात संग्रहालय, आर्ट गॅलरी, वसतिगृह, वाचनालय, विद्यार्थ्यांसाठी प्रशिक्षण हॉल आदी सुविधा असतील. परिसरात आद्य क्रांतिगुरू लहुजी वस्ताद साळवे यांचा ३५ फूट उंचीचा पुतळा उभारण्यात येणार आहे. याशिवाय नगर नियोजन योजनेअंतर्गत उरुळी देवाची येथे विकासकामे करण्यात येणार आहे, असे त्यांनी सांगितले.

कार्यक्रमाला आमदार माधुरी मिसाळ,भीमराव तापकीर, सिद्धार्थ शिरोळे, चेतन तुपे, सुनील टिंगरे,सुनील कांबळे , विभागीय आयुक्त डॉ.चंद्रकांत पुलकुंडवार, क्रीडा आयुक्त डॉ. राजेश देशमुख, जिल्हाधिकारी डॉ.सुहास दिवसे, मनपा अतिरिक्त आयुक्त विकास ढाकणे, माजी महापौर मुरलीधर मोहोळ आदी उपस्थित होते.

पुणे : येत्या आठवडाभरात बोपोडी चौकातील वाहतूक मार्गी लागेल,असे आमदार सिद्धार्थ शिरोळे यांनी शनिवारी सांगितले.

महापालिकेचे अतिरिक्त आयुक्त विकासजी ढाकणे, पथ विभाग प्रमुख अनिरुद्ध पावसकर, पोलिस उपायुक्त शशिकांत बोराटे यांच्या समवेत आमदार शिरोळे यांनी चौकातील वाहतुकीची पाहणी केली तसेच अधिकाऱ्यांसमवेत येत्या बुधवारी व्यापारी आणि स्थानिक रहिवाशांची वाहतूक संदर्भात बैठक घेण्यात येणार आहे.

बोपोडी चौकामध्ये रस्त्याची कामे अर्धवट आहेत, तिथे बरेच अपघात होत आहेत. तसेच हॉस्पिटल क्रॉसिंगला सुद्धा अडथळे येत आहेत, अशा प्रश्नांवर सविस्तर चर्चा झाली. बुधवार पर्यंत बोपोडी चौकातून डाव्या बाजूकडे हॅरीस ब्रिजकडे जाणारा रस्ता पूर्ण होईल. त्याचबरोबर त्याठिकाणी असलेला सिग्नल बुधवारपर्यंत हलविला जाईल, असे आमदार शिरोळे यांनी सांगितले.

तसेच जुना मुंबई पुणे हायवेवरील जय हिंद टॉकीजच्या पुढच्या टप्प्याच्या रस्त्याचे काम दहा तारखेपर्यंत पूर्ण होईल. त्याठिकाणी दुहेरी वाहतूक तातडीने सुरू करावी. भारतरत्न डॉ. बाबासाहेब आंबेडकर रस्त्यावर दुहेरी वाहतूक सुरु करावी आणि खडकीवासीयांना दिलासा द्यावा, अशी मागणी आमदार शिरोळे यांनी पाहणीच्या वेळी केली.

या पाहणीच्या वेळी प्रकाश ढोरे, आनंद छाजेड, सुनिताताई वाडेकर, दुर्योधन भापकर, संगीताभाभी गवळी, धर्मेश शहा, कार्तिकीताई हिवरकर, नेहाताई गोरे, मनीषाताई कांबळे, अजित पवार, अनिल भिसे, विजय ढोणे, शांतीलाल शेठ, हेमंत शहा, अनिरुद्ध वाकीकर, अनिकेत भिसे, भूषण जाधव, जय भाटीया, देवेंद्र बिडलान, राजेश पिल्ले, योगेश कर्नुर आदि उपस्थित होते.

सल्लागारपदी प्रा. दिगंबर ढोकले, शामकांत नांगरे, गणपत पाडेकर, बाळासाहेब भोर, नूतन गावडे

पिंपरी (दि. २ मार्च २०२४) पिंपरी चिंचवड शहरातील विश्वासार्ह आणि महाराष्ट्र शासनाचा सहकार भूषण पुरस्कार प्राप्त भोसरीतील शिवनेर नागरी सहकारी पतसंस्थेच्या तज्ज्ञ संचालकपदी ज्येष्ठ पत्रकार अनिल कातळे यांची नियुक्ती करण्यात आली आहे. तसेच सल्लागारपदी प्रा. दिगंबर ढोकले, शामकांत नांगरे, गणपत पाडेकर, बाळासाहेब भोर, नूतन गावडे यांची नियुक्ती झाली. संचालक मंडळाच्या बैठकीत यावर शिक्कामोर्तब करण्यात आले. पतसंस्थेचे अध्यक्ष मुकुंद आवटे यांनी कातळे यांच्यासह सल्लागारांचे पुष्पगुच्छ देऊन स्वागत केले.
यावेळी उपाध्यक्ष सुहास गटकळ, संचालक कैलास आवटे, बाळु गुंजाळ, निंबा डोळस, ॲड. सुर्यकांत काळे, प्रवीण गटकळ, गुलाब औटी, वसंत कुटे, मुबीन तांबोळी, संतोष बिलेवार, तज्ञ संचालक शांतीश्वर पाटील, ज्योती हांडे, संगिता इंगळे हे संचालक आणि नारायण हाडवळे हे मुख्य कार्यकारी अधिकारी असून सुनिता आवटे या व्यवस्थापक आदी उपस्थित होते. मनिषा वाघोले, प्रणित महाबरे, जयश्री गजरे आणि विद्या बांदल, दैनंदिन ठेव प्रतिनिधी म्हणून प्रमिला औटी, वैशाली कुऱ्हाडे, परिष डागा, ज्ञानेश्वर गाढवे तेजस वाघमारे, बाळासाहेब कराळे आदींनी आयोजनात सहभाग घेतला होता.
शिवनेर नागरी सहकारी पतसंस्थेची स्थापना 1 जून 1995 रोजी झाली आहे. 1 लाख भागभांडवलावर संस्थेच्या कामकाजास सुरुवात झाली होती. सुरुवातीला संस्थेचे भोसरीगाव कार्यक्षेत्र होते. संस्थेचे व्यवहार वाढत गेल्यानंतर संस्थेला पिंपरी चिंचवड महापालिका हद्द कार्यक्षेत्र मंजूर झाले. त्यानंतर संस्थेने जिल्हा कार्यक्षेत्राचे निकष पूर्ण केले. त्यामुळे मार्च 2020 मध्ये संस्थेस संपूर्ण पुणे जिल्हा कार्यक्षेत्र मंजूर झाले. संस्थेस स्थापनेपासून ऑडिट वर्ग अ प्राप्त आहे. संस्थेची कर्जवसुली 100 टक्क्याच्या आसपास राहिली आहे. संस्थेचे 3 हजार 843 सभासद असून भागभांडवल 2 कोटी 28 लाखांचे आहे. संस्थेस सन 2016-17 या वर्षासाठी महाराष्ट्र शासनाचा सहकार भूषण पुरस्कार मिळाला आहे. 2016 पासून दरवर्षी संस्थेस बँको पतसंस्था ब्ल्यु रिबन पुरस्कार प्राप्त झाला आहे. सभासदांसाठी आरोग्य शिबिर, गुणवंत विद्यार्थ्यांचा गौरव असे उपक्रम राबविले जातात. बायपास, किडनी प्रत्यारोपण, ब्रेन ट्युमर अशा आजारांसाठी सभासदाला आर्थिक मदत केली जाते. मयत झालेल्या सभासदाच्या वारसासही मदत केली जाते.
सामाजिक कार्याची दखल घेऊन ज्येष्ठ पत्रकार अनिल कातळे यांची तज्ज्ञ संचालकपदी नियुक्ती करण्यात आली. संचालक मंडळाने एकमताने ही नियुक्ती केली. संस्थेवर काम करण्याची संधी दिल्याबद्दल कातळे यांनी संचालक मंडळाचे आभार मानले. यावेळी गौरी देवरे हीचा एमपीएससी परिक्षेत यश मिळविल्याबद्दल सभासद पाल्य सत्कार करण्यात आला.

एक हात मदतीचा आगळावेगळा फॅशन शो

पिंपरी, पुणे (दि. २ मार्च २०२४) सौंदर्य स्पर्धा आणि फॅशन शो सारखे उपक्रम महिलांच्या आत्मविश्वास वाढीस मदत करतात. फॅशनच्या झगमगत्या दुनियेत केलेले रॅम्पवॉक हे आत्मविश्वास वाढविणारे असते. अशा स्पर्धेतील सहभागी महिलांबरोबरच कॅन्सर पीडित महिला आणि अंध मुलींना रॅम्पवॉक करण्याची संधी विष्णुप्रिया सेव्हेन आर्टस् प्रस्तुत महाराष्ट्र आयकॉन २०२४ “एक हात मदतीचा” या फॅशनशो मध्ये देण्यात आली. अभिनेते देव झुंबरे व छायाचित्रकार गणेश गुरव यांनी चिंचवड येथे महाराष्ट्र आयकॉन २०२४ “एक हात मदतीचा” या संकल्पनेंतर्गत कार्यक्रमाचे आयोजन केले होते. या स्पर्धेत किड्स कॅटेगरीत अध्या गाडे, मिस कॅटेगरीत तनिष्का वाडकर, मिसेस कॅटेगरीत पायल भाकरे, मिस्टर कॅटेगरीत वरुण नेहुल यांनी विजेते पदाचा मुकुट पटकावला.
नारीशक्ती सरिता साने, उद्योजक अशोक धुरी, उत्कुष्ट अभिनेता सचिन दानाई, उत्कुष्ट पत्रकार अनिल वडघुले यांना ‘महाराष्ट्र आयकॉन २०२४’ हे पुरस्कार देऊन गौरविण्यात आले.
सामाजिक कार्यकर्त्या तृप्ती देसाई, पिंपरी चिंचवड पत्रकार संघाचे अध्यक्ष अनिल वडघुले, सुनील हिरूरकर, अपंग केंद्र प्रमुख सुनील चोरडिया यांच्या उपस्थितीत बक्षीस व पुरस्कार वितरण करण्यात आले. स्पर्धेत परीक्षक म्हणून सोनाली कनखरे व मोनिका बांगाळ यांनी काम पाहिले.
विस्तृत विजेता निकाल – किड्स कॅटेगरीत फर्स्ट रनरअप पुर्वी आहिरे व सेकंड रनरअप तनुश्री कडु, मिस कॅटेगरीत फर्स्ट रनरअप ऐश्वर्या नारवणकर व सेकंड रनरअप श्रेया शिंदे, मिसेस कॅटेगरीत फर्स्ट रनरअप श्वेता रायकर व सेकंड रनरअप लक्ष्मी डावखरे आणि मिस्टर कॅटेगरीत फर्स्ट रनरअप आर्यन बजाज व सेकंड रनरअप निखिल फड यांनी बक्षीस पटकावले.
यावेळी सिने अभिनेते केतन लुंकड, प्रशांत तपस्वी, सुभाष खुडे, आदित्यराजे मराठे, ऐश्वर्या दौंड, स्वाती मगर, राहुल जगताप, वसीम बागवान, गायत्री बनसोडे, राहुल रांजणे, महेश कंडपाल, राहुल सोनिगरा, ऋषिकेश साने, अनिकेत कांबळे, अमोल रोडे, राजेंद्र तरस, हेमंत कोठावडे, गणेश सुतार, धीरज कांबळे, ॲड. सुमेध डोंगरे, ओम काळे, तुकाराम डफळ, विनोद साळवे, बाबुराव चौधरी आदी मान्यवर उपस्थित होते.

पिंपरी (दि. २ मार्च २०२४) तीन वर्षांपूर्वी शहरातील भटक्या व मोठ्या जनावरांसाठी टाळगाव चिखली येथे कोंडवाडा (गोठा) प्रकल्प उभारण्यास पिंपरी चिंचवड महानगरपालिकेने मंजुरी दिली होती. यासाठी शहरातील विविध संघटनांनी अनेक वेळा आंदोलने करून प्रशासनाचे या गंभीर प्रश्नाकडे लक्ष वेधले होते. २०२२ मध्ये विश्व हिंदू परिषद आणि इतर संघटनांच्या वतीने महानगरपालिका भवन परिसरामध्ये भटकी जनावरे सोडून आंदोलन केले होते. यावेळी अनेक कार्यकर्त्यांवर गुन्हे देखील दाखल करण्यात आले आहेत. परंतु अद्यापही हा प्रश्न प्रलंबित आहे. पिंपळे सौंदागर येथे श्वान फिरवण्यास आणण्यासाठी उद्यान विकसित करण्यात आले आहे. याचा आनंदच आहे. यासाठी तत्परता दाखवणारे प्रशासन अनेक वर्षापासून रस्त्यावर फिरत असलेल्या गोवंश साठी कोंडवाडा (गोठा) उभारण्यास का दिरंगाई करीत आहे ? असा प्रश्न विश्व हिंदू परिषद, बजरंग दलाचे सह संयोजक कुणाल साठे यांनी उपस्थित केला आहे.
सकल हिंदू समाज पुणे जिल्हा, विश्व हिंदू परिषद, बजरंग दल या संस्थांच्या वतीने प्रसिद्धीस दिलेल्या पत्रात साठे यांनी पुढे म्हटले आहे की, पिंपरी चिंचवड शहरात भटक्या जनावरांचा गंभीर प्रश्न आहे. गोवंशाची तस्करी, चोरी असे अनेक प्रकार यापूर्वी घडले आहेत. मागील दोन वर्षांपूर्वी भोसरी, मोशी परिसरात गोवंशला भूलीचे इंजेक्शन देऊन तस्करी, चोरी करण्याचे प्रकार उघडकीस आले आहेत. अशा भटक्या जनावरांमुळे अनेक ठिकाणी अपघात घडले आहेत. याबाबत वेळोवेळी हिंदुत्ववादी संघटनांनी आंदोलने करून प्रशासनाचे या गंभीर प्रश्नाकडे लक्ष वेधण्याचा प्रयत्न केला आहे. या आंदोलनात सहभागी कार्यकर्त्यांवर अनेक गुन्हे दाखल करण्यात आले आहेत. महानगरपालिकेत प्रशासकिय राजवट सुरू होण्याअगोदर २०२२ मध्ये कार्यकर्त्यांनी मनपा भवन परिसरामध्ये भटकी जनावरे आणून सोडून आंदोलन केले होते. त्यावेळी देखील हा प्रकल्प लवकर मार्गी लावू असे आश्वासन प्रशासनाने शिष्टमंडळास दिले होते. २०१२ पासून भटक्या गोवंशासाठी आणि मोठ्या जनावरांसाठी असा प्रकल्प उभारला जावा ही मागणी होती. तीन वर्षांपूर्वी चिखली येथे प्रकल्प उभारण्यास मंजुरी देखील मिळाली. श्वानांसाठी स्मशानभूमी व पार्क विकसित करणारे प्रशासन, दोन दिवसांपूर्वी झालेल्या स्थायी समितीच्या बैठकीत ३५० कोटी पेक्षा जास्त रुपयांच्या कामांना मंजूरी देणारे प्रशासक तथा मनपा आयुक्त शेखर सिंह हे गोवंश व मोठी भटकी, जखमी जनावरे यांचे संगोपन व संवर्धन करण्यासाठी कोंडवाडा (गोठा) उभारण्यासाठी २०२३ मध्ये मंजुरी देण्यात आलेल्या प्रकल्पास का चालना देत नाहीत ? असा उद्विग्न सवाल सकल हिंदू समाज पुणे जिल्हा, विश्व हिंदू परिषद, बजरंग दल या संस्थांच्या पदाधिकारी व कार्यकर्त्यांनी विचारला आहे. याचे उत्तर प्रशासक तथा आयुक्त शेखर सिंह देतील काय ?
पिंपरी चिंचवड हे वेगाने विकसित होणारे शहर आहे. स्मार्ट सिटी, स्वच्छ सिटी, मेट्रोसिटी म्हणून शहराचा नावलौकिक वाढत आहे. नागरिकांची मागणी नसताना अनेक मोठ्या प्रकल्पांना मंजुरी देऊन पत्रकार परिषद घेऊन प्रसिद्धी मिळविण्याचा हव्यास असणारे प्रशासक तथा आयुक्त शेखर सिंह या प्रश्नावर ठोस भूमिका घेऊन ती पत्रकार परिषदेत जाहीर करावी अशी मागणी हिंदुत्ववादी संघटना, बजरंग दलाच्या वतीने करण्यात आली आहे.

एमआयटी एडीटी विद्यापीठात राष्ट्रीय विज्ञान परिषद

 पुणे-  एमआयटी आर्ट, डिजाईन आणि टेक्नाॅलाॅजी विद्यापीठात राष्ट्रीय विज्ञान दिनानिमित्त आयोजित ‘सायफेस्ट २०२४’ द्वारे राष्ट्रीय विज्ञान परिषदेचा समारोप करण्यात आला. या दोन दिवसांच्या उत्साहपूर्ण विज्ञान मेळ्यासाठी महाराष्ट्रातील ५० हून अधिक महाविद्यालयांतील विद्यार्थी एकत्र आले होते. शिक्षण मंत्रालयाच्या इन्स्टिट्युशन इनोवेशन कौन्सिलच्या सहकार्याने व विद्यार्थी कल्याण विभागाच्या वतीने आयोजित या प्रदर्शनात १०० हून अधिक वैज्ञानिक प्रकल्पांचे प्रदर्शन करण्यात आले, ज्यामध्ये विविध तंत्रज्ञान आणि उत्पादन तयारी स्तरावरील नवकल्पनांवर प्रकाश टाकण्यात आला.एमआयटी एडीटी विद्यापीठाचे कार्याध्यक्ष तथा कुलगुरू प्रा.डॉ. मंगेश कराड यांनी मान्यवरांच्या समवेत या कार्यक्रमाचे उद्घाटन केले. याप्रसंगी प्र.कुलगुरू डाॅ.अनंत चक्रदेव, डाॅ.नचीकेत ठाकूर, डाॅ.विरेंद्र शेटे, डाॅ.मिलिंद ढोबळे, डाॅ.आनंद बेल्हे, डाॅ.सुदर्शन सानप व विद्यार्थी कल्याण विभागाचे सहाय्यक संचालक डाॅ.सुराज भोयार आदी उपस्थित होते. प्रा.डॉ. कराड यावेळी म्हणाले, सायफेस्ट हा विद्यार्थ्यांसाठी केवळ त्यांच्या नवकल्पना मांडण्यासाठीच नव्हे तर त्यांच्या समवयस्कांकडून शिकण्याचा आणि प्रेरित होण्याचा एक टप्पा आहे. वैज्ञानिक विचारातील शाश्वतता आणि अध्यात्माची बांधिलकी ही आमच्या विद्यापीठाची ओळख असून आम्ही विद्यार्थ्यांच्या सर्वांगीन विकासावर कायमच भर देतो.
एमआयटी विश्वशांती गुरुकुल, लेडी झुबेदा कुरेशी इंग्लिश प्रायमरी हायस्कूल, साधना विद्यालय आणि पृथ्वीराज कपूर मेमोरियल हायस्कूलच्या विद्यार्थ्यांनी या प्रदर्शनात उत्कृष्ट प्रकल्प सादर केले, ज्यामुळे त्यांना विजेते घोषित करण्यात आले. यंदाचा सायफेस्ट विज्ञान, टिकाऊपणा आणि अध्यात्म आदी थिमवर आयोजित करण्यात आला होता. ज्याची सांगता स्पेक्ट्रा – कल्चरल नाईटने झाली, ज्यात बँड नाईट, सिंगिंग आणि ग्रुप डान्स यांसारखे मंत्रमुग्ध करणारे कलाअविष्कार विद्यार्थ्यांकडून सादर करण्यात आले.
सायफेस्टचे आयोजक व निमंत्रक, प्रा. डॉ. सुराज भोयर, यांनी याप्रसंगी, प्रदर्शनाला मिळालेल्या उत्स्फूर्त प्रतिसादाबद्दल समाधान व आनंद व्यक्त केला. या प्रदर्शनात विद्यार्थ्यांनी केवळ नाविन्यपूर्ण कल्पना नव्हे तर त्यांच्यात असणाऱ्या आध्यात्मिक वारशासह स्वतःमध्ये असणाऱ्या विविध कलागुणांचे सादरीकरण करताना सर्वांना मने जिंकली, असे अखेरीस डाॅ.भोयार यांनी म्हटले. 

एकनाथ शिंदे मुख्यमंत्री झाल्यानंतर तीनशे कोटी रुपयांचा निधी हडपसर विधानसभा मतदारसंघात आपण आणला

पुणे-अडीच वर्ष उद्धव ठाकरे मुख्यमंत्री असताना हडपसर मतदार संघात एक रुपयाही निधी न आणणाऱ्यांनी आमच्यावर टीका करू नये एकनाथ शिंदे मुख्यमंत्री झाल्यानंतर तीनशे कोटी रुपयांचा निधी राज्य शासन व पुणे महापालिकेच्या माध्यमातून हडपसर विधानसभा मतदारसंघात आणला, या निधीतून डीपी रस्ते व अनेक प्रकल्प मार्गी लागले आहेत विकासकामांमधून  हडपसर परिसर व महंमदवाडी परिसराचा चेहरा मोहरा बदलणार आहे, न केलेल्या कामाचे फुकटचे श्रेय घेणाऱ्यांना करारा जबाब मिलेगा असा इशारा शिवसेना शहरप्रमुख माजी नगरसेवक प्रमोद नाना भानगिरे यांनी दिला.
 राज्य शासन व पुणे महापालिकेच्या माध्यमातून हडपसर विधानसभा मतदारसंघात राबविण्यात येणाऱ्या विविध विकास कामांची माहिती देण्यासाठी महंमदवाडी येथे पत्रकार परिषद आयोजित करण्यात आली होती या पत्रकार परिषदेमध्ये आक्रमक भूमिका भानगिरे यांनी मांडली.

शिवसेना उपजिल्हाप्रमुख अमोल घुले,
उपशहर प्रमुख संतोष रजपूत, विकी माने, विभागप्रमुख अभिमनू भानगिरे, महिला उपशहरप्रमुख स्मिता साबळे, जहीर भाई, सविता सोलंखे आदी यावेळी उपस्थित होते.

 हडपसर मधील वाहतूक कोंडीचा प्रश्न गंभीर बनला आहे हा प्रश्न सोडवण्यासाठी हडपसर मधील तीन उड्डाणपुल पाडून फातिमानगर पासून एकच मोठा उड्डाणपूल व्हावा व मेट्रोचे काम लवकर व्हावे यासाठी केंद्रीय मंत्री नितीन गडकरी यांना भेटून निवेदन दिले आहे, लवकरच मुख्यमंत्री एकनाथ शिंदे यांच्याकडे पाठपुरावा करून येथील वाहतूक कोंडी सोडविण्यासाठी उपाययोजना केल्या जातील असे सांगून प्रमोद नाना भानगिरे पुढे म्हणाले मुंढवा, केशवनगर, मांजरी या भागातील अनेक वर्षापासूनचे प्रलंबित प्रश्न सोडवण्यासाठी निधीची तरतूद केली आहे. फुटबॉल मैदान, तसेच शासनाच्या जागेत क्रिकेट प्रेमींसाठीही मोठे मैदान करण्यासाठी पाठपुरावा सुरू आहे, हडपसर महंमदवाडी परिसरातील डीपी रस्ते व्हावेत यासाठी निधीची मागणी मुख्यमंत्र्यांकडे केली होती मुख्यमंत्र्यांच्या सूचनेनुसार डीपी रस्त्यांसाठी 122 कोटी रुपयांची तरतूद करण्यात आली आहे, हडपसर मधील वाढती गुन्हेगारी व पोलिसांचे संख्याबळ लक्षात घेता येथे आणखी दोन पोलीस स्टेशन व्हावेत म्हणून मुख्यमंत्री आणि गृहमंत्री यांच्याकडे पाठपुरावा केला जाईल, हडपसर विधानसभा मतदारसंघात नगरसेवक नसताना महापालिकेच्या माध्यमातून अनेक विकास कामे सुरू आहेत आम्ही कामे करतो दुसरे श्रेय घेण्यासाठी पुढे येतात अडीच वर्षे त्यांचे मुख्यमंत्री असताना तुम्हाला एकही रुपया आणता आला नाही आणि आता आम्ही कामे करतोय तर त्याचे श्रेय घेता अशा विरोधकांना त्याच भाषेत उत्तर दिले जाईल असा इशाराही यावेळी भानगिरे यांनी दिला. निधीसाठी केलेल्या पाठपुराव्याचे पुरावे त्यांनी पत्रकार परिषदेत देऊन विरोधकांवर टीका केली.

 लोकसभा निवडणुकीत शिवाजीराव आढळराव पाटील हेच उमेदवार असतील व ते निवडूनही येतील असा विश्वास त्यांनी व्यक्त केला तर विधानसभा निवडणुकीत संधी मिळाली तर दहा वर्षात हडपसर विधानसभा मतदारसंघाचा कायापालट करणार असा दावाही नाना भानगिरे यांनी केला आहे.

 “माजी नगरसेवक असताना विकास कामांचा डोंगर…
हडपसरमधील प्रलंबित प्रश्न सोडविण्यासाठी खासदार, आमदार अपयशी ठरले असताना शिवसेना शहर प्रमुख प्रमोद नाना भानगिरे यांनी माजी नगरसेवक असताना देखील मोठ्या प्रमाणात निधी आणून नागरिकांची कामे केली आहेत हडपसर विधानसभा मतदारसंघात प्रथमच एवढ्या मोठ्या प्रमाणात निधी भानगिरे यांच्या माध्यमातून मिळाल्याने अनेक विकास कामे मार्गी लागली आहेत, भानगिरे यांच्या कार्यालयात जनता दरबार भरतो व तेथे नागरिकांची कामे कोणतीही कारणे न देता तातडीने सोडविली जातात.

बारामती -रोजगारनिर्मितीकडे सरकारने लक्ष दिल्याने त्यांचे आभार मानतो. राज्यात रोजगार निर्माण करण्याची गरज आहे. राजकारण बाजुला राहिले. पण, मुख्यमंत्री आणि त्यांच्या सहकाऱ्यांना या मुद्द्यावर आमची साथ राहील, असे खासदार शरद पवार यांनी बारामतीमधील नमो महारोजगार मेळाव्यात म्हटले आहे.

बारामती येथे विद्या प्रतिष्ठाणच्या संस्थेत नमोरोजगार मेळावा आयोजित करण्यात आला आहे. या कार्यक्रमाला मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, शरद पवार, सुप्रिया सुळे, नीलम गोऱ्हे इत्यादी नेते उपस्थित होते. शरद पवार यावेळी आपल्या भाषणात म्हणाले की, राज्याची रोजगार निर्मिती करण्याची क्षमता आहे. या मुद्द्यावर आमची सरकारला साथ असेल

शरद पवार म्हणाले की, विद्या प्रतिष्ठानच्या माध्यमातून अनेक तरुण- तरुणींना नोकऱ्या मिळाल्या. देशात मोठ्या प्रमाणाच बेरोजगारीचा मोठा प्रश्न निर्माण झाला आहे. हाच प्रश्न ओळखून आता सरकार तरुणांना नोकऱ्या देण्याचे ठरवले आहे. तरुणांना रोजगार मिळावा म्हणून प्रयत्न केले. त्यासाठी मी त्यांचे अभिनंदन करतो आणि आभारदेखील मानतो.

शरद पवार म्हणाले की, आतापर्यंत विद्या प्रतिष्ठानच्या मार्फत अनेक तरुणांना रोजगार दिला आहे. त्यासाठी वेगवेगळ्या क्षेत्रातील लोकांची मदत घेतली आहे. आता विद्या प्रतिष्ठानमधे आर्टिफिशियल इंटेलिजन्सचे पहिले महाविद्यालय सुरु होत आहे. राजकारण आपल्या जागी होत असते. पण तरुणांना नवीन रोजगार देण्यासाठी सर्वांनी एकत्र यायला हवे. मी मुख्यमंत्री आणि त्यांच्या सहकार्यांना खात्री देऊ इच्छितो की विकासासाठी आम्ही सदैव तुमच्या पाठिशी राहू, असेही त्यांनी स्पष्ट केले आहे.

पुणे, दि. २ मार्च २०२४: महापारेषण कंपनीच्या पिरंगुट २२०/२२ केव्ही अतिउच्चदाब उपकेंद्रातील पॉवर ट्रान्सफॉर्मरच्या दुरुस्तीच्या कामासाठी रविवारी (दि. ३) सकाळी ८ ते दुपारी २ वाजेपर्यंत मुळशी तालुक्यातील काही गावातील सुमारे ६ हजार ग्राहकांचा वीजपुरवठा बंद राहणार आहे.

याबाबत माहिती अशी की, महापारेषणच्या पिरंगुट २२०/२२ केव्ही उपकेंद्रातील ५० एमव्हीए क्षमतेच्या पॉवर ट्रान्सफॉर्मरमध्ये बिघाड आढळून आला आहे. त्याच्या दुरुस्तीचे काम रविवारी सकाळी सुरु करण्यात येणार आहे. त्यासाठी या उपकेंद्रातून निघणाऱ्या महावितरणच्या पाच वीजवाहिन्यांचा वीजपुरवठा बंद ठेवावा लागणार आहे. यामध्ये ४ वीजवाहिन्या उच्चदाब वीजग्राहकांसाठी आहेत तर एका वीजवाहिनीवरून घोटावडे, भरे, रिहे, कातरखडक, पिंपोली, मुलखेड, खानेकर वस्ती, भेगडेवाडी, ओझरकरवाडी, आंधेले गाव, बोरकरवाडी, आमलेवाडी, मातरवाडी, पडळकरवाडी, लांडगेवाडी, केमसेवाडी, खांबोली, गोडंबीवाडी एक व दोन, शेळकेवाडी, देवकरवाडी आदी गावे व वाड्यावस्त्यांना वीजपुरवठा केला जातो. त्यामुळे सुमारे ६ हजार लघुदाब व चार उच्चदाब ग्राहकांचा वीजपुरवठा रविवारी सकाळी ८ ते दुपारी २ वाजेपर्यंत बंद ठेवण्यात येणार आहे. या कालावधीत सहकार्य करावे असे आवाहन महावितरण व महापारेषणकडून करण्यात आले आहे.