पुणे: येत्या लोकसभा सार्वत्रिक निवडणुकीत मतदानाचा टक्का वाढविण्यासाठी जिल्हा प्रशासनाने केलेल्या आवाहनाला प्रतिसाद देत सेवानिवृत्त पोलीस वेल्फेअर असोसिएशन आणि मित्र संघटनेच्यावतीने सेवानिवृत्त पोलीस अधिकारी-कर्मचाऱ्यांकडून बाईक रॅलीद्वारे मतदान जागृती करण्यात आली.

पुणे महानगरपालिका आयुक्त डॉ. राजेंद्र भोसले, सेवानिवृत्त पोलीस वेल्फेअर असोसिएशनचे अध्यक्ष भानुप्रताप बर्गे, उपायुक्त राजीव नंदकर आदी यावेळी उपस्थित होते.

आयुक्त डॉ. भोसले यांच्या उपस्थितीत महानगरपालिकेच्या प्रांगणातून रॅलीची सुरुवात झाली. यावेळी मतदानाची शपथ घेण्यात आली. मतदानाच्या दिवशी सुट्टी साजरी न करता प्रत्येकाने राष्ट्रीय कर्तव्य म्हणून मतदानाचा हक्क बजवावा, असे आवाहन
डॉ. भोसले यांनी यावेळी केले.

सीमेवरील सैनिक २४ तास ३६५ दिवस आपल्या व देशाच्या संरक्षणासाठी अत्यंत उच्च तापमानामध्ये तसेच थंडी, पावसामध्ये तैनात असतो व आपले कर्तव्य बजावत असतो त्याचप्रमाणे आपणदेखील मतदानासाठी थोडा वेळ काढून मतदानाचे कर्तव्य आणि हक्क बजवावा असे आवाहन श्री.बर्गे यांनी यावेळी केले.

रॅलीमध्ये सुमारे ५०० दुचाकी स्वार सहभागी झाले. घोषणा देत आणि मतदारांना आवाहन करत शनिवार वाडा, लक्ष्मी रोड, अलका टॉकीज, सेनादत्त पोलीस चौकी, नळ स्टॉप, एस एन डी टी कॉलेज, लॉ कॉलेज रोड, भांडारकर रोड, कृषी महाविद्यालय, संचेती हॉस्पिटल, आरटीओमार्गे आंबेडकर चौकात रॅलीचा समारोप झाला.

पुणे: “जन्माला येणारी प्रत्येक व्यक्ती परिपूर्ण नसते. आपल्याला केवळ शारीरिक विकलांगपणा दिसतो. मात्र, वैचारिक दुर्बलता, विकृत मानसिकता हेही विकलांग असण्याचे लक्षण आहे. शारीरिक व्यंग असलेल्या व्यक्तींना ‘दिव्यांग’ संबोधून त्यांना सन्मान दिला गेला आहे. त्यांना मुख्य प्रवाहात आणून सन्मानाने जगण्याची संधी देण्याला आपण प्राधान्य द्यायला हवे,” असे प्रतिपादन राष्ट्रीय स्वयंसेवक संघाचे केंद्रीय कार्यकारिणी सदस्य सुरेश उर्फ भैय्याजी जोशी यांनी केले.

दिव्यांग कल्याणकारी शिक्षण संस्था व संशोधन केंद्र, सक्षम पश्चिम महाराष्ट्र आणि क्रिडा भारती पश्चिम महाराष्ट्र यांच्या संयुक्त विद्यमाने दिव्यांग विद्यार्थ्यांची यशोगाथा व ३५ वर्षापासून संस्थेची यशस्वी वाटचाल असलेल्या ‘कथा आत्मनिर्भरतेची’ व ‘विश्वस्त’ या पुस्तकाचे प्रकाशन, तसेच ‘१० मीटर रायफल शूटींग रेंज’ स्पर्धेचे उद्घाटन भैय्याजी जोशी यांच्या हस्ते झाले. वानवडी येथील संस्थेच्या मैदानावर या कार्यक्रमाचे आयोजन केले होते. 
कार्यक्रमात ‘सक्षम’चे अखिल भारतीय संघटन मंत्री चंद्रशेखरजी, क्रिडा भारतीचे अखिल भारतीय महामंत्री राज चौधरी, संस्थेचे अध्यक्ष माजी खासदार प्रदीप रावत, कार्याध्यक्ष अॅड. मुरलीधर कचरे, ‘सक्षम’चे महेश टांकसाळे, दत्ता लखे, क्रिडा भारतीचे विजय पुरंदरे, शैलेश आपटे आदी उपस्थित होते. तत्पूर्वी, येथील विद्यार्थ्यांनी सांस्कृतिक व विविध गुणदर्शन कार्यक्रम सादर केले. गुणवंतांचा सत्कार, तसेच काही दिव्यांग विद्यार्थ्यांना व्हीलचेअर, कृत्रिम पाय, कॅलिपर आदी साहित्य प्रदान करण्यात आले.

भैय्याजी जोशी म्हणाले, “दृष्टिकोन, मानसिकता घडविणाऱ्या सामाजिक संस्थांना व मंडळीना अशी पुस्तके मार्गदर्शक ठरतील. दिव्यांगांसाठी कार्यरत संस्थांना समाजातील दानशूर नेहमीच मदतीसाठी पुढे येतात. परिस्थितीला सामोरे जात त्यावर मात करून स्वताच्या अस्तित्व निर्माण करणार्‍या या मुलांचा अभिमान वाटतो.”

राज चौधरी म्हणाले, “समाजातील दिव्यांग घटकांना आत्मविश्वास देण्यासाठी ही संस्था प्रयत्न करते. समाजिक समरसता इथे नसानसात आहे. प्रत्येकाने नागरी कर्तव्याचे पालन केले पाहिजे. एकदिलाने राहायला हवे. स्वयंपूर्ण व आत्मनिर्भर जीवन जगण्याला प्राधान्य हवे. दिव्यांगांच्या मदतीसाठी आपण पुढे आले पाहिजे.”

स्वागत प्रास्ताविकात अॅड. मुरलीधर कचरे म्हणाले, “संस्थेचे हजारो मुलांना घडवलेले आहे. विकलांगतेवर मात करून खऱ्या अर्थाने दिव्यांग होत यश संपादन करत आहेत. या कार्याचा लेखाजोखा मांडणारे हे पुस्तक आहे. मुलांचा सर्वांगाने विकास होण्यासाठी संस्थेचे कार्य यापुढेही मोठ्या जोमाने सुरू राहील.”

संजय भुजबळ यांनी सूत्रसंचालन केले. मुख्याध्यापिका शिवानी सुतार यांनी आभार मानले. कार्यक्रमास निमंत्रित तसेच संपूर्ण महाराष्ट्रातून आलेले संस्थेचे माजी दिव्यांग विद्यार्थी व त्यांचे कुटुंबीय दिव्यांग विद्यार्थ्यांचे पालक असे एकूण पाचशे लोक उपस्थित होते. कार्यक्रमानंतर संस्थेमध्ये सर्वांसाठी स्नेहभोजन आयोजिले होते.
कार्यक्रम यशस्वी होण्यासाठी सक्षमचे सर्व कार्यकर्ते गहीनाथ नलावडे, शिवाजी भेगडे, कुणाल मिठारी, दत्ता लखे, अशोक सोनवणे, राहुल नागटिळक, कृषीका इंदुलकर त्याचबरोबर क्रीडा भारतीचे कार्यकर्ते विजय पुरंदरे, शैलेश आपटे, दीपक मेहंदळे, संजय रजपूत, अर्जुन पुरस्कार विजेती शकुंतला खटावकर व दिव्यांग कल्याणकारी संस्थेचे सेवक यांनी परिश्रम घेतले.

निमा प्रसूती स्त्रीरोग संघटनेतर्फे ‘सुश्रृती : द वुम्ब अँड वुंड सागा’ या आंतरराष्ट्रीय परिषद
पुणे : “वैद्यकीय व्यावसायिक म्हणून स्वतःची योग्यता उंचावत न्यावी. कारण ज्ञान आपल्याला निर्भय करते आणि विवेक शिकवते,” असे प्रतिपादन नॅशनल कमिशन फॉर इंडियन सिस्टीम ऑफ मेडिसीनच्या (एनसीआयएसएम) बोर्ड ऑफ द एथिक्स अँड रजिस्ट्रेशन फाॅर इंडियन सिस्टीम ऑफ मेडिसीनचे अध्यक्ष डॉ. राकेश शर्मा यांनी केले. 
नॅशनल इंटिग्रेटेड मेडिकल असोसिएशन (निमा), ऑब्स्ट्रेटिक अँड गायनॉकॉलॉजिकल सोसायटी (ओबीजीवाय), महाराष्ट्र, सुमतीबाई शहा आयुर्वेद महाविद्यालय आणि भारती विद्यापीठ काॅलेज ऑफ आयुर्वेद यांच्या संयुक्त विद्यमाने आयोजित आंतरराष्ट्रीय परिषदेच्या उद्घाटनप्रसंगी ते प्रमुख पाहुणे म्हणून बोलत होते. तीन दिवसांची ही परिषद मांजरी येथील स्वोजस पॅलेस येथे आयोजित करण्यात आली होती. या परिषदेस ८००हून अधिक वैद्यकीय व्यावसायिक सहभागी झाले होते.
याप्रसंगी ‘निमा’ सेंट्रल कौन्सिलचे अध्यक्ष डॉ. आशुतोष कुलकर्णी, ‘ओबीजीवाय’च्या अध्यक्ष डॉ. कामिनी धीमान, डॉ.‌ एस.‌ एफ. पाटील, श्री. अनिल गुजर, श्री. अरुण गुजर, डॉ. तुषार सूर्यवंशी, डॉ. मंदा घोरपडे, डॉ. सुहास हेर्लेकर, डॉ. मनोज गायकवाड, डॉ. विष्णु बावणे, डॉ. प्रियंका नाकाडे, डॉ. मनोज चौधरी आदी मान्यवर व्यासपीठावर उपस्थित होते. या आंतरराष्ट्रीय परिषदेचे आयोजक सचिव डॉ. सुजित शिंदे हे होते. डॉ. प्रशांत दळवी, डॉ. राहुल गरुडकर, डॉ. प्रदीप मुसळे, डॉ. प्रकाश दैठणकर, डॉ. उमेश लूनावत, डॉ. विवेक जोग, डॉ. हृषिकेश वाघमारे, डॉ. अमोल साबळे, डॉ. कमलाकर गजरे, डॉ. ज्योती गवळी, डॉ. तृप्ती गावडे, डॉ. रितेश दामले यांनी परिषदेच्या आयोजनात मोलाचे योगदान दिले.
उद्घाटन सत्राच्या सोहळ्यात ज्येष्ठ वैद्यकीय व्यावसायिक, अध्यापक डॉ. पुष्पा तुळपुळे यांचा जीवनगौरव सन्मान देऊन गौरव करण्यात आला. डॉ. अर्पिता शहा लिखित ग्रंथाचे, ‘सुश्रुती २०२४’ या स्मरणिकेचे प्रकाशनही यावेळी करण्यात आले. डॉ.‌ कामिनी धीमान यांनी ‘ओबीजीएन’च्या कार्याची, विविध उपक्रमांची माहिती दिली. डॉ. मंदा घोरपडे, डॉ. तुषार सूर्यवंशी, डॉ. आशुतोष कुलकर्णी यांचीही भाषणे झाली. डॉ. तुळपुळे यांनीही मनोगत व्यक्त केले. 
डॉ.‌ राकेश शर्मा यांनी आपल्या भाषणात स्त्रीशक्तीचा गौरवपूर्ण उल्लेख केला. ‘यत्र नार्यस्तु पूज्यन्ते रमन्ते तत्र देवता’ ही आपली परंपरा आहे. स्त्रियांनी आपले कर्तृत्व जीवनाच्या प्रत्येक क्षेत्रात सिद्ध केले असल्याचे त्यांनी नमूद केले. 
डॉ. राकेश शर्मा पुढे म्हणाले, “वैद्यकीय शाखेच्या विद्यार्थ्यांना इंटर्नशिप समस्या वाटू नये. प्रत्येकाला ती अनिवार्य आहे. पदव्युत्तर पदवीचे विद्यार्थी काॅलेजमध्ये फिरकत नाहीत, हेही अयोग्य आहे. अशा ‘ऑन पेपर पोस्ट ग्रॅज्युएट स्टूडेंटस’वर बंदी घातली पाहिजे. आयुर्वेदाच्या वैद्यकीय व्यावसायिकांनी प्राचीन ज्ञानपरंपरेचा ठेवा जपला आणि वृद्धिंगत केला पाहिजे.” 
डॉ. हेर्लेकर यांनी स्वागत-प्रास्ताविक केले. डॉ.‌ अर्पिता शहा व डॉ. अनुजा कुलकर्णी यांनी सूत्रसंचालन केले. डॉ. विभावरी वैद्य यांनी धन्वंतरी स्तवन केले. डॉ. अजयराज बाळ व डॉ. सुचिता राजेभोसले यांनी आभार मानले. 

पुणेः विद्यार्थ्यांना कायमच गुणवत्तापूर्वक शिक्षण देण्यासाठी कटीबद्ध असणाऱ्या एमआयटी आर्ट, डिजाईन आणि टेक्नॉलॉजी विद्यापीठाच्या शिरपेचात आणखी एक मानाचा तुरा खोवला गेला आहे. एमआयटी एडीटी विद्यापीठाने नुकतीच आपली शैक्षणिक कटिबद्दता सिद्ध करताना क्यूएस जागतिक विद्यापीठ क्रमवारी-२०२४(वर्ल्ड युनिव्हर्सिटी रँकिंग) च्या प्रतिष्ठित कला आणि डिझाइन श्रेणीमध्ये १५०-२०० अशा प्रभावी रँक बँडसह स्थान मिळवले आहे.या यशामुळे एमआयटी एडीटी विद्यापीठाने जागतिक स्तरावर उच्च शिक्षणातील अग्रगण्य संस्था म्हणून आपली प्रतिष्ठा मजबूत केली आहे. क्युएस वर्ल्ड युनिव्हर्सिटी रँकिंग हे शैक्षणिक गुणवत्तेचे आणि संस्थात्मक कार्यक्षमतेचे महत्त्वपूर्ण मापदंड म्हणून ओळखले जाते, जे शिक्षणातील उत्कृष्टतेचे मूल्यांकन आणि प्रोत्साहन देण्यासाठी महत्वपूर्ण काम करते.
एमआयटी एडीटी विद्यापीठ संस्थेचे कार्यकारी अध्यक्ष तथा कुलगुरू प्रा.डॉ.मंगेश कराड यांच्या दूरदर्शी नेतृत्वाखाली आणि कार्यकारी संचालिका प्रा.डॉ.सुनिता कराड यांच्या मार्गदर्शनाखाली आर्ट, डिजाईन आणि टेक्नॉलॉजी या शाखांत जागतिक दर्जाचे नाविण्यपूर्ण शिक्षण पुरवत आहे. त्यामुळे विद्यापीठाला या रँकिंगमध्ये स्थान मिळाल्याने विद्यार्थ्यांच्या पालकांसह राज्यभरातून एमआयटी एडीटी विद्यापीठावर कौतुकाचा वर्षाव होत आहे.

एमआयटी एडीटी विद्यापीठ डॉ. रामचंद्र पुजेरी, डॉ. मोहित दुबे आणि डॉ. अनंत चक्रदेव हे तीन प्र.कुलगुरू तसेच शिक्षक व शिक्षकेतर कर्मचारी यांच्या कष्टांमुळे यशाची विविध शिखरे पादक्रांत करत आहे. त्यात विद्यापीठाला क्यूएस वर्ल्ड युनिव्हर्सिटी रँकिंग मध्ये स्थान मिळणे आमच्यासाठी अभिमानाची गोष्ट असून ती सर्वांच्या कष्टाची पावतीच आहे. या रँकिंगसाठी सातत्याने पाठपुरावा करणाऱ्या डॉ.विरेंद्र भोजवानी व डॉ.राकेश सिद्धेश्‍वर यांचेही खूप अभिनंदन!
-प्रा.डॉ.मंगेश कराड,
कार्यकारी अध्यक्ष तथा कुलगुरू,
एमआटी एडीटी विद्यापीठ, पुणे.

पुणे, दि. ५: जिल्ह्यात तिसऱ्या टप्प्यात बारामती लोकसभा मतदार संघात ७ मे रोजी तर चौथ्या टप्प्यात १३ मे रोजी मावळ, पुणे व शिरुर मतदार संघात मतदान होत असून त्या अनुषंगाने सर्व मतदान केंद्रावर किमान आश्वासित तसेच अन्य सुविधांची व्यवस्था करण्यात येत असल्याची माहिती जिल्हाधिकारी डॉ. सुहास दिवसे यांनी दिली.

मतदार हा लोकशाहीच्या केंद्रस्थानी असून त्याच्या सोयीसाठी आवश्यक सुविधा उपलब्ध करुन देण्याचे भारत निवडणूक आयोगाचे निर्देश आहेत. त्यामध्ये आश्वासित किमान सुविधा, अन्य सुविधा, दिव्यांग मतदार, ज्येष्ठ मतदार, महिला मतदार आदींसाठी विविध सुविधा देण्यात येणार आहेत.

मतदान केंद्र २ किलोमीटरच्या परिसरात आणि तळमजल्यावर उभारण्यात आलेली आहे. शारीरिकदृष्ट्या विकलांग मतदार (पीडब्ल्यूडी), ज्येष्ठ मतदार यांना मतदानासाठी सुलभपणे जाता यावे यासाठी मतदान केंद्राच्या ठिकाणी रॅम्पची सुविधा करण्यात आली आहे.

मतदान केंद्रामध्ये मतदान अधिकारी, कर्मचारी, उमेदवारांचे मतदान प्रतिनिधी, शारीरिकदृष्ट्या विकलांग मतदार, गर्भवती महिला, ज्येष्ठ नागरिक यांना बसण्यासाठी पुरेशा प्रमाणात खुर्ची, बाकडे, टेबल आदी फर्निचरची व्यवस्था करण्यात आली आहे. मतदान केंद्रात पुरेशा प्रकाशासाठी विद्युतव्यवस्था करण्यात आली आहे. दुर्गम भागात वीजजोड नसल्यास त्या ठिकाणी बॅटरीचालित एलईडी, चार्जिंगचे दिवे आदी व्यवस्था करण्यात येणार आहे. मतदान केंद्राच्या परिसरात मतदान केंद्रात उपलब्ध सुविधांबाबत माहिती दर्शविणारे चिन्हे (साईनेज) लावण्यात येतील.

उन्हाळा लक्षात घेता पिण्‍याच्या पाण्याची व्यवस्था आणि सावली नसल्यास मंडपाची व्यवस्था करण्यात येत आहे. महिला व पुरुषांसाठी पुरेशा पाण्याच्या उपलब्धतेसह स्वतंत्र शौचालये, महिला मतदारांसह आलेल्या बालकांसाठी पाळणाघरची सुविधा आहे. मतदारांना आपले मतदान केंद्र क्रमांक, मतदार यादी भाग मधील अनुक्रमांक शोधण्यासाठी मदत करण्यास मतदान केंद्रस्तरीय अधिकारी व कर्मचाऱ्यांचा समावेश असलेले मतदान मदत कक्ष उभारण्यात येणार आहेत.

याशिवाय औषधोपचार किट, मतदान केंद्रावर शारीरिक विकलांग मतदार, ज्येष्ठ नागरिक मतदार यांना मदत करण्यासाठी तसेच केंद्रावरील रांगांचे व्यवस्थापनात सहाय्य करण्यासाठी स्वयंसेवक, ज्येष्ठ, दिव्यांग, हालचाल करण्यास अक्षम (लोकोमोटिव डिसेबल्स) आदींना मतदानाच्या दिवशी सार्वजनिक वाहतूक सेवेचा मोफत पास देण्यात येईल. सार्वजनिक वाहतूक सेवा उपलब्ध नसल्यास त्यांना अन्य माध्यमातून घरुन मतदान केंद्रापर्यंत आणणे व मतदानानंतर घरी सोडण्याची व्यवस्था उपलब्ध केली जाईल.

मतदान केंद्रावर महिलांसाठी एक, पुरुषांसाठी एक आणि ज्येष्ठ व शारीरिक विकलांग मतदारांसाठी एक अशा तीन रांगा राहतील, असेही जिल्हा निवडणूक प्रशासनाच्यावतीने कळविण्यात आले आहे.

पुणे, दि. ५: मावळ लोकसभा मतदार संघात ८५ वर्षावरील ज्येष्ठ, दिव्यांग नागरिक तसेच अत्यावश्यक सेवेतील अधिकारी कर्मचाऱ्यांसाठी टपाली मतदानाची सुविधा तसेच मतदान कर्तव्यावरील अधिकारी कर्मचाऱ्यांसाठी मतदान सुविधा केंद्रे स्थापन करण्यात आली असून या मतदानाचे वेळापत्रक निवडणूक निर्णय अधिकारी दीपक सिंगला यांनी जाहीर केले आहे.

मावळ तसेच चिंचवड विधानसभा मतदार संघात ८५ वर्षावरील ज्येष्ठ, दिव्यांग नागरिक यांच्या घरी जाऊन मत नोंदवून घेण्याची प्रक्रिया ८ व ९ मे रोजी तर निवडणूक कर्तव्यावरील अधिकारी कर्मचाऱ्यांचे मतदान सुविधा केंद्रावर (एफसी) ५ मे व ७ ते ९ मे दरम्यान नोंदवून घेण्यात येणार आहे.

पिंपरी विधानसभा मतदार संघात ८५ वर्षावरील ज्येष्ठ, दिव्यांग नागरिक यांच्या घरी जाऊन मत नोंदवून घेण्याची प्रक्रिया ७ व ८ मे रोजी तर निवडणूक कर्तव्यावरील अधिकारी कर्मचाऱ्यांचे मतदान सुविधा केंद्रावर ७ ते ९ मे
दरम्यान नोंदवून घेण्यात येणार आहे, असेही मावळ लोकसभा मतदार संघाच्या निवडणूक निर्णय अधिकारी कार्यालयाच्यावतीने कळविण्यात आले आहे.
0000