पुणे-राज्य निवडणूक आयोगाने राज्यातील १७ जिल्ह्यांतील १२ नगर परिषदा आणि चार नगर पंचायतींच्या निवडणूक कार्यक्रम जाहीर केला आहे. त्यामध्ये पुणे जिल्ह्यातील आठ नगर परिषदा आणि दोन नगर पंचायतींचा समावेश असल्याची माहिती जिल्हा प्रशासनाकडून देण्यात आली.
पुणे जिल्ह्यातील बारामती ही अ-वर्गातील नगरपरिषद, तर खेडमधील चाकण व दौंड या ब-वर्गातील नगरपरिषदांचा समावेश आहे. तसेच क-वर्गातील नगर परिषदांमध्ये खेडमधील राजगुरुनगर व आळंदी आणि इंदापूर, पुरंदरमधील जेजुरी, सासवड आणि शिरूर या नगरपरिषदांचा समावेश आहे. नव्याने निर्मित झालेल्या आंबेगावमधील मंचर आणि बारामतीमधील माळेगाव नगरपंचायतीसाठी निवडणूक जाहीर झाली आहे, असेही जिल्हा प्रशासनाकडून सांगण्यात आले.
दरम्यान, निवडणुकीसाठी ५ जुलै रोजी मतदार याद्या अंतिम करण्यात आल्या आहेत. या निवडणुकीसाठी २० जुलैला निवडणूक अधिसूचना जाहीर करण्यात येणार आहे. त्यानंतर २२ ते २८ जुलै दरम्यान अर्ज दाखल करता येणार आहे. २३ व २४ जुलै रोजी सुटी असल्याने अर्ज स्वीकारण्यात येणार नाहीत. २९ जुलै रोजी अर्जांची यादी प्रसिद्ध करण्यात येणार आहे. अर्जांची छाननी २९ जुलै रोजी करण्यात येणार आहे. ४ ऑगस्ट रोजी अर्ज मागे घेण्याची तारीख असून १८ ऑगस्टला मतदान, तर १९ ऑगस्टला मतमोजणी होणार आहे.
