मुंबई- मागील काही दिवसातील विविध प्रकारचे निर्णय आणि विधानपरिषदेची जागा, इतर अधिकाराच्या प्रश्नावरून काँग्रेस मंत्र्यांमध्ये नाराजी पसरली आहे. यासंदर्भात काँग्रेसचे नेते सोमवारी मुख्यमंत्री उद्धव ठाकरे यांची भेट घेणार आहेत. या भेटीदरम्यान काँग्रेस नेत्यांची नाराजी मुख्यमंत्र्यांसमोर मांडली जाणार आहे. मुख्यमंत्री उद्धव ठाकरे यांनी सोमवारी आपल्याला भेटीसाठी वेळ दिला असल्याची माहिती काँग्रेसचे प्रदेशाध्यक्ष व महसूल मंत्री बाळासाहेब थोरात यांनी दिली.
थोरात म्हणाले, की आमचे काही विषय आहेत त्यासंदर्भाने चर्चा करण्यासाठी मुख्यमंत्री उद्धव ठाकरे यांच्याकडे वेळ मागितली होती. त्यामुळे आज सकाळी मुख्यमंत्री यांचा फोन आला आणि त्यांनी आपल्याला सोमवारी वेळ देणार असल्याचे सांगितले आहे. सोमवारी मी आणि मंत्री अशोक चव्हाण मुख्यमंत्र्यांची भेट घेणार आहोत.
शुक्रवारी दादर येथील बाळासाहेब ठाकरे स्मारकात काँग्रेसच्या अनेक नेत्यांनी मुख्यमंत्र्याची भेट घेतली होती. परंतु, या भेटीत काँग्रेसमधील नाराजीवर कोणती चर्चा झाली नाही, असे स्पष्टीकरण काँग्रेसकडून देण्यात आले. त्यावेळी केवळ मंत्री सुनील केदार यांच्या विभागातील कामाच्या निमित्ताने मुख्यमंत्र्यांच्या भेटीला गेलो होतो. मात्र , महाराष्ट्रविकास आघाडीतील घटक पक्ष म्हणून चर्चा बाकी असून ती सोमवारी केली जाणार असल्याची माहिती थोरात यांनी दिली.
विधान परिषदेच्या जागेवरून काँग्रेसमध्ये मोठ्या प्रमाणात नाराजीचा सूर आहे. दुसरीकडे महामंडळाच्या जागावाटपाचा निर्णय ही घेतला जात नसल्याने यावरुनही काँग्रेसमध्ये मागील अनेक दिवसांपासून नाराजी आहे. मुख्यमंत्र्यांनी तातडीने यासंदर्भात निर्णय घ्यावेत.आघाडी म्हणून काही निर्णय घेताना काँग्रेसला डावलले जात असल्याची भावना काँग्रेस नेत्यांमध्ये निर्माण झाली आहे. यावरही सोमवारी होणाऱ्या भेटीत चर्चा केली जाणार असल्याचे सांगण्यात आलेय.