मुंबई : महापरिनिर्वाण दिनाच्या पार्श्वभूमीवर दादर येथील चैत्यभूमीला भेट देऊन तेथे करण्यात आलेल्या सोयी सुविधांची पाहणी केली. याप्रसंगी महामानव भारतरत्न डॉ. बाबासाहेब आंबेडकर तसेच वंदनीय हिंदुहृदयसम्राट शिवसेनाप्रमुख बाळासाहेब ठाकरे यांच्या शिवतीर्थावरील स्मृतिस्थळाचे दर्शन घेऊन विनम्रतापूर्वक अभिवादन केले.
महापरिनिर्वाण दिनानिमित्त दरवर्षी देशभरातील लाखो अनुयायी दादर येथील चैत्यभूमीवर जमतात. त्यांच्यासाठी करण्यात आलेल्या सोयी सुविधांचा आज प्रत्यक्ष आढावा घेतला. यानिमित्ताने येणाऱ्या अनुयायांची कोणतीही गैरसोय होऊ नये, तसेच गर्दीचे योग्य नियोजन व्हावे यासाठी मुंबई महानगरपालिका आयुक्तांना निर्देश दिले.
तसेच यानिमित्ताने उभारण्यात आलेल्या निवास व्यवस्थेची पाहणी करून उपस्थितांशी संवाद साधला. महापरिनिर्वाण दिनानिमित्त येणाऱ्या ५-६ लाख अनुयायांना यंदा बाळासाहेबांची शिवसेना पक्षाकडून विनामूल्य भोजन देण्यात येणार आहे. शिवाजी पार्क समोरील बीएमसी जिमखाना परिसरातही सोय उपलब्ध करून देण्यात येणार असून त्या जागेची पाहणी देखील यासमयी केली.
याप्रसंगी राज्याचे शालेय शिक्षणमंत्री दीपक केसरकर, आमदार सदा सरवणकर, महापालिका आयुक्त इक्बाल सिंह चहल, अतिरिक्त आयुक्त आशिष शर्मा, डॉ. बाबासाहेब आंबेडकर महापरिनिर्वाण दिन समन्वय समितीचे सरचिटणीस नागसेन कांबळे, माजी नगरसेवक समाधान सरवणकर, महिला विभाग संघटक प्रिया गुरव, गिरीश धानूरकर तसेच बाळासाहेबांची शिवसेना पक्षाचे पदाधिकारी व कार्यकर्ते उपस्थित होते.