पुणे : धुरंधर राजकारणपटू, स्थितप्रज्ञ नेता, उत्कृष्ट संसदपटू अशा माजी पंतप्रधान भारतरत्न अटलबिहारी वाजपेयी यांच्या व्यक्तीमत्वाच्या विविध पैलूंबरोबरच लेखक, कवी ही देखील त्यांची एक विशेष ओळख होती. त्यामुळे विविध प्रकारची गोष्टींची, कवितांची मराठी-इंग्रजी पुस्तके संकलित करुन १०० पुस्तकांच्या सहाय्याने साकारलेल्या अटलजींच्याच चित्रातून त्यांना आगळीवेगळी आदरांजली अर्पण करण्यात आली.
माजी पंतप्रधान भारतरत्न स्व. अटलबिहारी वाजपेयी यांच्या ९७ व्या जयंतीनिमित्त निनाद पुणे, निनाद पतसंस्था व कलातीर्थ संगीत-चित्रकला विद्यालयार्फे सदाशिव पेठेतील खुन्या मुरलीधर मंदिर चौकातील अटल कट्टा येथे हे चित्र साकारण्यात आले होते. यावेळी निनाद पतसंस्थेचे उदय जोशी व सर्व संचालक, कलातीर्थ संगीत-चित्रकला विद्यालयाचे अमोल काळे, महेश कुलकर्णी, आनंद सराफ, शुभदा जोशी, रामलिंग शिवणगे, संजय देशपांडे, अशोक कुलकर्णी, सुनिता शिवणगे, अप्पा जोगळेकर आदी उपस्थित होते. कलातीर्थच्या विद्यार्थ्यांनी अखंड १२ तास विविध चित्रे साकारत येथे चित्रयज्ञ देखील केला.
उदय जोशी म्हणाले, अटलबिहारी वाजपेयी यांचे आगळ्यावेगळ्या पद्धतीने स्मरण करण्याकरीता सलग ४ वर्षे अटल कट्टा येथे विविध उपक्रमांचे आयोजन केले जाते. यावर्षी उपक्रमाचे ५ वे वर्ष आहे. अटलजींचे चित्र साकारण्याकरीता मांडण्यात आलेली पुस्तके अनाथ मुलांच्या संस्था व विविध ठिकाणी भेट म्हणून देण्यात येणार आहेत.
अमोल काळे म्हणाले, अटलजींचे विचार तरुण पिढीपर्यंत पोहोचावे, याकरीता अटल कट्टा येथे विविध उपक्रमांचे आयोजन केले जाते. यंदा ४ बाय ६ फूट आकारातील १०० पुस्तकांच्या सहाय्याने अटलजींचे चित्र सलग ५ तासात आम्ही रेखाटले आहे. तसेच सलग १२ तास विविध चित्र काढून मुला-मुलींनी चित्रयज्ञ हा उपक्रम राबविला असून ही चित्रे सैनिक मित्र परिवारच्या माध्यमातून सिमेवरील सैनिकांना पाठविण्यात येणार आहेत.