पुणे: पुण्याचे बांधकाम व्यावसायिक डिएसके प्रकरणातील कथित गैरव्यवहार प्रकरणी बँक ऑफ महाराष्ट्रचे व्यवस्थापकीय संचालक आणि मुख्य कार्यकारी अधिकारी रविंद्र मराठे आणि कार्यकारी संचालक आर के गुप्ता यांचे अधिकार काढून घेण्याच्या बँकेच्या संचालक मंडळाच्या निर्णयाविरुद्धची उत्स्फूर्त प्रतिक्रिया म्हणून आज दिनांक 30 जून 2018 शनिवार रोजी बँकेच्या एकूण-एक अधिकारी आणि कर्मचार्यांनी काळ्या फिती लावून आपला निषेध व्यक्त केला. तसेच बँकेतील सर्व अधिकारी-कर्मचार्यांची या संदर्भामध्ये तातडीची एक द्वारसभा आज दिनांक 30 जून शनिवारी संध्याकाळी 5.00 वाजता लोकमंगल, पुणे या बँकेच्या मुख्यालायामध्ये आयोजित करण्यात आल्याचे फोरमच्या प्रतीनिधींनी सांगितले आहे.
संचालक मंडळ आणि त्यांना दिग्दर्शन करणारे वित्त मंत्रालय, बँकिंग विभाग यांनी काल संपन्न झालेल्या संचालक मंडळाच्या बैठकीत घेतलेल्या या निर्णयाची दुर्दैवी, अप्रस्तुत आणि अन्यायकारक निर्णय अशी संभावना करीत बँकेतील कार्यरत सर्व संघटनांनी ‘युनायटेड फोरम ऑफ महाबँक युनियन्स’ हे व्यासपीठ स्थापन करून संघर्षाचा पवित्र घेतला आहे, ज्याची सुरुवात म्हणून दिनांक 30 जून ते 05 जुलै हा निषेध सप्ताह म्हणून पाळला जाणार आहे. बँक ऑफ महाराष्ट्र ही महाराष्ट्र राज्याची अर्थ संदर्भातील जीवन रेषा (फायनान्शियल लाईफ लाईन) आहे. सर्वसामान्यांच्या जिव्हाळ्याची बँक ही जनमानसातील प्रतिमा डागाळण्याचा हा पद्धतशीर प्रयत्न असून ही प्रतिमा जपण्यासाठी बँकेतील एकूण-एक कर्मचारी एकदिलाने प्रयत्नांची पराकाष्ठा करेल असा निर्धार यावेळी व्यक्त करण्यात आला.
विशेष म्हणजे वरिष्ठ व्यवस्थापनावरील अन्यानायकारक कारवाई विरुद्ध बँकेतील सफाई कर्मचारी ते महाव्यवस्थापक पदावरील सर्वांनी एकत्र येवून पाठींबा देण्याची बँकिंग उद्योगातील ही अपवादात्मक घटना म्हणता येईल.
युनायटेड फोरम ऑफ महाबँक युनियन्स मधील सहभागी संघटनांच्या पदाधिकार्यांच्या आज लोकमंगल पुणे येथे झालेल्या बैठकीमध्ये या सर्व घडामोडींचा आढावा घेण्यात आला. पदाधिकार्यांच्या या शिष्ठमंडळाने बँकेचे कार्यकारी संचालक व सध्या व्यवस्थापकीय संचालक पदाचा पदभार असलेले श्री ए सी राऊत यांची भेट घेऊन आपली भूमिका विशद केली आणि सद्यस्थितीत सर्व संघटना व्यवस्थापनाच्या पाठीशी खंबीरपणे उभ्या रहाणार असल्याची ग्वाही दिली.
बँकेतील सर्व कर्मचार्यांनाच्या भावनांचा आणि विनंतीचा आदर करून संचालक मंडळाने आणि वित्त मंत्रालयातील बँकिंग विभागाने आपल्या निर्णयाचा फेरविचार न केल्यास भविष्यातील आंदोलनाचे स्वरूप आणि मार्ग काय असावेत या विषयी चर्चा करण्यासाठी युनायटेड फोरमची महत्वपूर्ण सभा दिनांक 6 जुलै रोजी लोकमंगल, पुणे या बँकेच्या मुख्यालायामध्ये होणार असून त्याच दिवशी पुण्यातील सर्व कर्मचार्यांची व्यापक सभा आयोजित करण्याचा निर्धार व्यक्त करण्यात आला आहे.