उपमुख्यमंत्री एकनाथ शिंदे व खासदार श्रीकांत शिंदे यांच्या सूचनेनुसार दिवाळी फराळ वाटप; डॉ. गोऱ्हे यांचा ग्रामस्थांशी व्हिडिओ संवाद
उदगीर, लातूर : उदगीर तालुक्यातील साताळा बु. गावातील पाणीपुरवठा योजनेच्या निकृष्ट कामाची चौकशी करून दोषी कंत्राटदारावर कारवाईसाठी पाठपुरावा करण्यात येईल. तसेच गावातील पाणीटंचाई, जनावरांचा चारा आणि जलधारा योजनेतील समावेशाबाबत प्रशासनाकडे पाठपुरावा करण्यात येईल, असे शिवसेना नेत्या तथा विधानपरिषदेच्या माजी उपसभापती डॉ. नीलम गोऱ्हे यांनी सांगितले.
उपमुख्यमंत्री एकनाथ शिंदे व खासदार श्रीकांत शिंदे यांच्या सूचनेनुसार साताळा गावात दिवाळीनिमित्त महिलांसाठी फराळ वाटप कार्यक्रम आयोजित करण्यात आला होता. यावेळी डॉ. गोऱ्हे यांनी व्हिडिओ कॉलद्वारे ग्रामस्थांशी संवाद साधला. या उपक्रमासाठी आपल्या आमदार मानधनातून आर्थिक योगदान दिल्याचे त्यांनी सांगितले.
ग्रामस्थांनी सुमारे १० लाख रुपयांच्या पाणीपुरवठा योजनेचे ७० टक्के काम होऊनही गावाला १५-१५ दिवस पाणी मिळत नसल्याची तक्रार केली. पाइपलाइन वारंवार फुटणे, निकृष्ट साहित्याचा वापर आणि अपूर्ण कामाबाबतही तक्रारी मांडल्या. यावर चौकशी अहवालानुसार संबंधित कंत्राटदारावर कारवाईसाठी पाठपुरावा करण्याचे आश्वासन डॉ. गोऱ्हे यांनी दिले. यासंदर्भात विभागीय आयुक्तांना यापूर्वीच पत्र दिल्याचेही त्यांनी सांगितले.
साताळा बु. गावाचा जलधारा योजनेत समावेश करण्यासाठी पुढील आठ दिवसांत प्रयत्न करण्यात येतील. तसेच जनावरांच्या चाऱ्याबाबत उदगीर तहसीलदारांकडे तातडीने विचारणा करण्यात येईल, असे त्यांनी स्पष्ट केले. गावातील प्रश्नांसाठी महिला व पुरुषांची संयुक्त समिती स्थापन करण्याची सूचनाही त्यांनी केली.
“मी पूर्वी उदगीरमध्ये वास्तव्यास होते. माझ्या छोट्या मुलीचा जन्मही उदगीरमध्ये झाला आहे. त्यामुळे या भागाशी माझे जिव्हाळ्याचे नाते आहे. तुमच्या प्रश्नांसाठी माझा पाठपुरावा कायम राहील,” असे डॉ. गोऱ्हे म्हणाल्या.
यावेळी माजी आमदार सुधाकर भालेराव, माजी आमदार विनायकराव पाटील, संपर्कप्रमुख मंगेश कुडाळकर, जिल्हाप्रमुख चंद्रकांत टेगेटोळं, विधानसभा प्रमुख अनिल पंचाक्षरी, महिला संपर्कप्रमुख रंजना कुलकर्णी, सरपंच कुसुम तिरकोळे, चेअरमन पद्मसिंह पाटील यांच्यासह स्थानिक पदाधिकारी यांनी नियोजन केले होते. कार्यक्रमात सुमारे २०० महिला व १५० ते २०० पुरुष सहभागी झाले होते.
