पुणे : रविवार पेठेतील एका सोन्याचे दागिने बनविणाऱ्या व्यावसायिकाच्या घरातून तब्बल 2 किलो 200 ग्रॅम वजनाचे सोन्याचे दागिने आणि सोन्याची बिस्किटे चोरीला गेल्याची घटना घडली. सुमारे 2 कोटी 20 लाख रुपये किमतीच्या या चोरीचा खडक पोलिसांनी अवघ्या 12 तासांत छडा लावत दोन आरोपींना अटक केली. आरोपींकडून चोरीचा संपूर्ण मुद्देमाल हस्तगत करण्यात आला असून, त्याशिवाय अतिरिक्त 46 ग्रॅम सोनेही पोलिसांनी जप्त केले आहे.
पोलिसांनी दिलेल्या माहितीनुसार, फिर्यादी हे सोन्याचे दागिने बनविण्याचा व्यवसाय करतात. विविध सोनार त्यांच्याकडे दागिने तयार करण्यासाठी सोने देत असतात. 10 ऑक्टोबर रोजी रविवार पेठेतील त्यांच्या घरात कोणी नसल्याची संधी साधून अज्ञात आरोपींनी दरवाजाचे कुलूप तोडले आणि घरात प्रवेश केला. घरातील लोखंडी कपाटात ठेवलेले 2 किलो 200 ग्रॅम वजनाचे सोन्याचे दागिने आणि सोन्याची बिस्किटे चोरून नेण्यात आली. या प्रकरणी खडक पोलीस ठाण्यात गुन्हा क्रमांक 553/2026 नोंद करण्यात आला.
गुन्ह्याचा तपास सुरू केल्यानंतर पोलिसांनी परिसरातील सीसीटीव्ही फुटेजची बारकाईने पाहणी केली. त्यामध्ये फिर्यादी राहत असलेल्या इमारतीखाली दोन संशयित व्यक्ती घुटमळताना दिसून आल्या. त्यानंतर पोलिसांनी गोपनीय माहितीच्या आधारे दोघांची ओळख पटवून त्यांच्यावर लक्ष केंद्रित केले. हे दोघेही त्याच इमारतीत राहत असल्याची माहिती पोलिसांना मिळाली.
पोलिसांनी मुस्तफा नजीर शेख (वय 36, रा. 161, केजीएन कॉम्प्लेक्स, पहिला मजला, रविवार पेठ, पुणे) आणि सरफराज उर्फ आवेज मैनुद्दीन शेख (वय 22, रा. 161, रविवार पेठ, काच आळी, पुणे) या दोघांना ताब्यात घेतले. दोघे एकमेकांचे नातेवाईक असल्याचे पोलिसांनी सांगितले. चौकशीनंतर दोघांना गुन्ह्यात अटक करण्यात आली.
आरोपींकडून चोरीला गेलेले 2 किलो 200 ग्रॅम सोन्याचे दागिने व सोन्याची बिस्किटे पंचनाम्याने हस्तगत करण्यात आली. त्याशिवाय आणखी 46 ग्रॅम सोने जप्त करण्यात आले आहे. पोलिसांच्या माहितीनुसार हस्तगत केलेल्या मुद्देमालाची एकूण किंमत 2 कोटी 24 लाख 862 रुपये असून, या गुन्ह्यात पोलिसांनी चोरी गेलेल्या मालापेक्षाही अधिक मुद्देमाल हस्तगत केला आहे.
ही कामगिरी अपर पोलीस आयुक्त राजेश बनसोडे, पोलीस उपायुक्त ऋषिकेश रावळे, सहायक पोलीस आयुक्त सचिन हिरे यांच्या मार्गदर्शनाखाली खडक पोलीस ठाण्याचे वरिष्ठ पोलीस निरीक्षक धनंजय पिंगळे, पोलीस निरीक्षक (गुन्हे) शर्मिला सुतार, तसेच राहुल मखरे, जयसिंग दाढे, अशोक खाडे, संतोष मोहिते, विनोद शिंदे आणि पोलीस अंमलदार मयूर भोसले, अमित जमदाडे, हेमंत पेरणे, निलेश साबळे, विकास पांडोळे, सैफ नदाफ, उमेश मठपती आणि सागर कुडले यांच्या पथकाने केली.
\
