मालेगाव
अबब , काय हे घडले ? असा अचंबा वाटावा नव्हे तर धक्का बसावी अशी हि बातमी आहे ,
शिवसेनेचे कायम टीकेचं लक्ष्य बनलेल्या एमआयएमला मालेगाव महापालिकेत मात्र शिवसेनेमुळेच उपमहापौर पद मिळालं आहे. महापालिकेत कुरघोडीचं राजकारण करत उपमहापौरपदाच्या निवडीत शिवसेना तटस्थ राहिल्याने एमआयएमचे शेख युनीस इसा निवडून आलेत. या निवडणुकीत हिंदुत्वाचा मुद्दा बाजूला ठेवत मालेगाव महापालिकेत आपणच किंगमेकर असल्याचं शिवसेनेने यातून दाखवून दिलंय.
मालेगाव महापालिकेत आज महापौर आणि उपमहापौर पदासाठी निवड झाली. महापौरपदी तिसरा महाजचे उमेदवार हाजी इब्राहिम यांची निवड झाली. या निवडीत शिवसेनेने इब्राहिम यांच्या बाजूने मतदान केलं. इब्राहिम यांना ४६ तर विरोधात ३२ मतं मिळाली. पण उपमहापौरपदाच्या निवडीत किंगमेकरची भूमिका बजावणाऱ्या शिवसेनेने मालेगाव विकास आघाडीचे सुनिल गायकवाड यांच्यावर कुरघोडी केली. गायकवाड हे विधानसभा निवडणुकीत राज्यमंत्री दादा भुसे यांच्याविरोधात उभे होते. त्यामुळे त्यांना उपमहापौर पदही मिळू नये याची काळजी शिवसेनेने घेतली. उपमहापौर पदाच्या निवडीवेळी शिवसेना तटस्थ राहिली आणि एमआयएमचे उमेदवार शेख युनीस इसा हे विजयी झाले. यात सुनिल गायकवाड यांचा पराभव झाला. इसा यांच्या बाजूने ३४ तर विरोधात ३२ मतं पडली.
महापौर आणि उपमहापौरपदाच्या या निवडीत दोन गट पडले होते. तिसरा महाज, शिवसेना आणि मित्र पक्ष असा एक गट. तर दुसरा गट हा काँग्रेस, जनता दल, मालेगाव विकास आघाडी आणि मित्रपक्ष यांचा होता. दोन्ही पदांच्या निवडीत काँग्रेस आणि सुनिल गायकवाड या दोघांनाही बाहेर ठेवण्यात शिवसेनेला यश आलं. विधानसभा निवडणुकीवेळी राष्ट्रवादीतून बाहेर पडलेल्या नऊ नगरसेवकांनी एमआयएममध्ये प्रवेश केला. आणि आता शिवसेनेच्या कुरघोडीच्या राजकारणात MIM चा उपमहापौरही झाला. दोघांचं भांडण आणि तिसऱ्याचा लाभ म्हणतात ना त्याचा प्रत्यय इथं दिसून आला अशी चर्चा सुरू आहे.