पुणे- भरधाव वाहनाच्या धडकेने दुचाकीस्वार व्यापाऱ्याचा मृत्यू झाल्याची घटना गंगाधाम-बिबवेवाडी रस्त्यावर घडली. अपघातानंतर पसार झालेल्या वाहनचालकाचा पोलिसांकडून शोध घेण्यात येत आहे.
अतुल जयंतीलाल कोठारी (वय ४५, रा. हाईड पार्क सोसायटी, मार्केट यार्ड) असे मृत्युमुखी पडलेल्या दुचाकीस्वार व्यापाऱ्याचे नाव आहे. याबाबत कोठारी यांचे भाऊ नितीन (वय ४७, रा. मार्केट यार्ड) यांनी मार्केट यार्ड पोलीस ठाण्यात फिर्याद दिली आहे. दुचाकीस्वार अतुल कोठारी मध्यरात्री सव्वाबाराच्या सुमारास गंगाधाम-बिबवेवाडी रस्त्याने जात होते. आईमाता मंदिराजवळ भरधाव वाहनाने दुचाकीस्वार अतुल यांना धडक दिली. अपघातानंतर वाहनचालक पसार झाला. अपघाताची माहिती मिळताच पोलिसांनी अतुल यांना तातडीने रुग्णालयात दाखल केले. उपचारांपूर्वीच त्यांचा मृत्यू झाला.पसार झालेल्या वाहनचालकाचा शोध घेण्यात येत असून सहायक पोलीस निरीक्षक रामदास मुंढे तपास करत आहेत.