पुणे –
भारतीय जनता पक्षाची सत्ता आल्यास वडगावशेरी भागातील बीआरटी, अनधिकृत बांधकामे, स्थानिक नेत्यांची दादागिरी व टँकरमाफियांचा कायमचा बंदोबस्त करणार असल्याचे विधान परिषदेतील विरोधी पक्षनेते विनोद तावडे यांनी सांगितले. वडगावशेरीतील भाजपचे उमेदवार जगदीश मुळीक यांच्या प्रचारसभेत ते बोलत होते. आघाडी सरकार कुचकामी असून, पंधरा वर्षांच्या काळात भ्रष्टाचाराशिवाय या सरकारने काहीच केले नाही. महाराष्ट्र तरुणांच्या हातात देण्याचा मोदींचा मानस आहे.
दरम्यान, एका जाहीर सभेत बलात्कारासंदर्भात वक्तव्य करताना आर. आर. पाटील यांना लाज का वाटली नाही, असा प्रश्न उपस्थित करीत, राष्ट्रवादीच्या मंत्र्यांना सत्तेचा माज चढला असल्याची टीका विधान परिषदेचे विरोधी पक्षनेते विनोद तावडे यांनी केली. कोथरूड विधानसभा मतदारसंघातील भाजपच्या उमेदवार मेधा कुलकर्णी यांच्या प्रचारार्थ डहाणूकर येथील सभेत तावडे बोलत होते. यावेळी पक्षाचे पदाधिकारी, कार्यकर्ते उपस्थित होते. यावेळी तावडे म्हणाले, सांगली येथील एका उमेदवारावर बलात्काराचा आरोप करण्यात आला आहे. याला अनुसरून आर. आर. पाटील यांनी संबंधित उमेदवाराने बलात्कार निवडणुकीनंतर करायला हवा होता, असे वक्तव्य केले आहे. हे वक्तव्य हा सत्तेचा माज आहे. काँग्रेस-राष्ट्रवादीने प्रचंड घोटाळे करून ठेवले असून, भाजप सत्तेत आल्यानंतर त्यांची चैाकशी करून त्यांना तुरुंगात टाकू, असा इशारा तावडे यांनी यावेळी दिला.