पुणे : चाकण (ता. खेड) येथील स्वप्ननगरी कॉम्प्लेक्समधील पाच इमारतींमध्ये तब्बल 69 ठिकाणी वीजचोरी उघडकीस आली आहे. यात 70,347 युनिट्सच्या 6 लाख 66 हजार रुपयांची वीजचोरी झाली आहे.
चाकण येथील झगडेवस्तीमधील स्वप्ननगरी कॉम्प्लेक्समध्ये महावितरणच्या सुमारे 20 जणांच्या पथकाने मंगळवारी (दि. 17) सुमारे 350 फ्लॅटमधील वीजजोडण्यांची तपासणी केली. यातील एस, टी, यू, ए-वन आणि एम या पाच इमारतींमध्ये एकूण 67 फ्लॅटमध्ये व दोन इमारतींमधील कॉमन वीज वापरासाठी महावितरणची अधिकृत वीजजोडणी नसताना वीजवापर सुरु असल्याचे आढळून आले. वीजपुरवठा करणार्या बसबार या यंत्रणेतून थेट वीजचोरी केल्याचे दिसून आले.
सुमारे 10 तासांच्या तपासणीत 67 फ्लॅट व दोन इमारतीच्या कॉमन वीज वापराच्या ठिकाणी 70,347 युनिट्सच्या 6 लाख 66 हजार रुपयांची वीजचोरी झाल्याचे निदर्शनात आले. या सर्व वीजचोरींचा पंचनामा करण्यात आला आहे. या 69 वीजचोरीप्रकरणी संबंधीतांविरुद्ध भारतीय विद्युत कायदा 2003 नुसार कलम 135 अन्वये कारवाई करण्यात येत आहे.
पुणे परिमंडलाचे मुख्य अभियंता श्री. रामराव मुंडे यांच्या नेतृत्वात पुणे ग्रामीण मंडलचे अधीक्षक अभियंता श्री. सुनील पावडे, राजगुरुनगर विभागाचे कार्यकारी अभियंता श्री. मनीष ठाकरे, उपकार्यकारी अभियंता श्री. रामचंद्ग चव्हाण, सहाय्यक अभियंता मंगेश सोनवणे, श्री. विक्रम राठोड, जनमित्र श्री. विलास सातकर, नारायण जाधव, श्री. संपत शिंदे आदी या मोहिमेत सहभागी झाले होते.