अलिबाग : अल्पसंख्याक समाजाची सर्वांगीण प्रगती व्हावी यासाठी अल्पसंख्याक समाजाच्या कल्याणासाठी शासनामार्फत राबविण्यात येणाऱ्या योजनांची प्रभावी अंमलबजावणी सर्व शासकीय यंत्रणांनी करावी, अशी सूचना महाराष्ट्र राज्य अल्पसंख्याक आयोगाचे अध्यक्ष मोहम्मद हुसेन खान यांनी केली.
शासनाच्यामार्फत अल्पसंख्याक समाजाच्या कल्याणासाठी राबविण्यात येणाऱ्या योजनांचा आढावा घेण्यासाठी जिल्हाधिकारी कार्यालयात आयोजित बैठकीत ते बोलत होते. अल्पसंख्याकांच्या विकासासाठी राबविण्यात येत असलेल्या पंतप्रधानांच्या 15 कलमी कार्यक्रमाचा तसेच केंद्र शासन आणि राज्य शासनाकडून राबविण्यात येत असलेल्या विविध योजनांचा तसेच जिल्ह्यातील कायदा व सुव्यवस्थेचा त्यांनी आढावा घेतला.
यावेळी जिल्हा परिषदेचे प्रभारी मुख्य कार्यकारी अधिकारी सुभाष मोळवणे, जिल्हा पोलीस अधिक्षक मो.सुवेज हक, अल्पसंख्याक आयोगाचे सचिव मोहम्मद हुसेन मुजावर, निवासी उपजिल्हाधिकारी सतीश बागल, उपजिल्हाधिकारी (सा.प्र.) किरण पाणबुडे, जिल्हा परिषदेचे उप मुख्य कार्यकारी अधिकारी (सा.प्र.) प्रकाश खोपकर, जिल्हा नियोजन अधिकारी सुनील जाधव, अल्पसंख्याक आयोगाचे गणेश सुरवसे आदी उपस्थित होते.
श्री.खान म्हणाले की, देशाला महासत्ता बनविण्यासाठी सर्व समाजाची प्रगती होणे आवश्यक आहे. अल्पसंख्याक समाजाची प्रगती व्हावी यासाठी असलेल्या योजनांची अंमलबजावणी करावी. योजनेच्या अंमलबजावणीत आर्थिक तरतुदीची अडचण निर्माण झाल्यास याबाबत आयोगास कळविल्यास निधी उपलब्ध करुन देण्याबाबत प्रयत्न करण्यात येतील. मदरशांच्या आधुनिकीकरणासाठी शासनाने तरतूद केली आहे. या तरतुदीचा योग्य वापर होण्यासाठी अधिकाधिक मदरशांकडून प्रस्ताव मागविण्यात यावेत. पोलीस भरतीसाठी अल्पसंख्याक समाजाच्या मुलांना प्रशिक्षण देण्यासाठी योग्य कार्यवाही करावी. कायदा व सुव्यवस्था अबाधित राहण्यासाठी ठिकठिकाणी मोहल्ला कमिटी स्थापन करुन तरुणांचा त्यामध्ये सहभाग करुन घ्यावा. जिल्ह्यात पॉलिटेक्निक कॉलेज सुरू करण्याबाबतची कार्यवाही करावी, असे सांगून त्यांनी जिल्ह्यातील अल्पसंख्याकांच्या योजनांसंदर्भात सुरू असलेल्या कामकाजाबाबत समाधान व्यक्त केले. तसेच अधिक चांगले काम होईल, अशी अपेक्षा व्यक्त केली.