अंधशाळेतील विद्यार्थींनीना ‘अंकनाद अॅप’ची भेट
पुणे :
पावकी – निमकी पाढे ‘अंकनाद अॅप’द्वारे पुन्हा भेटीस आले असून, ‘निर्मिती इपिक’ या संस्थेद्वारे त्याचे पुनरूज्जीवन करण्यात आलेले अंकनाद अॅप कोथरूड येथील अंधशाळेतील विद्यार्थींनीना देण्यात आले. आज दिनांक 11 जुलै रोजी ‘अग्रज फूड प्रॉडक्टस’चे संचालक बाळासाहेब थत्ते यांच्या वतीने हे अॅप भेट म्हणून देण्यात आले.
यावेळी राष्ट्रपती विजेत्या शिक्षीका मॉर्डन शाळा सौ. मृगजा कुलकर्णी, टेलिव्हीजन मालिकेतील प्रसिद्ध अभिनेत्री संयोगिता भावे, मंदार नामजोशी व निर्मिती नामजोशी उपस्थित होते.
मंदार नामजोशी व निर्मिती नामजोशी यांनी या अॅपची निर्मिती केली आहे. या अंकनाद अॅपमध्ये नादबद्ध अंकलिपी, पावकी, निमकी, पाऊणकी, कवायती, दिडकी, अडीचकी, औटकी (साडेतीन), एकोत्री, 1 ते 30 पाढे, अशा वेगवेगळ्या पाढ्यांमुळे बीजगणितात अंध विद्यार्थ्यांना उपयोग होणार आहे.
यावेळी बोलताना बाळासाहेब थत्ते म्हणाले, ‘बदलत्या तंत्रज्ञानचा वापर करून ‘अंकनाद’ या अॅप्लिकेशनद्वारे पाढे पाठांतर विद्यार्थ्यांना उपयुक्त ठरत आहे. अंध विद्यार्थ्यांना संगीताच्या तालात पाढे पाठांतर करता येणार आहे.’
अॅप सुरू करताच अंध विद्यार्थिनींनी पाढे आनंदाने म्हणण्यास सुरूवात केली. ‘आम्हाला या अॅपद्वारे पाढे म्हणण्यास अतिशय आवडत आहे’ अशी प्रतिक्रिया विद्यार्थींनीची होती. बालवाडीपासून ते दहावीपर्यंत उपयुक्त या अॅप्लीकेशनद्वारे या विद्यार्थीनी पाठांतर करणार आहेत. अशी माहिती मंदार नामजोशी यांनी दिली.