तालिबान्यांचा हैदोस सुरूच – अफगाणिस्तानच्या बँकेवर हल्ला

वाशिंग्टन – पेशावरमधल्या शाळेवर तालिबानी दहशतवाद्यांनी अमानुष हल्ला करून १३२ निरागस मुलांची निर्घृण हत्या केल्याच्या घटनेनं अख्खं जग हादरलेलं असतानाच, आज बुधवारी अफगाणिस्तानातील एका बँकेला तालिबानींनी लक्ष्य केलं आहे. आत्मघाती स्फोट घडवत, गोळीबार करत चार दहशतवादी बँकेत शिरले असून अफगाणच्या सुरक्षा फौजांसोबत त्यांची चकमक सुरू आहे. बँकेत अनेक नागरिक अडकले असल्याचं प्रत्यक्षदर्शींनी सांगितल्यानं सगळ्यांच्या काळजात धस्स झालंय.
दक्षिण अफगाणिस्तानच्या हेल्मांड प्रांतातील बँकेवर हा दहशतवादी हल्ला झालाय. बॉम्बचा धमाका आणि गोळीबार ऐकून बँकेतील काही कर्मचारी मागच्या दारानं बाहेर पडण्यात यशस्वी झाले. त्यांनी दिलेल्या माहितीनुसार, बँकेत अनेक ग्राहक, खातेदार असताना हा हल्ला झालाय. अनेक सरकारी कर्मचारी पगार घेण्यासाठी बँकेत आले आहेत. त्यांची नेमकी संख्या कळू शकलेली नसली, तरी नागरिकांचा जीव धोक्यात असल्यानं प्रशासनानं युद्धपातळीवर बचावकार्य सुरू केलं आहे.
चार तालिबानी दहशतवाद्यांनी हा हल्ला केल्याची प्राथमिक माहिती आहे. त्यापैकी एकानं आत्मघाती स्फोट घडवला, तर तिघेजण बँकेत शिरून अंदाधुंद गोळीबार करताहेत. अफगाणच्या सुरक्षा जवानांनी बँकेला घेराव घातला असून दहशतवाद्यांसोबत त्यांची चकमक बुधवारी दुपारपर्यंत सुरू असल्याचे वृत्त होते