सर्वसामान्यांना ही आता खाद्य बर्फ ओळखता येणार
पुणे : राज्याच्या अन्न व औषध प्रसासनाने औद्योगिक बर्फ आणि खाद्य बर्फ वेगळा असावा यासाठी बर्फाच्या उत्पादना संदर्भातील अधिसूचना काढली होती. याबाबतचे निवेदन विधानसभेच्या दोन्ही सभागृहात सादर करण्यात आले होते. या पॅटर्नला केंद्राने ही मंजुरी दिली असून हा पॅटर्न देशातील सर्वच राज्यांना लागू केला आहे. याबाबत अन्न औषध प्रशासन मंत्री गिरीश बापट यांनी पाठपुरावा केला होता.
बर्फामध्ये होणाऱ्या भेसळीमुळे मानवी आरोग्यवर होणाऱ्या दुष्परिणामांचा विचार करून, सर्वसामान्यांना खाद्य व अखाद्य बर्फ समजून यावा यासाठी उपाययोजना करण्याबद्दल अन्न औषध मंत्री बापट यांनी आदेश दिला होता. याबाबत अभ्यास केल्यानंतर प्रशासनाने अखाद्य बर्फ समजण्यासाठी त्यात खाण्यास योग्य असा फिकट निळा रंग वापरण्यात यावा असा प्रस्ताव तयार केला होता. खाद्य बर्फ मात्र पिण्यास योग्य पाणी वापरून पारदर्शक करण्यात यावा असे या प्रस्तावात म्हटले आहे. मासे, मटण अशा विविध पदार्थांच्या साठवणीसाठी अखाद्य पदार्थ वापरला जातो. त्यामुळे हा रंग खाण्यात आला तरी त्याचे दुष्परिणाम होऊ नयेत असा त्यापाठीमागे उद्देश आहे. राज्यात ही अधिसूचना लागू केल्यानंतर हा प्रस्ताव केंद्राकडे ही पाठवण्यात आला होता. केंद्राच्या फूड सेफ्टी अथोरिटी ऑफ इंडिया या संस्थेने महाराष्ट्राचा हा प्रस्ताव स्वीकारला असून देशातील इतर राज्यात ही या नियमाचा अवलंब करण्याचे आदेश दिले आहेत.
देशभरात १ जून२०१८ पासून याबाबतचा आदेश लागू होणार असून या कायद्याचे उल्लंघन करणाऱ्या बर्फ उत्पादकांवर कारवाई करण्यात येणार आहे.