मुंबई-राज ठाकरे यांनी आज सायंकाळी शरद पवार यांच्या ‘सिल्व्हर ओक’ या निवासस्थानी जाऊन त्यांची भेट घेतली. या भेटीत राज यांनी पवार यांच्याशी अवघे दहा मिनिटे संवाद साधला. यावेळी राज्याच्या परिस्थितीवरच प्रामुख्याने चर्चा झाल्याचं सांगण्यात येतं. मात्र या भेटीचं नेमकं कारण समजू शकलं नाही. येत्या सोमवारी शरद पवार हे काँग्रेसच्या हंगामी अध्यक्षा सोनिया गांधी यांची भेट घेणार आहेत. त्यामुळे राज्यात राजकीय समीकरणांची उलथापालथ होणार असल्याची शक्यता वर्तवण्यात येत असतानाच राज यांनी पवार यांची भेट घेण्याचा अधिक महत्त्व आलं आहे.
दोन दिवसांपूर्वीच मनसेचे नेते संदीप देशपांडे यांनी राज ठाकरे यांनी भेट घेतली. त्याचवेळी राज-पवार भेटीची वेळ निश्चित करण्यात आल्याचंही सांगण्यात येतं. राज्यात नुकत्याच झालेल्या विधानसभा निवडणुकीत मनसेचा केवळ एकच आमदार निवडून आला. मात्र या निवडणुकीत राज यांना कमी जागा लढवूनही १२ लाखाहून अधिक मते मिळविण्यात यश आलं होतं. त्यामुळे मनसे आमदारांच्या संख्याबळात कमी पडली असली तरी मनसेचं उपद्रवमूल्य कायम असल्याचं अधोरेखित झालं आहे. या पार्श्वभूमीवर उद्या राज्यात सत्ता समीकरणं बदलली किंवा नाही बदलली तरी मनसेची भूमिका महत्त्वाची ठरणार असल्यानेही राज-पवार भेट महत्त्वाची मानली जात आहे. शिवसेनेचे नेते संजय राऊत यांनीही पवारांची नुकतीच भेट घेतली होती. त्यामुळेही शिवसेना, मनसे आणि राष्ट्रवादी दरम्यान काही तरी शिजत असल्याचं बोललं जात आहे.