युवा नेता हार्दिक पटेल यांनी काँग्रेसचा राजीनामा दिला आहे. गेल्या काही महिन्यांपासून ते नाराज होते. जनता या निर्णयाचे स्वागत करेल याची मला खात्री आहे, असे हार्दिक पटेल यांनी म्हटले आहे . राहुल गांधी यांनी 15 दिवसांपूर्वी हार्दिक पटेल यांच्यासोबत चर्चा केली होती. गुजरातमध्ये नोव्हेंबर-डिसेंबरमध्ये विधानसभा निवडणुका होणार आहेत. ते पुढे कोणत्या पक्षात प्रवेश करणार याबाबत कोणतीही माहिती समोर आलेली नाही, मात्र त्यांच्या नुकत्याच आलेल्या वक्तव्यांनुसार ते भाजपमध्ये प्रवेश करणार असल्याची शक्यता वर्तवली जात आहे.
हार्दिक पटेल यांनी अखेर पक्षाच्या कार्याध्यक्षपदाचा राजीनामा दिला आहे. हार्दिक पटेल यांनी ट्विटरवर सोनिया गांधींना पत्र लिहून पक्षाच्या सर्व पदांचा आणि प्राथमिक सदस्यांचा राजीनामा दिल्याचे म्हटले आहे.रविवारी नरेश पटेल यांनी खोडलधाममध्ये पास नेते अल्पेश कथिरिया, दिनेश बांभनिया आणि गुजरात प्रदेश काँग्रेसचे कार्याध्यक्ष हार्दिक पटेल यांच्यासोबत बंद दाराआड बैठक घेतली. बैठकीनंतर हार्दिक पटेल म्हणाले की, मी काँग्रेसवर नाराज आहे. कोण नाराज होणार नाही? हे जनतेलाही माहिती आहे. कोणत्याही पक्षात एखाद्या नेत्याची जबाबदारी निश्चित असते.
विशेषत: राहुल गांधी गुजरातमध्ये आले असताना त्यांनी हार्दिकशी बोलणे टाळले आणि त्यांची दखलही घेतली नाही. राजस्थानमधील उदयपूर येथील काँग्रेसच्या चिंतन शिबिरातही हार्दिक पटेल यांची सूचक अनुपस्थिती दिसून आली होती.2019च्या लोकसभा निवडणुकीपूर्वी हार्दिक पटेल यांनी 12 मार्च 2019 रोजी काँग्रेसचे प्राथमिक सदस्यत्व स्वीकारले. त्यानंतर अवघ्या 19 महिन्यांच्या प्रवासात हार्दिक पटेल यांना गुजरात काँग्रेसचे कार्याध्यक्ष बनवण्यात आले. मात्र, हार्दिक पटेल काँग्रेस हायकमांडसमोर आपल्या मागण्या मांडत राहिले. गुजरात काँग्रेसच्या नेत्यांनी आपली कारकीर्द खराब केल्याचा आरोपही हार्दिक यांनी केला.