पुणे : स्वारगेटजवळील आदिनाथ सोसायटीच्या गार्डनमध्ये ससे व मत्स्यपालन करताना योग्य काळजी न घेता, त्यांचा छळ केल्याप्रकरणी स्वारगेट पोलिस ठाण्यात प्राणी संरक्षण कायद्यांतर्गत (पीसीए) दोघांविरुद्ध रविवारी गुन्हा दाखल करण्यात आला. त्यामध्ये सोसायटीचे अध्यक्ष व सचिव यांचाही समावेश आहे. याप्रकरणी अमित असित शहा (वय ३८, रा. आदिनाथ सोसायटी, पुणे-सातारा रस्ता) यांनी फिर्याद दिली आहे. अमित शहा यांच्या फिर्यादीवरून सोसायटीचे अध्यक्ष महेंद्र जैन व सचिव राहुल विलास मेहता (दोघेही रा. आदिनाथ सोसायटी, पुणे-सातारा रस्ता) यांच्याविरुद्ध प्राणी संरक्षण कायदा व वन्यजीव संरक्षण कायदयान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी अमित शहा यांची प्राणी सेवा नावाची संस्था आहे. या संस्थेमार्फत भटक्या, अपंग व जखमी प्राण्यांची काळजी व संगोपनाचे कार्य केले जाते. फिर्यादी रविवारी त्यांच्या आदिनाथ सोसायटीच्या गार्डनमध्ये फिरत होते. त्यावेळी त्यांना गार्डनच्या कोपऱ्यात एक लोखंडी जाळीचा पिंजरा आढळून आला. त्यामध्ये ५० ते ६० ससे असल्याचे त्यांच्या लक्षात आले. बहुतांश ससे पावसामध्ये भिजत व उपाशी होते. याबरोबरच तेथील पाण्याच्या टाकीमध्ये पाळीव मासे सोडण्यात आले होते. त्यांनाही ऑक्सीजन किंवा खाद्य दिले नव्हते. फिर्यादी यांनी याबाबत चौकशी केली असता हे ससे व मासे सोसायटीचे अध्यक्ष व सचिव यांच्याकडून पाळले असल्याची माहिती मिळाली. मात्र त्यांचे पालन करताना त्यांना योग्य त्या मूलभूत सुविधा पुरवणे, खाद्य देणे व त्यांची काळजी घेण्याकडेही त्यांनी दुर्लक्ष केल्याचे त्यांच्या निदर्शनास आले. ससे व मत्स्य पालन करताना त्यांची योग्य काळजी घेणे आवश्यक असतानाही दोघांनीही त्यांची काळजी घेतली नसल्यामुळे त्यांच्याविरुद्ध गुन्हा दाखल केला आहे.