अचानक मित्र मंडळ परिसरात डेक्कन पोलिसांची कारवाई; लाल तिखट, धारदार हत्यारे आणि इतर साहित्य जप्त
पुणे : गणेशोत्सवाच्या पार्श्वभूमीवर एरंडवणे परिसरात दरोड्याच्या तयारीत लपून बसलेल्या पाच जणांना डेक्कन पोलिसांनी धारदार हत्यारांसह पकडले. पोलिसांनी दिलेल्या माहितीनुसार, गणेशोत्सवानिमित्त डेक्कन पोलीस ठाण्याचे अधिकारी आणि कर्मचारी हद्दीत गस्त घालत असताना पोलीस अंमलदार सचिन गायकवाड यांना गोपनीय बातमीदारामार्फत माहिती मिळाली की, एरंडवणे येथील अचानक मित्र मंडळ परिसरात गणेश मंदिराच्या मजल्यावर सहा ते सात जण दरोडा टाकण्याच्या तयारीत धारदार हत्यारे, लाल तिखट आणि इतर साहित्य घेऊन लपून बसले आहेत.
माहिती मिळताच डेक्कन पोलिसांचे पथक संबंधित ठिकाणी पोहोचले. अचानक मित्र मंडळासमोरील दोन मजली इमारतीच्या वरच्या मजल्यावर जाऊन पोलिसांनी दरवाजा उघडण्यास सांगितले. दरवाजा उघडल्यानंतर आत पाच जण आढळले. तेथे टेबलवर धारदार हत्यारे, लाल रंगाची तिखट पावडर आणि इतर साहित्य मिळाले. त्यानंतर पाचही जणांना पोलिसांनी ताब्यात घेतले.
अटक करण्यात आलेल्या आरोपींची नावे अशी आहेत — रितेश गुरुनाथ चिप्पा, वय २५ वर्षे, रा. ५२६, गंजपेठ, महात्मा फुले वाड्यासमोर, समता भूमी, पुणे; विकास नितीन लांबोर, वय १९ वर्षे, रा. प्लॉट नं. १५, संजीवनी हॉस्पिटलजवळ, खिलारेवाडी, पुणे; प्रतीक हनुमंत कांबळे, वय १९ वर्षे, रा. सीडीएस कंपनीजवळ, गणेशनगर, चाळ नं. १०, एरंडवणे, अलंकार, पुणे; प्रतीक रामचंद्र कदम उर्फ बाबू, वय २३ वर्षे, रा. प्लॉट नं. १५, संजीवनी हॉस्पिटलजवळ, खिलारेवाडी, पुणे; आणि सुजल मनोज मोरे, वय १९ वर्षे, रा. चाळ नं. A/3/18, खोली नं. २०, इंदिरानगर, बिबवेवाडी, पुणे.
या प्रकरणी डेक्कन पोलीस ठाण्यात गुन्हा क्रमांक 278/2026 दाखल करण्यात आला असून भारतीय न्याय संहिता कलम 310(4), आर्म्स अॅक्ट कलम 4(25), तसेच महाराष्ट्र पोलीस कायदा कलम 37(1) सह 135 अंतर्गत कारवाई करण्यात आली आहे.
ही कारवाई अपर पोलीस आयुक्त राजेश बनसोडे, पोलीस उपायुक्त ऋषिकेश रावळे आणि सहाय्यक पोलीस आयुक्त अनुजा देशमाने यांच्या मार्गदर्शनाखाली करण्यात आली. वरिष्ठ पोलीस निरीक्षक रुणाल मुल्ला, पोलीस निरीक्षक (गुन्हे) रणजितसिंग परदेशी, सपना देवतळे यांच्या सूचनेनुसार पोलीस उपनिरीक्षक योगेश मोरे, अजय भोसले, सहाय्यक पोलीस फौजदार दत्तात्रय शिंदे, प्रशांत पवार, राजेंद्र मारणे, धनश्री सुपेकर तसेच पोलीस अंमलदार सचिन गायकवाड, सागर घाडगे, वसीम सिद्दीकी, धनाजी माळी आणि स्वप्निल गायकवाड यांनी ही कारवाई केली.
या प्रकरणाचा पुढील तपास डेक्कन पोलीस करीत आहेत.
