जर्मनीतील हॅनोवर येथे जागतिक व्यासपीठावर 22 बिझनेस युनिट्सच्या क्षमता सादर; बॅटरी पॅक, ट्रॅक्शन मोटर्स, चार्जर आणि पॉवर इलेक्ट्रॉनिक्सवर भर
पुणे, : जागतिक वाहन उत्पादकांना ऑटोमोटिव्ह पार्ट्स आणि मोबिलिटी सोल्युशन्स पुरवणाऱ्या Tata AutoComp Systems Limited ने जर्मनीतील हॅनोवर येथे सुरू असलेल्या IAA Transportation 2026 मध्ये व्यावसायिक वाहन क्षेत्रासाठी आपल्या एकात्मिक तंत्रज्ञान क्षमतांचे प्रदर्शन केले आहे.
15 ते 20 सप्टेंबरदरम्यान सुरू असलेल्या या जागतिक प्रदर्शनात Tata AutoCompने इलेक्ट्रिक वाहने, थर्मल मॅनेजमेंट, वाहनांचे इंटिरियर-एक्सटिरियर घटक तसेच सप्लाय चेन आणि अभियांत्रिकी सेवांमधील आपल्या उत्पादनांची आणि तंत्रज्ञानाची विस्तृत श्रेणी सादर केली आहे.
कंपनीच्या प्रदर्शनाचे उद्घाटन Tata Motorsचे CVCPO जयकुमार चुट्टार आणि PACCARचे CPO ब्रेनन गॉर्डी यांच्या हस्ते करण्यात आले.
22 बिझनेस युनिट्स, 11 संयुक्त उपक्रमांची ताकद
Tata AutoCompने या प्रदर्शनात आपल्या 22 व्यावसायिक युनिट्सची क्षमता जागतिक ग्राहकांसमोर मांडली आहे. यामध्ये आघाडीच्या जागतिक तंत्रज्ञान कंपन्यांसोबत असलेल्या 11 संयुक्त उपक्रमांचाही समावेश आहे.
कंपनीचे जगभरात 74 उत्पादन प्रकल्पांचे नेटवर्क असून, विविध वाहन उत्पादकांच्या बदलत्या गरजांनुसार स्थानिक आणि आधुनिक मोबिलिटी सोल्युशन्स विकसित करण्यावर कंपनीचा भर आहे.
इलेक्ट्रिक वाहनांसाठी संपूर्ण उत्पादन श्रेणी
युरोपातील व्यावसायिक वाहन बाजारात विद्युतीकरणाचा वेग वाढत असताना Tata AutoCompने आपला EV पोर्टफोलिओ विशेषत्वाने प्रदर्शित केला आहे.
यामध्ये बॅटरी पॅक, ट्रॅक्शन मोटर्स, बॅटरी कूलिंग सिस्टीम, इलेक्ट्रिक कंप्रेसर, पॉवर इलेक्ट्रॉनिक्स, बॅटरी थर्मल मॅनेजमेंट सिस्टीम (BTMS), बसबार आणि चार्जर्स यांचा समावेश आहे.
या उत्पादनांसोबतच कंपनी आपल्या अंतर्गत डिझाइन, अभियांत्रिकी आणि उत्पादन क्षमतांचेही प्रदर्शन करत आहे. त्यामुळे व्यावसायिक वाहनांच्या विद्युतीकरणासाठी एका पुरवठादाराकडून अनेक प्रकारची तंत्रज्ञान सोल्युशन्स उपलब्ध करून देण्यावर कंपनीचा भर असल्याचे स्पष्ट होते.
थर्मल मॅनेजमेंटमध्येही आधुनिक तंत्रज्ञान
Tata AutoCompच्या थर्मल मॅनेजमेंट पोर्टफोलिओमध्ये इंजिन कूलिंग सोल्युशन्स, Commercial Vehicle Thermal Management Systems (CVTMS), BTMS आणि HVAC सिस्टीम्स यांचा समावेश आहे.
इलेक्ट्रिक आणि पारंपरिक दोन्ही प्रकारच्या व्यावसायिक वाहनांसाठी तापमान नियंत्रण, बॅटरीची कार्यक्षमता आणि प्रवासी आराम यांसाठी आवश्यक असलेल्या प्रणाली कंपनीने प्रदर्शनात मांडल्या आहेत.
वाहनांचे वजन कमी करण्यासाठी नवे पर्याय
इंटिरियर आणि एक्सटिरियर विभागात कंपनीने हलक्या वजनाच्या तंत्रज्ञानावर भर दिला आहे. वाहनांची कार्यक्षमता वाढविणे, इंधन अथवा ऊर्जा वापर कमी करणे आणि टिकाऊपणा राखणे या उद्देशाने कंपोझिट घटक, स्टीलला पर्याय ठरणारी उत्पादने आणि हेवी-ड्यूटी प्लास्टिक इंटिरियर पार्ट्स प्रदर्शित करण्यात आले आहेत.
वाहनातील आराम, टिकाऊपणा आणि आकर्षक डिझाइन यांचा समतोल राखण्यावर या उत्पादनांमध्ये भर देण्यात आला आहे.
जागतिक OEMसाठी सप्लाय चेन सोल्युशन्स
Tata AutoCompचा सप्लाय चेन विभागही IAA Transportationमध्ये सहभागी झाला आहे. या विभागाकडून ट्रान्समिशन पार्ट्स, रॅचेट टाय-डाउन्स, कार्गो मॅनेजमेंट आणि टोइंग उत्पादने प्रदर्शित केली जात आहेत.
जागतिक OEM आणि Tier-1 कंपन्यांसाठी हा विभाग उत्पादन तसेच पुरवठा साखळी भागीदार म्हणून काम करतो. RFQ व्यवस्थापनापासून ऑटोमोटिव्ह घटकांचे अंतिम वितरण करण्यापर्यंत विविध सेवा कंपनीकडून दिल्या जातात.
‘व्यावसायिक वाहन उद्योग वेगाने बदलतोय’
Tata AutoComp Systemsचे उपाध्यक्ष डॉ. अरविंद गोयल यांनी सांगितले की, विद्युतीकरण, उत्सर्जनासंदर्भातील कडक नियम तसेच हलक्या आणि टिकाऊ तंत्रज्ञानाच्या वाढत्या मागणीमुळे व्यावसायिक वाहन उद्योगात वेगाने बदल होत आहेत.
कंपनीच्या Artifex Engineering Centerमधील क्षमता आणि जागतिक OEM कंपन्यांसोबत असलेल्या दीर्घकालीन सहकार्याच्या आधारावर संपूर्ण मोबिलिटी सोल्युशन्स विकसित केली जात असल्याचे त्यांनी सांगितले.
Tier 0.5 भागीदार म्हणून OEM आणि उत्पादकांसोबत सुरुवातीच्या टप्प्यापासूनच नवीन मोबिलिटी सोल्युशन्सची रचना आणि विकास करण्याचे कंपनीचे उद्दिष्ट असल्याचेही त्यांनी नमूद केले.
युरोपियन बाजारासाठी दीर्घकालीन भागीदारीवर भर
Tata AutoComp Systemsचे व्यवस्थापकीय संचालक आणि मुख्य कार्यकारी अधिकारी मनोज कोल्हटकर यांनी सांगितले की, प्रत्येक उत्पादन आणि सोल्युशनमध्ये सातत्यपूर्ण गुणवत्ता तसेच ग्राहकांचे समाधान हे कंपनीचे प्रमुख उद्दिष्ट आहे.
युरोपियन OEM कंपन्यांसमोरील बदलत्या आव्हानांच्या पार्श्वभूमीवर विश्वासार्हता, जलद प्रतिसाद आणि दीर्घकालीन मूल्य निर्माण करणाऱ्या भागीदारीवर Tata AutoCompचा भर राहणार असल्याचे त्यांनी स्पष्ट केले.
IAA Transportation हे व्यावसायिक वाहने, लॉजिस्टिक्स आणि भविष्यातील वाहतूक तंत्रज्ञानासाठी आंतरराष्ट्रीय स्तरावरील महत्त्वाचे व्यासपीठ आहे. या प्रदर्शनाच्या माध्यमातून Tata AutoCompने भारतातील अभियांत्रिकी आणि उत्पादन क्षमतांसह जागतिक व्यावसायिक वाहन उद्योगातील आपली उपस्थिती आणखी मजबूत करण्याचा प्रयत्न केला आहे.
