नवी दिल्ली-काँग्रेस खासदार राहुल गांधी यांना मंगळवारी 12 तुघलक लेन येथील त्यांचा जुना सरकारी बंगला परत मिळाला. संसदेच्या गृहनिर्माण समितीने राहुल यांची खासदारकी बहाल केल्यानंतर एक दिवसानंतर बंगल्याचे वाटप केले.
राहुल गांधी जेव्हा काँग्रेस मुख्यालयात पोहोचले तेव्हा त्यांना बंगला परत मिळण्याबाबत विचारणा करण्यात आली. राहुल म्हणाले – संपूर्ण भारत माझे घर आहे.
राहुल गांधी 12 तुघलक लेनमध्ये 19 वर्षांपासून राहत होते. मोदी आडनाव प्रकरणी 2 वर्षांची शिक्षा झाल्यानंतर 22 एप्रिल 2023 रोजी त्यांना हा बंगला रिकामा करावा लागला होता.
राहुल 12 आणि 13 ऑगस्ट रोजी त्यांच्या लोकसभा मतदारसंघ वायनाडलाही भेट देणार आहेत. खासदारकी बहाल झाल्यानंतर त्यांचा हा पहिलाच वायनाड दौरा असेल.
2004 मध्ये राहुल गांधी पहिल्यांदा अमेठीतून खासदार झाले. तोपर्यंत ते आपल्या आईसोबत 10 जनपथ येथील बंगल्यात राहत होते. 2005 मध्ये ते खासदार झाल्यावर त्यांना पहिल्यांदा 12 तुघलक लेन येथे बंगला देण्यात आला होता.
हा दिल्लीच्या लुटियन झोनमध्ये स्थित एक टाइप-8 बंगला आहे, जो सर्वोच्च श्रेणी आहे. या आलिशान बंगल्यात 5 बेडरूम, 1 हॉल, 1 डायनिंग रूम, 1 स्टडी रूम आणि सर्व्हंट क्वार्टर आहे. छोटेखानी गृहप्रवेश समारंभानंतर राहुल गांधी या बंगल्यात शिफ्ट झाले होते. या सोहळ्यात सोनिया, प्रियांका, रॉबर्ट यांच्यासह फक्त त्यांचे जवळचे लोक सहभागी झाले होते. त्याचा सार्वजनिक फोटोही नाही.
या वर्षी 26 फेब्रुवारीला राहुल यांनी काँग्रेसच्या 85व्या अधिवेशनात सांगितले होते की, माझ्याकडे घर नाही. 12, तुघलक लेन येथील सरकारी बंगला रिकामा करून राहुल 10 जनपथ येथील त्यांची आई सोनिया गांधी यांच्या निवासस्थानी शिफ्ट झाले.
12 तुघलक लेनशी संबंधित एक प्रसिद्ध किस्सा 2016 चा आहे. त्यावेळी हिमंता बिस्वा सरमा काँग्रेसमध्ये होते. एका मुलाखतीत त्यांनी सांगितले की, ते आसामच्या समस्यांवर चर्चा करण्यासाठी काँग्रेस उपाध्यक्ष राहुल गांधी यांना भेटायला गेले होते. त्यावेळी राहुल त्यांच्या पाळीव कुत्र्यांसोबत खेळत होते. राहुल यांनी हिमंतांकडे लक्ष दिले नाही. त्यामुळे संतापलेल्या हिमंता यांनी काँग्रेस सोडून भाजपमध्ये प्रवेश केला.
