पुणे-व्यवस्थापन शिक्षणात अग्रेसर असणाऱ्या इन्स्टिट्यूट ऑफ मॅनेजमेंट डेव्हलपमेंट अँड रिसर्चच्या ( आयएमडीआर ) माध्यमातून या पुढे समाजाचे प्रश्न सोडविण्यासाठी संशोधनावर भर देण्यात येणार आहे. त्यासाठी ऑल इंडिया कौन्सिल ऑफ टेक्निकल एज्युकेशने ( एआयसीटीई ) मान्यता दिली असल्याची माहिती डेक्कन एज्युकेशन सोसायटीचे ( डीईएस ) अध्यक्ष डॉ. शरद कुंटे यांनी दिली.
आयएमडीआरच्या सुवर्ण महोत्सवी वर्षाची आजपासून सुरूवात झाली. या वेळी डॉ. कुंटे बोलत होते.
संस्थेचे माजी विद्यार्थी आणि रिलायन्स ब्रॉडकास्ट नेटवर्कचे मुख्य कार्यकारी अधिकारी अब्राहम थॉमस यांचे ‘ व्यवस्थापन शिक्षणाचे भवितव्य व त्याचे जागतिक उद्योग क्षेत्र घडविण्यात योगदान ‘ या विषयावरील व्याख्यान या निमित्त आयोजित करण्यात आले होते.
आयएमडीआरच्या स्थानिक व्यवस्थापन समितीचे अध्यक्ष महेश आठवले, संचालिका डॉ. शिखा जैन यांनी मार्गदर्शन केले. डॉ. श्रुती नागर यांनी सूत्रसंचालन आणि प्रा. प्राजक्ता प्रधान यांनी आभार प्रदर्शन केले.