पुणे-हडपसर परिसरातील मांजरी फार्म याठिकाणी एका विहिरीत 50 वर्षीय महिलेचा खून केलेल्या अवस्थेतील मृतदेह पोलिसांना मिळून आला होता.याप्रकरणी हडपसर पोलिस ठाण्यात आज्ञात इसमावर खुनाचा गुन्हा दाखल करण्यात आला होता.याबाबत पोलिसांनी तपास करत आरोपीस अटक केली आहे. त्याच्या चौकशीत विहिरीवरील मोटर चोरी करताना महिलेने पाहिल्याने, तिचा खून केल्याची कबुली आरोपीने दिली आहे. तसेच तिचा पुरावा नष्ट करण्यासाठी महिलेचा मृतदेह आरोपीने विहिरीत फेकून दिल्याचेही पोलिसांना सांगितले आहे.
राजेश अशोक मुळेकर (रा.लोणी काळभोर ,तालुका हवेली, पुणे )असे याप्रकरणी अटक करण्यात आलेल्या आरोपीचे नाव आहे? तर उषा अशोक देशमुख (वय 50, रा.लोणी काळभोर ,पुणे) असे खून झालेल्या महिलेचे नाव असून ती शेळी पालन करत होती.
पोलिसांनी दिलेल्या माहितीनुसार, महात्मा फुले कृषी विद्यापीठाच्या मांजरी फार्म येथील 100 एकर जागेत निर्जन स्थळी खजिना विहीरमध्ये महिलेची बॉडी पोलिसांना मिळून आली. सदर महिलेस 100 ते 125 फूट अंतरावरून मारून फरपटून ओढून विहिरीत टाकल्याचे दिसून येत होते. मात्र, सीसीटीव्ही फुटेज घटनास्थळी नव्हते तसेच घटनास्थळ ग्रामीण भागातील असल्याने हडपसर परिसरातील वेगवेगळ्या वाड्या वस्त्यावर जाऊन पोलिसांनी आरोपी विषयी माहिती घेण्याचा प्रयत्न केला.
तपास पथकास यादरम्यान कवडी माळवाडी येथील एक व्यक्ती घटना झाल्यापासून गायब असल्याची माहिती मिळाली. संबंधित व्यक्ती चार-पाच दिवसांपूर्वीच जेलमधून सुटल्याची माहिती पोलिसांना मिळाली, त्यानुसार पोलिसांनी संशयताची माहिती काढली असता, संशयित राजेश मुळेकर हा फुरसुंगी भागात एका बिहारी इसमाकडे पेंटिंगच्या कामाकरता गेला आहे, अशी माहिती पोलिसांना प्राप्त झाली. त्यानुसार पोलिसांनी आरोपीचा शोध घेत त्यास अटक केली.
सदरची कामगिरी पोलिस आयुक्त रितेश कुमार , परिमंडळ पाचचे पोलिस उपायुक्त विक्रांत देशमुख ,एसीपी बजरंग देसाई ,वरिष्ठ पोलिस निरीक्षक अरविंद गोकुळे ,पोलिस निरीक्षक दिगंबर शिंदे ,विश्वास डगळे यांच्या मार्गदर्शनाखाली एपीआय विजयकुमार शिंदे ,पीएसआय अविनाश शिंदे ,पोलिस अमलमदार सुशील लोणकर, संदीप राठोड ,समीर पांडुळे ,सचिन जाधव ,शाहीद शेख, प्रशांत दुधाळ, निखिल पवार यांच्या पथकाने केली आहे.
चोरी पहिली अन जीव गमावलामांजरी फार्म येथील खजाना विहिरीवर बसवलेली पाण्याची मोटर चोरण्यासाठी आरोपी राजेश मुळेकर 24 एप्रिल रोजी दुपारी आला होता. त्यावेळी मोटर चोरत असताना, त्यास मयत महिला ही शेळ्या घेऊन जात होती तेव्हा तिने आरोपीस पाहिले. तिने मी तुझ्याबाबत येथील अधिकाऱ्यांना सांगते असे बोलून ती निघून जात होती. त्यावेळी आपले नाव सर्वांना समजेल व पुन्हा आपणास जेलमध्ये जावे लागेल. या विचाराने आरोपीने तेथे पडलेला सिमेंटचा ब्लॉक तिच्या डोक्यात पाठीमागून मारला.ती जमिनीवर पडल्यावर मयता जवळील कोयतेने तिच्या डोक्यात वार आरोपीने केला आणि त्यानंतर तिला फरफटत आणून विहिरीत ढकलून दिले अशी माहिती आरोपीने पोलिसांना दिली आहे.
