घाटकोपरमध्ये मराठीची सक्ती करा
मुंबई- शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे यांनी इयत्ता पहिलीपासून हिंदीची सक्ती करण्याच्या निर्णयाला कडाडून विरोध केला आहे. इथले मीठ खाता अन् मराठीला विरोध करता. आम्ही हिंदीची सक्ती कदापि होऊ देणार नाही. आम्ही प्रेमाने सगळ ऐकून घेऊ. पण सक्ती करण्याचा प्रयत्न केला, तर तुमच्यासकट उखडून टाकू, असा इशारा त्यांनी या प्रकरणी सरकारला दिला.
उद्धव ठाकरे यांनी शनिवारी येथे आयोजित भारतीय कामगार सेनेच्या मेळाव्याला मार्गदर्शन केले. त्यात त्यांनी राज ठाकरे यांच्या युतीचा प्रस्तावाला सकारात्मक प्रतिसाद देत हिंदीच्या सक्तीवरून केंद्रातील नरेंद्र मोदी व राज्यातील देवेंद्र फडणवीस सरकारवर सडकून टीका केली. वक्फ बोर्ड विधेयकात गैरमुस्लिम व्यक्तीची वक्फ बोर्डावर नियुक्ती करण्याची तरतूद होती. आम्ही त्या तरतुदीला विरोध केला. आम्ही जो प्रश्न विचारला, तोच प्रश्न सुप्रीम कोर्टाने उपस्थित केला. बिगर मुस्लिम लोक वक्फ बोर्डावर घेतले गेले, तर मग उद्या मंदिरांमध्ये बिगर हिंदुंच्या नियुक्त्या करणार नाही याची खात्री काय?, असे ते म्हणाले.
उद्धव ठाकरे पुढे हिंदीच्या सक्तीला विरोध करताना म्हणाले, आम्ही कोणत्याही निर्णयाला आंधळेपणाने पाठिंबा देणार नाही. हिंदी बोलली म्हणजे हिंदू नाही. आम्ही कट्टर मराठी बोलणारे आहोत. तुमच्यापेक्षा जास्त देशाभिमानी आहोत. आम्ही प्रेमाने सगळे ऐकून घेऊ. पण सक्ती केली तर तुमच्यासकट सर्वांना उखडून टाकू. हिंदीची सक्ती कशासाठी? महाराष्ट्रात मराठी भाषा अनिवार्य करण्याचा निर्णय मी मुख्यमंत्री असताना घेतला याचा मला अभिमान आहे. येथे अमराठी लोक अनेक पिढ्यांपासून राहतात. आम्ही सुरू केलेल्या मराठी शिकण्याच्या वर्गावरही ते येतात. त्यामुळे हिंदीची सक्ती आम्ही खपवून घेणार नाही. इथले मीठ खाता आणि मराठीला विरोध करता. आपले सरकार असताना असे धाडस करण्याची कुणाचीही हिमत नव्हती.
घाटकोपरमध्ये मराठीची सक्ती करा -उद्धव ठाकरे यांनी यावेळी भाजपला मुंबईच्या गुजरातीबहूल घाटकोपरमध्ये मराठीची सक्ती करून दाखवण्याचेही आव्हान दिले. पण काही नतदृष्ट याविरुद्ध कोर्टात गेले. आपले सरकार गद्दारी करून पाडले. एसंशिने पाडले आणि आता पाय चाटत आहेत. मी सांगतोय इस राज्य मैं रहना होगा तो जय महाराष्ट्र बोलना होगा. हिंदीची सक्ती होऊ देणार नाही. देवेंद्र फडणवीसांना सांगतो, तुमचे जे कोणी आले होते ना जोशी की माशी… ते घाटकोपरमध्ये बोलले होते, आता त्या घाटकोपरमध्ये मराठी सक्ती करून दाखवा. घाटकोपरमध्ये प्रत्येक माणूस मराठी बोलला पाहिजे असे करून दाखवा, असे ते म्हणाले.
