पुणे-
मुलींच्या पीजी वस्तीगृहात बळजबरीने शिरण्याचा प्रयत्न करणाऱ्या तरुणास अडवण्याचा प्रयत्न केल्याने टोळक्याने मॅनेजरसह वसतिगृहाच्या सुरक्षारक्षकास बेदम मारहाण केली. हा तरुण जेवणाचे पार्सल पोहचवण्यास गेला होता. पुण्यातील वडगावशेरी परिसरात ही घटना घडली. या प्रकरणी आरोपींवर गुन्हा दाखल करण्यात आल्याची माहिती पोलिसांनी शनिवारी दिली.
गणेश बाळासाहेब साबळे (वय 27) यांनी येरवडा पोलिस ठाण्यात दिलेल्या तक्रारीवरून आरोपी रोहन बाळू व त्याच्यासह इतर सहा अनोळखी मुलांवर गुन्हा दाखल करण्यात आला आहे. ही घटना 15 फेब्रुवारी रोजी रात्री पावणेदहा वाजण्याच्या सुमारास घडली.
पोलिसांनी दिलेल्या माहितीनुसार, तक्रारदार गणेश साबळे हे वडगावशेरी येथील ‘स्मार्ट लिव्ह इन पीजी’ (मुलींचे पीजी वसतिगृह) येथे मॅनेजर म्हणून काम करतात. घटनेच्या दिवशी एक डिलिव्हरी बॉय जेवणाचे पार्सल देण्यास आला होता. तो जबरदस्तीने मुलींच्या वसतिगृहात जाण्याचा प्रयत्न करू लागल्याने त्यास तेथील सुरक्षारक्षक दीपक मंडल याने अडवले. त्यावेळी तक्रारदार मॅनेजर तेथे आले असता, आरोपीने सुरक्षारक्षकास शिवीगाळ करत मारहाण केली. त्यामुळे मॅनेजर गणेश साबळे यांनी कानशिलात देवून आरोपीस तेथून जाण्यास सांगितले, याचा राग मनात धरून आरोपीने काही वेळाने त्याच्यासोबत सहा अनोळखी मुले घेऊन आला. त्यांनी पीजी वस्तीगृहाच्या पार्किंगमध्ये संगनमताने लाकडी दांडक्याने, हाताने मारहाण केली. यात मॅनेजरच्या डोक्याला व कानामागे दुखापत झाली. याप्रकरणी पुढील तपास येरवडा पोलिस ठाण्याचे सहाय्यक पोलिस निरीक्षक एम आळेकर करत आहेत.