पुणे-
पुणे शहर पोलीस दलात १६३३ + १३० पदांसाठीची भरती प्रक्रिया १६ फेब्रुवारी २०२६ पासून सुरू झाली असून या भरतीसाठी १,३९,००० उमेदवारांनी अर्ज केले आहेत.
या भरतीत पोलीस मुख्यालय, शिवाजीनगर येथे सुरु असलेल्या पोलीस शिपाई भरतीमध्ये महिला उमेदवारांची शारिरीक व मैदानी चाचणी १६ फेब्रुवारी २०२६ पासून सुरु झालेली आहे. त्यामध्ये भरती प्रक्रियेमध्ये सहभागी होणा-या महिला उमेदवारांपैकी लहान बाळ सोबत असणा-या महिला उमेदवारांची शारिरीक व मैदानी चाचणी प्रथम प्राधान्य देवून लवकरात लवकर प्रक्रिया पूर्ण करण्याची व्यवस्था केलेली आहे.असे अपर पोलीस आयुक्त (प्रशासन) संजय पाटील यांनी कळविले आहे.

पुणे- शहरातील शहरी गतिशीलता सुधारण्यासाठी अल्पकालीन उपाय, बिग डेटा वापर, स्वच्छ हवा व TOD आधारित सर्वसमावेशक धोरणावर भर देऊन पुणे कोंडीमुक्त ,प्रदूषण मुक्त पुणे करण्याचा निर्धार आज येथे व्यक्त करण्यात आला .दिनांक १७ फेब्रुवारी २०२६ रोजी पुणे शहरातील Urban Mobility (शहरी गतिशीलता) या अत्यंत महत्त्वाच्या विषयावर एकदिवसीय कार्यशाळेचे आयोजन बालगंधर्व रंगमंदिर येथे करण्यात आले. ही कार्यशाळा पुणे महानगरपालिकेचे आयुक्त श्री नवल किशोर राम यांच्या आदेशानुसार घेण्यात आली असून पुणे महानगरपालिकेतील विविध विभागांचे अधिकारी व कर्मचारी मोठ्या संख्येने उपस्थित होते.

या कार्यशाळेला महापौर मनीषा नागपुरे, उपमहापौर, सभागृह नेते श्री गणेश बिडकर तसेच विरोधी पक्षनेते श्री निलेश निकम यांनी उपस्थिती दर्शवून आपले मनोगत व्यक्त केले. त्यांनी येत्या काळात पुणे शहरातील नागरिकांचा प्रवास अधिक सुरक्षित, जलद व सुलभ करण्यासाठी प्रशासनाने ठोस पावले उचलावीत, असा आग्रह धरला.

पुणे महानगरपालिकेचे आयुक्त यांनी सांगितले की, सन २०२६ साठी रस्ते विकास व वाहतूक सुधारणा यासाठी पुणे महानगरपालिका इतर शासकीय विभागांसोबत समन्वयाने काम करणार आहे. वाहतूक व्यवस्थापन अधिक प्रभावी करण्यासाठी वाहतुकीशी संबंधित बिग डेटा (Big Data) चा वापर करून ट्रॅफिक पॅटर्न, गर्दीची ठिकाणे आणि समस्या ओळखून उपाययोजना केल्या जातील. तसेच भविष्यातील भांडवली खर्चिक (capital intensive) प्रकल्प रणनीतीपूर्वक व दीर्घकालीन दृष्टीने राबविण्याची आवश्यकता असल्याचे त्यांनी स्पष्ट केले.

कार्यशाळेत शहर अभियंता अनिरुद्ध पावसकर यांनी येत्या वर्षात व पुढील काळात पुण्यातील वाहतूक परिस्थिती सुधारण्यासाठी करण्यात येणाऱ्या उपाययोजनांबाबत सविस्तर सादरीकरण केले. तसेच मुख्य अभियंता राजेश बनकर आणि प्रकल्प विभागाचे मुख्य अभियंता दिनकर गोजारे यांनी एका वर्षाच्या कालावधीत राबविण्यात येणाऱ्या उपयोजनांची माहिती दिली.

यावेळी पोलीस अतिरिक्त आयुक्त मनोज पाटील यांनी वाहतूक शिस्त, अंमलबजावणी आणि तंत्रज्ञानाच्या वापराबाबत सविस्तर मार्गदर्शन केले. तसेच आयआयटीएम (IITM) संस्थेच्या प्रतिनिधींनी पुणे शहरातील हवेच्या गुणवत्तेबाबत (Air Quality) महत्त्वपूर्ण माहिती सादर केली.

कार्यशाळेमध्ये स्वच्छ हवा (Clean Air) या विषयाचे विशेष महत्त्व अधोरेखित करण्यात आले. खासगी वाहनांचा वापर कमी करून सार्वजनिक वाहतूक, बस व मेट्रोचा वापर वाढविल्यास उत्सर्जन व प्रदूषणात लक्षणीय घट होऊ शकते, यावर सखोल चर्चा झाली. यासोबतच पुणे शहरात जे. एम. रोड, एफ. सी. रोड यांसारखे अधिक रस्ते पादचारी, सायकलस्वार आणि सार्वजनिक जीवनासाठी अनुकूल ‘स्ट्रीट्स’ म्हणून विकसित करण्याची गरज व्यक्त करण्यात आली.

दुपारच्या सत्रामध्ये विविध राष्ट्रीय व आंतरराष्ट्रीय संस्थांच्या तज्ज्ञांनी शहरी वाहतूक व्यवस्थेतील सर्वोत्तम पद्धती (best practices) मांडल्या. सेंट्रल रोड रिसर्च इन्स्टिट्यूट (CRRI), Oasis Designs, Design Point (अहमदाबाद), तसेच RKD संस्थेच्या प्रतिनिधींनी अंमलबजावणीयोग्य उपाययोजनांबाबत आपले अनुभव सादर केले.

याच सत्रामध्ये नॅशनल इन्स्टिट्यूट ऑफ अर्बन अफेअर्स (NIUA), नवी दिल्ली या संस्थेमार्फत UrbanShift उपक्रमांतर्गत पुणे महानगरपालिकेसोबत Transit Oriented Development (TOD) संदर्भात सुरू असलेल्या कामाची माहिती देण्यात आली. TOD साठी मार्गदर्शक तत्त्वे (Guidelines) विकसित करणे, स्टेशन एरिया प्लॅन तयार करणे आणि शिवाजीनगर मेट्रो स्टेशन परिसरात पायलट प्रकल्प राबविणे हे या उपक्रमाचे मुख्य उद्दिष्ट असल्याचे सांगण्यात आले.

याच अनुषंगाने वाहतूक नियोजक निखिल मिजार यांनी TOD या विषयावर पुण्यातील प्रतिष्ठित बांधकाम व्यावसायिक व वास्तुविशारदांसोबत संवाद साधला. या चर्चेमध्ये मेट्रो स्टेशनच्या परिसरातील विकास व विशेषतः पुनर्विकास (Redevelopment) या विषयांवर सविस्तर विचारमंथन करण्यात आले. या संवादात CREDAI, MBVA, NAREDCO, AESA तसेच IIA या संस्थांचे तज्ज्ञ सहभागी झाले असून, खासगी क्षेत्राच्या दृष्टीकोनातून TOD अंमलबजावणीसाठी उपयुक्त सूचना मांडण्यात आल्या.

या कार्यशाळेदरम्यान विविध हितधारकांनी (stakeholders) मांडलेल्या सूचना व कल्पना नोंदविण्यात आल्या असून त्या स्टेशन एरिया मोबिलिटी प्लॅनमध्ये समाविष्ट करण्यात येणार आहेत.

तसेच पुणे महानगरपालिकेसोबत जवळून काम करणाऱ्या विविध संस्थांच्या प्रतिनिधींनी आणि Global Traffic Solutions संस्थेचे श्री प्रताप भोसले यांनीही प्रत्यक्ष अंमलबजावणीयोग्य उपायांवर सादरीकरण केले.

संपूर्ण कार्यक्रमाचे सूत्रसंचालन मुख्य अभियंता (प्रकल्प) दिनकर गुजारे आणि वाहतूक नियोजक निखिल मिजार यांनी केले.

अशा स्वरूपाच्या कार्यशाळा प्रत्येक विभागाने नियमितपणे आयोजित कराव्यात तसेच पुणे महानगरपालिकेतील सर्व अभियंत्यांनी या कार्यशाळेचा लाभ घेऊन येणाऱ्या वर्षात महानगरपालिकेची उद्दिष्टे पूर्ण करण्यासाठी शर्थीचे प्रयत्न करावेत, असे आवाहन यावेळी करण्यात आले

पुणे, दि. १७ फेब्रुवारी २०२६ : गुरु तेग बहादुर यांच्या ३५० व्या शहीद महोत्सवानिमित्त त्यांच्या जीवनचरित्रावर आधारित चित्ररथाचे आज सावित्रीबाई फुले पुणे विद्यापीठ परिसरात उत्स्फूर्त स्वागत करण्यात आले. हा चित्ररथ नुकताच पाषाण येथे दाखल झाला असून विविध ठिकाणी कार्यक्रमांचे आयोजन करण्यात आले.

सकाळी ११.३० वाजता पाषाण येथील भैरवनाथ मंदिर वस्ती येथे चित्ररथासमोर कार्यक्रम संपन्न झाला. त्यानंतर सुस रोडवरील साई चौक येथे रथ थांबवून नागरिकांना दर्शनाची संधी देण्यात आली.
लमाणतांडा पाषाण बाधित वस्ती येथे सुमारे तीन तास चित्ररथ थांबविण्यात आला. या ठिकाणी मोठ्या संख्येने नागरिक उपस्थित होते. तसेच परिसरातील चौकांमध्ये रथ लावून ‘हिंद दी चादर ‘ कार्यक्रमाच्या अनुषंगाने जनजागृती करण्यात आली.

यानंतर औंध येथील जिजामाता चौक (परिहार चौक), औंध गुरुद्वारा, नीलकंठेश्वर मंदिर तसेच छत्रपती शिवाजी महाराज स्मारक येथे रथ लावून कार्यक्रम पार पडले. खडकी येथे मुख्य बाजारपेठ, शिवाजी महाराज स्मारक व खडकी गुरुद्वारा येथेही चित्ररथासमोर विविध धार्मिक व प्रेरणादायी कार्यक्रमांचे आयोजन करण्यात आले.

या प्रसंगी श्री. गणेशजी कलापुरे, श्री. विशालजी मेघावत, श्री. संदीपजी तुपे, औंध गुरुद्वाराचे विश्वस्त श्री. पंपीनदर सिंग मान, औंध गुरुद्वाराचे पुजारी बाबाजी सिंग, खडकी गुरुद्वारा श्री गुरु सिंह सभा येथील मनमोहन सिंग (ग्यानीजी), बोपोडी संयोजक श्री. अक्षयजी मुरडे, श्री. अक्षय भेगडे आदी मान्यवर उपस्थित होते.

​मुंबई/पुणे:

२२ एप्रिल २०२५ रोजी पहलगम (जम्मू-काश्मीर) येथे झालेल्या दहशतवादी हल्ल्यात वीरमरण आलेले शहीद संतोष जगदाळे यांच्या कुटुंबाला आज मोठा दिलासा मिळाला आहे. जगदाळे कुटुंबातील एकमेव कमावत्या व्यक्तीचे छत्र हरपल्याने निर्माण झालेल्या संकटाच्या काळात, त्यांच्या कन्या आसावरी जगदाळे यांना पुणे महानगरपालिकेत शासकीय सेवेत सामावून घेण्याचा मार्ग आता मोकळा झाला असून, त्यांना नियुक्ती देण्याचे आदेश निर्गमित होत आहेत.

शहीद संतोष जगदाळे यांच्या निधनानंतर जगदाळे कुटुंब उघड्यावर पडले होते. या घटनेची गांभीर्याने दखल घेत विधान परिषद उपसभापती डॉ. नीलम गोऱ्हे यांनी २५ मे २०२५ रोजी जगदाळे कुटुंबाची सांत्वनपर भेट घेतली होती. कुटुंबाची हलाखीची परिस्थिती आणि व्यथा जाणून घेतल्यानंतर, डॉ. गोऱ्हे यांनी २७ मे २०२५ रोजी तत्कालीन मुख्यमंत्री श्री. एकनाथजी शिंदे यांना पत्र लिहून आसावरी जगदाळे यांना विशेष बाब म्हणून शासकीय सेवेत सामावून घेण्याची विनंती केली होती.
​
डॉ. गोऱ्हे यांच्या पत्राच्या अनुषंगाने १९ जून २०२५ रोजी नगरविकास विभागाने पुणे महानगरपालिकेला प्रस्ताव सादर करण्याच्या सूचना दिल्या होत्या. मात्र, या प्रक्रियेत अनेक तांत्रिक आणि प्रशासकीय अडचणी निर्माण झाल्या होत्या. या अडचणींमुळे नियुक्ती लांबणीवर पडत असताना डॉ. गोऱ्हे यांनी खचून न जाता सातत्याने पाठपुरावा केला. त्यांनी संबंधित अधिकाऱ्यांच्या वारंवार बैठका घेतल्या आणि सकारात्मक प्रस्ताव तयार करण्यासाठी प्रशासनावर दबाव निर्माण केला.
​
सध्याचे मुख्यमंत्री एकनाथ शिंदे आणि उपमुख्यमंत्री तथा नगरविकास मंत्री ना. श्री. एकनाथजी शिंदे यांनी या प्रकरणात संवेदनशीलतेने लक्ष घातले. तांत्रिक अडचणी असूनही एका शहीद कुटुंबाच्या पाठीशी उभे राहण्याची भूमिका त्यांनी घेतली. डॉ. गोऱ्हे यांच्या सततच्या पाठपुराव्याला आणि मुख्यमंत्री शिंदे यांच्या सकारात्मक निर्णयाला आज यश आले असून आसावरी यांना नोकरी प्राप्त होत आहे.

​”संतोष जगदाळे यांनी देशासाठी बलिदान दिले, त्यांचे जाणे ही न भरून निघणारी हानी आहे. त्यांच्या बलिदानाची परतफेड आपण करू शकत नाही, मात्र त्यांच्या कुटुंबाला वाऱ्यावर सोडणे ही आपली संस्कृती नाही. आसावरीला नोकरी मिळवून देण्यासाठी तांत्रिक अडचणींमुळे थोडा विलंब झाला, त्याबद्दल आम्ही जगदाळे कुटुंबाच्या भावनेशी सहमत आहोत. मात्र, आज तिला नियुक्ती मिळत असल्याचा समाधान आहे.

उपमुख्यमंत्री एकनाथजी शिंदे यांनी पुन्हा एकदा सिद्ध केले आहे की, ते केवळ राज्याचे प्रमुख नसून खऱ्या अर्थाने ‘लाडक्या बहिणीचे राखणदार’ आहेत.”
​या निर्णयामुळे जगदाळे कुटुंबाला आर्थिक स्थैर्य लाभणार असून, एका वीरपुत्राच्या बलिदानाचा सन्मान शासनाकडून करण्यात आला आहे.

मुंबई –

पंतप्रधान मोदी आणि फ्रान्सचे अध्यक्ष इमॅन्युएल मॅक्रॉन यांच्यातील बैठक मुंबईतील लोकभवन येथे सुरू झाली आहे. या भेटीदरम्यान दोन्ही नेत्यांनी एकमेकांना आलिंगन दिले. या चर्चेचा उद्देश भारत आणि फ्रान्समधील भागीदारी आणखी मजबूत करणे हा आहे.

या बैठकीदरम्यान भारत आणि फ्रान्समध्ये अंदाजे ₹३.२५ लाख कोटींचा मोठा संरक्षण करार होण्याची शक्यता आहे. मूल्याच्या बाबतीत हा भारताचा आतापर्यंतचा सर्वात मोठा लष्करी करार मानला जात आहे. या कराराअंतर्गत भारताला ११४ राफेल लढाऊ विमाने मिळतील.

या बैठकीत संरक्षण, सागरी सहकार्य, इंडो-पॅसिफिक रणनीती, उदयोन्मुख तंत्रज्ञान, कृत्रिम बुद्धिमत्ता आणि जागतिक मुद्द्यांवर चर्चा केली जाईल.

दोन्ही नेते सायंकाळी 5:15 वाजता भारत-फ्रान्स इनोव्हेशन इयर 2026 चे उद्घाटन करतील. यासोबतच दोन्ही देशांतील उद्योजक, स्टार्टअप संस्थापक, संशोधन तज्ञ आणि नवनिर्मितीशी संबंधित लोकांना संबोधित करतील.
राष्ट्राध्यक्ष मॅक्रॉन 17 ते 19 फेब्रुवारीपर्यंत भारताच्या दौऱ्यावर असतील. यावेळी ते दिल्लीतील AI इम्पॅक्ट समिटमध्येही सहभागी होतील.
राष्ट्राध्यक्ष झाल्यानंतर मॅक्रॉन चौथ्यांदा भारतात पोहोचले

राष्ट्राध्यक्ष झाल्यानंतर मॅक्रॉन यांचा हा चौथा भारत दौरा आहे. यापूर्वी ते मार्च 2018 मध्ये पहिल्यांदा भारतात आले होते. त्यानंतर ते सप्टेंबर 2023 मध्ये G20 शिखर परिषदेसाठी आणि जानेवारी 2024 मध्ये प्रजासत्ताक दिन सोहळ्यात प्रमुख पाहुणे म्हणून आले होते.

भारत आणि फ्रान्स यांच्यात 1998 पासून धोरणात्मक भागीदारी आहे आणि दोन्ही देश संरक्षण, तंत्रज्ञान, अंतराळ आणि ऊर्जा यांसारख्या क्षेत्रांमध्ये एकत्र काम करतात. हा दौरा देखील याच सहकार्याला पुढे नेण्याच्या दृष्टीने महत्त्वाचा मानला जात आहे.

भारताला 24 सुपर राफेल फायटर जेट मिळतील

भारत आणि फ्रान्समधील राफेल करारातील सर्वात महत्त्वाची गोष्ट म्हणजे यापैकी २४ विमाने ‘सुपर राफेल’ असतील. या प्रगत जेट विमानांना F-5 आवृत्ती म्हटले जात आहे, जी फ्रान्सची कंपनी दसॉ एव्हिएशन बनवत आहे.

सध्या भारतीय हवाई दलाकडे जी राफेल विमाने आहेत, ती F-3 प्रकारची आहेत आणि त्यांना 4.5 जनरेशनची लढाऊ विमाने मानले जाते. यात स्टेल्थ वैशिष्ट्ये आणि अणुबॉम्ब वाहून नेण्याची क्षमता देखील आहे. नवीन करारामध्ये मिळणारी बहुतेक जेट विमाने F-4 आवृत्तीची असतील, जी अधिक प्रगत प्रणाली आणि अद्ययावित तंत्रज्ञानासह येतील.

असे सांगितले जात आहे की युरोपियन मानकांनुसार F-5 राफेलला आणखी प्रगत श्रेणीत ठेवले जात आहे. ही सध्या विकासाच्या टप्प्यात आहेत. योजनेनुसार F-4 जेट विमानांची डिलिव्हरी २०२८-२९ पासून सुरू होईल, तर २०३० नंतर मिळणारी जेट विमाने F-5 म्हणजेच सुपर राफेल असतील.

या करारानंतर, फ्रान्सव्यतिरिक्त, भारत त्या निवडक देशांमध्ये सामील होईल ज्यांच्याकडे इतक्या प्रगत क्षमतेची राफेल लढाऊ विमाने असतील. यामुळे हवाई दलाची ताकद आणि तंत्रज्ञान पातळी या दोन्हीमध्ये मोठी वाढ होईल असे मानले जात आहे.

सुनील माने यांचे मुख्यमंत्र्याना पत्र

पुणे : पुणे शहरातील वाढती गुन्हेगारी, वाढलेल्या वाहतूक समस्या या पार्श्वभूमीवर पोलिसांना गुन्ह्यांची उकल करण्यासाठी पुरेसे मनुष्यबळ तसेच वेळ उपलब्ध होत नाही. त्याचप्रमाणे व्हीआयपींच्या स्वागतासाठी विभागीय आयुक्त, जिल्हाधिकारी, पोलिस आयुक्त यांसारख्या लोकसेवकांचा कामाचा वेळ जात आहे. त्यामुळे व्हीआयपींच्या बंदोबस्तासाठी स्वतंत्र पोलिसांची नेमणूक करावी अशी मागणी राष्ट्रवादी कॉँग्रेस शरदचंद्र पवार पक्षाचे प्रदेश सरचिटणीस, प्रवक्ते सुनील माने यांनी राज्याचे मुख्यमंत्री तथा गृहमंत्री देवेंद्र फडणवीस यांच्याकडे पत्राद्वारे केली आहे. यासंदर्भातले पत्र त्यांनी ई मेलद्वारे पाठवले आहे.

सुनील माने यांनी दिलेल्या पत्रात म्हटले आहे की, पुणे शहरात दिवसेंदिवस वाढणारी वाहने आणि उपलब्ध असणारे रस्ते यांच्या व्यस्त प्रमाणामुळे प्रचंड मोठ्या प्रमाणावर वाहतुकीच्या समस्या निर्माण होत आहेत. त्याचप्रमाणे शहरात खून, मारामारी, चोरी, सायबर गुन्हे वाढत आहेत. शहरातील वाढती गुन्हेगारी हा ही एक चिंतेचा विषय आहे. मुंबई पाठोपाठ पुणे ही राज्यातील महत्वाचे शहर बनत चालले असल्यामुळे व्हीआयपी दौऱ्यात सातत्याने वाढ होत आहे. गत वर्षीचा विचार करता गेल्या वर्षी झेड प्लस सुरक्षा असणाऱ्या ३३४ व्यक्तिंना, झेड सुरक्षा असणाऱ्या ९८ जणांना, वाय प्लस दर्जाच्या ९६९ जणांना तर वाय सुरक्षा असणाऱ्या २५ लोकांना पोलिसांना सुरक्षा पुरवावी लागली. व्हीआयपी दर्जाच्या व्यक्तींच्या बंदोबस्ता सोबत ‘कॅन्व्हॉय’ साठी सुद्धा गाड्या पुरवाव्या लागतात. पोलिस प्रशासनाकडे गुन्ह्यांची उकल करण्यासाठी पुरेसे मनुष्यबळ उपलब्ध होत नसल्याने पोलिसांवर ताण येत आहे. गुन्हेगारीला अटकाव करण्यासाठी पोलीस यंत्रणेवरील ताण कमी करून बंदोबस्त आणि या गोष्टींसाठी नेहमीच्या पोलीस दलाचा वापर न करता त्यासाठी स्वतंत्र व्यवस्था करण्याची पुणे शहराला गरज आहे.

व्हीआयपी बंदोबस्त व स्वागतासाठी विभागीय आयुक्त, जिल्हाधिकारी, पोलिस आयुक्त यांचा सतत वेळ जातो. यामुळे सर्वसामान्य जनतेच्या कामाचा वेळ वाया जातो. लोकसेवकांचा हा वाया जाणारा हा वेळ टाळण्यासाठी पुणे शहराच्या वाहतुकीसाठी स्वतंत्र पोलिस आयुक्त नेमावा, तसेच व्हीआयपी बंदोबस्तासाठी स्वतंत्र पोलिस व्यवस्था करावी अशी मागणी मी सरकारकडे  सातत्याने करत आहे. याबाबत पुण्याचे पालकमंत्री आजितदादा असताना त्यांना ११ डिसेंबर २०२३ साली व्हीआयपी बंदोबस्तासाठी स्वतंत्र पोलिस नेमावेत व पुण्यासाठी स्वतंत्र वाहतूक आयुक्त नेमावा यासाठी १३ डिसेंबर २०२३, २५ डिसेंबर २०२४ रोजी पत्र दिले होते. आपल्यालाही पुण्यासाठी स्वतंत्र वाहतूक पोलिस आयुक्त नेमावा यासाठी ६ मार्च आणि १३ ऑगस्ट २०२५ रोजी पत्र दिले होते. तरी कृपया आपण याबाबत लक्ष घालून व्हीआयपी बंदोबस्तासाठी स्वतंत्र पोलिस नेमावेत तसेच पुण्यासाठी स्वतंत्र वाहतूक पोलिस आयुक्त ही नेमावा अशी विनंती त्यांनी या पत्राद्वारे केली आहे.  

पुणे महानगरपालिका, यशदा आणि संवादतर्फे आयोजन

पुणे : पुणे महानगरपालिका, यशदा आणि संवाद, पुणे यांच्या संयुक्त विद्यमाने दुसरे प्रशासकीय अधिकारी मराठी साहित्य संमेलन शनिवार दि. २१ व रविवार दि. २२ फेब्रुवारी २०२६ या कालावधीत पुण्यात आयोजित करण्यात आहे. संमेलन बालगंधर्व रंगमंदिरात आयोजित करण्यात आले असून संमेलनाचे यंदाचे दुसरे वर्ष आहे, अशी माहिती यशदाचे अतिरिक्त महासंचालक शेखर गायकवाड, यशदाचे अतिरिक्त जिल्हाधिकारी राजीव नंदकर, संवाद, पुणेचे अध्यक्ष सुनील महाजन यांनी आज (दि. १६) पत्रकार परिषदेत दिली. पुणे महापालिका मराठी भाषा संवर्धन समितीच्या सचिव आशा उबाळे उपस्थित होत्या.

तेलंगणाचे अतिरिक्त पोलिस महासंचालक महेश भागवत संमेलनाचे अध्यक्ष असून पुणे महापालिकेचे आयुक्त नवल किशोर राम स्वागताध्यक्ष आहेत. यशदाचे महासंचालक निरंजनकुमार सुधांशू संमेलनाचे मुख्य संयोजक असून विभागीय आयुक्त डॉ. चंद्रकांत पुलकुंडवार सहसंयोजक आहेत.

संमेलनाचे उद्‌घाटन शनिवार, दि. २१ रोजी सकाळी १०:३० वाजता महापौर मंजुषा नागपुरे आणि उपमहापौर परशुराम वाडेकर यांच्या उपस्थितीत होणार आहे. संमेलनात शासकीय अधिकाऱ्यांच्या उत्कृष्ट साहित्यकृतीला वाङ्‌मय पुरस्कार देऊन गौरविले जाणार आहे.

दुपारी १२ वाजता ‘शासकीय अधिकाऱ्यांच्या साहित्य लेखनातील आव्हाने’ या विषयावर परिसंवाद आयोजित करण्यात आला असून यात ९५व्या अखिल भारतीय मराठी साहित्‍य संमेलनाचे अध्यक्ष भारत सासणे, केंद्रीय उच्च शिक्षा मंत्रालयातील अतिरिक्त सचिव आनंद पाटील, नवी दिल्लीच्या महाराष्‍ट्र सदनातील निवासी आयुक्त सुशील गायकवाड यांचा सहभाग असणार आहे.

दुपारी १:३० वाजता महाराष्ट्राबाहेरील महाराष्ट्रीयीन प्रशासकीय अधिकाऱ्यांचे अनुभवकथन ऐकता येणार आहे. यात तेलंगणाचे अतिरिक्‍त पोलिस महासंचालक महेश भागवत, भुवनेश्वरचे महापालिका आयुक्त राजेश पाटील, राष्‍ट्रीय कौशल्‍य विकास महामंडळाचे सल्लागार ज्ञानेश्वर मुळे, ओरिसा पशुसंवर्धन विभागाचे संचाकल विजय कुलांगे, बिहार राज्य रस्ते विकास मंडळाचे व्यवस्‍थापकीय संचालक कपिल शिरसाट, एनआयए विभागाचे पोलिस अधीक्षक प्रतीक ठुबे, आयकर आयुक्त सुरेन्द्रकुमार मानकोसकर यांचा सहभाग असणार आहे.

दुपारी ३ वाजता ‘शासकीय अधिकारी मराठी साहित्य संमेलनाची भूमिका व आव्हाने’ या विषयावर पहिले संमेलनाध्यक्ष, यशदाचे अतिरिक्त महासंचालक शेखर गायकवाड यांच्या मुलाखतीचा कार्यक्रम आयोजित करण्यात आली असून त्यांच्याशी यशदातील अतिरिक्त जिल्हाधिकारी राजीव नंदकर संवाद साधणार आहेत.

दुपारी ४ वाजता अभिजात मराठी भाषा व प्रशासन या विषयावर परिसंवाद आयोजित करण्यात आला असून यात ९१व्या अखिल भारतीय मराठी साहित्‍य संमेलनाचे अध्यक्ष लक्ष्मीकांत देशमुख, मराठी भाषा विभागाचे संचालक किरण कुलकर्णी, पुणे जिल्हा परिषदेचे मुख्य कार्यकारी अधिकारी गजानन पाटील, अहिल्यानगरचे मुख्य कार्यकारी अधिकारी आनंद भंडारी यांचा सहभाग असून त्यांच्याशी किशोर मासिकाचे संपादक किरण केंद्रे संवाद साधणार आहेत.

शासकीय अधिकाऱ्यांनी लिहिलेल्या पुस्तकांचा प्रकाशन सोहळा सायंकाळी ५ वाजता आयोजित करण्यात आला आहे. सायंकाळी ५:१५ वाजता कविसंमेलन आयोजित करण्यात आले असून यात निवृत्त सनदी अधिकारी दिलीप पांढरपट्टे, अतिरिक्‍त आयुक्‍त वैशाली पतंगे, अतिरिक्त जिल्हाधिकारी सतीश राऊत, उपसचिव लीना संखे, उपजिल्हाधिकारी गणेश मरकड, अतिरिक्त जिल्हाधिकारी मनिषा कुंभार, उपजिल्हाधिकारी वैशाली राजमाने, पीएमआरडीच्या सहआयुक्त मोनिका सिंग, निवृत्त मुख्याधिकारी विद्या पोळ, यशदातील माध्यम व प्रकाशन विभागातील व्यंकटेश कल्याणकर, यशदातील सहायक प्राध्यापक किरण धांडे यांचा सहभाग असणार आहे.

सायंकाळी ६:१५ वाजता भारत सासणे यांच्या कथेवर आधरित ‘मुर्गा’ हा लघुपट दाखविला जाणार असून पटकथा व संवाद लेखन राजेश जोशी यांचे असून किरण लद्दे दिग्दर्शक आहेत.

रविवार, २२ जानेवारी रोजी सकाळी १० वाजता ‘स्पर्धा परीक्षा संधी, समस्या व आव्हाने’ या विषयावर पोलिस सेवेतील प्रशिक्षणार्थी बिरदेव डोणे, महसूल विभागातील सोनल सोनकवडे, उपजिल्हाधिकारी शुभम पाटील, सोनल सूर्यवंशी, प्रसाद चौघुले बोलणार आहेत. अतिरीक्त जिल्हाधिकारी राजीव नंदकर सत्र संचालक आहेत.

सकाळी ११ वाजता ‘माझे वाचन आणि लेखन’ या विषयावर अपर मुख्य सचिव विकास खारगे, पिंपरी-चिंचवड महानगरपालिका आयुक्त श्रावण हार्डीकर, निवृत सनदी अधिकारी सुनील पाटील, उप महासंचालक पौर्णिमा गायकवाड, साहित्य अकादमी बाल साहित्य पुरस्कार विजेते व तहसीलदार आबा महाजन, राज्य कर उपायुक्त अंजली ढमाळ बोलणार आहेत.

दुपारी १२ वाजता ‘प्रशासकीय अधिकारी व साहित्य निर्मिती’ या विषयावरील परिसंवादात विभागीय आयुक्त चंद्रकांत पुलकुंडवार, सीजीएसटीच्या अतिरिक्त आयुक्त वैशाली पतंगे, बालभारतीच्या संचालक अनुराधा ओक, उपमुख्य कार्यकारी अधिकारी सोनाली इरपळे-घुले, राज्य कर उपआयुक्त अंजली ढमाळ यांचा सहभाग असणार आहे.

दैनंदिन प्रशासकीय कामकाजात घडणाऱ्या विनोदाबाबत यशदाचे अतिरिक्त महासंचालक शेखर गायकवाड, निवृत्त कृषी उपसंचालक नाथ राणे, सत्यशील गुर्जर, निवृत्त पोलिस अधिकारी राजेंद्र भामरे बोलणार आहेत.

दुपारी २:३० वाजता ‘कृत्रिम बुद्धिमत्ता-साहित्य क्षेत्रातील आव्हाने’ या विषयावरील परिसंवादात कार्पोरेट प्रशिक्षक सुनील पाटील, मुकुंद नाडगौडा, एससीईआटीचे उपसंचालक विकास गरड बोलणार आहेत.

दुपारी ४ वाजता यशदातील अतिरिक्त महासंचालक शेखर गायकवाड, अतिरिक्त जिल्हाधिकारी राजीव नंदकर, वाडिया महाविद्यालयातील प्रा. सचिन सानप हे ‘अधिकारी साहित्य संमेलनाची दिशा व भवितव्य’ या विषयावर बोलणार आहेत.

सायंकाळी ५ वाजता संमेलनाचा समारोप समारंभ आयोजित करण्यात आला आहे. 

नवी दिल्ली, 17 फेब्रुवारी 2026

बारामती येथे 28 जानेवारी 2026 रोजी झालेल्या लियरजेट 45 विमान व्हीटी-एसएसके च्या अपघाताची सविस्तर चौकशी विमान अपघात तपास संस्था करत असून ही चौकशी विमान (अपघात आणि घटनांचा तपास) नियम, 2017 आणि आंतरराष्ट्रीय नागरी विमान वाहतूक संघटनेच्या (आयसीएओ) परिशिष्ट 13 मधील आंतरराष्ट्रीय मानके आणि शिफारस केलेल्या पद्धतींनुसार काटेकोरपणे केली जात आहे.

या विमानात दोन स्वतंत्र फ्लाइट रेकॉर्डर बसविण्यात आले होते. अपघाताच्या वेळी हे दोन्ही रेकॉर्डर दीर्घकाळ तीव्र उष्णतेच्या संपर्कात आले आणि आगीमुळे त्यांचे नुकसान झाले.

एल3- कम्युनिकेशन्स यांनी तयार केलेला डिजिटल फ्लाइट डेटा रेकॉर्डर, विमान अपघात तपास संस्थेच्या प्रयोगशाळेत यशस्वीरीत्या डाउनलोड करण्यात आला. तर हनीवेल कंपनीने तयार केलेल्या कॉकपीट व्हॉइस रेकॉर्डरची सध्या विस्तृत तांत्रिक तपासणी सुरु आहे. डेटा पुनर्प्राप्तीसाठी विशेष तांत्रिक सहाय्य मिळविण्यासाठी उत्पादन करणाऱ्या देशाच्या मान्यताप्राप्त प्रतिनिधीकडून मदत मागविण्यात आली आहे.

ही चौकशी समावेशी, वस्तुनिष्ठ आणि पुराव्यांवर आधारित व्हावी यासाठी विमान अपघात तपास संस्था सर्व विहित तांत्रिक आणि प्रक्रियात्मक प्रोटोकॉलचे पालन करत आहे. संपूर्ण पारदर्शकतेसाठी संस्थेची वचनबद्धता कायम असून चौकशी दरम्यान योग्य वेळी पुढील माहिती सामायिक केली जाईल.

विमान अपघात तपास संस्थेने सर्व संबंधित घटकांना कोणत्याही प्रकारचे तर्कवितर्क टाळावेत  आणि प्रस्थापित कार्यपद्धतीनुसार चौकशी प्रक्रिया सुरळीतपणे पार पडू द्यावी अशी विनंती केली आहे.

“सुपर सनी मंथ” क्रीडा महोत्सव १८ फेब्रुवारी ते ८ मार्च दरम्यान रंगणार

पुणे, १७ फेब्रुवारी २०२६: युवा सामाजिक कार्यकर्ते आणि नगरसेवक सनी विनायक निम्हण यांच्या वाढदिवसानिमित्त सोमेश्वर फाउंडेशनच्या वतीने “सुपर सनी मंथ” या क्रीडा महोत्सवाचे आयोजन करण्यात आले आहे.

यावेळी नगरसेवक सनी विनायक निम्हण म्हणाले, “माझ्या वाढदिवसानिमित्त दरवर्षीप्रमाणे याही वर्षी आम्ही ‘सुपर सनी मंथ’ (Super Sunny Month) मोठ्या उत्साहात साजरा करत आहोत. क्रीडा, कला, आनंद आणि सकारात्मकतेचा हा सोहळा आता आपल्या सर्वांच्या जिव्हाळ्याचा विषय बनला आहे.

मला सांगायला अत्यंत आनंद होत आहे की, दरवर्षीप्रमाणे याही वर्षी आयोजित सर्व क्रीडा स्पर्धांना खेळाडू आणि क्रीडाप्रेमींकडून अतिशय जोरदार आणि सकारात्मक प्रतिसाद मिळत आहे. सर्व स्पर्धांची नावनोंदणी अतिशय उत्साहात होत आहे.

“आजच्या तरुणाईसमोर अनेक आव्हाने आहेत. व्यसनाधीनतेपासून दूर राहून खेळ आणि व्यायामाकडे वळणे ही काळाची गरज आहे. ‘सुपर सनी मंथ’च्या माध्यमातून प्रत्येक युवकाला आपली प्रतिभा दाखवण्याची संधी मिळावी आणि आपल्या परिसरातून राज्य व राष्ट्रीय पातळीवरील खेळाडू घडावेत, हीच माझी मनापासून इच्छा आहे.”
या क्रीडा महोत्सवाच्या माध्यमातून परिसरातील गुणवान व उदयोन्मुख खेळाडूंना व्यासपीठ उपलब्ध होणार असून त्यांना पुढील स्पर्धांसाठी प्रोत्साहन मिळणार आहे. विविध क्रीडा प्रकारांमध्ये होणाऱ्या स्पर्धांमुळे तरुणांना आपली कौशल्ये सादर करण्याची संधी मिळणार आहे.समाजामध्ये व्यसनमुक्तीचा संदेश देण्यासाठी आणि तरुणांमध्ये व्यायामाची आवड निर्माण करण्याच्या उद्देशाने या स्पर्धा आयोजित करण्यात आल्याचे सनी निम्हण यांनी सांगितले आहे. या माध्यमातून गुणवान व उदयोन्मुख खेळाडूंना प्रोत्साहन मिळणार आहे.

पुणे जिल्हा हौशी अॅथलेटिक संघटनेच्या मान्यतेने पुणे व पिंपरी चिंचवड शहरास जोडत व्यसनमुक्तीचा संदेश देणारी पुणे ट्वीन सिटी मॅरेथॉन, रन फॉर अमृतकाल स्पर्धेचे आयोजन ८ मार्च रोजी करण्यात आले आहे. स्पर्धेचे हे तिसरे वर्ष आहे. ही मॅरेथॉन स्पर्धा २१ किमी, १० किमी, ५ किमी आणि ३ किमी प्रकारात होणार आहे. सावित्रीबाई फुले पुणे विद्यापीठ येथे पहाटे ५ वाजता सुरू होणाऱ्या या स्पर्धेमध्ये १०,००० हुन अधिक धावपटूंनी आपला सहभाग निश्चित केला आहे. या मॅरेथॉन मधील सर्व सहभागी धावपटूंना टी शर्ट, गुडी बॅग, पदक, ई टायमिंग प्रशस्तिपत्रक, वैद्यकीय सुविधा विनामूल्य देण्यात येणार आहेत. तसेच या स्पर्धेसाठी ५,५०,००० रुपयांची पारितोषिक देण्यात येताल. या स्पर्धेची तांत्रिक नियोजन यश रायकर पाहणार आहेत. इच्छुक स्पर्धकांना या स्पर्धेची नांव नोंदणी दि.५ मार्चपर्यंत www.sunnynimhan.com या संकेतस्थळावर करता येईल.

जिल्हास्तरीय १४ वर्षांखालील मुले आणि मुलीसाठी आंतर शालेय निमंत्रित व्हॉलिबॉल स्पर्धेचे आयोजन करण्यात आलेले आहे. डेक्कन जिमखाना मैदानावर ही स्पर्धा बुधवार, १८ फेब्रुवारी आणि गुरुवार, १९ फेब्रुवारी रोजी रंगणार आहे, युवा खेळाडूंना प्रोत्सहाण देण्याच्या सनी विनायक निम्हण यांच्या धोरणानुसार होणा-या या स्पर्धत एकूण ६०,००० रुपयांची बक्षिसे, प्रशस्तिपत्रक आणि विजेत्यांना चषक देण्यात येणार आहेत. यामध्ये प्रत्येक सामना जिंकणा-या संघास रुपये १००० आणि हरणा-या संघास रुपये ५०० रुपये उत्तेजनार्थ देण्यात येणार असून या स्पर्धेचे हे आकर्षण ठरले आहे. सर्व सहभागी स्पर्धकांना प्रशस्तीपत्र देण्यात येणार

विनर्स कराटे असोसिएशनच्या मान्यतेने व सहकार्याने राज्यस्तरीय कराटे चॅम्पियनशिप २०२६ चे आयोजन करण्यात आले आहे. या स्पर्धेत राज्यभरातील सुमारे ८०० कराटेपडूंनी आपला सहभाग निश्चित केला असल्याची माहिती सेनसेई संतोष पवार यांनी दिली. मुले व मुलीसाठी या स्पर्धा १ मार्च रोजी सुस रोड येथील सनी वर्ल्ड येथे होणार आहेत. या स्पर्धा ६, ८, १०, १२, १४ वर्षाखालील आणि १४ वर्षावरील मुले व मुलीसाठी होतील. स्पर्धेत एकूण १,५०,०००रुपयांची पारितोषिके, प्रशस्तिपत्रक आणि पदके चषक देण्यात येणार आहेत.

सोमेश्वर चषक २०२६ बॅडमिंटन स्पर्धेचे आयोजन २१ आणि २२ फेब्रुवारी रोजी करण्यात आले आहे. द लाईफ स्पोर्टस्, सोमेश्वर वाडी, पाषाण येथे या स्पर्धा ९, ११, १३, १५, १७ वर्षे वयोगटात मुले आणि मुलींच्या गटात, तर वरीष्ठ गटात पुरुष व महिलांसाठी एकेरी व दुहेरीच्या स्पर्धा रंगणार आहेत. मंत्रेशी सागर यांच्या मार्गदर्शनाखाली या स्पर्धा होत असून स्पर्धेत एकूण ५०,००० रोख पारितोषीकांसह सर्व सहभागी खेळाडूंना प्रशस्तीपत्र देण्यात येणार आहेत.

कॅरम असोसिएशन ऑफ पुणे यांच्या मान्यतेखाली पुणे जिल्हास्तरीय कॅरम स्पर्धेचे आयोजन करण्यात आहे. हि स्पर्धा रुक्मिणी हॉल या ठिकाणी १८ व १९ फेब्रुवारी २०२६ रोजी रंगणार आहे. सुशील गुजर यांच्या मार्गदर्शनाखाली हि स्पर्धा होत असून स्पर्धेत एकूण ६०,००० रोख पारितोषीकांसह खेळाडूंना प्रशस्तीपत्र व करंडक देण्यात येणार असल्याचे कॅरम असोसिएशन ऑफ पुणेचे अध्यक्ष भरत देसडला यांनी सांगितले.

जिल्हास्तरीय पिकलबॉल स्पर्धेचे आयोजन करण्यात आले असून यामध्ये २०० हुन अधिक अधिक खेळाडू आपले कौशल्य पणाला लावणार आहे.
हि स्पर्धा २१ व २२ फेब्रुवारी २०२६ या दिवशी द लाईफ स्पोर्टस्, सोमेश्वर वाडी, पाषाण या ठिकाणी होणार आहे. ब्रिजमोहन सिंग यांच्या मार्गदर्शनाखाली हि या स्पर्धा होत असून एकूण ८५,००० रोख पारितोषीकांसह खेळाडूंना प्रशस्तीपत्र व करंडक देण्यात येणार आहेत.

पुणे जिल्हा मेट्रोपॉलिटन टेनिस संघटना(पीएमडीटीए) यांच्या मान्यतेखाली जिल्हास्तरीय १२ व १४ वर्षांखालील टेनिस स्पर्धेचे आयोजन करण्यात आले असून यामध्ये १५० हुन अधिक खेळाडू झुंजणार आहेत. हि स्पर्धा २१ व २२ फेब्रुवारी २०२६ या दिवशी सुस रोड येथील सनी वर्ल्ड टेनिस कोर्ट येथे पार पडणार आहे.

पुणे डिस्ट्रिक्ट चेस सर्कल यांच्या मान्यतेखाली सोमेश्वर करंडक खुल्या व विविध वयोगटातील एक दिवसीय रॅपिड बुद्धिबळ स्पर्धेचे आयोजन करण्यात आले आहे. हि स्पर्धा रविवार, १ मार्च रोजी, गोविंद गार्डन मंगल कार्यालय पाषाण या ठिकाणी होणार आहे. हि बुद्धिबळ स्पर्धा ७,१०,१२ व १५ वर्षाखालील व खुल्या गटात पार पडणार आहे. राजेंद्र कोंडे यांच्या मार्गदर्शनाखाली हि स्पर्धा होत असून स्पर्धेत एकूण १,००,००० रोख पारितोषीकांसह खेळाडूंना प्रशस्तीपत्र व करंडक देण्यात येणार आहेत.

क्षेत्रीय कार्यालयांमध्ये ‘जागल्या’ संकल्पना राबविण्यात येणार
पुणे- पुणे महानगरपालिका पथ विभागामार्फत प्रभाग१२, लकाकी रोड, मॉडेल कॉलनी येथे विशेष फुटपाथ दुरुस्ती अभियानाचा शुभारंभकरण्यात आला . छत्रपती शिवाजीनगर विधानसभा मतदार संघाचे आमदार सिद्धार्थ शिरोळे, महापौर मंजुषा नागपुरे, सभागृह नेते गणेश बिडकर, मा. महापालिका आयुक्त नवल किशोर राम व प्रभागातील स्थानिक नगरसेवक यांच्या हस्ते करण्यात आला. यावेळी पुणे महानगरपालिकेचे अधिकारी व कर्मचारी उपस्थित होते. सदर अभियानाच्या अंतर्गत फुटपाथवर असलेले विद्युत खांब, फलक, डीपी बॉक्स इत्यादी अडथळे फुटपाथच्या कडेस घेण्यात येणार आहे. फुटपाथ पादचाऱ्यांकरिता समतल करण्यात येणार आहे.
तसेच सदर अभियानाअंतर्गत शिवाजीनगर परिसरातील लकाकी रोड, थोरात चौक ते वेताळबाबा चौक हे दोन रस्ते प्राधान्याने हाती घेतलेले आहेत. या दोन्ही रस्त्याची अंदाजित लांबी १४०० मीटर इतकी असुन, या दोन्ही रस्त्याच्या दुतर्फा असणाऱ्या अस्तित्वातील पदपथाची योग्य प्रकारे दुरूस्ती करून सदरचे पदपथ आदर्शरित्या विकसित करण्यात येतील व त्यानंतर त्या धर्तीवर संपुर्ण पुणे शहरात सदरचे फुटपाथ दुरूस्ती अभियान राबविण्यात येणार आहे. या अभियानामुळे नागरिकांकरिता उत्तम दर्जाचे व समपातळीत असणारे फुटपाथ कोणत्याही अडथळ्या शिवाय वापरणे शक्य होणार आहे.
फुटपाथ दुरुस्ती अभियानाचे उद्घाटन करताना महापौर सौ. मंजुषा दीपक नागपुरे यांनी महापालिकेच्या वतीने राबविण्यात येणाऱ्या ‘जागल्या’ या संकल्पनेची माहिती दिली. ‘जागल्या’ या संकल्पनेच्या अंतर्गत सर्व क्षेत्रीय कार्यालयांमध्ये ‘जागल्या’ कर्मचारी नियुक्त करण्यात येणार आहे. सदर कर्मचाऱ्याने आपल्या कार्यक्षेत्रात रोज एक ते दोन तास पायी चालून परिसरातील फुटपाथवर असलेल्या अडथळ्यांच्या नोंदी, आवश्यक दुरूस्ती इत्यादी माहिती घेऊन संबंधित अधिकाऱ्याला माहिती सादर करावयाची आहे. त्यानुसार पदपथावरील अडथळे दूर करून आवश्यक त्या उपाययोजना करण्यात येतील. विशेष फुटपाथ दुरुस्ती अभियान आणि ‘जागल्या’ संकल्पनेमुळे पादचाऱ्यांना चालणे सुलभ होईल, असा विश्वास त्यांनी यावेळी व्यक्त केला.

पुणे – श्रीमद् राजचंद्रजी यांचे भक्त,आध्यात्मिक मार्गदर्शक,आणि आत्मज्ञानी गुरु व श्रीमद् राजचंद्र मिशन धरमपूरचे संस्थापक पूज्य गुरुदेवश्री राकेशजी यांच्या परिवर्तनकारी सत्संगाचे आयोजन येत्या दि.२० आणि २१ फेब्रुवारी रोजी करण्यात आले आहे.स्वारगेट येथील श्री गणेश कला क्रीडामंच येथे रात्री ८ ते १० या कालावधीत होणार आहे.

युवकांचे प्रेरणास्थान म्हणून ओळखले जाणारे पूज्य गुरुदेवश्री राकेशजी हे जगातील सुमारे ९६ युवक केंद्रामधून सत्संग,साधना,सेवा,संस्कृती, आणि क्रीडा या क्षेत्राच्या माध्यमातून युवकांना उच्च ध्येय गाठण्यासाठी मार्गदर्शन करीत आहेत.तसेच श्रीमद् राजचंद्र डिव्हाईन टच या देश विदेशातील २५२ केंद्रांच्या माध्यमातून बालमनावर संस्कार करण्याचे कार्य करीत आहेत. मुख्य म्हणजे श्रीमद् राजचंद्र मिशन धरमपूर संस्था जगातील २०६ केद्राच्या माध्यमातून कार्यरत आहे.

पूज्य गुरुदेवश्री राकेशजी हे जगातील अभ्यासकांना
धर्मयात्रांच्या माध्यमातून दर्शन, अनुभूती आणि माहिती याचा लाभ देत आहेत.तसेच धर्मयात्रे दरम्यान साधक यांना ते सत्संग , साधना,प्रतिष्ठा,पदार्पण आदि माध्यमातून मार्गदर्शन करीत आहेत.भावनिक, मानसिक आणि आध्यात्मिक आरोग्यावर सत्संगाचा सकारात्मक प्रभाव अनुभवण्यासाठी सर्वांनी दोन दिवसीय कार्यक्रमात मोठ्या संख्येने सहभागी व्हावे अशी विनंती आयोजकांनी केली आहे.